¶ 1 NAE kamata bule e Setikia i hono uofulu ma taha ta‘u o ene motua, bea naa ne bule i he ta‘u e hogofulu ma taha i Jelusalema. Bea koe higoa o ene fa‘e ko Hamutali koe ofefine o Jelemaia mei Libina.

2 Bea naa ne fai kovi i he ao o Jihova, o hage koe mea kotoabe nae fai e Jihoiakimi.

3 He koe mea i he houhau o Jihova nae hoko o behe ki Jelusalema mo Juta, nae agatuu ai be a Setikia ki he tu‘i o Babilone, kae oua ke ne kabuji akinautolu mei hono ao.

¶ 4 Bea nae hoko o behe, i hono hiva ta‘u o ene bule, i hono hogofulu oe mahina, bea i hono hogofulu oe aho oe mahina, nae ha‘u a Nebukanesa koe tu‘i o Babilone, bea mo ene kau tau kotoabe, ki Jelusalema, bea nofo atu ki ai, bea gaohi kolo o takatakai ki ai.

5 Koia nae takatakai ae kolo o a‘u ki hono hogofulu ma taha ta‘u oe bule a Setikia koe tu‘i.

6 Bea i hono fa mahina, i hono aho e hiva oe mahina, nae lahi aubito ae hoge i he kolo, koeuhi nae ikai ha mea kai ki he kakai oe fonua.

7 Bea nae vaivai ae kolo, bea hola ae kau tau kotoabe, bea naa nau alu mei he kolo i he bouli, i he hala oe mataba i he vahaa oe ogo a, aia nae i he goue ae tu‘i; bea nau alu i he hala ki he toafa, (lolotoga nae takatakai ae kolo e he kau Kalitia.)

¶ 8 Ka nae tuli ae tu‘i e he kau tau oe kau Kalitia, bea nau ma‘u a Setikia i he toafa o Jeliko; bea nae movetevete meiate ia a ene kau tau kotoabe.

9 Bea naa nau buke ae tu‘i, bea o hake ia ki he tu‘i o Babilone ki Libila i he fonua ko Hamati; bea ne fakamāu‘i ia i ai.

10 Bea nae tamate‘i e he tu‘i o Babilone ae gaahi foha o Setikia i hono ao: bea ne tamate‘i foki ae houeiki kotoabe o Juta i Libila.

11 Bea naa ne kabe‘i ae mata o Setikia; bea nae ha‘i aki ia ae maea ukamea fihifihi, bea tataki ia e he tu‘i o Babilone ki Babilone, bea nae tuku ia ki he fale fakabobula o a‘u ki he aho o ene mate.

¶ 12 Bea i hono nima mahina, i hono hogofulu oe aho oe mahina, ko hono hogofulu ma hiva ta‘u oe bule a Nebukanesa koe tu‘i o Babilone, nae ha‘u ki Jelusalema a Nebusaatani koe eiki oe kau leo, aia naa ne tauhi ki he tu‘i o Babilone,

13 Bea nae tutu aki ae afi ae fale o Jihova, moe fale oe tu‘i; moe fale kotoabe i Jelusalema, bea moe gaahi fale oe kakai eiki kotoabe, naa ne tutu aki ae afi:

14 Bea nae maumau‘i ki lalo ae a kotoabe nae tuu takatakai i Jelusalema, e he kau tau kotoabe oe kau Kalitia, ko kinautolu nae i he eiki oe kau leo.

15 Bea nae ave fakabobula e Nebusaatani koe eiki oe kau leo, ae kakai majiva niihi, bea mo hono toe oe kakai nae nofo i he kolo, bea moe kakai nae hola ki he tu‘i o Babilone, bea mo hono toe oe kakai toko lahi.

16 Ka nae tuku e Nebusaatani koe eiki oe kau leo ae kakai majiva niihi ki he fonua ke tauhi ae vaine bea koe kau tauhi goue.

¶ 17 Bea koe gaahi bou balasa aia nae i he fale o Jihova, bea koe gaahi tuuga, moe gaahi aigavai balasa aia nae i he fale o Jihova, nae maumau‘i e he kau Kalitia, bea ave ae balasa kotoabe ki Babilone.

18 Bea koe gaahi kulo foki, moe gaahi huo, moe gaahi helekoji māma, moe gaahi ibu, moe gaahi sibuni, bea moe gaahi ibu balasa aia naa nau gaue aki, naa nau fetuku ia.

19 Bea koe gaahi ibu, moe aiaga afi, moe gaahi ibu jii, moe gaahi kulo, moe gaahi tuuga māma, moe gaahi sibuni, bea moe gaahi ibu inu; aia nae koula i he koula, bea mo ia nae siliva i he siliva, nae fetuku e he eiki oe kau leo.

20 Koe bou e ua, moe fuu aiga vai lahi e taha, bea moe bulu balasa e hogofulu ma ua aia nae i lalo i he gaahi tuuga, aia nae gaohi e Solomone koe tu‘i i he fale o Jihova: bea nae ikai faa fakamamafa ae balasa oe gaahi ibu ni kotoabe.

21 Bea koe gaahi bou, ko hono maoluga oe bou e taha koe haga e tolugofulu ma ono; bea koe filo nae takatakai aki ia koe haga e uofulu ma fa; bea ko hono matolu koe louhi‘i e fa: bea nae ava be ia i loto.

22 Bea nae ai ha ulu balasa i oluga i ai; bea ko hono maoluga oe ulu e taha koe haga e hogofulu, moe togi fakasanisani, bea moe bomikaniti oku takai aki ae gaahi ulu, kuo gaohi kotoabe aki ae balasa. Bea ko hono ua oe bou nae tatau mo ia bea mo hono bomikaniti.

23 Bea nae ai ae bomikaniti e hivagofulu ma ono i he botu e taha; bea ko hono lau katoa oe bomikaniti nae takai aki ae mea nae togi, koe teau.

24 Bea nae ave e he eiki oe kau leo a Selaia koe taulaeiki lahi, bea mo Sefania ko hono ua oe taulaeiki, bea moe kau leo mataba e toko tolu:

25 Bea nae ave foki i he kolo ae kau tagata talifekau aia nae bule ki he kau tagata tau; bea moe kau tagata e toko fitu, ko kinautolu naa nau nonofo moe tu‘i, nae ilo akinautolu i he kolo; moe tagata tohi lahi oe kau tau, aia nae aana ae lau ae kakai oe fonua, moe kau tagata oe fonua e toko onogofulu, akinautolu nae ilo i loto kolo.

26 Koia, nae ave akinautolu e Nebusaatani koe eiki oe kau leo, bea ne omi akinautolu ki Libila ki he tu‘i o Babilone.

27 Bea nae teia akinautolu e he tu‘i o Babilone, bea tamate‘i akinautolu i Libila i he fonua ko Hamati. Nae behe ae ave fakabobula o Juta mei hono fonua.

28 Ko eni ae kakai nae ave fakabobula e Nebukanesa: i hono fitu ta‘u, koe kau Jiu e toko tolu afe ma uofulu ma tolu:

29 I hono hogofulu ma valu ta‘u o Nebukanesa naa ne ave fakabobula mei Jelusalema ae toko valugeau ma tolugofulu ma ua:

30 Bea i hono uofulu ma tolu ta‘u o Nebukanesa nae ave fakabobula e Nebusaatani koe eiki oe kau leo ae kau Jiu e toko fitugeau ma toko fago-fuiu ma toko nima: koe kakai kotoabe, koe toko fa afe, ma toko onogeau.

¶ 31 Bea i hono tolugofulu ma fitu ta‘u oe fakabobula o Jihoiakini koe tu‘i o Juta, i hono hogofulu ma ua oe mahina, mo hono uofulu ma nima oe aho oe mahina, nae hoko o behe, Ko Ivilimelotaki koe tu‘i o Babilone i hono uluaki ta‘u o ene bule, naa ne hakeaki‘i a Jihoiakini koe tu‘i o Juta, bea omi ia mei he fale fakabobula.

32 Bea naa ne lea lelei kiate ia, bea nae hiki hake hono nofoaga fakaeieiki ke maoluga i he nofoaga oe gaahi tu‘i nae i ai mo ia i Babilone.

33 Bea nae fetogi hono kofu fakabobula: bea ne kai ma mau ai be i hono ao i he gaahi aho kotoabe o ene moui.

34 Bea ko ene mea kai, nae tufa mau ai be e he tu‘i o Babilone ae kai kiate ia, koe inaji i he aho kotoabe, i he aho kotoabe o ene moui, o a‘u ki he aho o ene mate.