Purba, i Purba, i Purba
E Salbador ta poniendo Su nòmber den bo kurason. I bo ta sinti e amor puru di Cristu pa otro i pa bo mes.
Mi rumannan stimá, Mi ta gradesido pa ku e oportunidat di por papia ku boso. E konferensia tabata edifikante i stimulante pa mi. E kanto musikal i e palabranan papiá a wòrdu hiba pa medio di e Spiritu Santu. Mi ta resá pa lokual mi bisa lo komuniká den e mesun Spiritu.
Hopi aña pasá, mi tabata promé konsehero di un presidensia di distrikto den oriente di Estádos Unídos. Mas ku un bia, ora nos ta kore bai nos rama chikitu, e ta bisa mi, “Hal, ken ku nos topa, trata nan manera ku nan ta den problema grandi, i lo bo tin rason mas ku un biaha.” No solamente e ta tin rason, pero mi a siña a traves di añanan ku e tabata muchu abou den su kalkulashon. Awe, mi ta deseá pa enkurashá bo den e problemanan ku bo ta enfrentá.
Nos bida mortal ta diseñá dor di un Dios amoroso pa ta un tèst i un fuente di kresementu pa kada unu di nos. Bo ta kòrda e palabranan di Dios pa ku Su yunan na e Kreashon di mundu: “I nos lo prueba nan den esaki, pa wak ku nan lo hasi tur lokual Señor nan Dios lo manda nan.”1
For di prinsipio, e tèstnan no tabata fásil. Nos ta enfrentá desafionan dor di tin kurpa mortal. Nos tur ta biba den un mundu kaminda Satanas tin guera kontra bèrdat i kontra nos goso personal ku ta birando mas intenso. E mundu i bo bida por ta mustra manera ta kresiendo den konmoshon.
Mi siguransa ta esaki: e Dios amoroso ku a permití e tèstnan aki pa bo tambe a diseñá un kaminda sigur pa pasa dor di dje. Tata Selestial a stima e mundu asina tantu ku Ela manda Su Yu Stima pa yuda nos.2 Su Yu, JesuCristu, a duna Su bida pa nos. JesuCristu a hiba den Getsémani i riba e krus e karga di nos tur su pikanan. el a eksperensia tur nos tristesanan, i dòló, i e efektonan di nos pikanan pa asina E por konsolá i fortalesé nos denter di tur e tèstnan di bida.3
Bo ta kòrda ku Señor a bisa Su sirbidónan:
“E Tata ku Ami ta unu. Ami ta den e Tata i e Tata ta den mi; a medida ku bo risibí mi, lo bo ta den mi i Ami den bo.
“Por lo tantu, Mi ta meimei di boso, i mi ta e bon pastor, i e piedra di Israel. Esun ku ta edifiká riba e piedra aki lo no kai nunka.”4
Nos Profeta, Russell M. Nelson, tambe a duna e mesun garantìa. Ademas, el a deskribié di manera ku nos por edifiká riba e piedra i poné e nòmber Señor den nos kurason pa guìa nos dor di nos difikultatnan.
E la bisa: “Boso ku por ta deskurashá na e momentu aki, kòrda, bida no ta fásil. Difikultatnan mester wòrdu soportá i tristesa lo dura riba e kaminda. Si bo rekordá ku ‘pa Dios nada no ta imposibel’ (Lukas 1:37), sa ku E ta bo Tata. Bo ta un yu hòmber òf muher kreá den Su imágen, a traves di bo derechi pa medio di ta digno pa risibí revelashon pa yuda bo den bo esfuersonan hustu. Bo por tuma e santu nòmber di Señor riba bo. Bo por kualifiká pa papia den e nòmber sagrado di Dios (wakD&C 1:20).”5
Presidente Nelson su palabranan ta kòrda nos di e promesa ku ta den e orashon sakramental, un promesa ku nos Tata Selestial ta kumpliendo si nos kumpli ku lokual nos ta primintí.
Skucha e palabranan aki: “O Dios, e Tata Eterno, nos ta pidi bo den e nòmber di bo Yu, JesuCristu, pa bendishoná i santifiká e pan aki pa e almanan di tur esnan ku ta partisipá di dje; pa nan por kome den memoria di e kurpa di bo Yu, i testifiká na abo, O Dios, e Tata Eterno, ku nan ta dispuesto pa tuma riba nan e nòmber di bo Yu, i semper kòrd’é, i warda su mandamentu nan ku el a duna nan, pa nan por tin su Spiritu semper huntu ku nan. Amèn.”6
Ki ora ku nos bisa amèn ora ku e orashon ei wòrdu ofresé na nos bienestar, nos ta prometé ku ora nos partisipá di e pan ku nos ta dispuesto pa tuma riba nos e santu nòmber di JesuCristu, i semper Kòrd’é, i warda Su mandamentu nan. Na su turno, e ta primintí nos ku nos lo tin Su Spiritu semper huntu ku nos. Pa motibu di e promesa aki, e Salbador ta e piedra ku nos por para firme i sin miedu den tur mal tempu ku nos ta enfrentá.
Den mi konsiderashon den palabranan di kombenio i su korespondiente bendishonnan prometé, mi a puntra mi mes ta kiko ta nifiká pa tuma riba nos e nòmber di JesuCristu.
Presidente Dallin H. Oaks a splika: “e ta signifikante ku ora nos partisipá di e santa sena nos no ta testifiká ku nos ta tuma riba nos e nòmber di JesuCristu. Nos ta testifiká ku nos ta dispuesto pa hasié. (wakD&C 20:77.) Echo ta ku nos ta testifiká simplemente ku nos ta dispuesto suponiendo ku algu tin ku pasa promé ku nos aktualmente tuma riba nos ta e esensia di mas importante.”7
E deklarashon ku nos ta “dispuesto pa tuma riba [nos]” Su nòmber ta bisa nos ku miéntras nos a tuma su nòmber pa promé bia ora nos a boutisá, tuma Su nòmber no ta kaba ku boutismo. Nos mester traha kontinuamente pa tuma Su nòmber durante nos bida, inkluyendo ora nos ta renobá kombenionan na e mesa sakramental i hasi kombenionan den tèmpelnan sagrado di Señor.
Dos punto krusial pa kada un di nos lo ta “Kiko mi mester hasi pa tuma Su nòmber riba mi?” i “Kon lo mi sa ku mi ta progresando?”
E deklarashon di e Presidente Nelson ta sugirí un kontesta útil. el a bisa ku nos por tuma e nòmber di e Salbador riba nos i ku nos por papia P’e. Ora nos ta papia P’e, nos ta sirbi E. “Pasombra kon un hòmber por konosé e Señor kende e no a sirbi, i kende ta un hende straño p’e, i ta leu for di e pensamentu i intenshonnan di su kurason?”8
Papia di dje ta rekerí un orashon ku fe. E ta tuma un orashon ferviente na Tata Selestial pa siña kua palabra nos por bisa pa yuda e Salbador den Su obra. Nos mester por kualifiká pa e promesa: “Ya sea pa mi propio vòs o pa vòs di mi siervonan, e ta mesun kos.”9
Sin embargo, e ta mas ku papia P’e pa tuma Su nòmber riba nos. Tin sentimentunan den nos kurason ku mester por kualifiká nos komo su siervonan.
E profeta Mormon ta deskribí e sentimentunan ku ta kualifiká nos i permití nos pa tuma Su nòmber riba nos. E sentimentunan aki inkluyendo fe, speransa, i karidat, ku ta e amor puru di Cristu.
Mormon ta splika:
“Pasó pa motibu di boso humildat mi ta husga ku boso tin fe den Cristu; pasombra si boso no tin fe den dje e ora ei boso no ta meresé pa wòrdu kontá entre e pueblo di su iglesia.
“I atrobe, mi rumannan stimá, lo mi ke papia ku boso tokante speransa. Kon por ta ku boso ta yega na fe, a menos ku boso tin speransa?
“I pakiko boso lo spera? Ata mi ta bisa boso ku boso lo tin speransa dor di e ekspiashon di Cristu i e poder di su resurekshon pa wòrdu lantá na bida eterno, i esaki pa motibu di boso fe den dje segun e promesa.
“Asina anto, si un hende tin fe e mester tin speransa; Pasó sin fe no por tin speransa.
“I atrobe, wak mi ta bisa boso ku e no por tin fe i speransa, a menos ku e ta mansu, i humilde di kurason.
“Si ta asina, su fe i speransa ta en vano, Pasó ningun ta akseptabel dilanti Dios, eksepto esnan mansu i humilde di kurason; I si un hende ta mansu i humilde di kurason, i pa e poder di Spiritu Santu ta konfesá ku Jesus ta e Cristu, e mester tin karidat; Pasó si e no tin karidat e no ta nada; di manera ku e mester tin karidat.”
Despues di deskribí karidat, Mormon ta sigui bisa:
“Pero karidat ta e amor puru di Cristu, i e ta dura pa semper; i esun ku wòrdu hañá kuné den e delaster dìa, lo bai bon kuné.
“P’esei anto, mi rumannan stimá, pidi e Tata ku henter e energía di kurason, pa boso por ta yen di e amor aki, ku e ta duna esnan ku ta seguidornan bèrdadero di su Yu JesuCristu; pa boso por bira yunan di Dios; pa ora e paresé, nos ta manera dje, Pasó nos lo miré manera e ta; pa nos por tin e speransa aki; pa nos wòrdu purifiká asta manera e ta puru. Amèn.”10
Mi testimonio ta ku e Salbador ta pone Su nòmber den nos kurason. Pa hopi di boso, bo fe den Dje ta kresiendo. Bo ta sintiendo mas speransa i optimismo. I bo ta sintiendo e amor puru di Cristu pa otronan i bo mes.
Mi ta mir’é den mishoneronan sirbiendo rondó di henter mundu. Mi ta wak miembronan ku ta papia ku nan amigunan i miembro di famia tokante E Iglesia di JesuCristu di e Santunan di e Delaster Dianan. Hòmber, muher, hende hóben, i asta muchanan ta sirbiendo pa medio di e amor pa ku e Salbador i pa ku nan próhimo.
Na e promé reportahe di desasternan den henter mundu, miembronan ta traha plan pa bai reskatá, tin bia over di oséanonan, sin ku nan wòrdu puntra pa yuda. Tin bia nan ta haña ku e ta difísil pa warda te ora e zona destruí por risibí nan.
Mi ta realisá ku algun di boso ku ta skuchando awe lo sinti ku nan fe i speransa ta wòrdu dominá dor di boso problemanan. I bo por ta anhelá pa sinti amor.
Rumannan, Señor tin oportunidatnan serka di bo pa sinti i kompartí Su amor. Bo por hasi orashon ku konfiansa pa Señor guìa bo pa stima un hende pa E. E lo kontesta orashonnan di e mansu voluntario manera abo. Bo lo sinti e amor di Dios pa bo i e persona ku bo ta sirbi P’e. Ora ku bo ta yuda yunan di Dios ku nan problemanan, bo propio problemanan lo ta parse mas leve. Bo fe i bo speransa lo wòrdu fortifiká.
Mi ta testigu di e bèrdat ei. Durante di un bida henter, mi kasá a papia pa Señor i a sirbi hende P’e. Un di nos obispunan a bisa mi un bia, “Mi ta impreshoná. Tur ora ku mi tende di un persona den estaka kende tin problema, mi ta kuri bai yuda. Pero na momentu ku ami yega, ta mané si fuera ku tur orá bo kasá tabata ei nan kaba.” Esei a sosodé na tur lugá kaminda ku nos a biba pa 56 aña.
Awor e por papia algun palabra so pa dia. E ta wòrdu bishita dor di hendenan ku el a stimá pa Señor. Tur anochi i mainta mi ta kanta himnonan kuné i nos ta hasi orashon. Mi mester ta e vòs den e orashonnan. Tin ora mi por mir’e artikulá e palabranan di e himnonan. E ta preferá e himnonnan di mucha. E sintimentu ku ta parse mas ku e ta gusta ta resumí den e kansion “I’m Ttying to Be like Jesus.”11
E otro dia, despues di a kanta e palabranan di e koro: “Stimá un na otro manera Jesus a stimá nos. Purba di mustra amabilidat den tur lokual bo ta hasi,” e ta bisa suavemente, pero evidente, “Purba, i Purba, i Purba.” Mi ta pensa ku e lo enkontrá, ora e Mir’é, ku e Salbador a buta Su nòmber den su kurason i ku el a bira mesun kos Kuné. E ta kargando e awor den su problemanan, manera E lo karga bo dor di bo nan.
Mi ta testifiká na bo ku e Salbador sa i stimá bo. E sa bo nòmber manera ku abo sa di Dje. E konosé bo problemanan. El a eksperienshá nan. Pa medio di sa ekspiashon, el a vense e mundu. Pasombra bo ta dispuesto pa tumá su nòmber riba bo, lo bo aliviá e karganan ínkontabel di otronan. I ku tempu lo bo haña sa ku bo konosé e Salbador mihó i ku lo bo Stim’é mas. Su nòmber lo ta den bo kurason i di feks den bo memoria. Mi ta testiguá, ku gratitut pa Su bondat amoroso pa ku mi, pa ku mi ser kerí nan , i pa abo, den e nòmber di JesuCristu, amèn.