Birando un Pastor
Mi ta spera ku esnan di kual bo ta sirbi lo mira bo komo un amigu i realisá ku, den bo, nan tin un kampion i un konfidente.
Un aña pasá, un mucha di Primaria ku mi a topa kun’e na Chile a trese un sonrisa riba mi kara. “Kon ta bai,” el a bisa, “ami ta David. Bo por papia di mi na konferensia general?”
Den momentunan silensioso, mi a pensa riba David su kumindamentu inesperá. Nos tur ke wòrdu rekonosé. Nos ke ta importante, pa wòrdu rekordá, i pa sinti nos mes stimá.
Rumannan, kada unu di boso ta importante. Hasta ora nan no ta papia over di bo den konferensia general, e Salbador konosé bo i stimá bo. Si bo ta puntra bo mes si esaki ta bèrdat, solamente bo mester kontemplá ku El a “graba bo den e palma di [Su] man.”
Sabiendo ku e Salbador stima nos, nos por puntra nos mes, kon nos por mustra nos amor mas mihó pa E.
E Salbador ta puntra Pedro, “Bo stima mi … ?”
Pedro a kontestá, “ Si, Señor; Bo sa ku mi stima bo. El a bis’e, Alimentá mi lamchinan.”
Ora El a puntra e pregunta aki un di dos, i di tres biaha, “ Bo stima mi?” Pedro tabata tristu pero a konfirmá su amor: Señor, Bo sa tur kos; bo sa ku ami stima bo. Jesus a bisa e,Alimentá mi karnénan.”
Pedro no a proba su mes kaba komo un disipel stimá di Cristu? For di nan promé enkuentro kantu laman, el a laga su nèt di piska “mesora” atras pa por sigui e Salbador.Pedro a bira un berdadero piskadó di hende. El a kompaña e Salbador durante Su ministerio personal i a yuda instruí otro hende e evangelio di JesuCristu.
Pero awor e Señor resusitá tabata sa ku E no lo tabata bai tei mas huntu ku Pedro, pa mustr’é kon i ki ora e lo mester sirbi. Den e ousensia di e Salbador, Pedro lo mester buska guia di e Spiritu, risibí revelashon di su mes, i tambe tin fe i e kurashi pa aktua. Enfoká riba su karnénan, e Salbador ta deseá pa Pedro hasi lokual E lo a hasi si E mes tabata einan. El a puntra Pedro pa bira un pastor di karné.
Aprel ku a pasa, Presidente Russell M. Nelson a ekstendé un invitashon similar na nos pa alimentá nos Tata su karnénan na un manera mas santu i pa hasi esaki por medio di sirbi otro.
Pa por aseptá e invitashon aki efektivamente, nos mester desaroyá un kurason di un pastor i komprondé e nesesidat di Señor su karnénan. Kon nos ta bira e pastornan ku Señor i su profetanan mester di nos pa bira?
Manera ku tur pregunta, nos mester mira nos Salbador, JesuCristu—e Bon Pastor. E Salbador su karnénan tabata konosé i kontá; nan tabata wòrdu kuidá; nan tabata reuní den e rebaño di Dios.
Konosé i Kontá
Sigun nos ta aspirá di sigui e Salbador su ehèmpel, na promé lugá nos mester konosé i konta Su karnénan. Nos a wòrdu asigná individuonan i famianan spesífiko pa kuida, pa asina nos ta sigur ku tur Señor su rebaño ta numerá i niun no wòrdu lubidá. Numerá, sin embargo, no ta bai solamente over di number; e ta bai over di ta sigur ku kada persona ta sinti e amor di e Salbador por medio di kualkier ku ta sirbi pa E. Di e manera ei, tur por rekonosé ku nan ta konosé pa un amoroso Tata na Shelu.
Resientemente mi a sera konosí ku un muher hóben ku a wòrdu asigná pa sirbi un hermana kasi sinku biaha mas grandi ku e mes. Huntu, na a deskubrí un amor komun pa músika. Ora ku e muher hóben aki ta di bishitá, nan ta kanta kantika huntu i kompartí nan favoritonan. Nan a krea un laso di amistat ku a bendishoná nan tur dos su bida.
Mi ta spera ku esnan ku bo ta sirbi lo mira bo komo un amigu i realisá ku, den bo, nan a haña un kampion i un konfidente—un hende ku sa di nan sirkunstansia i ta sostené nan den nan speransa i aspirashon.
Resientemente mi a haña un asignashon pa sirbi un hermana ku ni ami, ni mi kompañero tabata konosé masha bon. Sigun mi tabata papia ku Jess, mi kompañera di diesseis aña ku mi ta sirbi kun’e, ku tur rason el a proponé, “Nos tin ku konosé mas mihó.”
Mesora nos a disidí ku un selfi i un teksto di introdukshon tabata nesesario. Ami a tene e telefòn, i Jess a primi e kònòpi pa saka e potrèt. Nos promé oportunidat pa sirbi tabata un enfoke kolektivo.
Na nos promé bishita, nos a puntra nos ruman muhé si tabatin kualke kos ku nos por inkluí den nos orashon di parti di dje. El a kompartí un reto personal i a bisa ku lo e apresiá nos orashonnan. Su honestidat i konfiansa propio a trese un laso di amor instantanio.
Sigun nos ta ora, lo bo sinti e amor di JesuCristu pa esnan ku bo ta sirbi. Kompartí e amor ei ku nan. Ki manera mas mihó tin pa kuida Su karnénan ku no ta di yuda nan sinti Su amor---pa medio di bo?
Tene Kuenta
Un di dos manera ku nos por desaroyá e kurason di un pastor ta di tene kuenta ku Su karnénan. Komo Santunan di delaster Dianan, nos ta organisá; nos por move, fiha, drecha, i rekonstruí kasi tur kos. Nos ta lihé pa duna un man den nesesidat òf un tayo ku kuki. Pero tin mas ku esaki?
Nos karnénan sa ku nos ta tene kuenta ku nan ku amor i ku nos lo ta aktua pa yuda?
Den Mateo 25 nos ta lesa:
“Bini, boso bendishoná di mi Tata, tuma posishon di e reino ku a wòrdu prepará pa boso … :
“Paso mi tabatin hamber, i boso a duna mi di kome; mi tabatin set, i boso a duna mi di bebe: mi tabata un estranhero, i boso a risibí mi den boso kas: …
“E ora ei e gustunan lo kontesta E, bisando, Señor ki ora nos a mira bo ku hamber, i a duna bo di kome? Òf ku set, i a duna bo di bebe?
“Ki ora nos amira bo komo estranhero, i a risibí bo den nos kas?”
Rumannan, e palabra importante ta mira. Esnan hustu a mira esnan ku tabata den nesesidat pasó nan tabata mira i nota. Nos por ta un ku wowo ku ta mira pa yuda i sostené, pa selebrá i asta soña. I sigun nos ta aktua, nos por ta sigurá di e promesa den Mateo: “ Si bo a hasi esaki pa esun di mas ménos … , boso a hasi esaki pa mi.”
Un amigu — nos lo yam’e Juan — a kompartí kiko por pasa ora nos mira otro su nesesidat ménos visibilidat: “Un hermana den mi bario a trata di kometé suisidio. Despues di dos luna, mi a deskubrí ku ningun hende di mi quorum no a aserká e esposo pa papia over di e eksperensia troumátiko aki. Lástimamente, mi tampoko no a aktua. Finalmente, mi a puntra e esposo pa un almuerso. E tabata un hòmber hopi tímido, hopi biaha reservá. Sin embargo ora ku mi a bisa, ‘ Bo kasá a trata di kometé suisidio. Esei mester tabata algu aplastante pa bo. Bo ta ker a papia over di e kos aki?’ e la yora abiertamente. Nos tabatin un kombersashon tierno i íntimo i a desaroyá un amistat i konfiansa remarkabel dentro den un tempu kòrtiku.”
Juan a añadí, “Mi ta pensa ku nos tendensia ta pa djis trese algun brownies mas ku trata di saka afó kon pa kana den e momentu ei ku honestidat i amor.”
Nos karnénan por tin doló, pèrdida, òf hasta pèrdè nan kaminda; komo nan pastor, nos por ta entre e promé nan pa mira nan nesesidat. Nos por skucha i stima sin husga i ofresé speransa i yudansa ku e guia eksigente di e Spiritu Santu.
Rumannan, e mundu ta mas yen di speransa i alegria dor di e aktonan inspirá chikitu di bondat ku bo ta hasi. Sigun bo ta buska Señor su guia kon pa mustra Su amor i mira e nesesidatnan di esnan ku bo ta sirbi, bo wowo lo wòrdu habrí. Bo asignashon sagrado pa sirbi ta duna bo e derecho divino di inspirashon. Bo por buska e inspirashon ei ku konfiansa.
Reuní den e Rebaño di Dios
Tres, nos ke pa nos karnénan ta reuní den e rebaño di Dios. Pa hasi esaki, nos mester konsiderá unda nan ta riba e kaminda di kombenio i ta dispuesto pa kana huntu ku nan den nan biahe di fe. Di nos ta un privilegio sagrado pa konosé nan kurason i apuntá nan direkshon di nan Salbador.
Hermana Josivini di Fiji tabatin difikultat pa mira pa dilanti riba su kaminda di kombenio —literalmente. Su amiga a mira ku Josivina tabata bringa pa mira e skrituranan bon sufisiente pa e por a lesa nan. El a proveé un brel nobo pa Josivini i un pòtlot hel pa e por a marka kada menshon di JesuCristu den e Buki di Mormon. Loke a kuminsá komo un deseo simpel pa sirbi i pa yuda ku estudio di skritura a resultá ku Josvinin a asistí tèmpel pa promé biaha den bintiocho aña despues ku el a wòrdu boutisá.
No opstante si nos karnénan ta fuerte òf débil, gosando òf den pena, nos por determiná ku niun hende no ta nan so. Nos por stima nan no opstante unda nan ta spiritualmente i ofresé sosten i enkurashá nan pa e próksimo stap dilanti. Sigun nos ta ora i buska pa komprondé nan kurason, mi ta duna testimonio ku Tata Selestial lo guia nos i Su Spiritu lo bia huntu ku nos. Nos tin e oportunidat di ta e “angelnan ku ta rondoná” nan sigun E ta bai dilanti nan.
Señor ta invitá nos pa kuida Su karnénan, pa atendé Su rebaño manera E lo hasi. E ta invitá nos pa ser un pastor pa tur nashon i tur pais. (I si, Elder Uchtdorf, nos stima i tin mester di pastor Aleman.) I E ta deseá pa Su hóbennan djòin den e kousa aki.
Nos hóbennan por ta algun di nos pastornan di mas fuerte. Nan ta, manera Presidente Russell M. Nelson a bisa, “entre e mihó ku Señor hamas a manda na mundu.” Nan ta e “spiritunan noble” nos “pastornan di mas puru,” ku ta sigui e Salbador. Bo por imaginá bo mes e poder ku pastornan asina lo trese si nan kuida Su karnénan? Sirbiendo brasa—brasa ku e hubentut aki, nos lo mira milagernan.
Mujeres jovenes i hombres jovenes, nos mester di boso. Si bo no tin un asignashon pa sirbi, papia ku bo presidente di Sosiedat di Sokoro òf di e Quorum di Èldernan. Nan lo gosá den e disposishon pa determiná ku Su karnénan ta konosé i kontá, kuidá i reuní den e rebaño di Dios.
Ora e dia yega ku nos tin ku hinka rudia na pia di nos Salbador stimá, sabiendo ku nos a kuida Su rebaño, mi ta spera ku nos por kontesta manera Pedro: ” Si, Señor; bo sa ku mi stima bo.” Esnan aki, Bo karnénan, a wòrdu stimá, nan ta salvo, i nan ta nakas. Den nòmber di JesuCristu, amèn.