E Nòmber Korekto di e Iglesia

Pa e Presidente Russell M. Nelson

JesuCristu ta manda nos pa yama e Iglesia na Su nòmber pasó esaki ta su Iglesia, yená ku Su poder.

Mi kerido rumannan, riba e dia di reposo bunita aki nos ta rehosihá den nos hopi bendishonnan di Señor. Nos ta gradisí pa boso testimonionan di e evangelio restourá di JesuCristu, pa e sakrifisio ku boso a hasi pa biba òf regresá riba e kaminda di kombenio, i pa boso servisio konsagrá den Su Iglesia.

Awe mi ta sinti e nesesidat pa kompartí ku boso un asuntu di gran importansia. Algun siman pasá, mi a saka un deklarashon di un korekshon riba e kurso pa e nòmber di e Iglesia. Mi a hasi esaki pasó Señor a impreshoná mi mente e importansia di e nòmber ku E a dekretá pa Su Iglesia, kual ta E Iglesia di JesuCristu di e Santunan di e Delaster dianan.

Manera boso por a spera, kontestanan riba e deklarashon i na guia di estilo revisá tabata miksto. Hopi miembro inmediatamente a kambia e nòmber di e Iglesia riba nan blog i páginanan riba ret sosial. Otronan a puntra nan mes dikon, ku tur loke ta pasando na mundu, si tabata nesesario pa enfatisá algu asina “sin konsekuensia.” I algun a bisa ku e lo no por wòrdu hasí, dikon mester purb’é? Laga mi splika dikon nos ta preokupá asina tantu riba e asuntu aki. Pero promé laga mi bisa loke e esfuerso aki no ta:

• Eno ta un kambio di nòmber.

• E no ta promové un marka nobo.

• E no ta algu kosmétiko.

• E no ta un kapricho.

• I e no ta sin konsekuensia.

En kambio, e ta un korekshon. E ta un mandamentu di Señor. José Smith no a nombra e Iglesia restourá dor di dje; tampoko Mormon a hasi esaki. Ta e Salbador Mes a bisa, “Pasó asina Mi iglesia lo wòrdu yamá den e delaster dianan, esta E Iglesia di JesuCristu di e Santunan di e Delaster dianan.”

Inkluso antes, den aña 34 despues di Cristu, nos Señor resusitá a duna un instrukshon similar na miembronan di Su Iglesia ora El a bishitá nan na kontinente Merikano. E tempu ei El a bisa:

“Boso lo yama e iglesia na mi nòmber. …

“I kon e por ta mi iglesia, a ménos ku e tin mi nòmber? Pasó si un iglesia wòrdu yamá ku nòmber di Moises, anto e lo ta Moises su iglesia; si e wòrdu yama ku nòmber di un hòmber, e lo ta iglesia di un hòmber; pero si e wòrdu yamá na mi nòmber e ora ei e lo ta mi iglesia.”

Kermen, e nòmber di e Iglesia no ta negosiabel. Ora e Salbador di un manera kla deklará kiko e nòmber di e Iglesia mester ta i asta kuminsá Su deklarashon ku, “Asina Mi Iglesia lo wòrdu yamá,” E ta serio. I si nos pèrmití apodo wòrdu usá i adoptá òf asta nos mes sponser tipo di apodo asina, E ta wòrdu ofend’é.

Kiko tin den un nòmber òf den e kaso aki, un apodo? Ora ta trata di apodo di e Iglesia, manera e “Iglesia SUD,” e “Iglesia Mormon.” òf e Iglesia di e Santunan di e Delaster Dianan, e kos di mas importante den e nòmbernan ei ta e ousensia di e Salbador su nòmber. Pa kita e nòmber di Señor for di Señor su Iglesia ta un viktoria mayor pa Satanas. Ora nos deskartá e nòmber di e Salbador, suptilmente nos ta despresiá tur loke JesuCristu a hasi pa nos — hasta Su Ekspiashon.

Konsiderá esaki for di Su perspektiva: Den premortalidat, E tabata Yehova, Dios di e Testamènt Bieu. Bou di direkshon di Su Tata, E tabata e Kreador di e mundu aki i otro mundunan. El a skohe di someté Su mes na e boluntat di e Tata i hasi algu pa tur Dios Su yunan ku niun otro hende por a hasi! Kondensendé pa bini mundu komo e Unigénito nos Salbador a tuma riba Dje kada doló, kada piká, i tur e angustia i sufrimentu hamas eksperenshá pa boso i ami i pa tur ku hamas a yega di òf lo biba. Bou di e peso di e karga insoportabel, El a sangra di kada poro. Tur e sufrimentu aki tabata intensifiká ora El a wòrdu kruelmente krusifiká riba e krus di Kalvario.

Dor di e eksperensianan insoportabel aki i Su Resurekshon después — Su infinito Ekspiashon — El a konsedé inmortalidat na tur i a reskatá kada un di nos for di e efektonan di piká ku e kondishon ku nos arepentí.

Despues di e Salbador Su Resurekshon i e morto di Su Apòstelnan, e mundu a hundi den siglonan di skuridat. Despues den e aña 1820, Dios e Tata i Su Yu, JesuCristu, a aparesé na e Profeta José Smith pa inisiá e Restourashon di Señor su Iglesia.

Despues di tur loke El a pasa aden---despues di tur kos ku El a hasi pa e genero humano mi ta realisá ku duele profundo ku nos ta aseptá inboluntariamente ku Señor Su Iglesia restourá ta wòrdu yamá ku otro nòmbernan, kaminda kada un ta skrap e nòmber sagrado di JesuCristu!

Kada djadumingu ora nos ta partisipá dignamente di e Santa Sena, nos ta renobá nos promesa sagrado na nos Tata Selestial ku nos ta dispuesto pa tuma riba nos e nòmber di Su Yu, JesuCristu. Nos ta primintí pa sigui E, arepentí, warda Su mandamentunan isemper kòrd’E.

Ora nos omití Su nòmber for di Su Iglesia, nos ta retirando E di un manera inatvertí, komo e enfoke sentral di nos bida?

Tumando e nòmber di Señor riba nos ta inkluí deklará i testifiká na otronan — dor di nos akshonnan i nos palabranan — ku Jesus ta e Cristu. Nos a yega di tin tantu miedu pa ofendé un persona ku a yama nos “Mormon” te ku nos a faya di defendé e Salbador mes, pa defendé E hasta den e nòmber kon ta yama Su Iglesia?

Si nos komo un pueblo i komo persona individual ke tin akseso na e poder di e ekspiashon di JesuCristu--- pa limpia i sana nos, pa fortalesé i magnifiká nos, i finalmente eksaltá nos—nos mester kla rekonosé E klaramente komo e fuente di e poder ei. Nos por kuminsá na yama e Iglesia na e nòmber ku E a dekretá.

Pa hopi di e mundu, Señor su Iglesia ta disfrasá komo e “Iglesia Mormon”. Pero nos komo miembro di Señor su Iglesia sa ken ta na kabes. JesuCristu Mes. Desafortunadamente, hopi ku ta tende e terminilogia Mormon por pensa ku nos ta adorá Mormon. No ta asina! Nos ta honra i respetá e gran profeta antiguo merikano. Pero nos no ta disípulonan di Mormon, Nos ta Señor su disípulonan.

Den kuminsamentu di e Iglesia restourá, terminologianan maneraIglesia Mormon i Mormonnan tabata hopi biaha usá komo apodo —komo terminologianan kruel, terminologianan abusivo — disigná pa kita Dios Su man den e restourashon di E Iglesia di JesuCristu den e Delaster Dianan.

Rumannan, tin hopi argumentonan mundano kontra restourá e nòmber korekto di e Iglesia. Pa motibu di un mundu digital den kua nos ta biba i ku optimalisashon di aplikashon pa buska ku ta yuda nos tur haña informashon ku nos mester kasi instantaniamente — inkluyendo informashon di Señor su Iglesia — kritikonan ta bisa un korekshon na e punto aki no ta sabio. Otronan ta sinti ku pasó nos ta konosí asina amplio komo “Mormonnan” i komo e “Iglesia di Mormon,” nos mester trata di saka e mihó for di dje.

Si esaki tabata un diskushon tokante promové un organisashon ku hende a traha e argumentonan ei por a prevalesé. Pero den e asuntu kriusial aki, nos ta wak E di ken e Iglesia aki ta i ta rekonosé ku Señor su manera no ta, i nunka lo ta e manera di hende. Si nos lo tin pasenshi i hasi nos parti bon, Señor lo guia nos dor di e tarea importante aki. Despues di tur kos, nos sa ku Señor ta yuda esnan ku ta buska pa hasi Su boluntat, meskos ku El a yuda Nefi kumpli ku e tarea di konstruí un barku pa krusa e laman.

Nos lo ke ta amabel i ku pasenshi den nos esfuersonan pa koregí e fayonan aki. Media responsabel lo ta simpatiko pa respondé na nos petishon.

Den un konferensia general anterior, Elder Benjamin De Hoyos a papia di un suseso asina. El a bisa:

“Algun aña pasá miéntras mi tabata sirbiendo den e ofisina di asuntos públiko di Iglesia na Mexio, [un kompañero i ami] a wòrdu invitá pa partisipá den un talkshow di radio. … [Un di e direktornan di programa] a puntra [nos], “Dikon e Iglesia tin un nòmber asina largu? …’

“Mi kompañero i ami a smail pa e pregunta asina magnífiko i despues a sigui pa splika ku e nòmber di e Iglesia no a wòrdu skohé pa hende. El a wòrdu duná dor di e Salbador. … E direktor di e programa inmediatamente i ku rèspèt a kontestá, ‘Nos e ora ei lo ripitié ku gran plaser.”

E reporte ta proveé un patronchi. Un pa un, nos mihó esfuersonan komo persona lo ta rekerí pa por koregí erornan ku a sluip drenta den kurso di e añanan. E resto di mundu lo por ta of lo no sigui nos guia pa yama nos na e nòmber korekto. Pero ta insinsero pa nos ta frustrá si mayoria di e mundu ta yama e Iglesia i su miembronan ku e nòmber robés si nos ta hasi meskos.

Nos guia di estilo revisá por yuda. E ta deklará, “Den e promé referensia, e nòmber kompletu di e Iglesia ta preferí: ‘E Iglesia di JesuCristu di e Santunan di e Delaster dianan.’ Ora un referensia kòrtiku [di dos] ta nesesario, e terminologia ‘e Iglesia’ òf e Iglesia di JesuCristu’ ta wòrdu kurashá pa usa. E ‘Iglesia restourá di JesuCristu’ tambe ta korekto i ta wòrdu kurashá pa usa.”

Si un hende lo puntra, “Bo ta un Mormon?” bo por kontestá, “Si bo ta puntra ku mi ta un miembro di e Iglesia di JesuCristu di e Santunan di e Delaster dianan, si mi ta!”

Si un hende puntra, “Bo ta un Santu di Delaster dia?” bo por kontestá Si mi ta. Mi ta kere den JesuCristu i ta un miembro di Su Iglesia restourá.”

Mi kerido rumannan, mi ta primintí boso ku nos lo hasi nos esfuerso pa restourá e nòmber korekto di Señor su Iglesia. Esun di ken e Iglesia aki ta, lo deramá Su poder i bendishon riba e kabesnan di e Santunan di e Delaster Dianan, manera nunka nos a mira. Nos lo tin e konosementu i poder di Dios pa yuda nos pa tuma e bendishonnan di e evangelio restourá di JesuCristu pa kada nashon, tribu, lenga i hende i pa prepará e mundu pa eDi Dos Binida di Señor.

E ora ei, kiko tin den un nòmber? Ora ta trata di e nòmber di Señor su Iglesia, e kontesta ta, “Tur kos!” JesuCristu ta manda nos pa yanma e Iglesia na Su nòmber pasó esaki ta su Iglesia, yená ku Su poder.

Mi sa ku Dios ta biba. Jesus ta e Cristu. E ta dirigí Su Iglesia awendia. Mi ta testifiká den e sagrado nòmber di JesuCristu, amèn.

Notanan

1. Señor a duna mi un impreshon den mi mente riba e importansia di e nòmber ku El a revelá pa Su Iglesia, esta, E Iglesia di Jesucristu di e Santunan di e Delaster dianan. Nos tin trabou nos dilanti pa pone nos den harmonia ku Su boluntat. Den e delaster simannan, vários lider i departamentu de Iglesia a kuminsá ku e pasonan nesesario pa hasié. Informashon adishonal tokante e asuntu importante aki lo ta disponibel den e siguiente lunanan(Russell M. Nelson, in “The Name of the Church” [official statement, Aug. 16, 2018], mormonnewsroom.org).

2. Tin Presidentenan anterior di Iglesia ku a hasi petishonnan similar. Por ehèmpel, President George Albert Smith a bisa: “No desepshoná Señor, dor di yama e Iglesia aki e Iglesia mormon. E no a yam’é e Iglesia mormon” (in Conference Report, Apr. 1948, 160).

3. Wak “Style Guide—The Name of the Church,” mormonnewsroom.org.

4. Doctrina y Convenios 115:4.

5. 3 Nefi 27:7–8.

6. WakMoises 1:33.

7. Wak Doctrina y Convenios 19:18.

8. WakMoroni 4:3;Doctrina y Convenios 20:37, 77.

9. Mormon tabata un di e kuater eskritornan prinsipal di e Buki di Mormon, e otronan tabata Nefi, Jakob i Moroni. Nan tur tabata testigu okular di Señor, meskos ku su traduktor inspirá, e profeta José Smith.

10. Hasta e palabraMormonitestabata un di e tèrminonan di of mofa ku tabata wòrdu usá(wakHistory of the Church, 2:62–63, 126).

11. Otro deskripshonnan ta parse di a pasa den tempu di e Tèstamènt Nobo. Durante di e huisio di Apòstel Pablo dilanti Felix, a bisa ku Pablo ta un lider prinsipal di e sekta di e nazarenonan (Acts 24:5). Tokante e uso di e frase “di e nazarenonan” un komentadó a skibi: “Esaki tabata e nòmber ku generalmente tabata duna e Kristiannan komo manera di despresio. Nan tabata wòrdu yamá asina pasobra Jesus tabata di Nazaret”(Albert Barnes,Notes, Explanatory and Practical, on the Acts of the Apostles [1937], 313).

    Di mes manera, un otro komentarista a afirmá: “Manera nos Señor a wòrdu yamá ku menospresio ‘E nazareno’(Matt. xxvi. 71), e hudiunan a denominá su disípulonan ‘nazarenonan’. Nan lo no a atmití ku nan tabata kristian,i.e. ke men, disípulonan di e Mesias”(The Pulpit Commentary: The Acts of the Apostles, ed. H. D. M. Spence and Joseph S. Exell [1884], 2:231).

    Den un liña relashoná, Elder Neal A. Maxwell opservá: “Durante e historia di skritura, nos ta mira esfuersonan ku ta bini kada biaha pa menospresiá profetanan pa asina deshasí di nan---pa markanan negativamente pa por menospresiá nan. Sinembargo, generalmente, nan ta wòrdu simplemente ignorá pa nan kontemporáneonan i pa historia sekular. Despues di tur kos, Cristiannan meramente tabata wòrdu yamá e sekta di e Nazoreo’ (Hechos 24:5.)” (“Out of Obscurity,”Ensign, Nov. 1984, 10).

12. Wak1 Nefi 18:1–2.

13. Benjamín De Hoyos, “Called to Be Saints,” Liahona, Mei 2011, 106.

14. Ounke nos no tin kòntròl riba lokual otronan por yama nos, nos ta den kompletu kontròl riba kon nos ta referí na nos mes. Kon nos por spera ku otronan ta honra e nòmber korekto di e Iglesia si nos komo miembro ta faya di hasi esaki?

15. “Style Guide—The Name of the Church,” mormonnewsroom.org.

16. E tèrminologiasantu ta hopi usá den e Santu Beibel. Por ehèmpel den Pablo su Epístola na e Efesionan, e ta usa e palabrasantu por l ménos un bia den kada kapítulo. Un santu ta un persona ku ta kere den Jesucristu i ta hasi esfuerso pa siguié.

17. Wak Doctrina y Convenios 121:33.