No Ta Preokupá
Ánimo, rumannan. Si, nos ta bibando den tempunan peligroso, pero a medida ku nos ta permanesé riba e kaminda di pakto, nos no tin nodi di tin miedu.
Mi ta agregá mi testimonio na e mensahe di Presidente Russel M. Nelson i Elder Quentin L. Cook duná algun ratu pasa di e harmonia i unidat di e Konseho di e Promé Presidensia i e Quorum di e Diesdos Apòstelnan. Mi sa ku e anunsionan aki ta revelashon i e mente i boluntat di Señor i lo bendishoná i fortifiká individualnan, famianan, i E Iglesia di JesuCristu di e Santunan di e Delaster Dianan pa generashonnan ku lo bini.
Un par di aña pasá, un di nos yu muhenan yòn kasá i su esposo a puntra Hermana Rasband i ami un pregunta masha importante ku ta influensia -bida: “Si ainda ta sigur i sabí pa trese yunan den e mundu aparentemente malbado i hororoso den kua nos ta biba?”
Awor, esei tabata un pregunta importante pa un mama i tata pa konsiderá ku nan kerido yunan kasá. Nos por a skucha e miedu den nan bos i sinti e miedu den nan kurason. Nos kontesta tabata firme “Si, e ta mas ku OK,” kompartiendo enseñansa nan fundamental di evangelio i nos impreshonnan di kurason i eksperensianan di bida.
Miedu no ta kos nobo. E disípulonan di JesuCristu, riba laman di Galileo, tabata tin miedu di e “bientu i ola” den sukú di anochi. Komo Su disípulonan awendia, nos tambe tin miedu. Nos adultonan soltero ta sinti angustia tòkante e kompromisio pa kasa. Matrimonionan yòn, manera nos yunan, por tin miedu di trese yunan den un mundu ku ta kresiendo den maldat. Misioneronan tin miedu di hopi kos, espesialmente pa aserká estranhero. Viudanan tin miedu di sigui pa dilanti nan so. Teenagernan tin miedu pa no wòrdu aseptá; muchanannan tin miedu di nan promé dia di skol; studiantenan di universidat tin miedu di haña [e resultado di] nan prufwèrk bek. Nos tin miedu di frakasá, rechaso, desepshon, i pa koke ta deskonosí. Nos tin miedu di horkan, teremoto, i kandela ku ta destruí e tera i nos bida. Nos tin miedu di no wòrdu skohé i, di otro un banda, nos tin miedu di wòrdu elegí. Nos tin miedu di no ta sufisiente bon; nos tin miedu ku Señor no tin bendishon pa nos. Nos tin miedu di kambio, i nos miedu por eskala den teror. Mi a inkluí kasi tur hende?
For di den pasado, miedu a limitá e perspektiva di e yunan di Dios. Semper mi a gusta e relato di Elias den 2 Reinan. E rei di Syria a manda un ehérsito ku “a yega den anochi, i rondoná e siudat.” Nan intenshon tabata pa kaptura i mata e profeta Elias. Nos ta lesa:
“I Su manisé trempan ora e siervo di e hòmber di Dios a sali pafó, el a ripará, ku e siudat tabata rondoná ku un ehérsito ku kabai i garoshi. I su sirbidó a bis’é, Ai mi shon, kiko nos mester hasi?”
Esei ta palabranan di miedu.
“Pero Elias a kontestá: ‘no spanta, esnan ku ta ku nos ta muchu mas tantu ku esnan ku ta ku an.”
Pero e no a para einan.
“E ora ei Elias a resa: Señor, habri su wowo pa e por mira. I Señor a habri e wowo di e sirbidó. El a ripará ku e seru tabata yen di kabai i garoshi di kandela; nan tabata rondoná Elias.”
Nos por tin o lagá di tin garoshi di kandela pa kore ku nos miedunan i konkistá nos demoñonan, pero e enseñansa ta opvio. Señor ta ku nos, konsiente di nos i ta bendishoná nos manera E so por. Orashon por yama forsa i e revelashon ku nos tin mester pa dirigí nos pensamentunan riba JesuCristu i Su sakrifisio ekspiatorio. Señor tabata sa ku tin biaha nos lo sinti miedu. Mi tabata einan i abo tambe, p’esei skrituranan ta yen di e konsehonan di Señor
“Sea di bon ánimo, i no teme.”
“Wak na mi den tur pensamentu; no duda, no teme.”
“No teme rebaño chikí.” Mi ta stima e ternura “rebaño chikí.” Den e Iglesia aki nos por ta tiki den kantidat, pa manera ku e mundu ta konta e influensia, pero ora nos habri nos wowo spiritual, “esnanku ta ku nos ta muchu mas tantu ku esnan ku ta ku nan.” Nos amoroso Pastor, JesuCristu, ta sigui, “Laga e tera i fièrnu huntu kombatí kontra boso, pasó ku boso ta edifiká riba mi baranka, nan no por vensé.”
Kon miedu ta wòrdu eliminá? Pa e hóben, e tabata para banda di Elias, un profeta di Dios. Nos tin e mesun promesa. Ora nos ta skucha Presidente Russell M. Nelson, ora nos ta skucha su konsehonan, nos ta para huntu ku un profeta di Dios. Kòrda e palabranan di José Smith: “ Ata’kí, despues di e kantidat di testimonionan ku nos a duna di dje, esaki ta e testimonio, e delaster di tur, ku nos ta duna di dje: Ku e ta biba!” JesuCristu ta biba. Nos amor pa E i Su evangelio ku ta kita miedu.
Nos deseo pa “Semper tin Su Spiritu” ku nos ta pusha miedu un banda pa un mehor bista eterno di nos bida mortal. Presidente Nelson a atvertí, “Den e dianan binidero, lo no ta posibel pa sobrebibí spiritualmente sin e guìa, direkshon, konsuelo, i influensha konstante di e Spiritu Santu.”
Señor a bisa, relashoná ku e plaganan ku lo kubri e tera i ku lo hasi hopi kurason duru: “Mi disípulonan lo ta den lugánan santu, i nan lo no move.”
I despues e konseho divino: “No preokupá, pasó, ora e kosnan aki sosodé, lo bo sa ku e promesa ku a wòrdu hasi na bo lo wòrdu kumplí.”
Para den lugánan santu---no preokupá---i promesanan lo wòrdu kumpli. Laga nos wak kada unu di nan den relashon ku nos miedu nan.
Promé, para den lugánan santu. Ora nos ta den lugánan santu—nos hogarnan hustu, nos kapìanan ku ta dediká, e tèmpelnan konsagrá—nos ta sinti e Spiritu di Señor ku nos. Nos ta haña kontesta riba preguntanan di nos problemanan òf e pas pa simplemente pone nan un banda. Esei ta e Spiritu den akshon. E lugánan sagrado aki den e reino di Dios riba mundu ta apelá riba nos reverensia, nos rèspèt pa otronan, lo mehor di nos mes bibando e evangelio, i nos speransa pa pone miedu un banda i buska e poder di sanashon di JesuCristu pa medio di Su Ekspiashon.
No tin lugá pa miedu den e lugánan santu di Dios òf den kurason di Su yunan. Di kon? Pa motibu di amor. Dios stimá nos—semper—i nos Stim’É. Nos amor pa Dios ta kontrarestá tur miedu, i Su amor ta na abundansia den e lugánan santu. Pensa riba esei. Ora nos ta tentativo den nos kompromiso ku Señor, ora nos desviá for di e kaminda ku ta hiba na bida eterno, ora nos ta kuestioná òf duda nos signifikashonnan di Su diseño divino, ora nos lagá miedu habri porta pa tur su kompañeronan—deskurashi, rabia, frustrashon, desilushon—e Spiritu ta bandoná nos, i nos ta sin Señor. Si bo sa kiko esei ta, lo bo sa ku esaki no ta un lugá bon pa bo ta. Kontrali di esaki, ora nos ta para den lugánan santu, nos por sinti Dios su amor, i amor “perfekto ta ekspulsá tur miedu.”
E siguiente promesa ta “no preokupá.” No ta importá kuantu maldat i káos ta yena e mundu, nos a wòrdu primintí dor di nos fieldat diario den JesuCristu e “pas di Dios, ku ta traspasá tur komprendementu.” I ora Christu bolbe den tur poder i gloria, maldat, rebeldiá, i inhustisia lo tèrminá.
Hopi tempu pasa e Apòstel Pablo a profetisá di nos tempu, bisando e hóben Timoteo:
“Sa tambe, ku den e delaster dianan lo bini temporada difísil.
“Pasó hende lo stima nan mes mas ku tur kos, kudishi, bromadó, orguyoso, blasfemá, desobediente na nan mayornan, mal agradesí, pekador, …
“ … ta stima plaser mas ku nan ta stima Dios.”
Kòrda, ku “esnan ku ta ku nos” na tur dos banda di e velo, esunnan ku ta stima Señor ku henter nan kurason, poder, mente, i forsa, “ta mas ku esunnan ku ta ku nan.” Si nos konfia aktivamente den Señor i Su kamida, si nos ta komprometí den Su obra, nos lo no tin miedu di e tendensianan di e mundu o wòrdu fastidiá pa nan, mi ta roga bo pa laga influensia di mundu un banda i preshoná i buska spiritualidat den bo bida diario. Stimá lokual Señor ta stimá---ku ta inkluí Su mandamentunan, Su kasnan sagradonan, nos sagrado kombenionan Kuné, e sakramento tur día di Reposo, nos komunikashon pa medio di orashon—i lo bo no wòrdu molestiá.
E lastu pùnto: konfia den Señor i Su promesa. Mi sa ku tur Su promesanan lo wòrdu kumpli. Mi sa mes firmemente manera ku mi ta pará dilanti di boso den e reunion sagrado aki.
Señor a revelá: “pasó esun ku ta sabi i a risibí e bèrdat, i a tuma e Spiritu Santu komo nan guìa, i no a wòrdu engañá—di bèrdat mi ta bisa bo, ku nan lo no wòrdu bashá abou i tirá den kandela, pero lo sobrebubí e dìa.
Esaki ta e motibu dikon nos no mester ta preokupá dor di e konfushon di awendia, pa esnan den e edifisio fenomenal i espasioso, pa esnan ku ta hasi mofa di e esfuerso honesto i di e sirbishi dediká na Señor JesuCristu. Optimismo, kurashi, inkluso karidat ta bini di un kurason ku no ta kargá ku preokupashon i konfushon. Presidente Nelson, kende ta “optimismo pa ku e futuro,” a kòrda nos, “Si nos tin ku tin kualke speransa òf ta sefta dor di un mión di stèm i filosofia di hende ku ta ataka e bèrdat, nos mester siña pa risibí revelashon.”
Pa risibí revelashonnan personal, nos mester poné prioridat pa biba e evangelio i enkurashá fieldat i spiritualidat den otro inkluyendo nos mes.
Spencer W. Kimball tabata un di e profetanan di mi hubentut. E par di añanan ku a pasa, despues ku mi a wòrdu yama komo Apòstel, mi a haña pas den su promé mensahe den konferensia general di Òktober 1943. E tabata sumergí dor di su yamamentu; mi sa kon esei ta sinti. Elder Kimball a bisa: “mi a pensa hopi i hasi orashonnan, yuna i resá. Ta tin pensamentunan kontradiktorio ku ta bini den mi mente—bosnan similar ku ta bisa: ‘Bo no por hasi e trabou aki. Bo no ta digno. Bo no tin e abilidat’—i alafin di tur manera ta bini e pensamentu triunfante: ‘Bo mester hasi e trabou asigná—bo mester por hasi bo mes kapas, digno, i kualifiká.’ I e bataya a kontinuá.”
Mi a yena mi kurason ku e testimonio puru di e Apòstel ku a bira e di 12 Presidente di e Iglesia poderoso aki. El a rekonosé ku e ta tin ku pone miedu su tras “pa hasi e trabou asigná” i ku e ta tin ku konfia den Señor pa por a hasi su mes “kapas, digno, i kualifiká.” Nos tambe por. E bataya lo kontinuá, pero nos lo enfrentá nan ku e Spiritu di Señor. Nos lo “no tin preokupashon” pasó nos ta defendé huntu ku Señor i defendé Su prinsipionan i Su plan eterno, nos ta pará riba tera sagrado.
Awor, kiko a para di yu muher i sua kende a hasi e pregunta mas sinsero i ku ta penetrá den kurason, basá riba miedu en kuestion añanan pasa? Nan a tuma nos kombersashon na serio e anochi ei; nan a hasi orashon i yuna i yega na nan propio konklushon. Felis i yen di goso pa nan i pa nos, nan abuelonan, awor aki nan ta bendishoná ku shete yu bunita siguiendo pa dilanti den fe i amor.
Ánimo, rumannan. Si, nos ta bibando den tempunan peligroso, pero a medida ku nos ta permanesé riba e kaminda di pakto, nos no tin ku tin miedu. Mi ta bendishoná bo si bo hasi asina, lo bo no tin preokupashon, den e tempu ku nos ta biba òf ku e problemanan ku lo presentá. Mi ta bendishoná bo pa bo skohe pa ta den lugánan santu i no move. Mi ta bendishoná bo pa bo kere de e promesanan di JesuCristu, ku E ta bibu, E ta kuidando nos, sòru pa nos i ta huntu ku nos. Den e nòmber di nos Señor i Salbador, JesuCristu. Amèn