E Ròl di e Buki di Mormon den Konvershon
Nos ta reuniendo Israel pa e di último bia i nos ta hasiendo esaki ku e Buki di Mormon, un di e hèrmèntnan mas poderoso di konvershon.
Hopi hende awendia ta puntra nan mes tokante di e realidat di Dios i nos relashon pa ku n’E. Hopi sa tiki òf nada mes tokante Su gran plan di felisidat. Mas ku 30 aña pasa, Presidente Ezra Taft Benson a opservá ku “hopi di e … mundu ta rechasá e divinidat di e Salbador. Nan ta duda Su nasimentu milagroso, Su bida perfekto, i e realidat di Su resurekshon glorioso.”1
Den nos tempu, preguntanan ta enfoká no solamente riba nos Salbador pero tambe Su Iglesia _ E Iglesia di JesuCristu di e Santunan di Delaster dianan — kual E a restourá pa medio di su Profeta Jose Smith. E preguntanan aki hopi bia ta enfoká riba e historia, enseñansa, òf práktikanan di e Salbador su Iglesia.
E Buki di Mormon ta Yuda Nos Krese den Testimonio
For di Prediká Mi Evangelio, nos ta lesa: “Kòrda ku nos entendimentu [di Tata Selestial i Su plan di felisidat] ta bin for di profetanan moderno — Jose Smith i su susesornan — ku a risibí revelashon direkto di Dios. P’esei, e promé pregunta ku un hende mester puntra ta si Jose Smith tabata un profeta, i e por kontesta e pregunta aki dor di lesa i hasi orashon tokante e Buki di Mormon.”2
Mi testimonio tokante e yamamentu divino di e Profeta Jose Smith a wòrdu fortifiká dor di studia bou orashon e Buki di Mormon: Un Otro Tèstamènt di JesuCristu. Mi a aktua riba e invitashon di Moroni pa “puntra Dios, e Tata Eterno, den e nòmber di Cristu,” pa sa di e verasidat di e Buki di Mormon.3 Mi ta duna testimonio ku mi sa ku e ta bèrdat. E konosementu ei a bin na ami, meskos ku e por bin na abo, “pa medio di e poder di e Espíritu Santu.” 4
E introdukshon di e Buki di Mormon ta bisa: “Esnan ku gana un testimonio divino [di e Buki di Mormon] for di e Espíritu Santu lo bin na sa tambe pa medio di e poder ku JesuCristu ta e Salbador di e mundu, ku Jose Smith ta Su reveladó i profeta den e lastu dianan aki, i ku E Iglesia di JesuCristu di e Santunan di Delaster dianan ta e reino di Señor un biaha mas establesé na tera, komo preparashon pa e Segunda Binida di e Mesias.”5
Komo un misionero hóben bayendo Chile, mi a siña e lès poderoso tokante e poder di konvershon di e Buki di Mormon. Señor Gonzalez a sirbi den un posishon respetá den su iglesia pa hopi aña. E tabata tin entrenamentu religioso intensive, inkluyendo un grado den teologia. E tabata hopi orguyoso di su konosementu bíbliko. Tabata opvio pa nos ku e tabata un erudito eskolar.
E tabata bon na tinu di e misioneronan di e Iglesia di JesuCristu di e Santunan di e Delaster Dianan ora nan tabata hasiendo nan labor den e siudat di Lima, Perú. Semper e ker a topa ku nan pa e por siña nan tokante di e Beibel.
Un dia, kasi manera un regalo di shelu, manera e a siña, dos mishonero a par’e den kaya i puntr’e si nan por bin su kas i kompartí e eskrituranan ku ne. Esaki ta su soño birando realidat! Su orashonnan a wòrdu kontesta. Finalmente, e por a pone e hóbennan aki mal guia den e kaminda stret. El a bisa nan ku e lo ta enkantá pa por tin nan bin su kas i papia tokante di e eskrituranan.
E no por a warda pa e su sita. E tabata kla pa usa e Beibel pa refutá nan kreensia. E tabata tin sigur ku e Beibel por mustra klaramente i artikuladamente e eror di nan kaminda. E nochi apuntá a yega, i e misioneronan a bati na e porta. E tabata kontentu. Su momentu a yega finalmente.
E la habri e porta i invitá e mishoneronan pa drenta su hogar. Un di e mishoneronan a entreg’é un buki blou i kompartí un testimonio sinsero ku e elder sa ku e buki ta kontené e palabra di Dios. E di dos misionero a agregá su testimonio fuerte di e buki, testifikando ku l a wòrdu tradusí pa e profeta moderno di Dios, yamá Jose Smith, i ku e buki ta siña di Cristu. E misioneronan a eskusa nan mes i bandoná e hogar.
Señor Gonzalez tabata asina desapuntá. Pero el a habri e buki i kuminsá pasa dor di e blachinan. el a lesa e promé blachi. el a lesa blachi tras di blachi i no a stòp te ora tabata lat den atardi di e siguiente dia. el a lesa hinter e buki i tabata sa ku e ta bèrdat. E tabata sa kiko e tin ku hasi. el a yama e mishoneronan, pa e risibí e lèsnan, i a entrega e bida ku el a konosé pa bira miembro di E Iglesia di JesuCristu di e Santunan di Delaster dianan.
E bon hòmber tabata mi maestro na MTC na Provo, Utah. Hermano Gonzalez su historia di konvershon i e poder di e Buki di Mormon a laga un impreshon grandi serka mi.
Ora mi a yega Chile, mi presidente di mishon, Presidente Royden J. Glade, a invitá nos pa lesa e testimonio di e Profeta Jose Smith registrá den Jose Smith — Historia kada siman. el a siña nos ku e testimonio di e Promé Vishon lo tin un korelashon direkto ku nos propio testimonio di e evangelio i e testimonio di e Buki di Mormon.
Mi a tuma e invitashon aki na serio. Mi a lesa e akontesimentunan di e Promé Vishon; mi a lesa e Buki di Mormon. Mi a hasi orashon manera Moroni a dirigí i puntra “Dios, e Tata Eterno, den e nòmber di Cristu” 6 … si e Buki di Mormon ta bèrdat. Mi ta duna testimonio awe ku mi sa ku e Buki di Mormon, manera e Profeta Jose Smith a bisa, ta “e buki mas korekto ku kualke otro buki na mundu, i ta e piedra klave di nos religion, i e hende [lo] yega mas serka na Dios dor di sigui su preseptonan ku kualke otro buki.”7 E Profeta Jose a deklará: “Kita e Buki di Mormon i su revelashonnan, i unda nos religion ta? Nos no tin ningun.”8
Konvershon Personal
Ora nos komprondé mihó ken nos ta i e propósito di e Buki di Mormon, nos konvershon ta bira mas profundo i mas sigur. Nos ta fortalesé den nos kompromiso pa warda e konvenionan ku nos a hasi ku Dios.
Un propósito prinsipal di e Buki di Mormon ta pa reuní Israel ku ta esparsi. E reunion aki ta duna tur yunan di Dios e oportunidat pa drenta den e kaminda di konvenio i, dor di honra e konvenionan aki, regresá bek den presensia di e Tata. Ora nos ta siña arepentimentu i boutisa konversonan, nos ta reuniendo Israel.
E Buki di Mormon tin 108 referensia na e kas di Israel. Na komienso di e Buki di Mormon, Nefi a siña, “Pa e plenitut di mi intenshon ta pa mi persuadi hende pa bin na e Dios di Abraham, i e Dios di Isaac, i e Dios di Jakcob, i wòrdu salba.”9 E Dios di Abraham, Isaac, i Jakob ta JesuCristu, e Dios di Tèstamènt Bieu. Nos ta wòrdu salba ora nos bin na Cristu pa medio di Su evangelio bibiente.
Despues, Nefi a skibi:
“Si, hasta mi tata a papia hopi tokante e Gentilnan, i tambe tokante di e kas di Israel, pa nan por wòrdu kompará manera un palu di oleifi, kual su takinan ta wòrdu kibra i plama riba e fas di mundu. …
“I despues ku e kas di Israel wòrdu plama nan mester wòrdu reuní huntu atrobe; òf, mas detayá, despues ku e Gentilnan risibí e plenitut di e Evangelio, e takinan natural di e palu di oleifi, òf e restunan di e kas di Israel, mester wòrdu di stek aden, òf bin na e konosementu di e berdadero Mesias, nan Señor i nan Redentor.10
Asina tambe, na final di e Buki di Mormon, e profeta Moroni ta rekordá nos di nos konvenionan, bisando, “Pa bo no ta mas turdi, pa e konvenionan di e Tata Eterno kual el a hasi ku boso, O kas di Israel, por wòrdu kumpli.”11
E Konvenio di e Tata Eterno
Kiko ta e “konvenionan di e Tata Eterno’ referí dor di Moroni? Nos ta lesa esaki den e Buki di Abraham:
“Mi nòmber ta Yehova, i mi sa e fin for di e komienso, p’esei mi man lo ta riba boso.
“I ami lo hasi di bo un gran nashon, i lo mi bendishoná bo mas ku bo por midi, i hasi di bo nòmber grandi bou di tur nashonnan, i lo bo ta un bendishon pa bo simia despues di bo, i asina den nan man nan lo karga e ministerio i e Saserdosio na tur nashon.”12
Presidente Russel M. Nelson a siña den e transmishon mundial resien ku “esakinan sigur ta e lastu dianan, i Señor ta apresurando Su trabou pa reuní Israel. E reunion aki ta kos di mas importante ku lo tuma lugá na mundu awendia. Nada mas por kompará kuné den magnitut, nada mas por kompará kuné den importansia, nada mas por kompará kuné den mahestuosidat. I si bo skohe, si bo ke, bo por ta parti di dje. Bo por ta un parti grandi di algu grandi, algu grandioso, algu mahestuoso!
“Ora nos ta papia di e rekohementu, simplemente nos ta bisa e bèrdat fundamental aki: kada un di e yunan di nos Tata Selestial, na ámbos banda di e velo, ta meresé di skucha e mensahe di e evangelio restourá di JesuCristu. Nan ta disidí pa nan mes si nan ke sa mas.”13
Ta esei ta loke nos ta hasi komo miembro di E Iglesia di JesuCristu di e Santunan di Delaster dianan: nos ta buskando pa trese e mundu na un entendimentu di — e konvershon na — e evangelio di JesuCristu. Nos ta e esnan ku ta rekohé den e delaster dianan.”14 Nos mishon ta kla. Rumannan, laga nos ta konosí komo esnan ku a tuma Moroni su promesa na kurason, hasi orashon i risibí un kontesta pa sa kue Buki di Mormon ta bèrdat, i e ora ei kompartí e konosementu ei ku otronan den palabra, pero mas importante, den echo.
E Buki di Mormon si Ròl den Konvershon
E Buki di Mormon ta kontené e plenitut di e evangelio di JesuCristu;15 e ta guia nos na e konvenionan di e Tata, kual si nos warda lo sigurá nos di Su gran don — bida eterno.16 E Buki di Mormon ta e piedra angular di e konvershon di tur e yunan di Tata Selestial.
Sitando atrobe for di Presidente Nelson: “Ora bo … lesa for di e Buki di Mormon diariamente, lo bo siña e doktrina di rekohementu, bèrdatnan tokante JesuCristu, Su Ekspiashon, i e plenitut di Su evangelio ku bo no ta haña den e Beibel. E Buki di Mormon ta sentral den e rekohementu di Israel. De echo, si no ta tin e Buki di Mormon, e rekohementu primintí di Israel lo no a sosodé.”17
Laga mi konkluí ku e palabranan di Salbador manera el a siña e Nefitanan tokante e bendishonnan primintí: “Boso ta yunan di e profetanan; i boso ta di e kas di Israel’ i boso ta di e konvenio ku e Tata a hasi ku boso tatanan, bisando na Abraham: I den bo simia lo tur e famianan di mundu lo wòrdu bendishoná.”18
Mi ta testifiká ku nos ta e yunan di Dios, e simia di Abraham, e kas di Israel. Nos ta reuniendo Israel pa e último bia i nos ta hasiendo esaki ku e Buki di Mormon — un buki ku, kombiná ku e Espíritu di Señor, ta e hèrmènt di mas poderoso pa konvershon. Nos ta wòrdu guia dor di e profeta di Dios, Presidente Russel M. Nelson, ken ta dirigiendo e rekohementu di Israel den nos dia. E Buki di Mormon ta bèrdat. el a kambia mi bida. Mi ta primintí boso, manera Moroni i hopi profetanan durante e siglonan, ku e por kambia di boso.19 Den e nòmber di JesuCristu, amèn.