¶ 1 I HONO hiva oe ta‘u o Setikia koe tu‘i o Juta, bea i hono hogofulu oe mahina, nae ha‘u a Nebukanesa koe tu‘i o Babilone mo ene kau tau kotoabe ki Jelusalema, o nau kabui ia.

2 Bea nae lava‘i ae kolo, i hono hogofulu ma taha oe ta‘u o Setikia, i hono fa oe mahina, bea mo hono hiva oe aho oe mahina.

3 Bea nae ha‘u ae houeiki kotoabe oe tu‘i o Babilone, o nofo ki he mataba i loto, ko Nekalisalesa, mo Samikanibo, mo Sasekimi, mo Labasalisi, mo Nekalisalesa, mo Labamaki, mo hono toe kotoabe oe houeiki oe tu‘i o Babilone.

¶ 4 Bea nae hoko o behe, i he mamata kiate kinautolu a Setikia koe tu‘i o Juta, moe kau tau kotoabe, naa nau hola, bea alu mei he kolo i he bouli, i he hala oe goue ae tu‘i, i he mataba i he vahaa oe ogo a: bea nae alu atu ia i he hala oe toafa.

5 Ka nae tuli akinautolu e he kau tau ae kau Kalitia, bea ma‘u a Setikia i he toafa o Jeliko: bea kuo nau ma‘u ia, naa nau omi ia kia Nebukanesa koe tu‘i o Babilone ki Libila ki he fonua ko Hamati, bea ne fakamāu ia i ai.

6 Bea nae tamate‘i i Libila e he tu‘i o Babilone ae gaahi foha o Setikia i hono ao: bea tamate‘i foki e he tu‘i o Babilone ae gaahi houeiki kotoabe o Juta.

7 Bea nae kabe‘i ae mata o Setikia, bea ha‘ijia aki ia ae gaahi maea ukamea fihifihi, ke ave ia ki Babilone.

¶ 8 Bea nae tutu aki ae afi e he kau Kalitia ae fale oe tu‘i, bea moe gaahi fale oe kakai, bea laku hifo ae gaahi a o Jelusalema.

9 Bea nae ave fakabobula ki Babilone e Nebusaatani koe eiki oe kau leo, ae toega kakai nae toe i he kolo, bea ko kinautolu kuo aluage kiate ia, io, koe toega kakai okinautolu nae toe.

10 Ka nae tuku e Nebusaatani koe eiki oe kau leo ae kakai majiva, akinautolu nae ikai haa nau mea i he fonua ko Juta, bea ne foaki kiate kinautolu i he aho koia ae gaahi goue vaine, bea moe gaahi goue.

¶ 11 Bea nae fekau e Nebukanesa koe tu‘i o Babilone, kia Nebusaatani koe eiki oe kau leo koeuhi ko Jelemaia, o behe,

12 Ave ia, bea fai lelei kiate ia, bea oua naa fai kovi kiate ia; ka ke fai kiate ia o hage ko ene lea kiate koe.

13 Bea nae fekau e Nebusaatani koe eiki oe kau leo, bea mo Nebusasibani, mo Labasalisi, mo Nekalisalesa, mo Labamaki, bea moe houeiki kotoabe oe tu‘i o Babilone;

14 Bea naa nau fekau ke omi a Jelemaia mei he lotoa oe fale fakabobula, bea nau tuku ia kia Ketalia koe foha o Ahikami koe foha o Safani, ke taki ia ki hono abi: bea nau nofo moe kakai.

¶ 15 Bea nae ha‘u ae folofola a Jihova kia Jelemaia, i he ene kei moua he lotoa oe fale fakabobula, o behe,

16 Alu o lea kia Ibetemeleki koe Itiobea, o behe, Oku behe mai a Jihova oe gaahi kau tau, koe Otua o Isileli; Vakai, teu fakahoko eku gaahi lea ke kovi ai ae kolo ni, ka e ikai ke lelei; bea e fakamooni ia i ho ao i he aho koia.

17 Ka oku behe e Jihova, Teu fakamoui koe i he aho koia: bea e ikai tukuage koe ki he nima oe kau tagata oku ke manavahe ki ai.

18 He koe mooni teu fakamoui koe, bea e ikai te ke to i he heleta, ka te ke ma‘u hoo moui kiate koe o hage koe koloa kuo vetea: koeuhi kuo ke falala kiate au, oku behe mai a Jihova.