¶ 1 KOE folofola nae hoko mei a Jihova kia Jelemaia, i he teu tau ki Jelusalema mo hono gaahi kolo oia, a Nebukanesa koe tu‘i o Babilone, mo ene kau tau kotoabe, moe gaahi buleaga kotoabe o mamani naa ne bule ki ai, bea moe kakai kotoabe, o behe,

2 Oku behe e Jihova, koe Otua o Isileli; Alu o lea kia Setikia koe tu‘i o Juta, bea tala kiate ia, oku behe e Jihova; Vakai, teu tukuage ae kolo ni ki he nima oe tu‘i o Babilone, bea te ne tutu aki ia ae afi:

3 Bea e ikai te ke hao koe mei hono nima, ka e ma‘u mooni koe, bea tukuage koe ki hono nima; bea e mamata e he fofoga ki he fofoga oe tu‘i o Babilone, bea te mo alea mo ia koe gutu ki he gutu, bea te ke alu ki Babilone.

4 Ka ke fanogo ki he folofola a Jihova, E Setikia koe tu‘i o Juta: oku behe e Jihova, kiate koe, E ikai te ke mate koe i he heleta.

5 Ka te ke bekia i he fiemalie: bea hage koe tutu  nae fai ki hoo gaahi tamai koe gaahi uluaki tu‘i nae mua iate koe, e behe e nau tutu mea namu kakala kiate koe; bea te nau mamahi koeuhi ko koe, o behe, Oiaue eiki i he kuou fakaha ae lea, oku behe e Jihova.

6 Bea nae toki lea aki e Jelemaia koe balofita ae gaahi lea ni kotoabe kia Setikia koe tu‘i o Juta i Jelusalema,

7 I he tau oe kau tau oe tu‘i o Babilone ki Jelusalema, bea moe kolo kotoabe o Juta nae toe, a Lakisi, mo Aseka: he nae toe ae ogo kolo tau ni i Juta.

¶ 8 Koeni ae folofola nae hoko mei a Jihova kia Jelemaia, hili hono fai ae fuakava e Setikia koe tu‘i moe kakai kotoabe nae i Jelusalema, ke fakaha kiate kinautolu ae tauataina;

9 Koeuhi ke taki taha tukuage e he tagata a ene tamaioeiki, mo ene kaunaga, ke tauataina, o kabau koe tagata Hebelu be koe fefine Hebelu; koeuhi ke oua naa tamaioeiki aki e ha Jiu a hono tokoua.

10 Bea nae tokaga ae houeiki kotoabe, bea moe kakai kotoabe, akinautolu nae fai ae fuakava, ke taki taha tukuage ene tamaioeiki, mo ene kaunaga ke tauataina, ke oua naa bule e ha taha kiate kinautolu, bea naa nau fai ia, o nau tuku ke nau alu.

11 Kae hili ia naa nau tafoki, bea bule ki he tamaioeiki moe kaunaga, ko kinautolu kuo nau tukuage ke tauataina, ke toe ha‘u, bea toe bule kiate kinautolu ke nau tamaioeiki mo kaunaga.

¶ 12 Koia nae ha‘u ae folofola a Jihova kia Jelemaia mei a Jihova, o behe,

13 Oku behe e Jihova, koe Otua o Isileli; Naaku fai ae fuakava mo hoo mou gaahi tamai i he aho naaku omi ai akinautolu mei he fonua ko Ijibite, mei he fale fakabobula, o behe,

14 Oka hili ae ta‘u e fitu te mou tukuage ae tagata taki taha hono tokoua koe Hebelu, aia kuo fakatau kiate koe, bea hili ene tauhi kiate koe i he ta‘u e ono, ke ke tukuage ia ke ne tauataina meiate koe: ka nae ikai fanogo kiate au a hoo mou gaahi tamai, be fakafanogo mai ho nau teliga.

15 Bea naa mou tafoki eni, o fai totonu i hoku ao, i hoo mou taki taha fakatauataina‘i a hono kaugaabi; bea naa mou fai ae fuakava i hoku ao i he fale kuo ui aki hoku huafa:

16 Ka naa mou liliu o fakauli‘i hoku huafa, bea nae bule e he tagata taki taha ki he ene tamaioeiki, moe tagata taki taha ki he ene kaunaga, ko kinautolu naa ne fakatauataina‘i ke faiteliha be, ke toe ha‘u, bea fakamoulaloa akinautolu, ke hoko koe tamaioeiki moe kaunaga kiate kimoutolu.

17 Koia oku behe e Jihova; Nae ikai te mou fanogo kiate au, ke fakaha ae tauataina taki taha ki hono tokoua, moe tagata taki taha ki hono kaugaabi: Koia, oku behe mai a Jihova, Vakai, Teu fakaha ae tauataina kiate kimoutolu, ki he heleta, moe mahaki fakaauha, bea moe hoge; bea teu bule ke fetuku akimoutolu ki he gaahi buleaga kotoabe o mamani.

18 Bea teu foaki ae kau tagata, ko kinautolu kuo maumau‘i eku fuakava, ko kinautolu oku heeki ai ke fakamooni ae gaahi lea oe fuakava aia naa nau fai i hoku ao, i he e nau fahi ua ae uhiki‘i bulu, bea alu i he vahaa oe ogo fahi,

19 Koe houeiki o Juta, moe houeiki o Jelusalema, koe kau talifekau, moe kau taulaeiki, bea moe kakai kotoabe oe fonua, ko kinautolu nae alu i he vahaa oe ogo fahi oe uhiki‘i bulu;

20 Teu foaki akinautolu ki he nima o ho nau gaahi fili, bea ki he nima onautolu oku kumi ki he e nau moui: bea e hoko ho nau agaaga koe mea kai ki he faga manu buna oe lagi, bea ki he faga manu oe fonua.

21 Bea teu foaki a Setikia koe tu‘i o Juta mo hono houeiki ki he nima o ho nau gaahi fili, bea ki he nima okinautolu oku kumi ki he e nau moui, bea ki he nima oe kau tau oe tu‘i o Babilone, akinautolu kuo alu hake iate kimoutolu.

22 Oku behe e Jihova, Vakai, teu fekau, bea bule kiate kinautolu ke nau toe ha‘u ki he kolo ni; bea te nau tau‘i ia, bea lava‘i ia, bea tutu ia aki ae afi: bea teu gaohi ae gaahi kolo o Juta ke lala tae hano kakai.