¶ 1 BEA kuo fanogo a Sefatia koe foha o Matani, mo Ketalia, koe foha o Basuli, mo Jehukali koe foha o Selemaia, mo Basuli koe foha o Malikia, ki he gaahi lea aia nae lea aki e Jelemaia ki he kakai kotoabe, o behe,

2 Oku behe mai a Jihova, Koia oku nofo i he kolo ni, te ne mate i he heleta, moe hoge, bea moe mahaki fakaauha: ka koia e alu kitua ki he kau Kalitia te ne moui; e iate ia ene moui koe koloa kuo vetea, bea te ne moui.

3 Oku behe e Jihova, Koe mooni e foaki ae kolo ni ki he nima oe kau tau o Babilone, bea te nau kaba ia.

4 Koia nae behe ai ae houeiki ki he tu‘i, Oku mau kole kiate koe, tuku ke tamate‘i ae tagata ni: he oku ne fakavaivai‘i ae nima oe kau tagata tau oku kei toe i he kolo ni, bea moe nima oe kakai kotoabe, i he ene lea aki ae gaahi lea behe kiate kinautolu: he oku ikai kumi e he tagata ni ae lelei oe kakai ni, ka koe kovi.

5 Bea behe mai a Setikia koe tu‘i, Vakai, oku i ho mou nima ia: he oku ikai faa fai e he tu‘i ha mea kiate kimoutolu.

6 Bea nae ave a Jelemaia, o li ia ki he fale fakabouli o Malikia koe foha oe tu‘i, aia nae i he lotoa oe fale fakabobula: bea nae tukutuku hifo aki a Jelemaia ae gaahi maea. Ka nae ikai ha vai i he fale fakabouli, ka koe kele be: bea nae galo hifo a Jelemaia i he kele.

¶ 7 Bea kuo fanogo a Ibetemeleki, koe Itiobea, koe tagata talifekau aia nae nofo i he fale oe tu‘i, kuo tuku a Jelemaia ki he fale fakabouli; bea oku nofo ae tu‘i i he mataba o Benijimani,

8 Nae alu atu mei he fale oe tu‘i a Ibetemeleki, o lea ki he tu‘i, o behe,

9 Ko eku eiki koe tu‘i, oku kovi ae mea kotoabe kuo fai e he kau tagata ni kia Jelemaia koe balofita, aia kuo nau li ki he fale fakabouli, he te ne mate fiekaia i he botu koia: he oku ikai kei toe ha ma i he kolo.

10 Bea nae fekau e he tu‘i a Ibetemeleki koe Itiobea, o behe, Alu mo koe ae kau tagata e toko tolugofulu, bea too hake a Jelemaia koe balofita mei he fale fakabobula, i he teeki ai te ne mate.

11 Bea nae ave e Ibetemeleki ae kau tagata bea nau o mo ia ki he fale oe tu‘i, ki lalo i he tukuaga koloa, bea too mei ai ae gaahi kofu motua bea mahaehae, o tukutuku hifo ia moe gaahi maea ki he fale fakabouli kia Jelemaia.

12 Bea nae behe a Ibetemeleki koe Itiobea kia Jelemaia, Ai ni ae gaahi kofu motua bea mahaehae i ho lalo faefine bea moe gaahi maea. Bea nae fai ia e Jelemaia.

13 Bea naa nau fuji hake a Jelemaia moe gaahi maea, bea ave ia mei he fale fakabobula: ka ka nofo a Jelemaia i he lotoa oe fale fakabobula.

¶ 14 Bea nae toki fekau e Setikia koe tu‘i, bea omi a Jelemaia koe balofita kiate ia ki he huaga lahi aia oku i he fale o Jihova: bea nae behe e he tu‘i kia Jelemaia, Teu fehui kiate koe ha mea e taha; bea oua naa ke fufu ha mea iate au.

15 Bea behe e Jelemaia kia Setikia, Kabau teu fakaha ia kiate koe, oku mooni e ikai te ke tamate‘i au? bea kabau teu akonaki‘i koe te ke fanogo kiate au?

16 Bea nae fuakava fakafufu a Setikia kia Jelemaia, o behe, I he moui a Jihova, aia kuo gaohi kiate kitaua ae laumalie ni, e ikai teu tamate‘i koe, bea e ikai teu tukuage koe ki he nima oe kau tagata ni oku kumi hoo moui.

17 Bea nae behe e Jelemaia kia Setikia, Oku behe mai a Jihova, koe Otua oe gaahi kau tau, koe Otua o Isileli; Koe mooni kabau te ke alu atu ki he houeiki oe tu‘i o Babilone, e moui ho laumalie, bea e ikai tutu aki ae kolo ni ae afi, bea te ke moui, mo ho fale:

18 Bea kabau e ikai te ke alu atu ki he houeiki oe tu‘i o Babilone, bea e toki foaki ae kolo ni ki he nima oe kau Kalitia, bea te nau tutu aki ia ae afi, bea e ikai te ke hao i ho nau nima.

19 Bea behe e Setikia koe tu‘i kia Jelemaia, Oku ou manavahe ki he kau Jiu kuo hola ki he kau Kalitia, telia naa nau tukuage au ki ho nau nima, bea te nau manuki‘i au.

20 Bea behe e Jelemaia, E ikai te nau tukuage koe. Oku ou kole kiate koe, ke ke talagofua ki he le‘o o Jihova, i he mea oku ou lea aki kiate koe: bea koia e hoko ai ae lelei kiate koe, bea e moui ho laumalie.

21 Bea kabau e ikai te ke alu atu, ko eni ae lea kuo fakaha e Jihova kiate au:

22 Io vakai, koe fefine kotoabe oku kei toe i he fale oe tu‘i o Juta, e omi akinautolu ki he houeiki oe tu‘i o Babilone, bea te nau lea o behe, Kuo akonaki‘i koe e ho kaiga, bea kuo nau ikuna koe: kuo moua ho va‘e i he kele, bea kuo nau tafoki kimui.

23 Bea te nau omi ho gaahi unoho kotoabe mo hoo fānau ki he kau Kalitia: bea e ikai te ke hao i ho nau nima, ka e buke nima koe e he tu‘i o Babilone: bea e tutu aki ae afi ae kolo ni koeuhi ko koe.

¶ 24 Bea nae behe e Setikia kia Jelemaia, Oua naa tuku ke ilo e ha tagata ae gaahi lea ni, bea e ikai te ke mate.

25 Bea kabau e fanogo e he houeiki kuo ta alea mo koe, bea te nau ha‘u kiate koe, bea behe kiate koe, Fakaha mai kiate kimautolu aia kuo ke tala ki he tu‘i, oua naa fakafufu ia iate kimautolu, bea e ikai te mau tamate‘i koe; bea moe mea foki kuo lea aki e he tu‘i kiate koe:

26 Bea ke ke behe kiate kinautolu, Naaku fai eku kole i he ao oe tu‘i, ke oua naa bule ia ke toe ave au ki he fale o Jonatani keu mate ai.

27 Bea nae ha‘u ae houeiki kotoabe kia Jelemaia bea fehui kiate ia: bea ne fakaha kiate kinautolu, o hage koe gaahi lea ni kotoabe aia nae fekau e he tu‘i. Bea nae ikai te nau toe lea kiate ia; he nae ikai ke ha mai ae talanoa.

28 Bea nae nofo a Jelemaia ki he lotoa oe fale fakabobula o a‘u ki he aho nae kaba ai a Jelusalema: bea nae i ai ia i he kaba o Jelusalema.