¶ 1 BEA nae hoko o behe, kuo fakaoji e Jelemaia ene lea aki ki he kakai kotoabe ae gaahi folofola kotoabe a Jihova ko ho nau Otua, aia nae fekau ai ia e Jihova ko ho nau Otua kiate kinautolu, ae gaahi lea ni kotoabe,

2 Bea toki lea e Asalia koe foha o Hosaia, mo Johanani koe foha o Kalia, bea moe kau tagata fielahi kotoabe, o behe kia Jelemaia, Oku ke lea loi: Nae ikai fekau koe e Jihova ko ho tau Otua ke lea behe, Oua naa alu ki Ijibite ke aunofo ki ai:

3 Ka ko Baluki koe foha o Nelia kuo ne ue‘i koe ke fai kiate kimautolu, koeuhi ke tukuage akimautolu ki he nima oe kau Kalitia, ke nau tamate‘i akimautolu, bea ave akimautolu koe kau bobula ki Babilone.

4 Bea ko Johanani koe foha o Kalia, moe houeiki tau kotoabe, bea moe kakai kotoabe, nae ikai te nau talagofua ki he le‘o o Jihova, ke nofo i he fonua ko Juta.

5 Ka nae ave e Johanani koe foha o Kalia, bea moe houeiki tau kotoabe o Juta, akinautolu kotoabe kuo liliu mei he gaahi buleaga kotoabe, nae kabuji akinautolu ki ai, ke nofo i he fonua o Juta;

6 Koe tagata, moe fefine, moe fānau, bea moe gaahi ofefine oe tu‘i, bea moe tagata taki taha kuo tuku e Nebusaatani koe eiki tau kia Ketalia koe foha o Ahikami koe foha o Safani, mo Jelemaia koe balofita, bea mo Baluki koe foha e Nelia,

7 Bea naa nau alu ki he fonua ko Ijibite: he nae ikai te nau talagofua ki he le‘o o Jihova: bea naa nau a‘u ki Tabanesi.

¶ 8 Bea nae ha‘u ae folofola a Jihova kia Jelemaia i Tabanesi, o behe.

9 Ave ae gaahi maka lalahi i ho nima bea fakafufu ia i he umea i he ta‘oaga umea, aia oku i he kau hala i he fale o Felo i Tabanesi, i he ao oe kau tagata a Juta;

10 Bea ke behe kiate kinautolu, Oku behe e Jihova oe gaahi kau tau, koe Otua o Isileli; Vakai, teu fekau bea omi a Nebukanesa koe tu‘i o Babilone, ko eku tamaioeiki, bea teu fokotuu hono nofoaga fakaeieiki ki he gaahi maka ni aia kuou fakafufu: bea te ne fofola ki ai a hono fale fehikitaki fakaeieiki.

11 Bea oka ha‘u ia te ne ta‘i ae fonua ko Ijibite, bea ko kinautolu kuo tuutuuni ki he mate te nau mate; bea ko kinautolu kuo tuutuuni ki he bobula e tukuage ki he bobula; bea ko kinautolu kuo tuutuuni ki he heleta ki he heleta.

12 Bea teu tutu ae afi i he gaahi fale oe gaahi otua o Ijibite; bea e vela ai akinautolu, bea te ne ave fakabobula akinautolu: bea te ne fakakofu aki ia ae fonua ko Ijibite, o hage oku ai e ha tauhi manu a hono kofu; bea te ne alu mei ai i he fiemalie.

13 Bea te ne maumau‘i foki ae gaahi tamabua o Betesemesi aia oku i he fonua o Ijibite; bea e tutu aki ae afi ae gaahi fale oe gaahi otua oe kakai Ijibite.