¶ 1 NAE hoko o behe i hono fitu mahina, nae ha‘u a Isimeli koe foha o Natania koe foha o Ilisama, koe hako oe hau, bea moe houeiki oe tu‘i, aia moe kau tagata e toko hogofulu mo ia, kia Ketalia koe foha o Ahikami ki Misiba; bea naa nau kai ma fakataha i Misiba.

2 Bea tuu hake a Isimeli koe foha o Natania, moe kau tagata e toko hogofulu nae iate ia, bea nau ta‘i aki ae heleta a Ketalia koe foha o Ahikami koe foha o Safani, bea tamate‘i ia, aia nae fakanofo e he tu‘i o Babilone ke bule ki he fonua.

3 Bea nae tamate‘i foki e Isimeli ae kau Jiu kotoabe nae iate ia, aia nae ia Ketalia, i Misiba, bea moe kau Kalitia nae i ai, bea moe kau tau.

4 Bea nae hoko o behe i hono ua oe aho i he hili ae tamate‘i o Ketalia, i he teeki ke ilo ia e ha toko taha,

5 Nae ha‘u ae kau tagata mei Sikemi, bea mei Sailo, bea mei Samelia, koe toko valugofulu kuo tele ho nau kava, bea kuo mahaehae ho nau kofu, bea foa akinautolu, bea nae i ho nau nima ae feilaulau moe mea namu kakala, ke omi ki he fale o Jihova.

6 Bea nae alu atu a Isimeli koe foha o Natania mei Misiba ke fakafetaulaki mo kinautolu, bea nae tagi mau be ia i he ene alu: bea nae hoko o behe i he ene fetaulaki mo kinautolu, naa ne behe kiate kinautolu, Mou omi kia Ketalia koe foha Ahikami,

7 Bea nae hoko o behe i he e nau ha‘u ki loto kolo, nae tamate‘i akinautolu o li ki he luo, e Isimeli koe foha o Natania, koia, moe kau tagata nae iate ia.

8 Ka nae iate kinautolu ae kau tagata e toko hogofulu, nae lea kia Isimeli, o behe, Oua naa ke tamate‘i akimautolu he oku iate kimautolu ae gaahi koloa kuo fakafufu i he gaahi goue, koe uite, moe baale, moe lolo, bea moe mea hua melie. Koia naa ne tafoki, bea nae ikai tamate‘i akinautolu mo ho nau kaiga.

9 Bea koe luo, aia nae li ki ai e Isimeli ae agaaga oe kau tagata, naa ne tamate‘i fakataha mo Ketalia, koia be nae gaohi e he tu‘i ko Asa, ko ene manavahe kia Baasa koe tu‘i o Isileli; bea koia, nae fakabito aki ia ae kakai kuo tamate‘i, e Isimeli koe foha o Natania.

10 Bea nae fakabobula e Isimeli ae toega kakai kotoabe nae i Misiba, ae ofefine oe tu‘i, bea moe kakai kotoabe nae toe i Misiba, akinautolu nae fakanofo e Nebusaatani koe eiki oe kau tau ke bule ki ai a Ketalia, koe foha o Ahikami: bea nae ave fakabobula akinautolu e Isimeli koe foha o Natania, bea nae alu atu ia ki he kau Amoni.

¶ 11 Bea kuo fanogo a Johanani, koe foha o Kalia, bea moe houeiki tau kotoabe nae iate ia, ki he kovi kotoabe kuo fai e Isimeli koe foha o Natania,

12 Naa nau ave ae kau tagata kotoabe, o nau o ke tau‘i a Isimeli koe foha o Natania, bea nae ilo ia i he kau vai lahi aia oku i Kibione.

13 Bea nae hoko o behe, i he mamata e he kakai kotoabe nae ia Isimeli a Johanani koe foha o Kalia, bea moe houeiki tau kotoabe nae iate ia, naa nau fiefia.

14 Bea koe kakai kotoabe nae ave fakabobula e Isimeli mei Misiba, naa nau tafoki mai o toe ha‘u kia Johanani koe foha o Kalia.

15 Ka nae hola mei a Johanani a Isimeli koe foha o Natania moe kau tagata e toko valu, o alu ki he kau Amoni.

16 Bea hili hono tamate‘i a Ketalia koe foha o Ahikami, nae toki ave e Johanani koe foha o Kalia, ae houeiki tau kotoabe nae iate ia, bea moe toega kakai kotoabe aia nae toe ma‘u mei a Isimeli koe foha o Natania, mei Misiba, koe kau tau malohi, moe kau fefine, moe fānau, bea moe kau tagata talifekau aia kuo toe omi mei Kibione:

17 Bea naa nau alu, o nofo i he botu o Kimami, aia oku ofi ki Betelihema, koeuhi ke alu ki Ijibite,

18 Koeuhi koe kau Kalitia: he naa nau manavahe kiate kinautolu, koeuhi kuo tamate‘i e Isimeli koe foha o Natania a Ketalia koe foha o Ahikami, aia kuo fakanofo e he tu‘i o Babilone ke bule i he fonua.