Remarkenan di Apertura
Ta tempu pa un Iglesia sentrá riba e hogar, sostené pa loke ta tuma lugá den nos rama, bario i edifisionan di estaka.
Mi kerido rumannan, nos a warda ansiosamente pa reuní ku boso atrobe den e konferensia general aki di òktober di e Iglesia. Nos ta ekstendé nos bonbiní mas kaluroso na kada unu di boso. Nos ta profundamente gradisí pa boso orashon ku ta sostené. Nos ta sinti nan efekto. Danki!
Nos ta gradisí pa boso tremendo esfuerso pa sigui bai dilanti ku konseho duná na e konferensia general seis luna pasá. Presidentenan di estaka rònt mundu a buska revelashon nesesario pa reorganisá e quorum di èldernan. Hòmbernan di e quorumnan ei huntu ku hermananan dediká di Sosiedat di Sokoro ta trahando diligentemente pa ministrá nos rumannan di un manera mas haltu i sagrado. Nos ta insprirá pa boso bondat i esfuersonan ekstraordinario pa trese e Salbador su amor na boso famia, bisiña, i amigunan i pa ministrá nan manera E lo a hasi.
For di e konferensia di aprel, Hermana Nelson i ami a reuní ku miembronan di kuater kontinente i riba islanan di e laman. Di Yerusalen te Harare, di Winnipeg te Bangkok, nos a eksperensiá boso gran fe i e fortalesa di boso testimonio.
Nos ta hopi kontentu ku e kantidat di nos hubentut ku a uni na Señor Su batayon di hubentut pa yuda rekohé Israel esparsí.1 Nos ta gradisí boso! I segun boso ta kontinuá pa sigui mi invitashon ofresé den e deboshonal mundial pa hubentut, boso ta pone un norma pa e sobrá di nos pa sigui. I esta un diferensia boso hubentut ta hasiendo!
Den e añanan resiente, nos den e konsehonan ku ta presidí di Iglesia a lucha ku e pregunta fundamental: kon nos por hiba e evangelio den su puresa simpel i e ordenansanan ku nan efikasia eterno na tur Dios su yunan?
Komo Santunan di e Delaster dianan, nos a kustumbrá di pensa di “iglesia” komo algu ku ta sosodé den nos kapianan, sostené pa loke ta sosodé na kas. Nos mester di un ahuste di e patronchi aki. Ta tempu pa un Iglesia sentrá riba e hogar, sostené pa loke ta sosodé den nos rama, bario, i edifisionan di estaka.
Segun e Iglesia ta keda ekspandé rònt nundu, hopi miembro ta biba kaminda nos no tin kapia—i ku lo no tin den e futuro serkano. Mi ta kòrda un famia ku, dor di e sirkunstansianan ei, mester a reuní den nan kas. Mi a puntra e mama kon e gusta pa bai Iglesia den su mes kas. El a kontestá, “mi gusta esei! Mi kasá ta usa mihó lenguahe na kas awor aki, sabiendo ku e lo bendishoná e santa sena aki kada djadumingu.”
E ophetivo di largu tempu di e Iglesia ta pa asistí tur miembro pa oumentá nan fe den nos Señor JesuCristu i den Su Ekspiashon, pa asistí nan pa sera i warda nan konbenionan ku Dios, i pa fortalesé i seya nan famianan. Den e mundu kompliká di awendia aki, esaki no ta fasil. E atversario ta oumentá su atake riba fe i riba nos i nos famianan di forma eksponensial. Pa sobrebibí spiritualmente, nos mester kontra strategianan i plannan proaktivo. Di akuerdo ku esei, awor nos ke inisiá ahustenan organisatorio ku lo fortalesé ainda mas nos miembronan i nan famianan.
Pa hopi aña, lidernan di Iglesia a bin ta traha riba curriculum integrá pa fortalesé famianan i personanan dor di un plan sentrá riba e hogar i sostené pa e Iglesia pa siña doktrina, fortalesé fe, i fomentá un mayor adorashon personal. Nos efuersonan den e añanan resien pa hasi e dia di Señor mas sagrado—pa hasi’é un delisia i un señal na Dios di nos amor p’E lo aliñia dor di e ahustenan ku nos lo introdusí.
E mainta aki nos lo anunsiá un balanse i konkshon nobo entre instrukshon di evangelio den e hogar i den e Igleisa. Nos tur ta responsabel pa nos kresementu spiritual individual. I skritura ta hasié kla ku mayornan tin e responsabilidat primordial pa siña e doktrina na nan yunan.2Ta e responsabilidat di e Iglesia pa asistí kada miembro den e meta divinamente definí di oumentá su konosementu di evangelio.
Elder Quentin L. Cook awor lo splika e ahustenan importante aki. Tur miembro di e Konseho di e Promé Presidensia i e Quorum di e Diesdos Apòstelnan ta uní den para tras di e mensahe aki. Nos ta rekonosé ku gratitut e inspirashon di Señor ku a influensiá e desaroyo di e plannan i proseduranan ku Èlder Cook lo presentá.
Mi kerido rumannan, mi sa ku Dios ta bibu! Jesus ta e Cristu! Esaki ta Su Iglesia ku E ta dirigí dor di profesia i revelashon na su humilde sirbidónan. Asina mi ta testifiká den e nòmber di JesuCristu, amèn.