Koe Tohi ae Balofita ko Jelemaia

¶ 1 KOE gaahi lea a Jelemaia, koe foha o Hilikia, koe toko taha oe kau taulaeiki nae nofo i Anatoti i he fonua o Benijimani:

2 Aia nae hoko ki ai ae folofola a Jihova i he gaahi aho o Josaia, koe foha o Amoni, koe tu‘i o Juta, i hono hogofulu ma tolu ta‘u o ene bule.

3 Nae hoko foki ia i he gaahi aho o Jihoiakimi koe foha o Josaia koe tu‘i, Juta, o a‘u ki hono fakaoji hono hogofulu ma taha ta‘u o Setikia koe foha o Josaia koe tu‘i o Juta, o a‘u ki hono ave fakabobula a Jelusalema i hono nima mahina.

4 Bea nae toki hoko mai ae folofola a Jihova kiate au, o behe,

5 Naaku ilo koe i he heeki ai teu fakatubu koe i he fatu; bea naaku fakatabu‘i koe, bea tuutuuni koe, koe balofita ki he gaahi buleaga, i he teeki ai te ke ha‘u mei he manāva.

6 Bea naaku toki behe, Oiaue! E Eiki ko Jihova! Vakai, Oku ikai teu faa lea: he koe tamajii au.

7 Ka nae behe e Jihova kiate au, Oua naa ke behe, koe tamajii koe: ka ke alu kiate kinautolu kotoabe oku ou fekau koe ki ai, bea koia teu fekau kiate koe ke ke lea aki.

8 Bea oua naa ke manavahe ki ho nau mata: he oku behe e Jihova, oku ou iate koe, ke fakamoui koe.

9 Bea nae toki mafao mai e Jihova hono nima, o ala ki hoku gutu. Bea behe mai e Jihova kiate au, Vakai, oku ou ai eku gaahi lea ki ho gutu.

10 Vakai, Kuou foaki kiate koe i he aho ni ae malohi ki he gaahi kakai, moe gaahi buleaga, ke taaki, mo veteki, ke fakaauha, mo li ki lalo, ke laga hake, mo to.

¶ 11 Bea nae hoko mai ae folofola a Jihova kiate au, o behe, E Jelemaia, koeha oku ke mamata ki ai? Bea naaku behe, Oku ou mamata ki he vaa oe akau koe alimoni.

12 Bea nae behe mai e Jihova kiate au, Kuo ke mamata totonu: he teu fakavave eku lea ke fakahoko ia.

13 Bea nae hoko mai ae folofola a Jihova o liuga ua kiate au, o behe, Koeha oku ke mamata ki ai? Bea naaku behe, oku ou mamata ki he kulo vela; oku haga mai hono gutu mei he tokelau.

14 Bea nae behe e Jihova kiate au, E tubu mei he tokelau ae kovi ki he kakai kotoabe oe fonua.

15 He, oku behe e Jihova, Vakai, teu ui ki he faahiga kotoabe oe gaahi buleaga i he tokelau; bea te nau ha‘u, bea te nau taki taha nofo i hono nofoaga i he huaga ki he gaahi mataba o Jelusalema, bea ki hono gaahi a kotoabe o takatakai, bea ki he gaahi kolo kotoabe o Juta.

16 Bea teu fakaha eku gaahi tautea kiate kinautolu, koeuhi koe nau agahala kotoabe, he kuo nau liaki au, bea tutu ae mea namu kakala ki he gaahi otua kehe, bea tauhi ki he gaahi gaue a ho nau nima.

¶ 17 Koia ke ke nonoo hoo nootagavala, bea tuu hake, bea lea aki kiate kinautolu aia kotoabe oku ou fekau kiate koe: bea oua naa ke manavahe ki ho nau mata, telia naaku fakama‘i koe i ho nau ao.

18 He vakai, kuou gaohi koe he aho ni koe kolo kuo teu ki he tau, koe bou ukamea, koe gaahi a balasa, ki he fonua kotoabe, ki he gaahi tu‘i o Juta, mo hono houeiki, bea ki hono kau taulaeiki, bea moe kakai kotoabe oe fonua.

19 Bea te nau tau‘i koe; ka e ikai te nau malohi kiate koe; he oku behe mai e Jihova, Oku ou iate koe, ke fakamoui koe.