¶ 1 A MUJIAAGE e au koe vai a hoku ulu, moe matavai oe loimata a hoku mata, keu tagi i he aho moe bo koeuhi ko kinautolu kuo mate i he ofefine o hoku kakai?

2 Amujiaage e au keu ma‘u i he toafa ae fale talifonoga; koeuhi keu tukuage hoku kakai, bea alu iate kinautolu! he koe kau agahala akinautolu kotoabe, koe fakataha oe kau tagata kākā.

3 Bea oku nau teke ho nau elelo ke loi o hage koe nau kaufana; ka oku ikai te nau to‘a koeuhi koe mooni i mamani; he kuo nau alu mei he kovi ki he kovi, bea oku ikai te nau ilo au, oku behe e Jihova.

4 Mou taki taha vakai ki hono kaugaabi, bea oua naa mou tui ki ha tokoua: koeuhi e fai fakakākā ae tokoua kotoabe, bea koe kaugaabi kotoabe e alu fano moe fakakovi.

5 Bea te nau taki taha kākā‘i hono kaugaabi, bea ikai te nau lea ki he mooni; kuo nau ako ho nau elelo ke lea loi, bea oku nau fakaogojia‘i akinautolu i he fai kovi.

6 Bea ko ho nofoaga oku i he lotolotoga oe kākā; koeuhi koe kākā oku ikai te nau fie ilo au, oku behe e Jihova.

7 Koia oku behe e Jihova oe gaahi kau tau, Vakai, Teu fakavela ke vai akinautolu, bea ahiahi‘i akinautolu; he koeha teu fai koeuhi koe ofefine o hoku kakai?

8 Oku tatau ho nau elelo moe gahau kuo fana‘i; oku ne lea aki ae kākā: oku ne lea fakafiemalie i hono gutu ki hono kaugaabi, ka ko hono loto oku toka malumu ki ai.

¶ 9 Bea oku behe e Jihova, Ikai teu tautea koeuhi koe gaahi mea ni? bea ikai e totogi e hoku laumalie ki he buleaga behe?

10 Teu tagi mo tagilāulāu koeuhi koe gaahi mouga, bea teu tagi koeuhi koe gaahi nofoaga i he toafa, he kuo nau vela o oji, koia oku ikai alu atu ai ha taha; bea oku ikai fanogo i ai ki he le‘o oe faga manu; kuo buna o mole mei ai ae manu oe atā moe manu oe fonua; kuo nau alu.

11 Bea teu gaohi a Jelusalema koe tuuga otoota, bea koe ana oe faga talakone; bea teu fakalala ae gaahi kolo o Juta ke tae ha kakai i ai.

12 Kohai ha tagata boto, te ne ilo eni? bea kohai ia kuo folofola ki ai ae folofola a Jihova, ke ne fakaha be koeha hono uhiga oe auha ae fonua, bea oku vela o oji ia o hage koe toafa, koia oku ikai alu atu ai ha taha?

13 Bea oku behe e Jihova, Koeuhi kuo nau liaki eku fono aia naaku tuku i ho nau ao, bea oku ikai te nau talagofua ki hoku le‘o, be eveeva ai;

14 Ka kuo nau muimui ki he mahalo a ho nau loto, bea ia Beali, aia nae ako e he e nau gaahi tamai kiate kinautolu.

15 Koia oku behe e Jihova oe gaahi kau tau, koe Otua o Isileli: Vakai, Teu fafaga aki ae kakai ni ae mea kona, bea teu foaki kiate kinautolu ae huhua kona oe ahu ke nau inu.

16 Bea teu fakamovetevete akinautolu i he kakai hiteni, aia nae ikai te nau ilo ki ai be koe nau gaahi tamai: bea teu fekau ae heleta ke muimui iate kinautolu kae oua keu fakaoji akinautolu.

¶ 17 Oku behe e Jihova oe gaahi kau tau, Mou fakakaukau, bea ui ki he kau fefine tagi ke nau ha‘u; bea moe kau fefine boto ke nau omi:

18 Bea ke nau fakatootoo, mo tagi koeuhi ko kitautolu, koeuhi ke tafe ae loimata i ho tau mata, bea ba ae vai i ho tau lau mata.

19 He oku ogo mai mei Saione ae le‘o oe tagi, o behe, Kuo vetea akitautolu, kuo tau bubutuu lahi, koeuhi kuo tau tukuage ae fonua, bea kuo kabuji akitautolu i ho tau abi.

20 Ka ne ogo ia, ke mou fanogo, akimoutolu ae kau fefine ki he folofola a Jihova, bea ogo‘i e ho mou teliga ae folofola a hono fofoga, bea ako ae tagi ki hoo mou fānau fefine, bea ako ke taki taha tagi a hono kaugaabi.

21 He kuo hake ae mate ki he gaahi katuba; bea kuo hu ia ki he gaahi fale fakaeieiki, ke tutuu ae fānau mei tua, bea moe kau talavou i he gaahi hala.

22 Oku behe e Jihova, Ke ke lea, o behe Naa moe gaahi agaaga oe kau tagata e to ia ki he ataatā oe goue, o hage ko ha kinohaa bea tatau moe falukuga oku toe, oka hili ae ututa‘u, koeuhi e ikai tanaki akinautolu e ha taha.

¶ 23 Oku behe e Jihova, Oua naa bolebole ae tagata boto i he ene boto, be koe tagata malohi i he ene malohi, bea oua naa bolebole ae tagata ma‘umea i he ene koloa.

24 Ka koia oku bolebole ke bolebole i he mea ni, koeuhi oku ne boto mo ilo‘i au, Ko au ko Jihova oku ou faa manavaofa, mo fakamāu, mo agatonu i mamani: he oku behe e Jihova oku ou fiefia i he gaahi mea ni.

¶ 25 Oku behe e Jihova, Vakai, oku ha‘u ae gaahi aho teu tautea ai ae kamu fakataha moe tae kamu;

26 Ko Ijibite, mo Juta, mo Itomi, bea moe fānau a Amoni, mo Moabe, mo kinautolu oku i he gaahi botu mamao, mo kinautolu oku nofo i he toafa: he oku tae kamu ae gaahi kakai ni kotoabe, bea oku tae kamu ae loto o Isileli kotoabe.