Oodlą’ Bee Sohodizin
Oodlą’ bee sodíilzingo, Bóhólníihii bináanish ła’ nihaidi’ááh Nínáánádáhígíí bee bíka adíilwoł biniiyé.
Díí áłtsé ntsáo áłah áleeh yiyi’ Eldir Maynes nihá yee sodóolziníí yá’át’ééhgo hane’ bee hahóolzhiizh. Hane’ yá’ádaat’éhii dóó sin baa dahózhóonii yee nihiká éelwod. Naat’áanii Russell M. Nelson díí áłah azlį́į’gi yee haadzí’ę́ę ayóó át’áo bééhániihdoo nínáa akǫ́ǫ́ t’áá íidáá béhoolzhiizh.
Naat’áanii Nelson yee’ díí yihahgo bééhániihdoo dííniid “naakidi neeznádiin nááhai yę́ędą́ą́’ Diyin God Azhé’é nilį́į dóó BiYe’ Jesus Christ Ayóó áyo’níi Joseph Smith yaa ni’áázh.” Naat’áanii Nelson díí áłah áleeh bibá hasht’e’ ádadołnééh nihidííniid, jo’éí bééhániih yaa koní “nighéídę́ę́’ Sodizin Báhooghan báhane’ bił hahóolzhiizh, dóó łahdóó t’áá íiyisíí ádadoołííł.” 1
Shí nahalingo, bee ha’odzí’ę́ę daats’í sidoots’ą́ą́’ yee haadzí’ę́ę dóó baa na’ídołkid, “Haalá yit’ao bohonéedzą́ągo łahdóó ádeeshłííł lá nisin?” T’áá Aaníinii Ninályáhígíí shį́į́ baa ííníłta’ dóó baa sodíínílzin ádahóót’iidyę́ę. T’ahdoo áhánéehęę áhoodzáaígíí daats’í baa da’íínóołta’ Diyin God Azhé’é Biye’ Ayóó’áyo’níinii yaaholne’ yę́ę dą́ą’. Nihíísh baa íínóołta’ Yisdá’iiníiłii Ya’ą́ąshdi Nihizhé’é nilį́i ba’áłchiní yich’į’ haadzi’ígíí. Shí díidí t’áá doole’é ałtso dóó biláahgo ííshłaa.
Diyin God bibee’adziilii dikwíidi ninályáhígíí baa ííłta’. T’óó jooba’hasingo díí áłahaleehígíí bá hasht’e’ádishnéehgo she’iina’ łahgo ádzaagí baa ákoniizį́į́’. Shijéí biyi’di łahgo ádzaa. Bik’idiitánígíí bee t’áá’íyisíí baa ahéé niizį́į́’. Díí T’áá Aaníinii Ninályáhígíí náás yit’ihígíí bee atah t’áadoole’é ła’ á’deeshłíłígíí baa nitséskeesgo baa shiłhózhó.
Nihaanitséskeesgo íínisin, nihí shį́į́ ałdo’ baa nihił dahózhǫ́ǫgo báhasht’e’ádadołyaa dóó t’áá íyisíí Bóhólníihii biká adeeshwoł danohsin.
Akée’di ádahodoonííł ha’nínę́ę dóó aláahdi át’éego ádahoodzaa yę́ę bee hahóolzhiizh’ígíí nihił danlį́, jo’éí binahjį’ Bóhólníihii Bisodizin Báhooghan dóó Bidine’é bikéé’ deiyikáhígíí yaa doogáłii yibá’ hasht’e’í’dílnééh. Bóhólníihii bá hasht’e’ ádadiilnééhgo nihíka’adoolwoł díí nahasdzáán bikáágo t’ahdoo ákótao yiiltséehígíí bee t’áá ałtsoní bíláahdi nihidziilgo ánhidoolííł.
Bini’ant’ą́ą́tsoh biyi’ 1840yę́ędą́ą́’ Diyin Yáhalne’ii Joseph Smith dóó Áłtsé Naat’áaniijí yił dahnaháaztánę́ę kódadííniid: “Díí akée’di yoołkááłígíí biyi’di Bóhólníihii binaanish t’áá’íyisii áyoo’át’é dóó bila’ashdla’ii yik’i’diitįįhígíí bilahgo át’é. T’áadoo bee nólninígóó doo baa hojólne’ át’éégo dóó doo ła’ biláahdi át’ée da doo. Hodeeyáádą́ą́’ dóó hóshdę́ę́’ diijį́įjį’ náás oochíłígíí biyi’jį’ Diyin God yádahalne’ii dóó diné t’áá’íyisíí yá’át’éehgo dahinánígíí yee dabidziilgo hoolzhish; t’áá’íyísíí t’áá ałtso bibee’adziilii bee háádílyaa, Christ Jesus t’áá’ałtsoní yá’ąąshdi dóó nohokáá ádaat’éhígíí, áłah ánéidoodlííł, ádaat’éhą́ągi’ át’ao ándoo’nííł, nahasdzáán ályaa dóó hóshdę́ę́’ Diyin yádahalne’ii yaa dahoolne’ yę́ęgi’át’ao; azhé’é danlinígíí bee bich’į’ ha’oodzíí’ yę́ę t’áá’íyisii ayóó át’éego behodoolnííł, áko Diyin God Ts’ída Aláahdiígíí be’edziil bee na’anish yit’į́įgo íídoolííł ts’idá ayóó át’é t’áadoo bee nóhshónígóó ííshją́ą́n íidoolííł.”
Dóó ádadííniid: “Bee danhidziilígí bee t’áá ałhiijį’ naasyiikah Diyin bá hasht’é adahwiilnę́ęh, dóó Priesthood Diyin God bibee adziilii t’áá át’é bił hadadiil’nééh. Ts’idá aláadi baa nitsáhákees akéedi dayoołkáłgo naanishígíí ałtso ła’doonííł, nihe’adziil bee, bee hodiniilzinígíí bee, bíhwiil’ą́’ígíí bee, Jesus yánaazinígíí yeedahodilzinígíí bee, díí náás yéigo niłdzilgo dóó ts’idá aláahdi ayóó’át’éego bee ła’doonííł Diyin God yáhalne’ii [Daniel] yaa hoolne’yę́ęgi’át’ao [nół’į́ Daniel 2:34–35, 44–45]; áko díí naanish t’áá łá’íígíí t’éiyá íilį́įgo, ts’idá aláahdi ayóó’át’éego dóó aláahdi bohónéedzą́ągo ła’doonííł.” 2
T’áá Aaníinii Ninályáhígíí bąąh n’doonishíí ła’ ádadoolníłígíí dóó hahgo ádadoolníłígíí tahdoo bee nihił hane’ da. Ákondi ałkidą́ą́ Ałtsé Naat’áaniijí Dahnaháaztánígíí danlináa bił bee dahózin ńt’éé’ díí Bóhólníihii binaanish t’áá áyisíí ntsaahígíí. Kǫ́ǫ́ éíí díí ła’ bik’ehgóó ádahodoonííł:
Jesus yá naazíníí binahjį’ Bóhólníihii bina’nitin yaayidoolééł “tʼáá ałtso bílaʼashdlaʼii kéédahatʼį́ígo, dóó ałʼąą dóoneʼé dah deíkááhgóó, dóó bizaad ałʼąą ádaatʼéego yee.” 3 Dííjį́įdi bee na’anishí bééhozdílzinígíí dóó álílee ádaat’éii bee – ła’ naazí “diné hayiileehí dadoołeeł” 4 be’oodlą’ dabidziilgo ak’idadiiz’į’ doo.
Nihí éíí bidziilgo da’ahííníitą’do azhą́ nihinaago ahídadigoh ndi. Diyin kehgo danhidziilgo áłah dadiidleeł dóó nihighaan nahaz’ą́ądóó Jesus Christ bina’nitin bee nihik’ihojidlíi doo.
Doo da’oodlánígíí ndi ya’ákodadínóozįįł díí Jesus Christ Binahagha’ Akéé’di Dayoołkáałgo Yá Naazínígíí éíí Diyin God bidziilgo bił hólónígíí. Doo nidaaldzidgo Diyin God dayoodláago yikéé’naazínígíí t’áá ákwííjį́ Jesus Christ bizhi’ ák’ideididootááł.
Áko lá haiyitáo bohónéedzą́ągo díí naanish atah łahdóó nihinaanish ádadiilnííł? Naat’áanii Nelson nanhineeztą́ą́’ hait’éego Diyin k’ehgo bee adziil bee náás yiikah dooígíí. Ádaanída’ííniikąąhgo baa nihił hózhǫ́ǫ nihe’oodlą’ nooseełgo bee Jesus t’áá aaníí Christ nilinígíí nihił beehózindo, Nihizhé’é Yá’ąąshdi Hólóonii bich’į’ sodiilzingo nihíísts’ą́ą́’do dóó yiiniidlą́ągo, Diyin God bibeehaz’áanii bik’eh honiilį́įgo, nihidziilgo ánhósindo dóó t’áá aaníinii yee nihił halne’ doo. Ii’sizíinii Diyinii éí t’ááłahjį nił hólǫ́ǫ doo. T’áá’aaníinii yá’ádaat’éehii bee sihasinígí nihiłhólǫ́ǫ doo azhą́ nihinaago doo yá’át’éehii baa nida’aldeeh ndi.
Joseph Smith Diyin k’ehgo adziilíí bee i’iilį́įdo binyé yee nanhineeztą́ą́’. Oodlą’ bee sohodizinígi bee Diyin God t’áá’aaníinii yee hołhalne’ígíí ałdó’ yee nanhineeztą́ą́. Be’oodlą’ bee sodoolzingo, Diyin God Azhé’é nilinígíí yoodlą́ągo bik’ijisdli’. Be’oodlą’ígíí binahjį’ sodoolzin, Jesus Christ t’éiyá habąąhígi át’éii há nahjį’ kóyiiłįįh. Áádóó be’oodlą’ bee sodoolzin, shibąąhígíí át’éii shanididoot’ááł nízingo Jesus Christ Bisodizin bá Hooghan t’áá aníiniígíí hadinéeshtaał jiniizíí’.
Diyin God yáhalne’ii nilį́įgo, Joseph Smith oodlą́ągo dóó sodilzingo yee Diyin God t’áá‘aníinii yee bił hane’ nt’éé’. Dííjį́ dóó náás yíídeeską́ą́góó nihich’į’ ndahwii’náandí, da’iiniidlą́ągo binahjį’ sodadiilzin doo. Naat’áanii Brigham Young ádííniid, “Dííjį́įdi Jesus Christ Yá Naazígíí bijéí biyi’dę́ę́’ Diyin God dayoodlą́ągo dóó t’áá áłahjį’ yantsídaakeesgo dóó yich’į’ sodadilzingo t’éiyá biká adoolwoł dóó boo’ish doo.” 5
Díí saad bik’eh honiil’į́įdo bááh dóó tó dilzingo yidą́nígíí bá sohodizingo ání: “T’áá áłahjį’ yéédaalniih dooleeł.” “Yéédaalniih” ííłnínígíí éíí Jesus Christ. Ákóne’ saad dahnáánashjaa’ígíí “dóó bibeehaz’áanii baa yiníláhígíí yik’ehgo dahináa dooleeł,” nínígi éíí binahjį’ yéego Béé déilniih dooleeł. 6 Áko Jesus Christ t’áá áłahjį’ bénéilniihgo, t’áá nihiyi’ídi sodiilzingo nabídídíílkił, “Ha’át’íí naanish shį́į́ ná’áshłééh?”
Kótao oodlą’ bee sohodoozingo, Jesus Christ díí akéedi holzhishígíí yee ąą áyiilaa. Dóó naanish ts’idá aláahdi át’éego bindeiilnishgo ahodoolzhish. T’óó ahayóogóó shił bééhózin, ni ałdó’ nił bééhózin, sodizin dabidziilgo bik’ehgóó ádahoodzáaígíí.
Ałtsé ákót’éigo sodoolzinígíí éíí Joseph Smith. Sodilzingo áłchiní yázhí ádaaninígíí át’ao Bóhólníihii yich’į’ haadzíígo ání ná ádeeshłíłígíí bee shił hólne’ yidííniid. Bóhólníihii bich’į’ haadzi’go bee ni’bikáá’ baa hane’ígíí łahgo ádzaa.
Baa nitséskeesgo, aláahdi bik’ididiitį́łígíí éíí Joseph nitsidinígo’go sodilzin ńt’éé Satan baa tiihíyáh.
Shił bééhózingo éíí Satan dóó bá nidaalnishígíí nihitah nidaakaigo ch’ééh t’áádoo sodadoołziní danihiłní. Joseph Smith t’áá bóodziil nít’éé’ yee Diyin God yich’į’ sodoolzingo díí ha’át’ííshį́į́ bidziilgo doo bidóochííd át’éego bótą’ yę́ę bits’ą́ąjį’ bákóyiilaago bee bikáa’oowod, áadi inda Ázhé’é Yá’ąąshdi Hólǫ́ǫnii dóó Jesus Christ baa ní’áázh.
Satan ch’ééh áát’įįd yida’deełkaałgo díí T’áá aaníinii ninályáhígíí bee hahoolzhiizh yę́ędą́ą́’ Joseph bisodizin t’áá íyisíí ayóó át’éego bádííyįįd. Ni dóó shí áłts’íísígo atah i’diilnííł díí T’áá Aaníinii Ninályáhígíí náásyit’ih biyi’góó. T’áá aaníinii ninályáhígíí be’anaa’í doo yá’áshóonii éíí ch’ę́ę́h t’áadoo sodadołziní nihiłní. Joseph oodlánígíí dóó bíni’ bidziilígíí binahjį’ nihí ałdó t’áá ákótéigo nihe’oodlą’ bee danihidziil doo. Díí biniinaa Ázhé’é Yá’ąąshdi Hólóonii bich’į’ sodiszingo Prophet Joseph ayóo baa ahéé nisin łeh.
Book of Mormon biyi’di Enos baa hane’ígi át’áo shisodizin dóó she’oodlą’ binahjį’ T’áá Aaníinii Ninályáhígíí náásyit’ihígíí łahdoo bee áká adeeshwoł nisin. Díí biyi’doo t’áá ha’át’ííshį́į́ baa nídíílnishígíí, ałdó yee nandínootįįł.
Joseph sodoolzinígi át’áo, Enos oodlánígíí yinahjį’ sodoolzin. Díígi át’ao yaa hoolne’:
“Dóó shitsʼíís dóó shiyiʼsizíinii Diyin God bitsʼą́ą́dę́ę́ʼígíí tʼáá íiyisíí yídin silį́į́’; dóó Áshiilaaígíí bidááhdóó ntsidinísgoʼ, dóó tʼáá íiyisíí shitsʼíís dóó shiyiʼsizíinii bá náʼooshkąąh dóó sodiszingo haasdzííʼ; dóó bich’į’ sodiszingo ałtso yiską́; aoo’,dóó tł’éé’ hazlį́į́’ ndi t’ahdii yá’ąąsh gódei sodiszin ńt’ę́ę́’.
“Dóó łaʼ iinéé’ shich’į’ ha’oodzíí’, kóníigo: enos, nibąąhági ádaatʼéii bee naa ndeetʼą́, dóó nik’ihojidoodliił.
“Dóó shí, Enos, Diyin God doo biyooch’íídgóó shił bééhózin; ákohgo, baa yínííł nisinę́ę nahjį’ kólyaa.
“Dóó kódííniid: Bóhólníihii, dííshą’ éí hait’áo ál’į́?
Dóó éí kóshidííniid: Háálá Christ ts’ídá t’ahdoo diits’į́hígíí dóó yiiłtséhígíí, yínídlánígíí biniinaa. Dóó ts’ídá t’óó ahayóí nááhaigo índa bits’íís ííshjání íídoolííł; ákohgo, náás yínááł, háálá ne’oodlą’ haanándiidlaa.” 7
Díí saad nashineeztą́ą́’go bee shik’ihojisdli’: “Háálá Christ ts’ídá t’ahdoo diits’į́hígíí dóó yiiłtséhígíí, yínídlánígíí biniinaa.”
Joseph éí Christ yoodlą́ągo tsintahgóó níyá dóó áadi sodilzingo Satan baa tihyíyáa ndi sodilzinígí bee nahjį’ kódzaa. T’ahdoo éíí Ázhé’é Diyin God dóó Biye’ yiyiiłtsééhda ndi, oodlánígíí binahjį’ bijéí biyi’dóó t’áá bóodziilígí yee sodoolzin.
Enos baa hane’ biyi’doo nashineeztą́’ígíí ayóo shił nilí. She’oodlą’ binahjį’ sodiszingo, Yisdá’iiníiłii éíí Ázhé’é Diyin God yich’į’ shá yáłti’go shisodiszin yá’ąąshdi shá náyiilááh. Áádę́ę́’ nát’ą́ą́ shiłnáhalne’. Ayóo shik’ihojidlí. Azhą́ hach’į’nidahwii’náa ndi hoł hasht’e hodítéedo dóó hoł hózhǫ́ǫ doo.
Bénáshniih, Naakits’áadah Diyin Yánaazínínii t’óó bitah níyáhą́ądą́ą́’, Elder David B. Haight bił nitsidinishgo’go sodiilzin. K’ad shinááhaígíí bííghahgo binááhai yę́ędą́ą́’, bich’į’ bee nahwii’nánę́ę́ k’ad shí ałdo’ bee shich’į’ nahwii’ná. Sodilzingo bízhi’ bénáshniih. T’áadoo déghal da ndi, ayóoga’ bił hózhǫ́ǫgo sodilzin. Azhé’é Yá’ąąshdi Hólóonii yich’į’ bił hózhǫ́ǫgo yich’į’ sodoolzin.
Bizhí t’ah ndi diists’a’ hódííniid yę́ędą́ą́’, “Jesus Christ bizhi’ binahjį.” Elder Haight bisodizinga’ Yisdá’iiníiłii bá lą’ yee asłį́į́’ shił nahalingo disíts’ą́ą́’. Áko shį́į́ iłhózhǫ́ bee bisodizin bá ndiilyá.
Nihidziilgo í’iil’ínígíí bee áká anéiilwo’go éí nitsaago bidziil dooleeł T’áá Aaníinii Ninályáhígíí binahjį’ Jesus Christ bidziilgo yiiniidláago t’áá aaníí nihiYisdá’iiníiłii nilį́įdo dóó nihiZhé’é Yá’ąąshdí Hólóonii t’áá aaníí nihiZhé’é dooleeł. Oodlą’ bee sodíilzingo, Bóhólníihii binaanish ła’ nihaidi’ááh Nínáánádáhígíí bee bíká adíilwoł biniiyé. Biká sodiszinii eíí t’áá áníiltso baa nihił dahózhǫ́ǫ naanish nihi yókeedígíí Bá ádadiilnííł dishní.
T’áá aaníí ádishníigo eíí Jesus Christ hiná. Díí Bí Bisodizin Bá Hooghan dóó nahasdzą́ą́’ bikáá’ bił haz’ą́ át’é. Joseph Smith Ninályáadi lá Diyin yá yáłti’í nilí. Naat’áanii Russell-M. Nelson éí Diyin Yá yáłti’ nilį́. Bí ałtso Diyin bibee ádziil bee ąą ńdaditį́hí dah yóojih Jesus Christ Binahagha’ Akée’di Dayoołkáałgo Yá Naazínígíí biyi’. Jesus Christ bízhi’ bináhjį’, áamen.