¶ 1 OKU folofola behe e Jihova oe gaahi kau tau, koe Otua o Isileli ki Moabe; E malaia a Nibo! he kuo maumau ia: kuo veuveuki mo kaba a Kiliateimi: bea kuo maveuveu mo bubutuu a Misikabi.

2 E ikai toe fakaogo lelei a Moabe: kuo nau fakakaukau kovi ki ai i Hesiboni; (  o behe, ) Ke tau tuuji ia ke oua naa kei buleaga ia. Bea e tuuji foki akoe Matimena: e tuli koe e he heleta.

3 Kuo ogo mai ae le‘o oe tagi mei Holonaimi, koe maumau‘i moe fakaauha lahi.

4 Kuo fakaauha a Moabe; kuo tagi ke ogo a hono kakai iki.

5 Koeuhi i he alu hake a Luiti te nau alu hake moe tagi mau ai be: he kuo fanogo ae fili ki he tagi oe fakaauha i he alu hifo a Holonaimi.

6 Mou hola, bea fakahaofi hoo mou moui, ka te mou hage koe akau tae hano lau i he toafa.

7 He koeuhi kuo ke falala ki hoo gaahi gaue, mo hoo gaahi koloa, e lava‘i ai foki koe: bea e alu ki he fakabobula a Kimosi, mo ene kau taulaeiki mo hono houeiki fakataha.

8 Bea e hoko ae tagata maumau ki he kolo kotoabe, bea e ikai aubito hao ha kolo e taha: e malaia ae telea, bea e fakaauha moe toafa, o hage koe folofola a Jihova.

9 Foaki ae kabakau ki Moabe koeuhi ke ne hola o alu: he kuo lala hono gaahi kolo, bea oku ikai ha taha ke nofo ai.

10 E malaia ia oku ne fai ae gaue a Jihova i he kākā, bea e malaia ia oku taofi ene heleta mei he toto.

¶ 11 Kuo fakafiemalie a Moabe talu ene kei jii, bea kuo toka hifo ki hono takele, bea nae ikai fakatafe mei he ibu ki he ibu, bea nae ikai ave ia ki he fakabobula: koia oku mau iate ia hono ifo, bea oku ikai fakakehe hono nanamu.

12 Koia oku behe e Jihova, Vakai, oku ha‘u ae gaahi aho, aia teu fekau ai ae kau fakahe, bea te nau fakahe‘i ia, bea fakatafe ene gaahi ibu, bea maumau e nau gaahi hina.

13 Bea e ma a Moabe ia Kimosi, o hage koe ma ae fale o Isileli ki Beteli ko ho nau falalaaga.

¶ 14 Bea oku fefe hoo mou lea behe, Oku mau malohi koe kau tagata malohi ki he tau?

15 Kuo maumau a Moabe, bea kuo alu hake ia i hono gaahi kolo, bea kuo alu hifo ki he tamate‘i a hono kau talavou kuo fili, oku behe, e he tu‘i, aia ko hono huafa ko Jihova oe gaahi kau tau.

16 Kuo ofi ene hoko mai ae tuutamaki a Moabe, bea oku fakatootoo mai a hono mamahi.

17 Ko kimoutolu kotoabe oku nonofo mo ia, mou mamahi koeuhi koia, bea ko kimoutolu kotoabe oku ilo hono higoa, mou behe, Oiaue! ae feji‘i ae tokotoko malohi, bea moe vaa matamata lelei!

18 Ke ke alu hifo mei ho nāunāu, bea nofo fieinua, akoe koe ofefine aia oku nofo i Tiboni; he kuo hoko kiate koe ae maumau o Moabe, bea te ne fakaauha hoo gaahi botu malohi.

19 Akoe oku ke nofo i Aloeli, Ke ke tuu i he vee hala mo leo; bea fehui kiate ia oku hola, bea mo ia oku hao, o behe, Koeha ae mea kuo fai?

20 Kuo veuveuki a Moabe; he kuo holoki hifo ia: mou tagilāulāu bea tagi lahi, mou fakaha ia i Alanoni, kuo maumau‘i a Moabe.

21 Kuo hoko ae tautea ki he fonua tokalelei; ki Holoni, mo Jehasa, bea mo Mefata.

22 Bea mo Tiboni, mo Nibo, bea mo Betetibilateimi,

23 Bea mo Kiliateimi, mo Betekamuli, bea mo Betemioni,

24 Bea mo Kiliote, mo Bosila, bea ki he gaahi kolo kotoabe i he fonua o Moabe, be koe mamao be koe ofi.

25 Kuo tuuji ae nifo o Moabe, bea kuo feji‘i hono nima, oku behe e Jihova.

¶ 26 Mou fakakona ia: he kuo ne fakahikihiki eia ia kia Jihova: e fetafokifokiaki foki a Moabe i he ene lua, bea e hoko ia foki koe manukiaga.

27 Ikai nae hoko a Isileli koe manukiaga kiate koe? Nae ilo ia moe kau kaihaa? koeuhi talu hoo lea ki ai mo hoo hobohobo i he fiefia.

28 Ko kimoutolu oku nofo i Moabe, liaki ae gaahi kolo, bea nofo i he botu maka, bea mou hage koe lube oku gaohi hono bunuga i he gutu oe luo.

29 Kuo tau fanogo ki he fielahi a Moabe, (oku fakamanavahe ene fielahi) ko ene agahiki, moe fieeiki, moe fakamofutofuta, bea moe laukau o hono loto.

30 Bea oku behe e Jihova, Oku ou ilo ene ita ka oku ikai te ne faa fai; e ikai te ne lava‘i i he ene gaahi loi.

31 Koia teu tagilāulāu koeuhi ko Moabe, io, teu tagi koeuhi ko Moabe kotoabe; Teu mamahi koeuhi koe kau tagata o Kilihelesi.

32 E vaine o Sibima, teu tagi aki ae tagi o Jesa koeuhi ko koe: kuo ave ho huli ki tahi, o a‘u ki he tahi o Jesa: kuo hoko ae maumau ki ho gaahi fua momoho bea ki he fua oe vaine.

33 Bea kuo mole ae fiefia moe nekeneka mei he goue mahu, bea mei he fonua o Moabe; bea kuou fakagata ae uaine i he tataoaga uaine: e ikai fai ha malamalaki aki ae kalaga; oku ikai koe kalaga e nau kalaga.

34 Oku ogo‘i ae tagi mei Hesiboni ki Iliale, bea kuo ogo atu ho nau le‘o o a‘u ki Jehasi, mei Soa o a‘u ki Holonaimi, o hage koe bulu mui kuo tolu ta‘u a ene motua: koeuhi e liaki‘i ae gaahi vai o Nimilimi.

35 Koia oku behe e Jihova, Teu fakagata i Moabe, aia oku ne fai ae feilaulau i he gaahi botu maoluga, bea mo ia oku tutu mea namu kakala ki hono gaahi otua.

36 Koia e tagi hoku loto o hage koe gaahi fagufagu koeuhi ko Moabe, bea e tagi hoku loto o hage koe gaahi fagufagu koeuhi koe kau tagata o Kilihelesi: koeuhi kuo auha ae gaahi koloa kuo ne ma‘u.

37 Koeuhi e tula ae ulu kotoabe, bea e koji ae kava kotoabe: bea e i he nima kotoabe ae gaahi tafa, bea moe tauagaa ki he koga loto.

38 E ai ae tagilāulāu lahi, i he fuga oe gaahi fale kotoabe o Moabe, bea i hono gaahi hala: he kuou maumau‘i a Moabe o hage koe ibu, aia oku ikai fiefia ki ai ha toko taha, oku behe e Jihova.

39 Te nau tagi lahi, o behe, Oiaue hono maumau‘i hifo ia! Oiaue ae fulitua mai a Moabe i he ene ma! E hoko a Moabe koe manukiaga, bea moe mea fakailifia kiate kinautolu kotoabe oku takatakai ia.

40 He oku behe e Jihova; Vakai, te ne buna o hage koe ikale bea te ne mafao atu hono kabakau ki Moabe.

41 Kuo kaba a Kiliote, bea kuo ilifia ai ae gaahi botu malohi, bea e hoko i he aho koia ae loto oe kau tagata malohi i Moabe o hage koe loto oe fefine kuo laga.

42 Bea e fakaauha ae buleaga o Moabe, koeuhi koe fakahikihiki ia kia Jihova.

43 Oku behe mai e Jihova, Akoe oku nofo i Moabe, e iate koe ae ilifia, moe luo, bea moe tauhele.

44 Oku behe e Jihova, Koia oku hola i he manavahe te ne to ki he luo; bea koia e hao mei he luo e moua ia i he tauhele: he teu omi kiate ia, io ki Moabe, ae ta‘u o ho nau aahi.

45 Nae tuu i he malumalu o Hesiboni akinautolu nae hola koe mea i he malohi: ka e alu atu ae afi mei Hesiboni, bea moe uloafi mei he loto Sihoni, bea e fakaauha ai ae tuliki o Moabe, bea moe tumuaki oe gaahi fonua fakamaveuveu.

46 E Moabe, e malaia akoe! oku malaia ae kakai o Kimosi: he kuo ave fakabobula a ho gaahi foha, bea kuo alu foki a ho gaahi ofefine ki he fakabobula.

¶ 47 Ka oku behe e Jihova, Teu liliu ae fakabobula o Moabe, i he gaahi aho amui. Ko eni ae fakamāu o Moabe.