Kosonned Laud Riau
Kitail anahne kolokol kosonned laud riauko koaros. Pwehn wia met, kitail anahne kanaiehng apwalih kosonned oh limpoak.
Riei lih akan nan rongawahu en Sises Krais, I kasamwo kuwail me pwukoahki pwukoa sarawi en sounapwalih peneinei poatopoat. Presiden Russell M. Nelson padahkihongehr kitail me, “Mwomwohdiso wet kapwurpwurdo pwe peneinei kan en kak kokouda, katengtengpene, oh ahneki popohl poatopoat.”1 Padahk wet kolokol ire kesempwal kei ong aramas akan me wia lih mwahuki lih, ohl mwahuki ohl, ohl de lih emen me mwahuki ohl oh lih, de ohl de lih me men wiahla lih de ohl me pil kin adaneki LGBT.2 Presiden Nelson pil katamankinkitail me kitail sohte “anahne pwungki emen emen ansou koaros pwehn poakong emen emen.”3 Padahk kokohp pwukat kesempwal ong koaskoasoipene kan nan peneinei pwehn sapengala peidek kan en serihkan oh me pwulepwul kan. I kapakapkiher kamarain pwehn padahk ong pokon wet pwe peidek pwukat kin sair kumwail pil kin doke peneinei koaros nan Mwomwohdiso wet.
I.
I pahn tepkihda dahme Sises padahngki duwen kosonned laud riauo.
“Ke pahn poakohng Kauno omw Koht, sang nan kapehdomw unsek, sang ni ngenohmw unsek, sang ni omw lamalam koaros unsek.”
“Ih met kosonned me keieu lapalap oh kesempwal.
“A me keriaun kesempwal, me rasehngete met, iei: ‘Ke pahn poakohng mehn mpomw duwen omw kin poakohng pein uhk.”4
Met wehwehki me kitail anahne poakohng aramas koaros, pwe karasaras en Sises me pid ohl en Sameriao padahngki me aramas koaros wia mehn mpatail.5 Ahpw atail inengieng en kapwaiada keriau en kosonnedo sohte konehng en karotongala me keieuo, pwehn poakohng Koht ki atail mohngiong unsek, ngenitail unsek oh atail lamalam unsek. Kitail kin kasalehda limpoak wet ni atail kin “kapwaiada [Sapwellime] kosonned akan.”6 Koht kupwurki kitail en kapwaiada Sapwellime kosonned akan pwehki ihte sang ni peik, iangahki koluhla, me kitail pahn kak pwurala oh kousonla Reh oh duwehla Ih me unsek.
Nan en Presiden Russell M. Nelson kapahrek nan BYU, e mahsanih duwen “ehupene kehlail nan pwungen limpoak en Koht oh Sapwellime kosonned akan.”7 Kosonned me doke ni mehlel ire kan me pid irail kan me wia LGBT iei kosonned en Koht me pid pwopwoud oh ienge kosonned me pid mwakelekel. Pali riauo koaros kesempwal nan en Samatail Nanleng koasondi en komour ong Sapwellime serihkan. Presiden Nelson padahngki me, “Kosonned en Koht kan mie pwehki Eh ketin poakong kitail ni mehlel oh Kupwurki kitail en wiahla dahme kitail kak en wiahla.”8
Presiden Nelson padahngki: “Sahpw tohto nan sampah … mweidadahr pwopwoudin lih oh lih de ohl oh ohl. Ni atail wia tohn Mwomwohdiso wet, kitail kin wauneki kosonned akan en wehi … ,iangahki me pid pwopwoud. Ahpw, ni mehlelo, ni tapio, Koht me kasarawiala pwopwoud! Oh lel rahnwet me koasoandier sang Reh pahn wiawi nan pwungen ohl emen oh lih emen. Koht saikinte wekidala Sapwellime koasoandi en pwopwoud.”
“Presiden Nelson doulahte masahni: Koht pil saikinte wekidala kosonned en mour mwakelekel. Koasondi kan me pid pidolong nan tehnpas sarawi pil saikinte wekidekla.”9
Presiden Nelson katamankinkitailehr koaros me “aht pwukoah en Wahnparon kan iei en padahngki me mehlel ohte. Pwukoahu sohte kihong kiht manaman en wekidala kosonned sarawi.”10 Kahrehda, sounkaweid kan en Mwomwohdiso wet anahne ansou koaros padahngki kesempwal en pwopwoud nan pwungen ohl emen oh lih emen oh pil kosonned en mour mwakelekel.
II.
Inondehn doadoahk en Mwomwohdiso en Sises Krais en Souleng en Imwin Rahn-akan iei en kin kaunopada seri en Koht kan ong wehin selestial, oh ni mehlel kilohri me keieu ileile, popohl unsek de mour soutuk. Wasa me keieu ileile kin kak alahldi sangete ni pwopwoud soutuk.11 Manaman en kapikada mour nan pwungen ohl oh lih12—me kaudiahl en imwin rahn akan kahdaneki “pepeuslahn wiawihda en aramas kohkohlahte” wia kisehn mour soutuk.”13
Presiden Nelson padahkehng me saik pwopwoud kan mahsani, “Loaloapwoatieng Sapwellimen Koht kosonned akan pahn apwalihuk ken kekeirda warohng mour soutik”14—met iei, en duwehla Koht, ni mour sarawi oh ansou mwahu en kousoan rehn Samatail oh Inatail Nanleng nan wasa lapalahpie. Iei wasao me kitail kin anahne ong koaros me kitail kin poakepoake. Pwehki atail limpoak, kitail sohte kak mweidehng limpoako en karotonngala kosonned akan oh koasondi oh doadoahk en Koht, me kitail ese pahn wahdo peren unsek ong irail kan me kitail kin poakepoake.
Ahpw me tohto me kitail kin poakepoake, iangahki irail kan me kolokol rongamwahu kapwurpwurdohu, me sohte kamehlele de pilada en sohte idawehn kosonned en Koht me pid pwopwoud oh kosonned en mwakelekel. Ah kumwail?
Padahk en Koht kasalehda me kitail koaros wia Sapwellime seri kei oh E kapikkitailda pwehn ahneki popohl.15 Kaudial en imwin rahn akan padahngki me Koht ketin koasonedier me nan mour wet aramas koaros kak pilada peik pwehn rapahki Sapwellime kapai keieu laud de pilada ren kolahng nan wehin kilori tikitik kan.16 Pwehki en Koht e ketin poakohng Sapwellime serihkan, wehin kilori tikitik kan inenen kaselel sang dahme aramas kak wehwehki.17 Tomw en Sises Krais kamangaialahr mepwukat koaros en wiawi, ni Eh ketin “kalinganahda Semeo, oh doarehla koaros ki doadoahk en nin lime kan.”18
III.
I padahngkiher duwen kosonned keieuo, ahpw ia duwen me keriauo? Ia mwoamwen atail pahn kolokol kosonned en poakong mehn mpatail? Se songosongen kangoangehki towehkan en poakong irail kan me kin ideidawehn padahk oh wiewia kan en lih me mwahuki lih, ohl mwahuki ohl, ohl oh lih me mwahuki koaros, de lih oh ohl me men wiahla pali teio duwehte me Sounkomouro padahkihong kitail en wiahiong men mpatail kan koaros. Ansou me lih lih pwopwoud oh ohl ohl pwopwoud kansansalda mweimwei nan Amerika, Presidensi Keieu oh Wahnpoaron Ehk-riemeno kasalehda: “Rongamwahu en Sises Krais padahkiheng kitail en poakehng oh kadekehng aramas koaros oh lamalam koaros—mendahte ma kitail sapwungki. Se koasonehdi me irail kan me idawehn kosonned de pehkiek en mwolen kopwung me mweidada pwopwoudpenehn lih lih de ohl ohl sohte pahn wiakaula.”19
Kitail sohte pil pahn kaloke irail kan me sohte pwungki dahme kitail kamehlele oh inoukidahr kan.20 Poakehla pwe ekei aramas akan me mih pahn irair pwukat me kin pepehm me irail sohte mweimwei oh lekdeklahr sang ekei towe kan oh sounkaweid nan atail peneinei, ward oh steik kan. Kitail koaros anahne nantiong en kin sapan oh wahu sang mahs.
IV.
Pwehki kahrepe kan me kitail sohte wehwehki, atail kahpwal kan wekpeseng nan atail mour wet, oh atail keirda pil kin wekpeseng. Ahpw kitail wehwehki me Koht pahn ketin sewese emenemen kitail powehdi atail kahpwal kan ma kitail peki Sapwellime sawas ni mehlel. Mwurin kalokolok oh koluhkihla atail kauwehla kosonned akan kitail esehier me kitail koaros pahn kolahng nan ehu wehin kilohri. Kauno me pahn wia kadeik lapo pwe Ih kelehpw me sapwellimaniki marain, eripit, oh mahk pwehn kadeik emenemen kitail.
Ni ansouohte, kitail anahne kolokol kosonned lap ko koaros. Pwehn wia met, kitail anahne kanaiehng atail mwekid ong kosonnedo oh limpoak—kolokol kosonned akan oh kekeid pohn ahl en inouo, ni ansouohte poakong mehn mepatail kan. Nan seiloak wet kitail anahne rapahki kamarain sarawi ong dahme kitail pahn sewese oh uhwong oh mwoamwen poakohng oh kapaidoke oh padahngki nan mwekid wet. Nan seiloak wet kitail sohte kak sounnetnetki kosonned akan ahpw kitail anahne kasalehda ni unsek atail wehwe oh limpoak. Kitail anahne kadek lamalam ong serihkan me kasalehda arail mwahuki iengarail kan, dehr mwadangete kamehlele pwe diren seri me pwilikihdi anahn pwukat ni arail keirda wiahla aramas laud kei.21 Atail seiloak wet sohte pahn wetsang ahl en inouo oh e sohte pahn sewese mehkot me pahn kahluwa aramas sang Kauno. Nan mepwukat koaros kitail tamataman me Koht inoukidahr koapworopwor oh popohl unsek oh kapai kan ong koaros me kolokol Sapwellime kosonned akan.
V.
Nohno kan oh pahpa kan oh kitail koaros me ahneki pwukoa en kasukuhli kosonned laud riau pwukat. Ohng lih en Mwomwohdiso wet, Presiden Spencer W. Kimball kawehwehda kaudiahl ehu me: “Keirda me pahn pwarada nan Mwomwohdiso wet ni imwin rahn akan pahn kohdo pwehki lih mwahu tohto nan sampah … pahn tohtohla nan Mwomwohdiso wet. Met pahn wiawi pwehki sang lih kehlail en Mwomwodiso wet ahr kasalehda pwung oh ehupene nan arail mour oh keirda me lih en mwomwodiso wet kilangher wekisang oh kaperen sang me kin lelohng lih en sampah pwon.” Kahrehda lih dingang kesempwal kan en Mwomwohdiso wet me pahn wia kilel kehlail ehu nan keirdahn towe oh palingehn en Mwomwohdiso wet ni imwin rahn akan.”22
Nin duwen kokohpo, Presiden Russell M. Nelson kalokidahr me “rahn me Presiden Kimball kohpadao iei rahn wet. Ih kumwail lih me e mahsaniadahko!”23 Kitail kan me rong kokohpo sounpar 40 samwalahro sohte kasawiada me nan pwungen lih akan en Mwomwohdiso wet me pahn komourla irail akan me pein kempoakeparail kan oh arail peneinei kan me ansou wet aledahr peren en sampa wet oh kaweid en tepelo, Ei kapakap oh kapai iei me kumwail pahn padahngki oh mwekidki pwehn kapwaiada kokohp wet, ni mwaren Sises Krais, amen.