Ła’í Niidlį́įgo Diyin God Binaanish Ádeilnééh
Ahił ndéilnishgo t’éiyá bohónéedzą́ diyin k’éhjí bííniigahgo nihaa dadeest’ą́nígíí łá’ dadiilnííł, Diyin be’adziil dóó bi’óholníih bee nihik’ihojídlíi doo.
Shik’is dóó shilahkéí ayóó ánhíinish’níi, baa shił hózhǫ́ nihił honishłóníi. T’áá da’íísínółts’ą́ą́’góó, sáanii shijéí biyi’dę́ę́’ yá’át’ééh danihidishní dóó hastói shijéí bii’dóó k’é nihidishní. Ła’í niidlį́į́go Bóhólníihii binaanish ádeiilnííł.
Adam dóó Eve baa ntsíikeesgo, Eden bidá’ak’éhgi bił hasht’eh hodít’é niidzin t’óó ałtsé baa tsídiikosgo. T’áá áłahjį’ tł’óó’góó hózhóní shą’shingo baa ntséskees—doo ayóo deesdói dóó ayóo deesk’áaz da—dóó t’áá áhanígóó lą’ída nanise’ ałtah áát’éełgo dáalkanii yiyį́įh nisin. Díí nahasdzáá ániidii bá ályaa, lą’ígóó ha’doolziłígíí hóló, áko binaagóó dahózhóní yee’ t’áá áhwííjį́ naaldlóóshii binaagóó ndáakai dóó ha’íshį́į́ yik’í naanát’ash nt’éé’. Bí aldó’ bee haz’áanii béiyilyá yik’e hół’į́įdoo biniiyé dóó ał’ąąn ádaat’áo bee áda’él’į́, áko ła’ bił ałtáan nakáhgo t’óó bił náháłą́ą nt’éé’. 1 Ndi naha’áago be’íina’ hool’áágóó ła’ yik’éh áhoolaa, áhił náalnishgo yóhooł’ą́ą́’ dóó Diyin God biniiyé ábiilaa yę́ę yee łá’í silį́į’go yee náashnish—dóó ałtso Ba’áłchiní yá.
K’ad díí naakigo yi’ashígíí be’íina’ bee nół’į́. T’áá áłah yináalnishgo t’éi ayáá ńt’éé’, naaldlóóshii ałdó’ ła’ shich’íi yą’ dabó’níi ńt’éé’, dóó na’ahíntingo dóó ahił sodilzingo t’éiyá bee iiná nantł’ahígí yilaozh’áázh. Łah da shį́į́ na’ahíntingo ádoolnííł góne’ t’áá íiyisíí bá nantł’ah ńt’éé’. Ákondi, Náátłizh yęę ninahjį’, yits’ą́ą́dóó yaa’ákoniizį́’ii eíí t’áá hazhó’ó ayóó áhi’jó’ní dóó ła’í jílį́įgo ahił njóolnish. Ya’ąąshdę́ę́’ nabi’dineestą́ą́’, yisdá na’iildééh bee naneestą́ą́’ dóó Jesus Christ bina’nítin bik’éhgo óodaał yíhooł’ą́ą́’. Díí nahasdzáá bikáá’ nibi’dée’nilígíí hool’áágóó ahił náalnish doo biniiyé, ayóó áhi’dó’ní binahjį’ be’íina’ yá’át’éehgo áyiilaa.
Adam dóó Eve ba’áłchíní hazlį́į’go yá’ąąshdę́ę́’ hane’ ádeił’íinii nidabíneeztą́’ yę́ę ba’áłchíní ałdo’ yee neiineeztą́ą́’. Ba’áłchíní t’áá íiyisíí neineeztą́ą́’ ił hózhóo bee iinánígíí yik’éhgo dahináa doo biniiyé, áko lą’ígóó ídahooł’ą́ą́’ dóó Diyin God yik’eh dahółíi ńt’éé’ yinahjį’ yá’ąąshdi bishchíinii yich’į’ anáhidookah nízingo. Kót’áo ííł’į́įgo, Adam dóó Eve hool’áágóó bináanish t’áá’áłah ał’ąąn át’éego bídziilígíí yee ahíłká aná’ahinilchéhę́ę yaa ahééh nízin nt’éé’. 2
Áádoo neeznádiin dóó dimííl yázhí nááhai dóó nízaagóó náás hodeeshzhíízh, hastói dóó sáanii ahidiníłnáo yá’át’éehgo aheełt’áo ahił ndáalnishgo baa deet’ąnée t’óó bił yóó’ahooyá. Hózhónígo Eden bidá’ák’ehgi bił hahóolzhiizh dóó díísh jį́įjį’, nihe’ena’í ch’į́įdii be’iiníziin sáanii dóó hastói ałts’áyííniił bits’íís dóó bii’sizíi bee shíhólníi doo nízingo. Lúcifer eíí sáanii dóó hastói t’áá ła’í nilį́įgo ntsékees yę́ę doolchǫǫłígíí bił bééhózin, diyingo niilyáhą́ą dóó bił aha’diniit’ą́ nihináanish yę́ę t’óó yee nihił hółą́ągo, eíí aláadi hool’áágóó diyingo bee nihighan si’ąnígíí yidoołchǫǫł biká.
Satan eíí nihił tana’ágizh kót’áo bee aláadi ánísht’é hwiinidzinígíí bee dóó t’áá shí t’éíyá shida’ats’ih hwiindzinígíí bee, hooláágóó t’áá aanínígíí nihits’aa neiníł’in díí Diyin God bits’ą́ą́doo sáanii dóó hastói ał’ąąn át’éego bił bi’dizhchįnígíí dóó t’áá áłah aláadi baa ntsáhákeesígíí. Nihe’ena’í ch’į́įdii be’iiníziin biniinaa hooghan haz’ą́ągi łahgóó sáanii doo bídahólníi da dóó doo bizaa ílį́į́góó ádahósin. Bee hodinííshnęęł nízin nt’éé’ díí sáanii dóó hastói hai aláadi át’éhígíí áko doo ahídínéelnáágóó ádeeshłííł nízin nt’éé’ dóó doo t’áá ła’í nilį́į da doo nízin nt’éé’.
Áko, nahasdzáá bikáá’gi náás hodeeshzhíízh, sáanii dóó hastói bináanish ał’ąą’ át’áo yee ahił náalnish biniiyé ábi’diilyaa yę́ę ntsáo doo bééhózin da. Asdzání danlínígíí lą’ígo diné yá naalte’ danilį́įgo yaa náakai doo eíí ahéełt’áo dine’é yił ałhąąh ndáalnish da áko bináanish t’áá ach’į’ígo yaa ntsídaakees. Diyin k’éhgo náás óoldah yę́ę ne’kódzaao bił chahóółhéél; t’óó diné ayoo bídahólnííh daazlį́į́’go bekék’ehgóó adeesdee’.
Áádoo nt’éé’ t’áá’ aanínii Jesus Christ bina’nítin bee ch’i’dinídláád “jóhonaa’éí adiníłdíníí biláago” 3 Diyin God nihiZhé’é Niliníi dóó Bíye’, Jesus Christ, Joseph Smith ashkii nilį́įgo yaa ni’áázh dą́ągo tsitahdi 1820 yę́ędąą’ New Yorkdi. Akó hoodzaadóó bik’ijį’ yá’ąąsh bits’ą́ą́dę́ę́’ hane’ bee hahóolzhiizh. Ts’ída áłtsé Jesus Christ BiSodizin bá Hooghan biyi’ ninályáhígíí eíí Diyin God be’ádziil bi’óhólnííh. T’áá Aaníí Ninályáhígíí biyi’dóó, sáanii dóó hastói ahéełt’áo ahííshgha ahił yilnishígíí ts’ída aláadi át’é, eíí náanish diyingo Jesus Christ yilą́ąjį’ sizį́.
1842 biyi’, ániid Sodizin bá Hooghan hadilyáii sáanii aká adíijah dadííniid, Naat’áanii Joseph Smith díí yá’át’éego yá haidiilaa “Diyin bee adziil bee hadilyáago biyaagi dóó bekék’ehgóó hadilyaa.” 4 Bí ádiinííd, “Shí k’ad Diyin God bízhi’ binahjį’ bee ąą nídítį́hí nihich’į’ kóshłééh …—díí kodóó yá’át’éehgo bee hahoodoolzhish.” 5 Bee áandítį́hí bee ąą’ályaadóó éíí, łahgóó sáanii ólta’ bee bídahoolnííh daazlį́į́’, dóó ła’ éíí ánahat’áájí alą́ąjį’yidéilníísh, dóó t’áádoole’é baa hąąh hasinjí yee bídahólnííh kót’ao bee hoolzhish binahjį’ nahasdzáán bikáágóó k’ad ałdó’ t’áá ákót’é. 6
Díí Sodizin bá Hooghan biyi’dóó sáanii dayíkahígíí, eíí Relief Society wolyé, t’áadoo benáłt’éhégóó Diyin God bá yáłti’í be’ádziil bi’óhólníih yee yá haidiilaago sáanii náanish diyinii dóó baa hasti’ígíí yee bóhólníihgo yéidiní’ą́, dóó Sodizin bá Hooghan biyi’ ał’ąą át’ao yee nidáalnish doo biniiyé, doo eíí t’áá sahdii át’ée da. 7
Diyin bá yáłti’í Joseph Smith naagháhą́ą́dąą’ dóó díísh jį́įjį’, t’áá aaníí ninályáhígíí bee náás hóolzhishgo biyi’dóó ak’i’diitįįh bee ééhózinígíí Diyin God be’ádziil dóó bi’óhólníih binahjį’ sáanii dóó hastói bináanish diyinii dóó baa hasti’ígíí yee ádeił’į́. T’áá ániid bee nanhi’dineestą́ą́’ Diyin bee adziilii bibee áandítį́hí dah dayíjáhígí binahjį’ sáanii bá sohodizingo Diyin bee adziilii bibee óhólníihii yee ndaalnish. 8
Ghąąjį́’ 2019yę́ędą́ą́’, President Russell M. Nelson sáanii templegóó ndaaskaígíí neineeztą́ą́’ Diyin God bibee’adziilii be’adziil dabiníghangóó bee dahólǫ́ Diyin God yił aha’da’deest’ánę́ę yik’eh dahółį́įgo. 9 Hóníigo haadzíí’, sáanii ałdó’ yá’ąąshdę́ę́’ Diyin God be’ádziil bee bik’idahojidlí bibee’adziilii yee yił aha’da’deest’ą́ diné priesthood baa dahaasyáhíígí nahalingo.” T’áá ałtso bilahkéí ííłní, “nihí Yisdá’iiníiłii be’ádziil t’áá áłahjį’ nihiká adoolwółgo bee nihá ahóóti’ éíí bee nighan haz’ąądóó na’áłchíní dóó ayóó ádéiiní’níníí bee biká adíílwoł.” 10
Áko díísh ha’át’ao anhiłní? Hait’ao éí nihe’iina’ łahgo ádiilnííł Diyin God bibee óhólníihii dóó be’adziil bik’ida’diitįįhgo? Łahgo bik’i’di’diitį́łígíí éíí sáanii dóó diné ahił ndaalnishgo, lą’ígóó naanish ła’ dajiiłnįįh. 11 Ahidiníłnao naanish bee ahíłká anéiijah doo ałhaahoné binyé da. Azhą́ sáanii doo priesthood baa dahasyáada ndi, baa yááłti’ yę́ęgi’átao sáanii éíí Diyin bee’adziil bee bik’idahojidlí Diyin yił aha’da’deest’ánii binahjį’, dóó naanish diyinii baa dit’aahgo priesthood bee óhólníihii yee binaanish ádeił’į́.
Łah yoołkááł Bini’ant’ą́ą́ts’ózí biyi’, Naat’áanii Russell M. Nelson bił dahsíkéeo Joseph dóó Emma Smith bighan ánályáagi biyi’ Harmony, Pennsylvaniadi, akée’di yoołkáłí Aaron bibee ádziil ninályáhą́ądi. Naat’áanii Nelson díí T’áá’aaníinii Ninályáhígíí biyi’dóó sáanii ayóó át’ao binaanish ádayiiláago yaahalne’.
Naat’áanii Nelson ání: “Kwe’é priesthood ninályáhágí náshdaahgo T’áá’aaníinii Ninályáhígíí biyi’dóó sáanii ayóó át’ao binaanish ádayiiláagíí baa ntéskees łeh.
“Joseph t’óó áłtsé Mormon biNaaltsoos biyidę́ę́’ saad yéé’ádléhę́ędą́ą́’, háiishą’ bá na’azoh nt’éé’? T’áá bí áłch’į́į́dígo áyiilaa. Emma bíká eelwod.
“Áko baa ntséskees Joseph tsintahgo niyá bighan bííghahdi Palmyra, New Yorkdi. Háágóólá ííyá? Tsintah Hodiyinígóó níyá. Ha’át’íí lá biniiyé ákǫ́ǫ́ íiyá? Jó Bimá sodideeszííł nízingo áadi sondílzįįh ńt’éé’.
“Éíí naakigo sáanii ayóó át’ao priesthood ninályáhígíí dóó Sodizin bá Hooghan T’áá’aaníinii Ninályáhígíí yee íká ahi’noolchą́ą́’. Íídą́ą́’ át’éhą́ągi át’ao doo naaki nilį́į́go k’ad niheda’asdzą́ą́ ayóó’át’ao aláago nihiłdanlį́. Aoo’ t’áá aaníí ákót’é.”
Emma dóó Lucy dóó Joseph nahalingo, ahidahwiil’aah dóó ahíłká anéiijahgo Jesus Christ bikéé’ nisiidzį́įdoo dóó t’áá haishį́į́ ałdó bee bíká adiilwoł.
Díí bee nidanihi’dintin “Diyin God bibe’adziil ba’áłchíní yee lą’ígo yee yik’ijidlí. … Sodizin bá Hooghan biyi’dóó naanish diyinii haadit’áahgo, dóó Ataa’ bighan diyingo bee é’el’ínii haadit’áahgo, dóó haghan haz’ąądoo k’é da’ahizhdi’níigo, dóó t’áadoo iits’a’í ła’ baa áhojilyą́ągo, sáanii dóó diné Latter-day Saint danlínígíí Diyin God bibee ádziil dóó bee óhólnííh náás yee déiyikááh. Díí sáanii dóó diné Diyin God binaanish ahidíníłnaao yee ahił ndaalnish Diyin God Bibee’adziil yee ła’ deił’į́ éíí Prophet Joseph Smith binahjį’ Jesus Christ bina’nitin ninályáhígíí bee niłdzil.” 12
T’áá ła’í ídlíigo ahił nidajilnishgo eíí aláadi át’é Diyin bá na’anish nihá bee hoo’a’ dóó bich’į’ nihi’dool’aadígíí ádadiilnííł, doo éíí t’áá bí ła’ dooníił da. Ahił ndajilnishgo yá’át’ééhgo bee na’alkid – da’ahííjíists’ą́ą́’go, baa yádajiłti’ígo bik’idazh’diitįįh – ndi yá’ąąshdę́ę́ háka’awo’. Hooghanjí doodáo Sodizin bá Hooghanjí naanish bee nihídahólníhígíí, diyingo nihaahideest’ánée bídéiyíníigahgo bee ahił ndeilnishdo, bibee ádziil dóó bibee óhólníih bee nihik’ihojidlíi binahjį’ ahidadíníilnao ahił ndeilnish doo.
Dííshjį́idi sáanii ahił na’anish yee ałha’deet’ánígíí hait’ao yee keedahat’į́? Díí binahjį’ hashne’.
Alison dóó John t’áá doo beenáłt’éhégo áhiłnaalnish. Dzi’izí tandemígí áhání dóó ndzaadgóó yee ałháandíkahígí yee atah nát’ash. Hozhdínóołnéełgo, ałkéé’ dahjizkéhígíí doo ni’jiisíígo ahiłnijilnishgo t’éiyá. T’áá áhąąh ałhéé’ al’íigo t’éiyá doo dinóotł’a da. Doo ła’ aláahdi hóhólnííhgo, doo naaki nlíígo ahiłhojilne’go dóó ahiłnijilnishgo. Alą́ąjį’ígí naat’áanii ásizíi bi’di’ní, bik’ehgo bin’diidloh dóó bik’ehgo dahna’iizįįh. Akéé’dóógí stokerígíí, yéego t’áá ałtsojį’ ha’asííd dóó ałch’e’i’dólzin hazhóó’ógo ndilwodgo haayiiłyeed dóó ła’ yitsį́įjį’ nidilwo’go ni’ kwínáyiil’įįh. Áhilłká ana’ahinilchéehgo yá’át’ééhgo bee nahaldoh dóó ádeideet’ánígí yee ła’yoolííł.
Alison ání: “Áłtsé éíí ásizíi nilínígíí áníi łeh ‘Yiziih’ siidzį́įgo báyá’át’éhígóne’ dóó ‘Bídiishleeh’ níigo éíí t’áadoo nanisí níigo ání. Nináás dóó t’áadoo íits’a’í akéé’dóó dasidáhígíí bił beehózin łeh ásizíi dah yidooziiłígíí éí doodago yiidiileehgo. Ahidiníłnao ałha’áhwizhnidzin łeh ła’ ch’ę́ę́h át’ǫ́ǫ ła’ígí t’áá áko bika’iilwo’. Ałha’jódlíigo dóó ahiłnjilnishgo bee báyá’át’ééh.” 13
John dóó Alison dzi’izí néini’isígí yee ahił naalnish nt’éé’, ayééhgo ahéskéhígíí ałdó’ yee t’áá ła’í nilíigo yá’át’éehgo yee ahiłnaalnish. Iiná baahózhóonii t’éiiyá ałhá ndzin; yá’ádaat’éehii yee ahantsékees dóó doo ła’ doo bił áhót’éégo éíí yaa naalnishgo ałch’enáyoodlííł. Na’ahidlóózígíí yee ałnááhoot’asgo dóó ła’ ch’ééh át’íigo ła’ígí bíka’análwo’. Ahidiníłnao ííłínígíí ílíigo yee ahaantsékees dóó yéé hodólzinígíí dóó t’áádoole’é bee hólónígíí yá’át’éego yee ééhósin. T’áá íyisíí doo ałts’ájónííł át’éégo Christ bee ayóó ó’níí yee ayóó’áhi’dó’ní.
T’áá ła’í ídlį́įgo Diyin k’ehgo ahił na’anishíí díí jíidii bee nihide’áhoot’é nihinaago “shí ałtsé” daanínígíِ bee. Sáanii át’éedooígí, diyingo baa dahasyá 14 dóó yee naalnish doo binyé, ákondi éíí doo aláahdi da – dóó doo t’áá ach’į’ígo da – diné át’éhígíí dóó yee naalnishígíí bee. T’áá’ ánííltso éíí Nihizhé’é Yá’ąąshdi Hólónígíí ba’áłchiní niidlį́ dóó binahat’a’ nihaidini’ą́ bííníígahgo ła’ diilnííłgo nihá áyiilaa.
Dííjįįdi, “sáanii Nihimá Eve bidziilgo ntíkees yę́ę dóó doo náldzid yę́ęgi ádaat’éhígíí bídihóyéé’” 15 bilahkei yił ahididookahgo bila’ ashdla’ii t’áá ałtso Christ yich’į’ yiłnidahidookah. 16 Diné éíí nihííghahdoo bił ndeilnishdoo “doo éíí t’óó sha’ashingo” áko doo sáanii t’áásáhi yéegoo deilníísh da. Sáanii eíí t’áadoo ni’danlíní “náás didookah dóó danlínii diyingo baa deet’ánę́ę yee dóó yee naazį́nii bándzin” 17 ałhąąh deilnííshgo t’áadoo éíí t’áásáhí ádeeshłííł daníziní éíí doodago ádeeshłígíí shaadeet’ą́ągo inda biba’ daníziní. 18
Sáanii bidziilgo naazínígíí eíí doo ła’ yeełt’é dadii’níigo ałhąąh ninádei’nił da t’óó hazhó’ó t’áá aanínii bik’ida’didiitį́į́ł iidoolíłígíí diyingo baa deet’ą́. Doo kót’ao ádoolnííł dadii’níi da, t’áá nihí Diyin God sáanii bił nilįní gi’át’ao ániit’ée doo: aláahdi át’éhégíí bee aheełt’ao yisdá na’iildéhii dóó Diyin God bich’į’ ana’iildéhígíí bikándeilnish.
Bídeiyínííghahísh? Ał’ąą dine’é t’áadoo nahjį’ kódeil’įní dóó t’óó hazhó’ó ayóó ádeiní dóó diyin k’éhgo bił ndeilnishgóish t’áá bííniigah? Naat’áanii Russell M. Nelson ánhiłní “da’ahíinóhtą’go díí diyin bínaanish biyi’ yíikah … [bee] Bóhólníihii Naaki Góne’ Nádahígíí bibá’ dine’é hasht’e’ ádailnéhii bindáilnish.” 19 Díí bidéiiniilníish, nihił nílį́įgo ahídadíníilnao ádeil’įnígíí yéego náás bee hoolzhish dóó diyin k’éhgo nihaa daheesyáhígíí bee. Ts’ídá aláahdi ił hózhóonii bee nihił dahózhǫ́ǫ doo.
T’ááła’í niidzíngo Bóhólníihii Bínaanish bee t’ááła’í niidlį́įgo bindeilnishgo bee náás yíikah doo. Yisdá’iiníiłii ayóó íiníi’níi, Jesus Christ bízhi’ bináhjį’, áámen.