¶ 1 BEA nae bule ae tu‘i ko Setikia koe foha o Josaia koe fetogi o Konaia koe foha o Jihoiakimi, aia nae fakanofo koe tu‘i i he fonua o Juta, e Nebukanesa koe tu‘i o Babilone.

2 Ka nae ikai te ne fanogo eia, be ko ene kau tamaioeiki, be koe kakai oe fonua ki he gaahi folofola a Jihova, aia naa ne folofola aki i he balofita ko Jelemaia.

3 Bea nae fekau e Setikia koe tu‘i a Jehukali, koe foha o Selemaia, bea mo Sefania koe foha o Maaseia koe taulaeiki, ki he balofita ko Jelemaia, o behe, Hufia ni akimautolu kia Jihova ko ho tau Otua,

4 He nae kei fealuaki be a Jelemaia i he kakai: he nae teeki ai tuku ia ki he fale fakabobula.

5 Bea nae toki ha‘u ae kau tau a Felo mei Ijibite: bea kuo fanogo ki ai ae kau Kalitia akinautolu nae kabui a Jelusalema, naa nau alu mei Jelusalema.

¶ 6 Bea nae toki hoko ae folofola a Jihova ki he balofita ko Jelemaia, o behe,

7 Oku behe e Jihova, koe Otua o Isileli; Te ke lea o behe ki he tu‘i o Juta, aia nae fekau koe kiate au ke eke kiate au; vakai, koe kau tau a Felo aia kuo ha‘u koe tokoni kiate kimoutolu, te nau toe alu ki Ijibite ko ho nau fonua.

8 Bea e toe ha‘u ae kau Kalitia o tau moe kolo ni, bea e lava‘i ia, bea tutu aki ia ae afi.

9 Oku behe e Jihova; Oua naa kākā‘i akimoutolu, o behe, Koe mooni e alu iate kitautolu ae kau Kalitia; koeuhi e ikai te nau alu.

10 Kabau naa mou ta‘i ae kau tau kotoabe ae kau Kalitia aia nae tau‘i akimoutolu, kae toe be ae kau tagata kafo iate kinautolu, ka te nau tuu hake ae tagata taki taha mei hono fale fehikitaki, bea tutu aki ae afi ae kolo ni.

¶ 11 Bea nae hoko o behe, i he mahui ae tau ae kau Kalitia mei Jelusalema koe manavahe ki he kau tau a Felo,

12 Nae alu atu a Jelemaia ke mahui mei Jelusalema ki he fonua o Benijimani, i he lotolotoga oe kakai i ai.

13 Bea i he ene i he mataba o Benijimani, nae i ai ae eiki ae fale fakabobula, ko hono higoa ko Ilija, koe foha o Selemaia, koe foha o Hanania; bea naa ne buke a Jelemaia koe balofita, o ne behe, Oku ke hola ki he kau Kalitia.

14 Bea behe e Jelemaia, Oku ikai mooni ia; oku ikai teu hola ki he kau Kalitia. Ka nae ikai te ne tui kiate ia: bea buke e Ilija a Jelemaia, bea omi ia ki he houeiki.

15 Bea nae ita ae houeiki kia Jelemaia, bea ta‘i ia, bea tuku ia ki he fale fakabobula i he fale o Jonatani koe tagata tohi: he kuo nau gaohi ia koe fale fakabobula.

¶ 16 Bea kuo hu a Jelemaia ki he fale fakabouli, bea mo hono gaahi ana, bea nofo ai a Jelemaia i he gaahi aho lahi;

17 Bea nae toki fekau e Setikia koe tu‘i ke omi ia mei ai: bea fehui fakafufu e he tu‘i kiate ia i hono fale, o behe, Oku ai ha folofola mei a Jihova? Bea behe e Jelemaia, Oku ai: he nae behe eia, e tukuage koe ki he nima oe tu‘i o Babilone.

18 Bea nae lea a Jelemaia, ki he tu‘i ko Setikia, Koeha eku kovi kuou fai kiate koe, be ki hoo kau tamaioeiki, be ki hoo kakai, koeuhi kuo mou tuku ai au ki he fale fakabobula?

19 Koefe ho mou kau balofita nae kikite kiate kimoutolu, o behe, E ikai tau‘i akimoutolu, be koe fonua ni e he tu‘i o Babilone?

20 Ka koeni, fanogo mai, Oku ou kole kiate koe, E hoku eiki koe tu‘i: oku ou kole kiate koe, tuku ke lelei eku kole i ho ao; bea oua naa bule ke toe ave au ki he fale Jonatani koe tagata tohi, telia naaku mate ai.

21 Bea nae toki fekau e Setikia koe tu‘i ke ave a Jelemaia ki he lotoa oe fale fakabobula, bea ke nau foaki kiate ia i he aho kotoabe ae koga ma mei he hala oe kau tagata ta‘o ma, o a‘u ki he fakaoji ae ma kotoabe i he kolo. Koia nae nofo a Jelemaia ki he lotoa oe fale fakabobula.