Reuní Tur Kos den Cristu
E poder di e evangelio di Señor pa transformá i bendishoná nos ta vlui for di diserní i apliká e relashon konektá di su doktrina, prinsipionan, i práktikanan.
Un kabuya ta un hèrmènt esensial ku nos tur konosé. Kabuya ta trahá di pidanan di hilu di tela,mata, waya, òf otro materialnan kua kada un individualmente ta wòrdu lorá òf di flèktu huntu. Ta interesante ku, supstansianan ku por ta bastante simpel por wòrdu di wif huntu i bira eksepshonalmente fuerte. Asina ku, konektá efektivamente i mara materialnan ordinario por produsí un hèrmènt ekstraordinario.
Meskos ku un kabuya ta haña su forsa for di hopi hilunan individualmente di wif huntu, asina e evangelio di Jesucristu ta duna e perspektiva di mas grandi di bèrdat i ta ofresé e bendishonnan mas riku ora nos hasi kaso na e amonestashon di Pablo pa “reuní tur kos den Cristu, tantu lokual ta den shelu, i lokual ta na tera; hasta den dje.”1 Mas importante ta, e reunimentu di bèrdat vital aki ta sentrá den i ta enfoká riba Señor Jesucristu pasobra E ta “e kaminda, e bèrdat, i e bida.”2
Mi ta pidi pa e Spiritu Santu lo iluminá kada un di nos segun nos pensa kon e prinsipio di reuní tur kos den Cristu ta apliká den maneranan práktiko pa siña i biba Su evangelio restourá den nos bida diario.
Un Temporada di Revelashon
Nos ta biba den un temporada remarkabel i revelador di e Iglesia restourá di Jesucristu. E adaptashonnan históriko anunsiá awe tin solamente un propósito global: pa fortalesé fe den Tata Selestial i Su Plan i den Su Yu Jesucristu i Su Ekspiashon. E reunion di djadumingu no a bira simplemente mas kòrtiku. Mas bien, awor nos tin mas oportunidat i responsabilidat komo persona i famia pa usa nos tempu pa mehorá e Sabat komo un alegria na kas i Iglesia.
Aprel último, e struktura organisatorio di quorumnan di saserdosio no a simplemente kambia. Mas bien, énfasis i forsa a wòrdu duná pa un manera mas haltu i santu di ministrá na nos hermano i hermananan.
Meskos ku e hilunan di flèktu di un kabuya ta produsí un hèrmènt poderoso i duradero, tur e akshonnan relashoná ku otro ta parti di un esfuerso unifiká pa dirigí mihó e enfoke, rekursonan, i obra di e Salbador su Iglesia restourá ku su mishon fundamental: pa yuda Dios den Su obra pa logra trese e salbashon i eksaltashon di Su yunan. Por fabor no enfoká prinsipalmente riba e aspektonan logístiko di lokual a wòrdu anunsiá. Nos no mester pèrmití detayenan di kon hasi algu skuresé e motibunan spiritual global pa kua e kambionan aki ta wòrdu hasí awor.
Nos deseo ta pa fe den e Tata su Plan i den e Salbador su mishon di redenshon por oumentá den e mundu i ku Dios su kombenio eterno por wòrdu establesé.3 Nos úniko metanan ta pa fasilitá kombershon kontinuo na Señor i pa stima mas kompletamente i sirbi nos rumannan mas efektivamente.
Segmentá i Repartí
Tin biaha komo miembronan di Iglesia nos ta segmentá, separá, i ta apliká e evangelio den nos bida dor di krea listanan largu di tópikonan individual pa studia i tareanan pa hasi. Pero tal aserkamentu posiblemente por limitá nos komprenshon i vishon. Nos mester tene kuidou pasobra enfoke manera fariseo riba listanan di kos pa hasi por distraé nos for di yega mas serka di Señor.
E propósito i purifikashon, e felisidat i goso, i e kombershon i protekshon kontinuo ku ta bini for di entregá [nos] kurason na Dios4i [risibí] Su imágen den [nos] kara5 no por wòrdu optené solamente dor di realisá i marka tur e kosnan spiritual ku nos ta suponé pa hasi. Mas bien, e poder di e Salbador su evangelio pa transformá i bendishoná nos ta flui for di diserní i apliká relashon di diferente punto di su doktrina, prinsipionan, i práktikanan. Solamente ora nos reuní tur kos den Cristu, ku enfoke firme riba Dje, bèrdatnan di evangelio agrupá por pèrmití nos pa bira lokual Dios ke nos bira6 i perseverá ku balor te na fin.7
Siña i Akoplá Berdatnan di Evangelio
E evangelio di Jesucristu ta un tapeit magnífiko di bèrdat ku ta pas den otro8 i ta di wif huntu. Segun nos siña i konektá berdatnan di evangelio huntu, nos ta bendishoná pa risibí perspektivanan presioso i mas kapasidat spiritual dor di wowonan ku por mira influensia di Señor den nos bida i oreanan ku por skucha Su stem9. I e prinsipio di reuní tur kos ---hasta den Dje — por yuda nos den kambia e lista tradishonal den unu uní, integrá, i kompletu. Laga mi duna un ehèmpel di doktrina i di Iglesia di lokual mi ta sugeriendo.
Ehèmpel 1. E di kuater artíkulo di fe ta un di e ehèmpelnan di mas grandi di reuní tur kos den Cristu: “Nos ta kere ku e promé prinsipionan i ordenansanan di e Evangelio ta: promé, Fe den Señor Jesucristu; di dos, Arepentimentu; di tres, Boutismo dor di imershon pa e remishon di pikánan; di kuater, Imposishon di man pa e don di Spiritu Santu.”10
Fe berdadero ta enfoká den i riba Señor Jesucristu—den Dje komo e Yu Dibino i Unigénito di e Tata i na Dje i e mishon redentor ku El a kumpli. “Pasobra el a satisfasé e finnan di e lei, i a reklamá tur esnan ku tin fe den dje; i nan ku tin fe den dje lo tene na tur kos bon; p’esei anto e ta defendé e kousa di e yunan di hende.”11 Ehersé fe den Cristu ta konfia i pone nos konfiansa den Dje komo nos Salbador, riba Su nòmber, i den Su promesanan.
E promé i natural konsekuensia di konfia den e Salbador ta arepentí i kita for di maldat. Ora nos ehersé fe den i na Señor, naturalmente nos ta bira na, i ta bini na, i ta dependé riba Dje. Pues, arepentimentu ta konfia den idependé di e Redentor pa hasi pa nos lokual nos no por hasi pa nos mes. Kada un di nos mester “[konfia] kompletamente riba e méritonan di e ku ta poderoso pa salba”12 pasobra solamente “dor di e méritonan, i miserikòrdia, i grasia di e Santu Mesias”13 nos por bira kriaturanan nobo den Cristu14 i finalmente regresá na i biba den e presensia di Dios.
E ordenansa di boutismo dor di imershon pa e remishon di pikánan ta eksigí nos pa konfia den Dje, dependé di Dje, isigui E. Nefi a proklamá, “Mi sa ku si boso sigui e Yu, ku kompletu resolushon di kurason, sin aktua ku hipokresia i mentira dilanti Dios, pero ku berdadero intenshon, arepintiendo di boso pikánan, testifikando na e Tata ku boso ta dispuesto pa tuma riba boso e nòmber di Cristu,dor di boutismo — si, dor di sigui boso Señor i boso Salbador abou den awa, segun su palabra, ata, e ora ei boso lo risibí e Spiritu Santu; si, e ora ei ta bini e boutismo di kandela i di e Spiritu Santu.”15
E ordenansa di imposishon di man pa e don di e Spiritu Santu ta eksigí noskonfiansa den Dje, konfia den Dje, siguié, i sigui dilanti den Dje i ku yudansa di e Spiritu Santu. Manera Nefi a deklará, “I awor … pa medio di esaki mi sa ku a ménos ku un hende perseverá te na fin, den sigui e ehèmpel di e Yu di e Dios bibiente, e no por optené salbashon.”16
E di kuater artíkulo di fe no ta simplemente identifiká e prinsipionan i ordenansanan fundamental di e evangelio restourá. Mas bien, e deklarashon inspirá aki di kreensianan ta reuní tur kos den Cristu:konfia, konta ku ne den i riba Dje, siguié, isigui dilanti ku n’e –hasta den Dje.
Ehèmpel 2. Awor mi ke deskribí kon tur programanan i inisiativanan di Iglesia ta reuní tur kos den Cristu. Hopi ilustrashonnan adishonal por wòrdu presentá; lo mi usa solamente algun selektá.
Na 1978, Presidente Spencer W. Kimball a instruí miembronan di Iglesia pa edifiká e fortalesa di Sion den mundu. El a konsehá e santunan pa keda den nan pais natal i establesé estakanan fuerte dor di reuní e famia di Dios i siña nan e kamindanan di Señor. El a indiká tambe ku mas tèmpel lo wòrdu konstruí i a primintí bendishonnan pa e santunan unda ku nan ta biba den e mundu.17
Segun e kantidat di estakanan a krese, e nesesidat a intensifiká pa kasnan di miembro “bira [lugánan] kaminda miembronan di famia [gusta] di ta, kaminda nan[ por] enrikesé nan bida i haña amor mutuo, sosten, apresio, i estímulo.”18 Konsekuentemente, na 1980, reunionnan di djadumingu a wòrdu konsolidá den blòk di tres ora pa “enfatisá atrobe responsabilidat personal i familiar pa siña , biba, i studia e evangelio.”19 E énfasis aki riba famia i hogar a wòrdu reafirmá atrobe den “ E Famia: Un Proklamashon na e Mundu” introdusí pa Presidente Gordon B. Hinckley na 1995.20
Na Aprel di 1998[diesnuebe nobentiocho], Presidente Hinckley, a anunsiá e konstrukshon di hopi mas tèmpel chikitu, ku esei tresiendo e ordenansanan sagrado di e Kas di Señor mas serka di e personanan i famianan Santu di Delaster dia rònt mundu.21 I e oportunidatnan mehorá aki pa kresementu i desaroyo spiritual a wòrdu komplementá dor di oumento relashoná den outosufisiensia temporal pa medio di introdukshon di e Perpetual Education Fund in 2001.22
Durante di su atministrashon, Presidente Thomas S. Monson kada biaha a eksortá e santunan pa sali na “reskate” i a enfatisá e kuido pa esnan pober i den nesesidat komo un di e responsabilidatnan dibino apuntá di Iglesia. Siguiendo e énfasis riba preparashon temporal, e Self-Reliance Services initiative a wòrdu implementá na 2012.
Durante di e añanan ku a pasa, prinsipionan esensial tokante di hasi e dia di Reposo un alegria den hogar i na Iglesia a wòrdu enfatisá i fortalesé,23 asina preparando nos pa e skema di reunion di djadumingu anunsiá den e seshon aki di konferensia general.
I seis luna pasá, quorumnan di saserdosio Melkisedek a wòrdu fortalesé i aliniá mas efektivamente ku e esnan ousiliar pa kumpli ku un aserkamentu na ministrashon mas haltu i sagrado.
Mi ta kere ku e sekuensia i sinkronisashon di e akshonnan durante hopi dékada por yuda nos pa mira un obra mas uní i integral i no djis un serie di inisiativa independiente i separá. “Dios a revelá un patronchi di progreso spiritual pa personanan i famianan mediante ordenansanan, enseñansa, programanan, i aktividatnanku ta sentrá den hogar i sostené pa Iglesia. Organisashonnan i programanan di Iglesia ta eksistí pa bendishoná hendenan i famianan i no tei pa nan mes bienestar.24
Mi ta pidi pa nos por rekonosé Señor su obra komo un obra mundial ku ta birando muchu mas sentralisá den hogar i sostené pa Iglesia. Mi sa i ta testifiká ku Señor ta revelando i lo sigui revelá hopi kosnan grandi i importante pertenesiente na e Reino di Dios.25
Promesa i Testimonio
Mi a kuminsá mi mensahe dor di enfatisá e fortalesa ku ta kreá segun hilunan individual di material ta wòrdu hinká òf di flèktu huntu den un kabuya. Di mes un manera, mi ta primintí ku oumento di perspektiva, propósito, i poder lo bira evidente den nos enseñansa i bibamentu di e evangelio restourá ora nos lucha pa reuní tur kos den Cristu.
Tur oportunidatnan i bendishonnan di konsekuensia eterno ta originá den, ta posibel i tin propósito pa motibu di, i ta permanesé pa medio di Señor Jesucristu. Manera Alma a testifiká ku no tin otro manera òf medio pa kua hòmber por wòrdu salbá, solamente den i pa medio di Cristu. E ta e bida i e lus di e mundu.26
Ku goso mi ta deklará mi testimonio di e dibinidat i realidat bibiente di e Tata Eterno i di Su Yu Stimá, Jesucristu. Den nos Salbador, nos ta haña goso. I den Dje nos ta haña siguransa di “pas den e mundu aki, i bida eterno den e mundu benidero.”27 I esaki mi ta testifiká den nòmber sagrado di Señor Jesucristu, amèn.