¶ 1 KOE lea nae ha‘u kia Jelemaia oku kau ki he kakai kotoabe o Juta i hono fa oe ta‘u o Jihoiakimi koe foha o Josaia koe tu‘i o Juta, koe uluaki ta‘u ia o Nebukanesa koe tu‘i o Babilone;

2 Aia nae lea aki e Jelemaia koe balofita ki he kakai kotoabe o Juta, bea ki he kakai kotoabe o Jelusalema o ne behe,

3 Talu mei hono hogofulu ma tolu ta‘u o Josaia koe foha o Amoni koe tu‘i o Juta, io o a‘u ki he aho ni, aia ko hono uofulu ma tolu ta‘u eni, kuo ha‘u kiate au ae folofola a Jihova, bea kuou lea aki ia kiate kimoutolu, o tuu hegihegi hake o lea; ka nae ikai te mou fanogo.

4 Bea kuo fekau e Jihova kiate kimoutolu kotoabe a ene kau tamaioeiki koe kau balofita, o tuu hegihegi hake o fekau akinautolu: ka kuo ikai te mou fanogo, be fakatokaga ho mou teliga ke ogo‘i.

5 Naa nau behe, Mou taki taha tafoki mei hono hala kovi, bea mei he kovi o hoo mou gaahi faiaga, bea nofo i he fonua kuo foaki e Jihova kiate kimoutolu bea mo hoo mou gaahi tamai, o taegata bea taegata:

6 Bea oua e muimui ki he gaahi otua kehe o tauhi akinautolu, be lotu kiate kinautolu, bea oua naa mou fakahouhau‘i au aki ae gaahi gaue a ho mou nima; bea e ikai teu fai ha kovi kiate kimoutolu.

7 Oku behe e Jihova, ka oku ikai te mou tokaga kiate au, koeuhi oku mou fakahouhau kiate au i he gaahi gaue a ho mou nima ke mou kovi ai.

¶ 8 Koia oku behe e Jihova oe gaahi kau tau; Koeuhi nae ikai te mou fanogo ki he eku gaahi lea,

9 Vakai, Teu fekau ke fetuku ae gaahi faahiga kotoabe oe tokelau, mo Nebukanesa koe tu‘i o Babilone, ko eku tamaioeiki, bea oku behe e Jihova, Teu omi akinautolu ki he fonua ni, bea ki hono kakai, bea ki he gaahi kakai oku nofo takatakai ai, bea e fakaauha aubito akinautolu, bea teu gaohi akinautolu koe mea fakaulia, moe manukiaga, bea moe fakaauha o taegata.

10 Bea teu too meiate kinautolu ae le‘o oe fiefia, bea moe le‘o oe nekeneka, ae le‘o oe tagata taane, bea moe le‘o oe taahine, bea moe uulu oe maka momoji, bea moe ulo oe tuhulu.

11 Bea e hoko ae fonua ni kotoabe koe fakaauha, bea koe fakailifia; bea e gaue ae kakai ni ki he tu‘i o Babilone i he ta‘u e fitugofulu.

¶ 12 Bea e hoko o behe, oka kakato ae ta‘u e fitugofulu, teu tautea ae tu‘i o Babilone, mo hono kakai: oku behe e Jihova, koeuhi koe nau kovi, bea moe fonua oe kau Kalitia, bea teu gaohi ia koe fakaauha o taegata.

13 Bea teu omi ki he fonua koia eku gaahi lea kotoabe aia kuou lea ki ai, io koe mea kotoabe kuo tohi i he tohi ni, aia kuo kikite aki e Jelemaia ki he gaahi buleaga kotoabe.

14 Koeuhi e bule kiate kinautolu foki ae gaahi kakai, moe gaahi tu‘i lahi e bea teu atu kiate kinautolu o fakatatau ki he e nau gaahi faiaga, bea hage koe gaahi gaue a ho nau nima.

¶ 15 He oku behe e Jihova koe Otua o Isileli kiate au: Too mei hoku nima ae ibu uaine oe houhau ni, bea atu ia ki he gaahi buleaga kotoabe, aia teu fekau koe ki ai, ke nau inu ia.

16 Bea te nau inu, bea tajiba, bea faha, koeuhi koe heleta teu fekau kiate kinautolu.

¶ 17 Bea naaku too ae ibu mei he nima o Jihova, beau fakainu ae gaahi buleaga kotoabe, aia nae fekau au ki ai e Jihova:

18 Ko Jelusalema, moe gaahi kolo o Juta, bea mo hono gaahi tu‘i, bea mo hono houeiki ke gaohi akinautolu koe fakaauha, koe ofoaga, koe manukiaga, bea koe malaia; o hage koia kuo hoko he aho ni.

19 Ko Felo koe tu‘i o Ijibite, mo ene kau tamaioeiki, mo hono gaahi houeiki, bea mo hono kakai kotoabe.

20 Bea moe kakai kehekehe kotoabe, bea moe gaahi tu‘i kotoabe i he fonua ko Usa, bea moe gaahi tu‘i kotoabe i he fonua oe kau Filisitia, mo Asikeloni, mo Asa, mo Ekiloni, bea mo hono toe o Asitoti.

21 Ko Itomi, mo Moabe, bea moe fonua o Amoni.

22 Bea moe gaahi tu‘i kotoabe o Taia, bea moe gaahi tu‘i kotoabe o Saitone, bea moe gaahi tu‘i oe gaahi botu i he matātahi.

23 Ko Titani, mo Tima, mo Busi, bea mo kinautolu kotoabe oku i he gaahi muileleu mamao,

24 Bea moe gaahi tu‘i kotoabe o Alebea, bea moe gaahi tu‘i oe kakai kehekehe oku nofo i he toafa,

25 Bea moe gaahi tu‘i kotoabe o Simili, bea moe gaahi tu‘i kotoabe o Ilami, bea moe gaahi tu‘i kotoabe oe kau Mitea,

26 Bea moe gaahi tu‘i kotoabe oe tokelau, ae ofi moe mamao o lau fakataha, bea moe gaahi buleaga kotoabe o mamani, oku i he fuga oe kelekele: bea e inu fakamuimui iate kinautolu ae tu‘i o Sisaki.

27 Koia ke ke lea kiate kinautolu, Oku behe e Jihova oe gaahi kau tau, koe Otua o Isileli; Mou inu, ke mou kona, mo lua, mo higa, bea oua naa toe tuu hake, koeuhi koe heleta aia teu fekau kiate kimoutolu.

28 Bea e hoko o behe, kabau e ikai te nau fie too ae ibu i ho nima ke nau inu, ke ke toki behe kiate kinautolu, Oku behe mai a Jihova oe gaahi kau tau; Koe mooni te mou inu.

29 He koeni, Vakai, oku ou omi ni ae kovi ki he kolo aia oku ui aki a hoku huafa, bea te mou hao aubito o tae tautea? E ikai tuku tae tautea akimoutolu: he teu ui ki he heleta ke hoko ki he kakai kotoabe o mamani, oku behe e Jihova oe gaahi kau tau.

30 Koia ke ke kikite aki kiate kinautolu ae gaahi lea ni kotoabe, bea tala kiate kinautolu, E mana a Jihova mei oluga, bea e ogo atu hono le‘o mei hono afioaga maonioni; te ne gugulu lahi i hono afioaga; te ne kalaga ki he kakai kotoabe o mamani, o hage ko kinautolu oku malamalaki ki he fua oe vaine.

31 E ai ae logoaa mai o a‘u ki he gaahi gataaga o mamani; he oku fekovikovi‘i a Jihova moe gaahi kakai, te ne alea moe kakano kotoabe: bea te ne tukuage ae agahala ki he heleta, oku behe e Jihova.

32 Oku behe e Jihova oe gaahi kau tau, Vakai, e alu atu ae kovi mei he kakai, ki he kakai, bea e fakatubu mei he gataaga o mamani ae ahiohio lahi.

33 Bea i he aho koia, e tamate‘i e Jihova mei hono gataaga e taha o mamani o a‘u ki hono gataaga e taha o mamani: bea e ikai ha mamahi koeuhi ko kinautolu, bea e ikai tanaki, be tanu: ka e hoko akinautolu koe kinohaa i he fuga fonua.

¶ 34 Tagi, mo tagilāulāu akimoutolu koe kau tauhi, bea fetafokifokiaki akimoutolu i he efuefu, ko kimoutolu koe tauhi lahi; he kuo hokojia ae gaahi aho o hoo mou fakamovetevete, bea mo hoo mou tamate‘i; bea e maumau‘i akimoutolu o hage koe ibu maugataa.

35 Bea e ikai ha hala ke hola ai ae kau tauhi, be ha haoaga ki he tauhi lahi.

36 E ogo mai ae le‘o oe tagi ae kau tauhi, bea moe tagilāulāu ae tauhi lahi: he kuo maumau‘i e Jihova e nau goue.

37 Bea kuo tuuji ae gaahi nofoaga fiemalie koeuhi koe houhau kakaha o Jihova.

38 Kuo ne liaki hono ana, o hage koe laione: he kuo lala a ho nau fonua, koeuhi koe ita lahi oe fakamalohi, bea koeuhi koe kakaha o hono houhau.