E Ministerio di Rekonsiliashon
Mi ta testifikádi e trankilidat di alma ku e rekonsiliashon ku Dios i ku otronan ta trese si nos ta mansu i balente pa buské.
Aprel último, ora Presidente Russel M. Nelson a introdusí e konsepto di ministrá el a enfatisá ku e ta un manera pa warda e gran mandamentunan di stima Dios i stima otro.1 Nos komo ofisialnan di Iglesia, abiertamente a aploudí i felisitá boso na e reakshon tremendo ku boso a kuminsá al respekto.nos ta gradisi boso pa sigui nos profeta stimá den e obra maravioso aki i nos ta sugerí boso no warda riba hopi instrukshon mas. Djis bula den e pisina i landa. Bai na esnan ku mester ayudo. No wòrdu inmobilisá pensando si bo mester bai e “rugslag” òf landa manera “kachó”. Si nos sigui e prinsipionan básiko ku a wòrdu siñá, keda aliñá ku e yabinan di Saserdosio, i buska e Spiritu Santu pa guia nos, nos no por faya.
E mainta aki mi ke papia di un aspekto asina mas personal di ministrá ku no ta pa asignashon, ku no ta inbolbí un intrevista konforme kalendario, i ku no tin ku raportá na ningun lider, eksepto na shelu. Pèrmiti mi kompartí djis un ehèmpel simpel di e klase di minstrashon aki.
Grant Morrell Bowen tabata un kasá i tata ku tabata trahadó i deboto, i manera hopi ku a hasi nan bibá di e tera, tabatin un reseshon ekonómiko ora e kosecha di batata tabata pober. E i su kasá, Norma, a tuma otro trabou, i despues a muda pa otro suidat, i a kuminsá nan kresementu bèk na stabilidat ekonómiko. Sinembargo, den un aksidente desafortuná, Hermano Bowen a keda profundamente lastimá ora, den un entrevista di rekomendashon pa tèmpel, e obispu tabata un tiki skeptiko tokante Morrell su deklarashon ku e tabata un pagadó di diesmo íntegro.
Mi no sa kua di e dos hòmbernan aki tabatin e echonan mas eksakto, pero mi sa ku Hermana Bowen a sali for di e entrevista ku su rekomendashon renobá, kaminda Hermano Bowen a sali ku un rabia ku a hib’é for di Iglesia pa 15 aña.
Sin importá ken tabatin rason riba e diesmo, evidentemente tantu Morrell komo e obispu a lubidá e mandamentu di e Salbador di “yega na akuerdo ku bo atversario lihé”2 i Pablo su konseho pa “ no laga solo baha riba bo rabia.3 E echo ta nanno a rekonsiliá i e solo a baha riba Hermano Bowen su rabia pa dianan, despues simannan, i despues añanan, probando e punto di un di e romanonan antiguo di mas sabí, ku a bisa, “ Rabia, si e no wòrdu kontené ta hopi biaha mas [destruktivo] ku e inhustisia ku a provok’é.”4 Pero e milager di rekonsiliashon semper ta disponibel pa nos, i di amor pa su famia i e Iglesia ku e tabata sa ku ta bèrdat, Morrell Bowen a bin bèk kompletamente aktivo den Iglesia. Laga mi konta boso kòrtiku kon esei a sosodé.
Hermano Bowen su yu Brad ta un bon amigu di nos i un setenta di Area dediká sirbiendo na sùit Idaho. Brad tabatin 11 aña e tempu di e insidente aki, i pa 15 aña el a mira su tata su dedikashon religioso disminuí, un testigu di e teribel kosecha ku ta wòrdu kosechá kaminda rabia i malkomprendimentu a wòrdu zembrá. Algu mester wòrdu hasí. Asina ta ku ora e fakansi di Akshon di Grasia tabata yegando den 1977, Brad un studiante di Brigham Young University di 26 aña di edat; su kasá Valerie; i nan beibi Mic, forsá den nan outo vershon di studiante i, no opstante e mal wer, a kore bai na Billings, estado di Montana. Ni sikiera un aksidente den seru di sneu serka di West Yellowstone por a evitá pa e trio aki hasi nan kontakto ministrante ku hermano Bowen senior.
Na su yegada, Brad i su ruman Pam a puntra pa un momento privá ku nan tata. “Bo tabata un tata maravioso,” Brad a kuminsá ku algun emoshon, “i semper nos tabata sa kuantu bo ta stima nos. Pero algu ta robés, i esei ta pa hopi tempu. Pasó bo a wòrdu heridá un biaha, hinter e famia a keda heridá pa hopi aña. Nos ta kibrá i abo ta e úniko hende ku por drecha nos. Por fabor, por fabor, despues di tur e tempu aki, bo por haña den bo kurason pa pone e insidente desafortuná ku e obispu un banda i guia bo famia atrobe den e evangelio manera un biaha bo tabata hasi?”
Tabatin un silensio grandi. E ora ei Hermano Bowen a wak nan dos, su yunan, huesu di su huesu i karni di su karni5 i a bisa hopi poko poko, “Si, si lo mi hasi’é.”
Emoshoná, pero sorpresá di e kontesta, Brad Bowen i su famia a wak nan kasá i tata bai serka e obipu aktual den un spiritu di rekonsiliashon pa regla kos den su bida. Den un kontesta perfekto na su bishita balente i totalmente inesperá, e obispu, ku hopi biaha a ektendé e invitashon na Hermano Bowen pa bin bèk, a pasa su brasanan rònt di Morrell i a bras’é pa basta ratu basta largu.
Den apenas algun siman no ta tuma muchu tempu — Hermano Bowen tabata kompletamente aktivo den Iglesia i a hasi su mes digno pa regresá tèmpel. Despues el a aseptá e yamamentu pa presidí un rama chikitu di 25 persona ku tabata luchando i a yudé krese bira un kongregashon florisente ku un asistensia di mas ku 100. Tur esaki a tuma lugá kasi mitar siglo pasá, pero e konsekuensia di ruego ministrante di un yu hòmber i yu muhé na nan mes tata i ku e tata ei su boluntat a pordoná i sigui bai dilanti no opstante e imperfekshonnan di otronan a trese bendishonnan ku te ainda ta yegando — i lo sigui yega pa Semper — pa e famia Bowen.
Rumannan, Jesus a puntra nos pa nos “biba ku otro den amor”6 i “ku lo no tin disputa entre boso.”7 “Esun ku tin e spiritu di kontenshon no ta di mi,” El a atvertí e Nefitanan.8 En berdat, di gran manera, nos relashon ku Cristu lo wòrdu determina — òf por lo ménos afektá — pa nos relashon ku otro.
“Si bo.ta desea di bini na mi,” El a bisa, “i ta kòrda ku bo ruman tin algu kontra bo —
“Bai bo kaminda serka bo ruman i rekonsiliá promé ku [ne] i despues bini serka mi ku propósito sinsero di kurason, i i lo mi risibí bo.”9
Sigur kada un di nos por sita un gran kantidat di sikratisnan i dolornan bieu, i memorianan doloroso, ku te ainda ta molostiá e pas den un hende su kurason òf di famia òf di bisindario. Sea ku ta nos a kousá e doló ei òf ku ta esun ku a haña e doló, e heridanan ei mester wòrdu saná pa asina bida ta asina gratifikante manera Dios ke pa e ta, Meskos ku e kuminda den bo frishidèr ku bo ñetunan ta kontrolá pa bo, e heridanan bieu ei a pasa masha tempu nan fecha di vensementu. Por fabor no duna e espasio presioso den bo alma na esakinan mas. Manera Prospero a bisa Alonso ku tabata arepentí den The Tempest, “No karga nos rekuerdo di un doló ku ya a bai.”10
“Pordoná, i lo bo wòrdu pordoná,”11 Cristu a siña den e tempu di Testamènt Nobo. I den nos tempu: “Ami, Señor, lo pordoná esun ku ami ke, pero di boso ta rekerí pa pordoná tur hende.”12 Sinembargo,ta importante pa algun di boso ku ta biba den angustia berdadero pa nota loke E no a bisa, E no a bisa, “Bo no ta permití pa sinti doló di bèrdat òf tristesa real di e eksperensha debastador ku boso tabatin na man di un otro.” Tampoko e no a bisa, “Pa por pordoná kompletamente bo mester drenta bèk den un relashon tóksiko òf regresá na un sirkumstansia abusivo i destruktivo.” Pero no opstante asta e ofensanan di mas teribel ku por sosodé ku nos, nos por lanta riba e doló solamente ora nos pone nos pianan riba e kaminda di sanamentu berdadero. E kaminda ei ta esun di pordon kanando ku Jesus di Nazareth, ku ta yama kada un di nos, “Bini, i siguí Mi.”13
Den e tipo di invitashon asina pa ta Su disípulo i pa trata di hasi meskos ku El a hasi, Jesus ta puntra nos pa ta e instrumento di Su grasia --- pa ta embahador di Cristu den “e ministerio di rekonsiliashon,” manera Pablo a deskribé na e Korintionan.14 E Sanador di tur herida, E ku por drecha tur kos robés, ta puntra nos pa obra ku n’E den e tarea impreshonante di trese pas den un mundo ku no por hañ’é di niun otro manera.
Asina manera Phillips Brooks a skirbi:”Abo ta laga malentendimentu miserable sigui aña tras di aña ku e intenshon di regla esakinan riba un dia; abo ku ta warda peleanan miserable bibu pasó bo no por disidí ku ta awor ta e dia pa boso sakrifiká boso orguyo i [regla] nan; abo ku ta kana pasa hende ku mal humor riba kaya, sin papia ku nan pa un kos di kèns … ; abo ku ta laga… [un hende su] kurason tin dolor pa un palabra di apresio di simpatia ku abo ke duna. … .riba un dia. … bai inmediatamente i hasi e kos ku bo kisas nunka lo tin otro oportunidat pa hasi esei.15
Mi kerido rumannan, mi ta testifiká ku pordoná i bandoná ofensanan sea bieu òf nobo, ta sentral pa e grandesa di e Ekspiashon de JesuCristu. Mi ta testifiká ku al final e reparashon spiritual asina por bini solamente di nos Redentor. Esun ku ta pura pa yuda nos “ku e sanashon den su hala.”16 Nos ta gradisí E, i nos Tata Selestial ku a mand’É, pa renobashon i renasementu, un future liber di tristesa bieu i fayonan di pasado, no solamente ta posibel pero nan a wòrdu kumpra i paga p’e kaba pa un kosto insoportabel simbolisá pa e sanger di e Lamchi ku a deramé.
Ku e outoridat apostóliko ku e Salbador di e mundu a otorgá na mi, mi ta testifiká di e trankilidat di alma ku rekonsiliashon ku Dios i otro lo trese si nos ta mansu i sufisientemente balente pa logra esaki. “Stòp di bringa ku otro.” E Salbador a pidi.17 Si boso sa di un herida bieu, drecha esaki. Kuida di otro ku amor.
Mi kerido amigunan, den nos ministerio kompartí di rekonsiliashon mi ta pidi pa nos ta pasifikadornan — pa stima pas, pa buska pas, pa krea pas, pa atesorá pas. Mi ta hasi un yamada aki den nòmber di e Prinsipe di Pas, ku sa tur kos tokante di wòrdu heridá den kas di Su amigunan”18 pero ku ainda a haña forsa pa pordoná i lubida — i sana — i bira felis. Pa esei mi ta pidi, pa boso i ami, den e nòmber di JesuCristu, amèn.