![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F63%2Fdb%2F63dbc33d38c0b40f3d729416e1ca9500f8c30cea%2F63dbc33d38c0b40f3d729416e1ca9500f8c30cea.jpeg/full/!250,/0/default)
Waklin! A’an nakatxb’oq
Li evangelio maawa’ jun ramleb’ chiruheb’ li yale’k ut ch’a’ajkilal, a’an b’an jun li tenq’ re taak’iiq li qapaab’aal ut re taqatzol chan ru elk chi uub’ej.
Wan chaq kutan anajwan xinpatz’ re li wixaqil, “Ma naru nakaye we k’a’ut naq maajun wa xqataw junaq xnimal ch’a’ajkilal sa’ li qayu’am?”
Kinril, kise’ek ut kixye, “Us. Tinye aawe k’a’ut naq maajun wa xqataw junaq xnimal ch’a’ajkilal; xb’aan naq jwal ka’ch’in laa wulul re xjultikankil!”
Rik’in lix sumehom xink’e reetal naq xyu’aminkil lix evangelio li Jesukristo ink’a’ naxsach li ra ut li yale’k, li aajeleb’ ru re k’iik.
Li evangelio maawa’ jun ramleb’ chiruheb’ li yale’k ut ch’a’ajkilal, a’an b’an jun li tenq’ re taak’iiq li qapaab’aal ut re taqatzol chan ru elk chi uub’ej.
Wiib’ oxib’ po chaq anajwan xinyu’ami li yaal a’an. Sa’ jun li kutan naq yookin chi b’eek, li wilob’aal xmoymoyo’; xin’ok sa’ q’ojyin. Xchal lin xiw. Eb’ laj b’anonel xe’xye we, “Wi ink’a’ nakatikib’ xb’anb’al anajwan, naru nakatkana chi mutz’, maare ink’a’ chiru naab’al xamaan.” Xniman lin xiw.
Ut chirix a’an, xe’xye, “Na’ajman naq taqoksi rik’in kuux—li b’an sa’ laa wu—taateemanq xsa’ laa wu—rajlal kaahib’ xamaan, chiru chik chixjunil laa yu’am.”
Moko sa ta rab’inkil a’an.
Jo’kan ut xchal jun lin k’a’uxl jo’ patz’om. Xinpatz’ wib’, “Us! Moko us ta xsa’ li wu re tib’elej, a’ut chan ru wan xsa’ li wu re musiq’ej? Ma aajel ru xb’anb’al ajwi’? Ut k’a’ru naraj naxye li ilok chi saqen ru sa’ musiq’ej?”
Xinna’leb’ak chirix li resil li winq mutz’, li naxk’ab’a’in aj Bartimeo, li na’el resil sa’ lix hu laj Markos. Li raqal naxye, “Ut naq kirab’i naq a’an li Jesus aj Nazaret, toja’ naq kixye chi kaw xyaab’ xkux: at Jesus, ralalat aj David, chawuxtaana wu.”
Choq’ reheb’ naab’al li kristiaan, li Jesus yal ralal chaq laj jose, jo’kan naq, k’a’ut naq laj Bartimeo xye re “Ralalat laj David?” Xb’aan naq xnaw ru naq a’an tz’aqal li Mesias, li xyeeman chaq resil xb’aaneb’ li profeet li taayo’laaq sa’ xcha’al xjunkab’al laj David.
Ch’ina-us rilb’al naq li winq mutz’, li ink’a’ naru chi ilok, kixnaw ru li Jesus. A’an kiru chirilb’al sa’ musiq’ej li ink’a’ naru chirilb’al sa’ tib’elej, us ta wan naab’aleb’ li ke’ru chirilb’al li Jesus sa’ tib’elej, a’b’anan mutz’eb’ tz’aqal sa’ musiq’ej.
Sa’ li seraq’ a’in naqatzol naab’al chirix li ilok sa’ musiq’ej chi chaab’il.
Naqil, “Li yookeb’ chi uub’ej ke’xq’us re naq tixkanab’ choqink: a’ut a’an q’axal kaw chik kixjap re chixyeeb’al, at ralal laj David chawuxtaana wu.”
Sa’ xsutam yookeb’ chixyeeb’al re naq xik’ naxye, a’b’an kixjap re chi kaw xyaab’ xkux xb’aan naq naxnaw ani li Jesus. Ink’a’ kixk’e xwankil lix yaab’ kuxej a’an, a’ut a’an kaw wi’chik kixjap re.
A’an kik’anjelak sa’ xna’aj kanaak chi k’anjelab’il a’an. Us ta wan lix rahilal, kiroksi lix paab’aal re naq ki’el chi uub’ej.
Jo’kan ut, li xb’een na’leb’ naqatzol a’an naq noko’ilok chi saqen ru sa’ musiq’ej naq naqajayali qib’ rik’in li Jesukristo ut naqayal qaq’e chi wank sa’ li yaal.
Ex was wiitz’in, re naq chaab’ilaq xsa’ li qu re musiq’ej, tento naq taqasik’ ru ink’a’ rab’inkil lix yaab’ xkux li ruchich’och’ wanko wi’. Sa’ li ruchich’och’ a’in li nasachok na’leb’ ut sachb’il ajwi’ xna’leb’, aajel ru naq wanqo chi tiik sa’ li k’a’ru naqanaw, naq tiik wanqo sa’eb’ li qasumwank, naq tiik wanqo chixpaab’ankileb’ li taqlahom, ut naq taqakawresi li qapaab’aal, jo’ kixb’aanu li winq a’in. Aajel ru naq taqawotz li qanawom chirix li Qaawa’ chi kaw xyaab’ qakux chiru li ruchich’och’. Li winq a’an naxnaw chaq ru li Jesus, kiwan chi tiik sa’ lix paab’aal, ut ink’a’ kixjalb’ehi rib’ rik’in lix yaab’ xkux li ruchich’och’.
Anajwan wankeb’ naab’aleb’ lix yaab’ kuxej neke’raj xsachb’al lix yaab’ qakux jo’ xtzolom li Jesukristo. Lix yaab’ xkux li ruchich’och’ neke’raj qasachb’al, jo’kan ut naq tento taqaye chi kaw xyaab’ qakux li qanawom chirix li Kolonel. Sa’ xyanq chixjunil lix yaab’ xkux li ruchich’och’, li Qaawa’ naroyb’eni naq laa’ut ut laa’in taqawotz li qanawom, taqataqsi lix yaab’ li qakux, ut toowulaq jo’ lix yaab’ xkux a’an. Wi ink’a’ naqab’aanu, ani taach’olob’anq chirix li Jesukristo? Ani taa’aatinaq chirix lix k’ab’a’ ut taach’olob’anq re lix choxahil k’anjel?
Wan jun qataqlankil sa’ musiq’ej li nachal xb’aan lix nawom qach’ool chirix li Jesukristo.
A’b’an k’aru kixb’aanu laj Bartimeo chirix a’an?
Naq li Qaawa’ kixtaqla naq taawakliiq, kixb’aanu wi’chik rik’in paab’aal.
Li loq’laj hu naxye: “Ut a’an kixkut lix b’atb’al, ak taapisk’oq, kichal rik’in li Jesus.”
Li winq a’an tuulan ut tiik xch’ool kixtaw ru naq naru naxtuqub’ ru lix yu’am wi li Jesus naxtaqla a’an. A’an kixnaw naq us wi’chik chiru li wan wi’, ut li k’a’ru kixb’aanu xb’een wa naq kirab’i naq li Jesus yoo chixb’oqb’al a’an risinkil lix q’eel t’ikr.
Jun sut wi’chik kik’anjelak a’an ut ink’a’ kiroyb’eni naq k’anjelanb’ilaq.
Maare xk’oxla, “Ink’a’ chik nawaj a’in, anajwan naq li Jesus wan chik sa’ lin yu’am. A’in jun chik li ak’ kutan. Ink’a’ chik nawaj li yu’am re rahilal. Rik’in li Jesus naru nintikib’ jun chik li ak’ yu’am re sahil ch’oolejil sa’ xk’ab’a’ a’an, rochb’een a’an, ut rik’in a’an. Maak’a’ nawaj re li tixk’oxla li ruchich’och’ chiwix. Li Jesus nikinxb’oq ut tinxtenq’a chixyu’aminkil jun ak’ yu’am.”
Jwal ch’ina-us tz’aqal li jalaak a’in!
Naq kixtz’eq lix q’eel t’ikr, kirisi chixjunil lix k’a’uxl naramok re.
Ut a’an a’in xkab’ li na’leb’: nachaab’ilo’ xsa’ li qu re musiq’ej naq naqakanab’ li qaruchich’och’il winq, naqajal qak’a’uxl, ut naqatikib’ jun li ak’ yu’am rik’in li Kristo.
Li b’e re xb’aanunkil a’an, a’an xk’ulb’aleb’ ut roxloq’inkileb’ li sumwank li te’k’amoq qe sa’ jun chaab’il yu’amej rik’in li Jesukristo.
Naq junelik yooqo chixk’oxlankil naq ra li naqak’ul xb’aan li qawanjik, ut li qach’a’ajkilal, ut xb’aan chixjunil li k’a’aq re ru naqak’ul sa’ li qayu’am, ut ajwi’ xb’aaneb’ chixjunileb’ li kristiaan li naqak’oxla naq neke’xmaq’ xsahil qach’ool, toj yooqo chixk’uulankil li qaq’eel t’ikr. Yaal naq wan hoonal naq eb’ li kristiaan, ma yal neke’raj malaj ink’a’, nokohe’xrahob’tesi. A’b’anan, aajel ru naq taqasik’ elk chi uub’ej rik’in paab’aal chirix li Jesukristo re risinkil li qaramb’al sa’ musiq’ej li maare toj naqak’am re xmuqb’al li na’leb’ ink’a’ us ut li qamaak, ut taqatz’eq, xb’aan naq naqanaw naq a’an naru nokoxk’irtesi ut tooxk’irtesi.
Maajun wa tooruuq chixyeeb’al, “Wankin jo’ chanru wankin xb’aan junjunq li k’a’aq re ru tento taak’ulmanq. Ut ink’a’ ninru chi jalaak, ut wan reetalil a’an.”
Naq naqak’oxla chi jo’kan, naqakanab’ naq k’anjelanb’ilaqo.
Naqak’uula li qaq’eel t’ikr.
K’anjelak rik’in paab’aal naraj naxye xpaab’ankil li qaKolonel, xpaab’ankil naq rik’in lix tojb’al rix li maak kixb’aanu, naru nokowaklesiik sa’ xb’een chixjunil jo’ naxtaqla a’an.
Li rox li raqal natawman sa’eb li kaahib’ chi aatin: “kichal rik’in li Jesus.”
Chan ru kiru chi nach’ok rik’in li Jesus wi mutz’? Kiru chi xik yal rik’in rab’inkil lix yaab’ xkux li Jesus.
Ut a’an a’in li rox na’leb’: teetooq tz’aqal xsa’ li qu re musiq’ej naq naqab’i lix yaab’ xkux li Qaawa’ ut naqakanab’ naq a’an tooxb’eresi.
Jo’ naq li winq a’an kixtaqsi lix yaab’ xkux sa’ xb’een chixjunileb’ li wankeb’ aran, kiru chirab’inkil lix yaab’ xkux li Qaawa’ sa’ xyanqeb’ chixjunileb’ li xyaab’ kuxej.
A’an ajwi’ li paab’aal a’an li kib’aanunk re naq laj Pedro kib’eek sa’ xb’een li ha’ naq lix jayalihom sa’ musiq’ej kiwan rik’in li Qaawa’ ut ink’a’ kixjal li rilob’aal xb’aan li iq’ na’apun chixsutam.
Jo’kan b’i’ li seraq’ chirix li winq mutz’ naraqe’ rik’ineb’ li aatin a’in “Ut chi junpaat ki’ok chi ilok ut kixtikib’ xtaaqenkil li Jesus sa’ b’e.”
Jun li raqal jwal aajel ru sa’ li seraq’ a’in a’an naq li winq kixk’e tz’aqal xpaab’aal chirix li Jesukristo ut kixk’ul jun li sachb’a-ch’oolej xb’aan naq kixpatz’ chi wan rajom, li tz’aqal rajom re xtaaqenkil a’an.
Ut a’in tz’aqal li rajom li osob’tesiik naqak’ul sa’ li qayu’am, a’an xtaaqenkil li Jesukristo. Naraj naxye xnawb’al ru a’an, ok sa’ sumwank rik’in li Dios ut roxloq’inkil li sumwank sa’ xk’ab’a’ a’an, xjalb’al li qawanjik xb’aan tz’aqal a’an, ut xyalb’al qaq’e toj sa’ roso’jik rik’in xtaaqenkil a’an.
Choq’ we, re naq saqenaq ru li wilob’aal sa’ musiq’ej tento tinjayali wib’ rik’in li Jesukristo.
Jo’kan b’i’, ma saqen xsa’ li wu re musiq’ej, naq nab’ane’ xsa’ li wu sa’ tib’elej rik’in li kuux? Anihin laa’in re raqok aatin? A’b’an wan inb’antioxihom rik’in li nawil.
Nawil tz’aqal li ruq’ li Qaawa’ sa’ li santil k’anjel a’in ut sa’ lin yu’am.
Nawil lix paab’aaleb’ naab’aleb’ li kristiaan yalaq b’ar nikinxik li neke’xkawob’resi lin paab’aal laa’in.
Nawileb’ li anjel sa’ insutam.
Nawileb’ lix paab’aal li kristiaan li ink’a’ rilomeb’ ru li Qaawa’ sa’ tib’elej, neke’xnaw b’an ru sa’ musiq’ej, xb’aan naq nach’ tz’aqal wankeb’ chixk’atq.
Ninch’olob’ xyaalal naq li evangelio a’in a’an xsumenkil chixjunil li k’a’aq re ru, xb’aan naq li Jesukristo a’an xsumenkil chixjunil li k’a’aq re ru. Jwal ninb’antioxin xb’aan li nawil naq nintaaqe lin Kolonel.
Ninch’olob’ xyaalal naq wi naqab’i xyaab’ xkux li Qaawa’ ut naqakanab’ a’an chiqab’eresinkil sa’ xb’ehil li sumwank re li Kolonel, too’osob’tesiiq re ilok chi saqen ru, re tawok-u rik’in sa’ musiq’ej, ut re xk’ulb’al li qach’ool ut li qak’a’uxl chiru li qayu’am.
Chiqawotz taxaq chi kaw lix nawom qach’ool chirix a’an, kawaq wi’chik chiruheb’ li xyaab’ kuxej wankeb’ sa’ qasutam, sa’ jun ruchich’och’ li naraj rab’inkil resil li Jesukristo ut ink’a’ chi yal b’ayaq. Nintz’aama naq taqatz’eq li qaq’eel t’ikr ut naq toonumtaaq sa’ xb’een li ruchich’och’, toj reetal li ch’aab’il yu’am rik’in li Jesukristo. Nintz’aama naq taqakanab’ chixjunil li k’a’aq re ru li moko nokoxkanab’ ta xtaaqenkil li Jesukristo ut taqataw xsahil xtaaqenkil, rajlal naq taqab’i lix yaab’ xkux. A’in li nintz’aama, sa’ lix k’ab’a’ li Jesukristo, amen.