Bo Ke Wòrdu Saná?
Dor di e Ekspiashon di JesuCristu, si nos skohe pa arepentí i bira nos kurason kompletamente na e Salbador, E lo sana nos spiritualmente.
lgun siman den su mishon, nos yu ménor i su kompañero misionero tabata kompletando nan estudio ora mi yu a sinti un doló suave i konstante den su kabes. El a sinti hopi straño; promé el a pèrdè kòntrol di su man robes; despues e no tabata sinti su lenga. E parti robes di su kara a kuminsá kologá. E tabatin difikultat pa papia. E tabata sa ku algu no tabata bon. Loke e no tabata sa ta ku e tabata meimei di un haña derame den tres area di su selebre. Miedu a kuminsá drenté miéntras ku el a bira parsialmente paralisá. Kon lihé un viktimá di un derame selebral ta risibí kuido por tin un efekto dramátiko riba kuantu tempu e ta dura pa e rekuperá. Su kompañero – un misionero yen di fe a aktuá desidido. Despues di a yama 911, el a dun’é un bendishon. Milagrosamente, e ambulans tabata solamente na 5 minüt di distansia.
Despues ku nos yu a wòrdu hibá hospital masha purá, e personal médiko lihé a evaluá e situashon i a determiná ku nan mester atministrá un remedi na nos yu ku posibelmente por drei bèk e konsekuensia di e paralisis i e konsekuensia di e posibel derame ku tempu.1 Pero, si nos yu no ta hañando un derame, e remedi por tin konsekuensia serio, manera sangramentu den su selebre. Nos yu mester a tuma un desishon. El a skohe pa aseptá e remedi. Ounke rekuperashon kompletu ta rekerí mas operashon i hopi luna, nos yu despues a regresá i a terminá su mishon despues ku e efektonan di e derame supstansialmente a keda birá.
Nos Tata Selestial ta todopoderoso i omnisiente. E konosé nos lucha físiko. E ta konsiente di nos dolónan físiko dor di malesa, morto, bira grandi, aksidente, òf trastorno di nasementu. E ta konsiente di nos luchanan spiritual asosiá ku ansiedat, soledat, depreshon, òf malesa mental. E konosé kada persona ku a sufri inhustisia òf ku a wòrdu abusá di dje. E konosé nos debilidatnan i e tendensianan i tentashonnan ku nos ta lucha ku ne.
Durante mortalidat nos ta wòrdu probá pa wak si nos lo skohe bon riba malu. Pa esnan ku warda Su mandamentunan, nan lo bai biba ku nE ‘‘den un estado di goso eterno.”2 Pa yuda nos den nos progreso pa bira meskos ku nE, Tata Selestial a duna tur poder i konosementu na Su Yu, JesuCristu. No tin niun doló, físiko, ni emoshon , ni spiritual ku Cristu no por sana.3
For di e ministerio mortal di e Salbador, skritura ta relatá hopi evento milagroso kaminda JesuCristu a usa Su poder divino pa sana esnan ku tabata sufri físikamente.
E Evangelio di Juan ta relatá e historia di un sierto hòmber ku a sufri di un enfermedat debilitante pa 38 aña.
“Ora Jesus a mir’é drumí, i tabata sa ku e tabata den e situashon ei pa hopi tempu, El a bis’é, Bo ke wòrdu saná?
E hòmber suak a kontestá ku niun hende no tabata serka pa yud’é ora e tabatin mas mester di esaki.
“Jesus a bis’é. Lanta, kue bo kama, i kana.
“I inmediatamente e hòmber a sana, i a kue su kama, i a kana. ”4
Por fabor tuma nota di e kontraste den efekto di kon largu e hòmber a sufri riba su mes — 38 aña — i kon lihé e sanashon a bini ora ku e Salbador a wòrdu involukrá. E sanashon tabata “inmediato.”
Na un otro okashon un muhé ku un asuntu di sanger pa 12 aña, i ku a gasta tur su sèn na dòkter, … a bai tras di Dje, i a mishi ku e rant di Su paña i inmediatamente su asuntu ku sanger [a stop). …
“I Jesus a bisa, Un hende a mishi ku mi, pasó Mi a sinti ku poder a sali for di Mi.
“I ora e muhé a mira ku ya e no tabata skondí, el … a deklará na Dje dilanti tur e hendenan … kon el a wòrdu sanáinmediatamente.”5
Durante Su ministerio, Cristu a siña ku e tin poder riba e kurpa físiko. Nos no por kontrolá e tempu ki ora Cristu Su sanashon di nos malesa físiko lo sosodé. Sanashon ta sosodé di akuerdo ku Su boluntat i sabiduria. Den skritura, algun ta sufri pa dékadanan; otronan, hinter nan bida mortal. Enfermedatnan mortal por refiná nos i por profundisá nos relashon ku Dios. Pero ora nos laga Cristu ta involukrá, semper E lo fortalesé nos spiritualmente pa asina nos por tin kapasidat mas grandi pa soportá nos karganan.
Al final, nos sa ku kada malesa físiko, enfermedat, òf imperfekshon lo wòrdu saná den e Resurekshon. Esei ta un regalo pa tur hende dor di e Ekspiashon di JesuCristu.6
JesuCristu por sana mas ku nos kurpa físiko. E por sana nos spiritu tambe. Den e skritura nos ta siña kon Cristu ta yuda esnan ku nan spiritu tabata suak i a sana nan.7 Ora nos reflekshoná riba e kosnan aki, nos speransa i fe den e Salbador Su poder pa bendishoná nos bida ta krese. JesuCristu por kambia nos kurason, sana nos di e efektonan di inhustisia òf abusu ku nos por eksperensiá, i fortalesé nos kapasidat pa soportá perdida i dolo di kurason, tresiendo nos pas pa yuda nos soportá e pruebanan den nos bida, sannando nos emoshonalmente.
Cristu tambe por sana nos ora nos kometé piká. Nos ta kometé piká ora nos a sabienda kibra Dios Su leinan.8 Ora nos kometé piká, nos alma ta bira sushi. Nada inpuro no por mora den presensia di Dios.9 “Wòrdu limpia di piká ta ser saná spiritualmente.”10
Dios e Tata sa ku nos lo kometé piká, pero El a prepará un manera pa nos por wòrdu redimí. Elder Lynn G. Robbins a siña: “Arepentimentu no ta [Dios Su] plan di respaldo den kaso ku nos faya. Arepentimentuta Su plan, sabiendo ku nos lo faya.11 “Ora nos kometé piká, nos tin e oportunidat pa skohe e bon riba e malu. Nos ta skohe e bon ora nos arepentí despues ku nos kometé piká. Dor di JesuCristu i Su sakrifisio ekspiatorio, nos por wòrdu redimí di nos pikánan i regresá den presensia di Dios e Tata si nos arepentí. Sanashon spiritual no ta di un banda---e ta rekerí e Salbador Su poder di redimí i arepentimentu sinsero di parti di e pekador. Pasó esnan ku skohe pa no arepentí, nan lo wòrdu rechasá e poder di sanashon ku Cristu ta ofresé. Pa nan, ta manera no tabatin redenshon.12
Miéntras mi tabata konsehá otronan ku tabata buskando pa arepentí, mi a ripará ku hendenan ku tabata biba den piká tin difikultat pa tuma bon desishon. E Spiritu Santu lo bandoná nan i hopi biaha nan ta lucha pa tuma desishonnan ku ta trese nan mas serka di Dios. Nan lo lucha lunanan i asta añanan, ku berguensa òf miedu di e konsekuensianan di nan pikánan. Hopi biaha nan ta sinti ku nunka nan no por kambia òf wòrdu pordoná. Hopi biaha mi a tende nan kompartí nan miedu ku si nan sernan kerí haña sa, loke nan a hasi, nan lo stop di stima nan òf bandoná nan. Ora nan sigui e liña di pensamentu aki, nan ta disidí di djis keda ketu i demorá nan arepentimentu. Inkorektamente nan a sinti ku tabata mihó pa no arepentí awor, pa asina no sigui lastimá esnan ku nan ta stima. Den nan mente ta mihó pa sufri despues di e bida aki ku bai den e proseso di arepentimentu awor. Rumannan, nunka no ta un bon idea pa tarda ku boso arepentimentu, E atversario hopi biaha ta usa miedu pa prevení nos pa akrua inmediatamente riba nos fe den JesuCristu.
Ora [nos] sernan kerí ta konfrontá ku e bèrdat di nos komportashon pekaminoso, maske ku nan ta sinti profundamente heridá,hopi biaha nan ke yuda e pekador ku sinseramente ke arepentí pa kambia i pa rekonsiliá ku Dios. Defakto sanashon spiritual ta wòrdu aselerá, ora e pekador konfesá i ta wòrdu rondoná pa esnan ku stim’é i yud’é pa bandoná su pikanan. Por fabor kòrda ku JesuCristu ta poderoso tambe den kon e por sana e viktima inosente di piká ku ta yega na Dje.13
Presidente Boyd K. Packer a deklará: “Nos spiritunan ta wòrdu dañá ora nos kometé eror i kometé piká. Pero kontrali na e kaso di nos kurpa mortal, ora e proseso di arepentímentu terminá, niun sikatris no ta keda atras, dor di e Ekspiashon di JesuCristu. E promesa: ‘Ata ki, esun ku arepentí di su pikanan, e ta wòrdu pordoná, i Ami e Señor no ta kòrda nan mas.’ [Doctrina y Convenios 58:42].”14
Ora nos arepentí “ ku hinter propósito di kurason,”15 “inmediatamente e gran plan di redenshon lo kuminsá” den nos bida.16 E Salbador lo sana nos.
E kompañero misionero i e profesionalnan ku a yuda nos yu afektá pa un derame selebral den e kampo misional a aktuá lihé. Nos yu a skohe pa risibí e remedi pa revertí derame. E efektonan ku ta paralisá di e derame ku por a siguie pa e restu di su bida mortal a keda revertí. Meskos, mas lihé nos arepentí i trese e Ekspiashon di JesuCristu den nos bida, mas lihé nos por wòrdu saná di e efektonan di piká.
Presidente Russell M. Nelson a ofresé e invitashon aki, “Si bo a baha for di e kaminda, … mi ta invitá bo … pa por fabor bini bèk. Kualkier sea bo preokupashon, kualkier sea bo desafionan, tin un lugá pa bo den esaki, ku ta Señor Su Iglesia. Abo i generashonnan ainda pa bin lo wòrdu bendishoná pa bo akshonnan awor di regresá riba e kaminda di kombenio.17
Nos sanashon spiritual ta rekerí nos pa someté nos mes na e kondishon ku nos Salbador a stipulá. Nos no mester tarda! Nos mester aktuá awe! Aktua awor pa asina e paralisis spiritual no prevení bo progreso eterno. Miéntras ku mi ta papiando si bo a sinti e nesesidat pa pidi pordon na un hende ku bo a hasi malu ku n’e, mi ta invita bo pa aktuá. Bisa nan loke ku bo a hasi. Pidi pa nan pordon. Si bo a kometé un piká ku ta impaktá bo dignidat di tèmpel, mi ta invitá bo pa papia ku bo obispu — awe. No tarda.
Mi rumannan, Dios ta nos Tata Selestial amoroso. El a duna tur e poder i konosementu na Su Yu stimá JesuCrsitu. Dor di Dje, hinter e genero humano riba un dia lo wòrdu saná di tur enfermedat físiko pa semper. Dor di e Ekspiashon di JesuCristu,si nos skohe pa arepentí i bira nos kurason na nos Salbador, E lo sana nos spiritualmente. E sanashon por kumnsá inmediatamente. E desishon ta di nos. Nos ke wòrdu saná?
Mi ta testifiká ku JesuCristu a paga e preis pa asina nos por wòrdu saná. Pero nos mester skohé pa tuma e remedi aki di sanashon ku e ta ofresé. Tum’é awe. Den e nòmber di JesuCrsitu amèn.