¶ 1 OKU behe mai e Jihova, Kabau te ke tafoki E Isileli, tafoki kiate au; bea kabau te ke tukuage a hoo gaahi mea fakalielia i hoku ao, e ikai ave koe.

2 Bea te ke fuakava, Oku moui a Jihova i he mooni, moe fakamāu, bea i he agatonu; bea oku meiate ia ae fakamonuia ae gaahi buleaga bea te nau vikiviki iate ia.

¶ 3 He oku behe e Jihova ki he kau tagata o Juta mo Jelusalema, Mou fakamolu ae kelekele foou, bea oua naa tūtū‘i i he gaahi akau talatala.

4 Ae kau tagata o Juta moe kakai o Jelusalema, mou kamu ho mou loto kia Jihova, bea too ae ufiufi o ho mou loto, telia naa alu atu eku houhau o hage koe afi, bea e vela ia o ikai faa tamate‘i, koeuhi koe kovi o hoo mou gaahi fai aga.

5 Mou fakaha i Juta, bea fakailo i Jelusalema; o behe, Mou ifi ae mea bea i he fonua: fakaha, i he botu kotoabe, o behe, Tau fakataha akitautolu, bea alu ki he gaahi kolo kuo laga.

6 Fokotuu ae fuka ke haga ki Saione: mou alu, oua e tatali: he teu omi ae kovi mei he tokelau, io koe fakaauha lahi.

7 Kuo ha‘u ae laione mei he fihi oe vao, bea oku ha‘u i hono hala aia e fakaauha ae gaahi buleaga; kuo alu atu ia mei hono botu ke fakaauha ae fonua: bea e lala ae gaahi kolo, o ikai ha kakai.

8 Koeuhi koe mea ni, nonoo aki akimoutolu ae vala tauagaa, bea mamahi mo tagi: he oku heeki ai foki meiate kitautolu ae houhau kakaha o Jihova.

9 Oku behe e Jihova, E hoko o behe i he gaahi aho koia, e vaivai ae loto oe tu‘i, bea moe loto oe houeiki; bea e ofo ae kau taulaeiki, bea e fakatumutumu ae kau balofita.

10 Bea naaku toki behe ai, Oiaue, E Eiki Jihova! koe mooni kuo ke tukuage ae kakai ni mo Jelusalema ki he kākā, o behe, Te mou ma‘u ae fiemalie; kae oji kuo hoko ae heleta ki he laumalie.

11 Bea e lea ki he kakai ni mo Jelusalema i he gaahi aho koia; o behe, Oku ha‘u ae matagi vela mei he gaahi botu maoluga i he toafa ki he ofefine o hoku kakai, ka oku ikai ke tatafi be fakamaa.

12 E ha‘u ae matagi lahi mei he gaahi botu koia kiate au; bea teu fakamāu ni akinautolu foki.

13 Vakai, te ne ha‘u o hage koe gaahi ao, bea ko ene gaahi saliote o hage koe ahiohio: oku vee vave hake ene faga hose i he buna ae ikale. Oku tau malaia! he kuo faaaauha akitautolu.

14 E Jelusalema, ke ke fakamaa ho loto mei he agahala, koeuhi ke ke moui. E fefe hono fuoloa ae nofo a hoo gaahi mahalo kovi iate koe?

15 He oku ogo‘i ae le‘o mei Tani, bea oku fakaha ae mea fakamamahi mei he mouga o Ifalemi.

16 Vakai, mou tala ki he gaahi kakai; fakaha ki Jelusalema, kuo ha‘u ae kau leo mei he botu mamao, bea te nau kalaga ki he gaahi kolo o Juta.

17 Oku behe e Jihova, oku nau takatakai ia o hage koe kau tauhi goue; koeuhi kuo ne agatuu kiate au.

18 Kuo hoko ae gaahi mea ni kiate koe koe mea i hoo aga mo hoo gaahi faiaga; ko eni hoo mamahi oku kakaha ia, koeuhi oku aji ia ki ho loto.

¶ 19 A hoku fatu, a hoku fatu! oku ou mamahi o a‘u ki hoku loto: oku ue‘i hoku loto iate au; oku ikai teu faa fakalogobe, koeuhi kuou fanogo ki he mea lea, kuo fanogo a hoku laumalie ki he teu tau.

20 Kuo hoko ae fakaauha ki he fakaauha, he kuo lala ae fonua kotoabe; kuo maumau‘i fakafokifa a hoku fale fehikitaki; bea mo hoku gaahi buibui.

21 E fefe hono fuoloa o eku mamata ki he fuka, bea fanogo ki he le‘o oe mea lea?

22 He oku vale a hoku kakai, oku heeki ai te nau ilo au: koe fānau faha akinautolu oku ikai ha nau boto; oku nau boto ki he fai kovi, ka oku ikai te nau ma‘u ae ilo‘i ki he fai lelei.

23 Bea naaku mamata ki he fonua, bea vakai, kuo maveuveu mo geeji be ia; bea, ki he gaahi lagi foki, bea nae ikai ha māma.

24 Neu mamata ki he gaahi mouga, bea, vakai, kuo nau tetetete, bea nae ue‘i ae gaahi tafugofuga kotoabe, o hage koe mea maamaa.

25 Naaku mamata, bea, vakai, nae ikai ha tagata, bea kuo mole kotoabe ae faga manu buna oe lagi.

26 Neu mamata, bea, vakai, kuo toafa ae botu fua lelei, bea kuo maumau‘i hifo ae gaahi kolo kotoabe i he ao o Jihova, i hono houhau kakaha.

27 He kuo behe e Jihova, E lala ae fonua kotoabe; ka e ikai teu fakaoji aubito.

28 E mamahi a mamani koeuhi koe mea ni, bea e uliuli ai ae gaahi lagi i oluga: koeuhi kuou lea aki ia, bea e ikai teu fakatomala; kuou tuutuuni ia, bea e ikai teu tafoki mei ai.

29 E hola ae kolo kotoabe koeuhi koe batū ae kau tagata heka hose, moe kau tagata fakakaufana; te nau alu ki he vao fihi bea kaka ki he gaahi maka: bea e jiaki ae kolo kotoabe, bea e ikai nofo ha tagata i ai.

30 Bea oka maumau‘i koe, koeha te ke fai? Kabau te ke fakakofu aki koe ae kulokula, bea kabau te ke teuteu aki koe ae gaahi mea teuga, bea kabau te ke loa ho mata aki ae vali, oku taeaoga ho fakahoihoifua koe; e fehia kiate koe akinautolu nae ofa, bea te nau kumi hoo moui.

31 He kuou fanogo ki he le‘o o hage koe fefine oku laga, bea moe mamahi o hage koia kuo ne faele‘i ene uluaki tama, koe le‘o oe ofefine o Saione, aia oku to‘e bea mafao hono nima, o behe, Oiaue au! he oku vaivai hoku laumalie koeuhi koe kau fakabo.