Koasoandi Kapw ohng Kehlpen me Pwulopwul Kan

Sang Elder Quentin L. Cook

Sang Pwihn en Wahnpoaron Ehk-riemeno

Tohto mwahnakapw oh peinakapw pahn kapwaiada pwukoah pwukat oh kekeid pohn ahl en inou ni arail sewesehda neitail me pwulopwul kan.

Kalahngan en komwi, Presiden Nelson, pwehki kaudiahl kaperen me pid sounkadehde kan en pepdais oh kaweid kan me komw pekiher sen ehukihda pwehn sewese kakehlailih me pwulopwul kan oh kadaiala arail kak ohng me pid soahng sarawi kan.

Mwohn ei pahn ehukihda wekdekla pwukat, se wia aht kaping mwuledek ong towehkan nin duwen arail ngoangi kapwaiada doadoahk kan me pid Kopwurpwurdohn rohngamwahuo. Ihme Presiden Nelson kaweidkiher sounpar nekiero, kumwail alehier sakamwail pwaidamin kan!¹

Kumwail kin perenki sukuhlki Kohdo, Idawehnie ni imwamwail kan.² Kumwail pil aledahr wekdeklahkan nan mwomwohdiso. Tohn pwihn en elder kan oh Pwihn en Sawas en Lih kin miniminpene wia doadoahk en komour.³

Aht kaping kalahngan mwuledek.⁴ Se kaping kalahnganki mehlel neitail me pwulopwul kan arail wie kekehlailte nan arail pwoson.

Neitail me pwulopwul kan wie momour nan ansou kaperen oh diren kasongosong ehu. Mehn pilipil kan me mie inenen kapwuriamwei sang mahs. Ehu karasepe: sehlpwohn kapw kan kin kak alehdi ire kesempwal oh kaselel kan, iangahki poadopoad en peneinei oh pwuhk sarawi kan. Ni ansouohte, e pil kak alehdi ire likamw, suwed, oh wiewia samin kan me sohte kin sansal mahs.

Oaralap me poahsoanki nan Ihmw

Kemwekid en me pwulopwul kan

Pwehn sewese me pwulopwul kan nan mehn pilipil liseliping kan, Mwomwohdisoht kaunopadahr irehn kaweid kehlail oh wehwe silu. Keieu, dipwisoun kasukuhl kan kakehlailahr oh kakehr doadoahk nan peneinei kan. Keriau, ehu pirokrahm me audaudkihda mwekid kei oh iren kakehlail ong seri oh me pwulopwul kan ahpwtehn kasansalada Rahn Sarawio sang Presiden Russell M. Nelson, Presiden M. Russell Ballard, oh Ohpiser Lap akan. Kesiluhn irehn kaweid iei wekdeklahn pwukoah kan pwe pisop kan oh sounkaweid teikan en kak tetehk mwahu me pwulopwul kan. Doadoahk wet anahne manaman en palingehn pwehn sewese neitail me pwulopwul kan en wiahla sounpei pwulopwul kan me Presiden Nelson kangoangehkin irail en wiahla.

Dokpenehn Ireh kan

Doadoahk pwukat, ni ahr patehng iren doadoahk kei me pakairdahr sounpar kei samwalahro, e sohte wia wekdekla mwahl kei. Ehuehu wekdekla pwukat wia kisehn koasondi ehute me pahn kapaiada Souleng kan oh kaunop irailda en tuhong Koht.

Ehu kisehn koasondi pwuko pid dih me kohkohda met. Neitail me pwulopwul kan kepwukoahkiher pwukoa laud ni arail pwulopwul—ahpw pahpa/nohno oh sounkaweid kan sohte pahn kedirepwa dahme irail kak wiahiong pein irail.⁵

Pakair

Rahnwet se pakairki wekdekla ong me pwulopwul kan nan ward oh steik kan. Ihme Presiden Nelson kawehwehier, Sister Bonnie H. Cordon pahn kosoia duwen wekdeklah kan ong Peinakapw akan ni soutik et. Ehu kahrepen wekdekla pwukat me I pahn koasoia met iei en kakelaka me kolokol Prihsduhd en Aron kan, pwihn kan, oh presidensi en pwihn kan. Wekdekla pwukat peiante dahme kitail kin wia me pid Doctrine and Covenants 107:15, me koasoia, “Pisoprik iei me wia presidensi en prihsduhd en [Aron], oh kolokol kih kan oh manaman en kih pwukat.

Ehu pwukoahkan en pisop me ntingdier nan pwuhk sarawi kan iei en kin kakaun prihsd kan oh kaweid irail, kasukuhlihkin irail arial pwukoah kan en arial ohpis.⁶ Me pil patehng, sounsawas keieu nan pisoprik pahn pwukoahki sounpadahk kan oh sounsawas keriau pwukoahki dihken kan.

Nin duwe met, pwehn peian kaudial en nan Doctrine and Covenants, presidensi kan en Mwanakapw akan nan ward kan pahn kasohrala. Ohl pwoson pwukat wiahier doadoahk mwahu, oh se wia aht kaping ong irail.

Se koapworopworiki me pisoprik kan pahn kesempwaliki oh kakehlaka pwukoa en prishduhd en mwahnakapw akan oh sewese irail nan arail pwihn kan. Mwahnakapw mah me kak wia sounkaweid pahn malipilipda en sewese predidensi kan en Prihsduhd en Aron oh pisoprik kan nan arail pwukoh kan.⁷ Se koapwoaroapwoarki me mwahnakapw oh peinakapw tohto pahn kapwaiada pwukoah pwukat oh kekeid pohn ahl en inou ni arail sewesehda neitail me pwulopwul kan.

Nin duwen koasondi sarawi en Kauno, pisopo me kin pwukoahki aramas koaros nan ward. E kin kapaiahda pahpa/nohno kan en me pwulopwul kan oh me pwulopwul kan. Emen pisopo diarada me ni e sesewese mwahnakapw men me ahneki kahpwal en kilekilang kilel suwed, mwahnakapwo ahpw kak koluhla mwurin en pisopo eh sewesehda pahpa/nohnou en poakehla oh mahkohng pwutako. En mwahnakapwo eh weliakapwo wia weliakapw ehu me wiawihong ah peneineio oh kak pweida pwehki en pisopo ah sewesehda peneineio pwon. Mwahnakapw menet met kolokol Melkisedek Prishduhd oh wiewia ah misin.

Ihme mwekid wet kasalehda, wekdekla pwukat pahn:

• Sewese pisop kan oh neirail sounsawas kan en apwali arail pwukoah kan ong me pwulopwul kan oh seri en Praimeri kan.

• Koasoanehdi manaman oh pwukoa kan en Prihsduhd en Aron nan en mwahnakapw kan arail mour oh doadoahk kan.

Wekdekla pwukat pil:

• Kadoke pwukoa kan en presidensi kan en pwihn en Prihsduhd en Aron oh arail repwoht kan en inenlang pisoprik.

• Kangoange sounkaweid mahkan en sewese oh kaiahni presidensi kan en pwihn en Prihsduhd en Aron oh kadaiala manaman oh mweiwei kan en arail ohpis.

Me sansalehr, wekdekla pwukat sohte katikala en pisoprik kan pwukoah ohng peinakapw akan. Ihme Presiden Nelson padahngkiher, “[En pisopo] keieu oh inondehn pwukoa iei en kin apwalih mwahnakapw oh peinakapw akan en ah wardo.”⁸

Ia mwoamwen en atail pisop pwerisek kan pahn kapwaiada pwukoa wet? Ni amwail tamataman, nan 2018, en pwihn en Melkesidik Prihsduhd kan arail pwukoah wekdekla pwehn karaniala pwihn en Sawas en Lih pwe irail pwihn en elder kan oh pwihn en Sawas en Lih kan en kak patpene, pahn kaweid en pisop, sewese apwali pwukoah kan me pisopo kin pwukoahki mahs. Pwukoah pwukat iangahki doadoahk en misineri oh nan tehnpas sarawi oh poadoapoad en peneinei nan ward⁹—oh pil pali laud en sawas ong toweh kan en ward.

En pisop pwukoah kan

Pisopo sohte kak kasapwil ekei pwukoa, me duwehte me pwulopwul kan, sounkopwung, apwali me anahn kan, oh apwahpwali mwohni oh anahn kan. Pwukoa pwukat, mehlel, malaulausang dahme kitail kin wehwehki mahso. Ihme Elder Jeffrey R. Hollad kawehwehda sounpar nekiero ansou me wekdeklahn pwihn en Prihsduhd en Melkisedek pakairda: “Pisopo me wia, ni mehlel, somworo keieu lap nan wardo. Koasoan sapahl kapw wet [en pwihn en elder kan oh Pwihn en Sawas en Lih] pahn mweidehng pisopo en kakaun doadoahk en Prihsduhd en Melkesidik oh Pwihn en Sawas en Lih ahpw e sohte anahne wia en pwihnko arail doadoahk.”¹⁰

Ni karasepe, presiden en Pwihn en Sawas en Lih oh pwihn en elder kan, pwehki kepwukoah, kak ale pwukoahn kaukaweid me mah kan—duwehte en presiden en Peinakapw akan kin kaukaweid peniakapw akan. Pwehki pisopo kelepw me kak wia sounkopwung, sounkaweid teikan pil kin alahle kaweid en kaudial sang nanleng pwehn apwalih kahpwal kan me sohte ahane sounkopwungo de soangen wiakau teikan.¹¹

Met sohte wehwehki me peinakapw men sohte kak de sohte konehng en koasoiong pisopo de ah pahpa/nohno. Arail pwukoa iei me pwulopwul kan! Ahpw e wehwehki me sounkaweid en Peinakapw akan me kak ni mehlel apwalih anahn kan en peinakapw men. Pisoprik kan pil kin nsenohki peinakapw kan duwehte mwahnakapw akan, ahpw se pohnese en sounkaweid en Peinakapw kehlail, pwerisek kan arail koahiek en poakehng oh kasukuhli, ahpw sohte kihsang en kaun en kilahs kan pwukoah, pwe me pwulopwul kan en pweida nan arail pwukoah kan.

Sister Cordon pahn ehukihda pil ekei wekdekla kaperen pwukat ong peinakapw kan pwohnget. Ahpw, I men pakairki me presiden kan en Peinakapw kan pahn uhd repwoht lahng oh ale kaweid sang pisop en wardo. Mahso, pwukoa wet kin kak kesepwil ong emen sounsawas, ahpw sang met kohla, peinakapw akan wia en me kolokol kih en kakaun wardo ah pwukoah. Presiden en Pwihn en Sawas en Lih pahn kin repwohtlang pisopo.¹²

Ni dakehn steik oh pohnangi, kitail pahn kolokolete presidensi kan en Mwahnakapw akan. Ni dakehn steik, emen ahi kaunselor me pahn wia presiden en Mwahnakapw akan¹³ oh pahn, iang ahi kaunselor kan me apwalih Peinakapw oh Praimeri, wia tohn en steik Kamidi en Prihsduhd en Aron—Pwihn en Peinakapw. Ohl pwukat oh presidensi en Peinakapw akan en steik pahn kin doadoahkpene. Emen sounsawas ong presiden en steik me pahn wia sermen, kamidi wet pahn ahniki pwukoa laud kesempwal pwehki pirokrahm oh mwekid tohto nan koasondi kapw on Serihkan oh Me Pwulopwul kan pahn kin wiawi ni dakehn steik.

Ahi kaunselor pwukat, pahn kaweid en presidensi en steik, kak wia sounsawas kei ong pisop oh pwihn en Prishduhd en Aron duwehte sawas kan me kin wiawi sang ahi kaunselor kan ong pwihn en elder kan nan ward.

Pil ehu ire, pil emen ahi kaunselor pahn pil wia presiden en steik Santi Skuhl oh, ma mie anahnepe, pahn iang towe en steik kamidi en Prihsduhd en Aron—Pwihn en Peinakapw.¹⁴

Pil ekei wekdekal kan ahpw pahn kawehwehda nan kisinlikou kei me pekderlahngehr sounkaweid kan. Wekdekla pwukat iangahki:

• Kaunsel en me pwulopwul kan en ward pahn weliandi mihting en pisoprik kamidi en me pwulopwul kan.

• Lepin lokaia “Mutual”pahn kakommoldi oh pahn uhd wiahla “kemwekid en Peinakapw akan,” “mwekid kan en pwihn en Prihsduhd en Aron,” de “mwekid kan en me pwulopwul kan” oh e pahn kin wiawi wihk koaros ma kak.

• Mwohni en ward ong mwekid kan en me pwulopwul kan pahn kin nehne parek peseng nan pwungen mwahnakapw oh peinakapw kan nin duwen tohtohn me pwulopwul kan nan ehu pwihn. Uweh ieu me itar pahn kin kolahng mwekid en Praimeri kan.

• Nan dake koaros—ward, steik, oh pohnangi—kitail pahn doadoahngki lepin lokaia “pwihn” kaidehn “auxiliary.” Irail kan me kakaun pwihn Lap akan en Sawas en Lih, Peinakapw, Mwahnakapw, Praimeri, oh Santi Skuhl pahn kahdaneki “Ohpiser Lap akan.” Irail kan me kakaun pwihn kan nan daken ward oh steik kan pahn kahdaneki “ohpiser en ward” oh “ohpiser en steik.”¹⁵

Wekdeklahkan me pakairda rahn wet kak tepda doadoahk ahsou me prans kan, ward kan, disdrik kan, oh steik kan onopadahr, ahpw en dehr pwandasang Seniweri 1, 2020. Wekdekla pwukat, ni eh kapatapatehng wekdeklahn mwowe kan, pwilsang kaweid en palingehn oh doadoahk me peiante koasondi en kapaiahda oh kakehlaka ohl, lih, me pwulopwul, oh seri koaros, sewesehki emenemen irail en idawehn karasaras en atail Sounkomour, Sises Krais, ni atail kekeid nan ahl en inouo.

Riei ohl oh lih akan, I inouki oh kadehde me wekdekla kesempwal pwukat, me pwildosang pahn kaweid en presiden oh soukohp marain, Russell M. Nelson, pahn kaweid oh kakehlaka tohn Mwomwohdiso wet koaruhsie. Neitail me pwulopwul kan pahn kakehlakahla arail pwoson Sounkomouro, perehre sang kasongosong en tepelo, oh onopadahr en powehdi kahpwal kan en mour wet. Ni lengileng sarawi en Sises Krais, ahmen.

Ire kan

1. Tehk Russell M. Nelson, in “Latter-day Saint Prophet, Wife and Apostle Share Insights of Global Ministry,” Newsroom, Oaktohpe 30, 2018, newsroom.ChurchofJesusChrist.org.

2. Pil patehng, kumwail pil nsenohkier oh tepda doadoahngki eden Mwomwohdiso pwungo me Presiden Russell M. Nelson padahngkiher oh tamataman atail Sounkomouro ni limpoak oh wahu ni amwail wia mwo.

3. Tohn Mwomwohdiso en Sises Krais pekederlahr ‘pwehn doadoahk nan sapwellime mwetuel en wain pwe aramas en mourkihla’ (tehk Doctrine and Covenants 138:56). Doadoahk en komouralahn aramas iei doadoahk en misineri, kakehlaka towe kapw kan, kakehlakahda towe kan me sohte kehlail en sarawi, doadoahk en nan tehpas sarawi oh doadoahk en repen peneinei en mahs, oh padahki rongamwahu. Pisoprik kin kaweid doadoahk wet nan ward, ale sawas sang tohn sawas en nan ward” (Handbook 2: Administering the Church, 5.0, ChurchofJesusChrist.org).

4. Sounkaweid kan, kitail poakong tohn Mwomwohdiso en Sises Krais en Souleng en Imwin Rahn-akan ong kamwahupatail oh amwail mour en tohnpadahk. Kitail kaping kalahngan ong amamas akan, nohno kan, pahpa kan, me pwulopwul, oh serihkan me wie alialu nan elen inouo—oh wiewia mwo ni ngoang oh popohl.

5. Nan 2019, dihken sounpar 11 ko tepda nehk kamadipw sarawi oh peinakapw sounpar 11 oh mwahnakapw kan ale kisinlikoun mweimwei en pidolong nan tehnpas sarawi en lepin ansou. Sounpar nekiero, Presiden Nelson kehkehlikieng mwahnakapw oh peinakapw kan en towehda pwihn en sounpei pwulopwul ehu pwehn kihpen Israel palio oh paliet (tehk “Hope of Israel” [worldwide devotional for youth, June 3, 2018], HopeofIsrael.ChurchofJesusChrist.org). Pasapengo inenen laud.

   Pwuhl-daim misineri kan wie doadoahk kehlail ni arail pwulopwulte. Sang Oaktohpe 6, 2012, mwahnakapw akan kak wia misin ni arail sounpar 18 oh peinakapw akan ni arail sounpar 19.

6. “Oh pwukoa en presiden pohn Prihsduhd en Aron iei en kin kakaun prihsd kan, oh kaweid irail, pwehn padahkihong irail arail pwukoa kan. … Presiden menet me wia pisop: pwe iei ehu pwukoh kan en prihsduhd wet” (tehk Doctrine and Covenants 107:87–88).

7. Sounkaweid mah kan pil pahn malipilipda en wia semen kei nan pwihn en Prihsduhd en Aron pwehn sewese nan pirokrahm oh mwekid kan oh iang mihting kan en pwihn pwe pisoprik en kak pwarpwarek en Peinakapw kan kasukuhl oh mwekid kan oh ekei amsou pwarek Praimeri. Ekei semen kan kak pil malipilipda en sewese ehu mwekid, me duwete kamp; mehteikan kan malipilipda ong ansou reirei pwehn sewese sounkaweid kan en pwihno. E pahn anahne ohl mah riemen nan ehu mihting, mwekid, de pirokrahm en ehu ehu pwihn. Tetehn pwukoa oh mwahr kan pahn wekdekla, se sohte kasik me uwen ohl mah me anahne sewese pwihn kan en Prihsduhd en Aron pahn kamalaulaula.

8. Russell M. Nelson, “Witnesses, Aaronic Priesthood Quorums, and Young Women Classes,” Liahona, Nohpempe 2019, 39, kapatahieng; pil tehk Ezra Taft Benson, “To the Young Women of the Church,” Ensign, Nohpempe 1986, 85.

9. Se pil kaweidki pisop kan en pil apwalih me pwulopwul kiripw kan oh arail peneinei kan.

10. Jeffrey R. Holland, mihting en sounkaweid kan en kapokon lap, Epreil 2018; pil tehk “Effective Ministering,” ministering.ChurchofJesusChrist.org. Elder Holland padahngki me pwukoa kan me pisop sohte kak kesepwil iei kakaun pwihn en Prihsduhd en Aron oh peinakapw akan, sounkopwung, apwalih mwohni oh anahn teikan en Mwomwohdiso, oh apwali me semwehmwe oh me anahn kan. Presidensi kan en pwihn en elder kan oh Sawas en Lih oh mehteikan kak wia pwukao en doadoahk en misineri, tehnpas sarawi oh poadopoad en peneinei, epwel mwahu en kasukuhl nan ward, oh mwasmwasahn oh apwahpwali tohn Mwomwohdiso.

11. Me patehng irehkan me anahne kih kan en emen soukopwung, irehn wiakau kan uhdahn pahn epwelsang pisop kan nin duwen kosonned en Mwomwohdisoht.

12. Presiden en Sawas en Lih nan steik pahn kin repwoht lang presiden en steik.

13. Sounsawas kan en presiden en Mwahnakapw en steik kak malipilipda sang tohn steik de, nin duwen anahn, pil kak sang ahi kauselor me pwukoahki Peinakapw kan oh ahi kauselor me pwukoahki Praimeri.

14. Ohl me pwukoahki presiden en Santi Skuhl kolokol pwukoa laud ong mehn kasukuhl ong me pwulopwul kan ong Rahn Sarawi riau nan sounpwong ehu.

15. Presidensi kan en Sawas en Lih, Peinakapw, Mwahnakapw, Santi Skuhl, oh Praimeri nan dakehn steik oh pohnangi wia Ohpiser Lap kei de Ohpiser en steik. Ni dakehn ward, pisoprik kin kaweidih mwahnakapw kan, eri Prihsduhd en Aron me wia sounkaweid en mwahnakapw kan sohte wia Ohpiser en ward kei.