¶ 1 BEA ko eni ae gaahi lea oe tohi aia nae tohi e Jelemaia koe balofita mei Jelusalema ki hono toega oe kau mātua nae fetuku fakabobula, bea ki he kau taulaeiki, moe kau balofita, bea ki he kakai kotoabe aia nae fetuku fakabobula e Nebukanesa mei Jelusalema ki Babilone;

2 (Bea hili hono alu mei Jelusalema, a Jekonia koe tu‘i moe tu‘i fefine, bea moe kau talafekau, koe gaahi houeiki o Juta mo Jelusalema, moe kau tufuga, bea moe kau tufuga ukamea;)

3 I he nima o Ilasa koe foha o Safani, mo Kemalia koe foha o Hilikia, (aia nae fekau e Setikia koe tu‘i o Juta ki Babilone kia Nebukanesa koe tu‘i o Babilone) o behe,

4 Oku behe e Jihova oe gaahi kau tau, koe Otua o Isileli, kiate kinautolu kotoabe kuo fetuku fakabobula, akinautolu kuou bule‘i ke fetuku mei Jelusalema ki Babilone.

5 Mou laga ae gaahi fale, o nofo ai; bea to ae gaahi goue, mo kai hono fua;

6 Mou too kiate kimoutolu ae gaahi unoho, bea fakatubu ae gaahi foha moe gaahi ofefine; bea fili ae gaahi unoho ki ho mou gaahi foha, bea atu ho mou gaahi ofefine ki ho nau gaahi unoho, koeuhi ke nau fanafanau ae gaahi foha moe gaahi ofefine; koeuhi ke mou fakatokolahi i ai, bea oua naa fakatokojii.

7 Bea kumi ke melino ae kolo aia kuou bule‘i ke fetuku fakabobula akimoutolu ki ai, bea hufia ia kia Jihova: he te mou ma‘u ae fiemalie i hono melino.

¶ 8 He oku behe e Jihova oe gaahi kau tau, koe Otua o Isileli; Oua naa tuku ke kākā‘i akimoutolu e hoo mou kau balofita moe kau fiemana oku iate kimoutolu, bea oua naa tokaga ki he gaahi miji oku mou miji aki.

9 He oku nau kikite loi kiate kimoutolu i hoku huafa: Oku behe e Jihova, Nae ikai teu fekau akinautolu.

¶ 10 He oku behe e Jihova, Oka oji he ta‘u e fitugofulu teu aahi kiate kimoutolu, bea teu fakamooni eku lea lelei kiate kimoutolu, bea bule ke mou toe ha‘u ki he botu ni.

11 He oku behe e Jihova, Oku iate au ae gaahi tuutuuni, kuou tuutuuni kiate kimoutolu, koe gaahi tuutuuni ki he fiemalie, kae ikai ki he kovi, koeuhi ke foaki hoo mou amanaki kiate kimoutolu i he ikuaga.

12 Bea te mou toki ui kiate au, bea te mou alu o lotu kiate au, bea teu fanogo kiate kimoutolu.

13 Bea te mou kumi mo ilo‘i au, oka mou ka kumi kiate au aki ho mou loto kotoa.

14 Bea oku behe e Jihova, Te mou ilo au: bea teu liliu ho mou fakabobula, bea teu tanaki akimoutolu mei he gaahi buleaga kotoabe, bea mei he gaahi botu kotoabe naaku kabuji akimoutolu ki ai, oku behe e Jihova; bea teu toe omi akimoutolu mei he botu koia naaku bule ke fetuku bobula ki ai akimoutolu.

¶ 15 Koeuhi kuo mou behe, Kuo fokotuu e Jihova kiate kitautolu ae kau balofita i Babilone;

16 Ka kuo folofola behe a Jihova, ki he tu‘i oku nofo i he nofoaga o Tevita, bea moe kakai kotoabe oku nofo i he kolo ni, bea mo ho mou kaiga kuo alu atu mo kimoutolu ki he fakabobula;

17 Oku behe e Jihova oe gaahi kau tau; Vakai, teu fekau kiate kimoutolu ae heleta, moe hoge, moe mahaki fakaauha, bea teu gaohi akinautolu ke hage koe gaahi fiki kovi, aia oku ikai faa kai, koe mea i he ene kovi.

18 Bea teu tautea aki akinautolu ae heleta, moe hoge, bea moe mahaki fakaauha, bea teu tukuage akinautolu ke ave akinautolu ki he gaahi buleaga kotoabe o mamani, ke hoko koe malaia, moe fakaofo, moe manukiaga, moe ogoogokovi, ki he buleaga kotoabe aia kuou kabuji akinautolu ki ai:

19 Oku behe e Jihova, koeuhi nae ikai te nau fanogo ki he eku gaahi lea, aia naaku fekau kiate kinautolu i he eku kau tamaioeiki koe kau balofita, o tuu hegihegi hake be o fekau‘i akinautolu, ka oku behe e Jihova nae ikai te mou fie fanogo.

¶ 20 Koia mou fanogo ki he folofola a Jihova, akimoutolu kotoabe oku fakabobula, akimoutolu kuou ave mei Jelusalema ki Babilone:

21 Oku behe e Jihova oe gaahi kau tau, koe Otua o Isileli, kia Ehabi koe foha o Kolaia, bea mo Setikia koe foha o Maaseia, akinaua oku kikite loi kiate kimoutolu i hoku huafa: Vakai, Teu tukuage akinaua ki he nima o Nebukanesa koe tu‘i o Babilone; bea te ne tamate‘i akinaua i ho mou ao;

22 Bea koe mea iate kinaua e tubu ai ae lea fakamalaia i he kau bobula kotoabe o Juta oku i Babilone, o behe, Ke gaohi koe e Jihova ke hage ko Setikia bea hage ko Ehabi, aia nae tutu i he afi e he tu‘i o Babilone;

23 Koeuhi kuo na fai kovi i Isileli, bea tono‘i ae unoho o ho na kaugaabi, bea kuo na lea aki ae gaahi lea loi i hoku huafa, aia nae ikai teu fekau kiate kinautolu; he oku behe e Jihova, Oku ou ilo‘i, bea ko hono fakamooni au.

¶ 24 Ke ke lea behe foki ki Simaia, mei Nehelami, o behe,

25 Oku folofola mai a Jihova oe gaahi kau tau, koe Otua o Isileli, o behe, Koeuhi kuo ke atu ae gaahi tohi i ho higoa oou ki he kakai kotoabe i Jelusalema; bea kia Sefania koe foha o Maaseia koe taulaeiki, bea ki he taulaeiki kotoabe, o behe,

26 Kuo fakanofo koe e Jihova koe taulaeiki koe fetogi o Jihoiata koe taulaeiki, koeuhi ke mou hoko koe kau tauhi i he fale o Jihova, koeuhi ke iloga ae tagata kotoabe oku faha, bea mahalo koe balofita ia ke ai ia ki he fale fakabobula bea moe akau fakamau va‘e.

27 Koia, koeha nae ikai te ke valoki ai kia Jelemaia o Anatoti, aia oku ne behe eia koe balofita ia kiate kimoutolu?

28 He naa ne fekau kiate kimautolu i Babilone, o behe, Oku fuoloa ae fakabobula ni, mou laga ae gaahi fale, bea nofo ai; bea to hoo mou gaahi goue, bea kai hono fua.

29 Bea nae lau ae tohi ni, e Sefania koe taulaeiki ki he teliga o Jelemaia koe balofita.

¶ 30 Bea nae toki hoko ae folofola a Jihova kia Jelemaia, o behe,

31 Fekau atu kiate kinautolu kotoabe kuo fakabobula‘i, o behe, Oku behe mai e Jihova, koe mea ia Simaia mei Nehelami; koeuhi kuo kikite e Simaia kiate kimoutolu, bea ne fakafalala akimoutolu ki he loi, ka nae ikai teu fekau ia:

32 Koia oku behe mai e Jihova, Vakai, Teu tautea a Simaia mei Nehelami, bea mo hono hako: e ikai ha toko taha i hono faahiga ke nofo mo ene kakai; bea e ikai te ne mamata ki he lelei teu fai ki hoku kakai, oku behe e Jihova; koeuhi kuo ne ako aki ae agatuu kia Jihova.