![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fbe%2Fa1%2Fbea127aada7087b3800ad0bc7101b51a78b8af01%2Fbea127aada7087b3800ad0bc7101b51a78b8af01.jpeg/full/!250,/0/default)
Paab’ank chi tiik toj saʼ rosoʼjik
Xb’aan li ruq’ a’an, texruuq chi numtaak sa’ xb’een li junjunq chi aj Goliat li taachalq sa’ lee yu’am.
Ex saaj wamiiw, anajwan nawaj aatinak eerik’in laa’ex—ex saaj sa’ li Iglees.
Jun chihab’ chaq koob’oqe’ sa’ li Jolomil Awa’b’ejil reheb’ li Saaj ixq. K’a’jo’ xk’ihal li xk’ulman chiru li chihab’ a’in!
Xqanaw eeru naab’al eere ut xqatzoleb’ lix k’utum li Kristo sa’ komonil. Xe’qab’icha li b’ich, xe’qataw qamiiw, ut xook’anjelak eerik’in sa’ k’iila na’ajej. Xookawob’resiik xb’aan lix nawom eech’ool sa’eb’ li ch’utub’aj-ib’ reheb’ li saaj ut sa’ li ninqi k’anjel. Ut sa’ komonil xooloq’onin sa’ li rochoch li Qaawa’.
Rajlal sut naqawotz li raatin li Qaawa’ Jesukristo. Ut a’an ajwi’ li taak’ulmanq sa’ li ewu a’in; nawaj aatinak eerik’in laa’ex, ex saaj sa’ lix Iglees li Jesukristo.
Li nimla patz’om
Ma eek’oxlahom jun sutaq chan ru texkuyuq chi paab’ank chi tiik chiru li Dios naq wankex sa’ jun ruchich’och’ aj maak? B’ar neketaw eekawilal re xik chi uub’ej ut chixb’aanunkil rajlal li us? Chan ru nekenumsi li sahil ch’oolejil tz’aqal yaal?
Nink’oxla naq li seraq’ chirix laj David ut laj Goliat naru taatenq’anq.
Laj David ut laj Goliat
Sa’ li Najter Chaq’rab’, eb’ li teep aj pleet aj Filisteo ke’pleetik rik’ineb’ laj Israelita, ut sa’ eq’la ut sa’ q’ojyin, jun nimla winq aj Filisteo aj Goliat xk’ab’a’ kixyaab’asi naq chichalq yalaq ani aj Israelita chi pleetik rik’in.
Sa’ xyanqeb’ laj Israel kitawman laj David, jun saaj aj ilol karneer li q’axal ka’ch’in xteram chiru laj Goliat a’b’an k’a’jo’ xnimal lix paab’aal chirix li Jesukristo! Laj David kixye naq a’an taapleetiq. Us ta li rey kixyal xq’unb’esinkil xch’ool re naq ink’a’ taaxik, laj David kixsik’ ru xkanab’ankil rib’ sa’ ruq’ li Jesukristo.
Rub’elaj a’an, laj David kipleetik rik’in jun li kaqkojl ut jun li oso. Rik’in li kixk’ul, a’an kixnaw naq li Dios xkol rix ut xtenq’a chi elk chi uub’ej. Sa’ xk’a’uxl laj David, lix k’anjel li Dios a’an li k’anjel q’axal nim xwankil. Jo’kan ut naq, chi nujenaq rik’in paab’aal chirix jun Dios li ink’a’ tixkanab’, a’an kixxokeb’ oob’ li pek, kixchap lix jok’, ut naxik chi yalok rik’in li nimla winq.
Nayeeman sa’ li loq’laj hu naq li xb’een pek kixkut laj David kixket xpeekem laj Goliat, ut kixraq xyu’am.
Xsik’b’al li sumehom
Laj David kiroksi yal jun chi pek re xkamsinkil laj Goliat, a’b’an kixkawresi rib’ rik’in oob’. Oob’! A’in nikinixk’e chixk’oxlankil chan ru naru tinkawresi wib’ re xk’ulb’al li ruchich’och’.
Qayehaq naq li junjunq chi pek kixchap laj David nareetali jun kawilal naqaj ru re elk chi uub’ej sa’ li qayu’am? K’a’ruheb’ raj li oob’ chi pek a’an? A’an a’in li xink’oxla laa’in:
-
Lix pekil lin rahom choq’ re li Dios.
-
Lix pekil lin paab’aal chirix li qaKolonel, Jesukristo.
-
Lix pekil lin nawom chirix anihin tz’aqal laa’in.
-
Lix pekil lix jalb’al ink’a’uxl wulaj wulaj.
-
Lix pekil lin b’e re roksinkil lix wankil li Dios.
Qatz’ilaq rix chan ru naq noko’osob’tesiik xb’aaneb’ li kawilal a’in.
Xb’een, lix pekil lin rahom choq’ re li Dios. Xraab’al li Dios a’an li xb’een xnimal ru taqlahom. Li hu Choq’ re Xkawilaleb’ li Saaj naxye: “Li Dios nakatxra. A’an laa Yuwa’. Lix rahom li tz’aqal re ru naru tatxmusiq’a chixraab’al ajwi’ a’an. Naq laa rahom choq’ re laa Choxahil Yuwa’ wan jo’ xb’eenil sa’ laa yu’am, saqen wi’chik ru li b’e taasik’ ru.”
Li qarahom choq’ re li Dios ut li qasumwanjik rik’in a’an naxk’e qe li metz’ew naqaj ru re xjalb’al li qach’ool ut chi numtaak sa’ xb’eeneb’ lix yalb’al qix.
Xkab’, lix pekil lin paab’aal chirix li qaKolonel, Jesukristo. Naq li Jesukristo kichal sa’ li ruchich’och’, kixk’ul rahilal sa’ xk’ab’a’ li qamaak, ut kixk’ul sa’ xb’een a’an lix rahil qach’ool, li qarahilal, lix q’unal qametz’ew, ut li qayajel sa’ tib’elej ut sa’ k’a’uxlej. Xb’aan a’in naq naxnaw chan ru qatenq’ankil. Xpaab’ankil li Jesukristo naraj naxye xpaab’ankil lix nawom, lix hoonal, lix rahom, ut lix wankil re xtojb’aleb’ rix li qamaak. Li pek re paab’aal chirix li Jesukristo tixq’ax ru yalaq k’a’ chi “nimla winq” sa’ li qayu’am. Naru toonumtaaq sa’ xb’een li t’anenaqil ruchich’och’ xb’aan naq a’an kinumta sa’ xb’een xb’een wa.
Li rox, lix pekil lin nawom chirix anihin tz’aqal laa’in. Li qaraarookil profeet, Awa’b’ej Russell M. Nelson, kixk’ut chiqu naq li jwal aajel ru sa’ li qawanjik, a’an naq laa’o ralal xk’ajol li Dios, laa’o ralal xk’ajol li sumwank, ut laa’o lix tzolom li Jesukristo.
Chixjunil najala naq ninnaw anihin tz’aqal laa’in. Naq nawiib’an inch’ool chirix lin seeb’al, ninka’suti sa’ ink’a’uxl malaj chi kaw xyaab’ inkux, “Laa’in jun xrab’in li Dios, laa’in jun xrab’in li Dios,” jo’ k’ihal sut nawaj ru toj reetal naq taakawuuq inch’ool re xik chi uub’ej.
Xkaa, lix pekil lix jalb’al ink’a’uxl wulaj wulaj. Sa’ li hu Choq’ re Xkawilaleb’ li Saaj, naqil: “Li jalb’a-k’a’uxlej maawa’ tojb’a-maak xb’aan laa maak; a’an b’an li b’e nokorach’ab’ wi’ li Jesus chiru li maak. Xjalb’al qak’a’uxl naraj naxye xjalb’al qayu’am―xsutq’isinkil qib’ rik’in li qamaak ut sutq’iik rik’in li Dios. Naraj naxye chaab’ilo’k ut xk’ulb’al xkuyb’al li qamaak. Moko yal jun sut ta ajwi’ nak’ulman; rajlal yoo chi k’ulmank.”
Maak’a’ chik k’a’ru naseeb’ob’resin re li qaam chiru reek’aankil naq kuyb’il qamaak xb’aan li Dios ut xnawb’al naq saq qu ut k’amb’ilo wi’chik sa’ usilal rik’in a’an. Li kuyuk maak naru na’ux choq’ re chixjunileb’ li kristiaan.
Li ro’ li pek a’an lix pekil lin b’e re roksinkil lix wankil li Dios. Eb’ li sumwank noko’ok wi’ rik’in li Dios, jo’eb’ li naqab’aanu sa’ li k’ojob’anb’il k’anjel re li kub’iha’, nokohe’xtenq’a chiroksinkil wankilal re choxahilal. Lix wankil li Dios a’an jun wankilal tz’aqal yaal li nokoxtenq’a chixk’ulb’al li yale’k-ix, chixsik’b’al ru li us, ut chixnimob’resinkil li qaseeb’al re xkuyb’aleb’ li ch’a’ajkilal. A’an jun wankilal li nokoxtenq’a chi k’iik rik’ineb’ li seeb’al neke’qaj ru.
Li hu Choq’ re Xkawilaleb’ li Saaj naxye: “Eb’ li sumwank nakate’xb’ak’ rik’in laa Choxahil Yuwa’ ut li Kolonel. Neke’xnimob’resi lix wankil li Dios sa’ laa yu’am.”
Qatz’ilaq rix li b’ak’e’k a’an. Ma najultiko’ eere naq li Kristo kixk’ut chan ru naq jalan li ochoch kabʼlanbʼil saʼ xbʼeen li saqoonaq rik’in li ochoch kab’lanb’il sa’ xb’een samahib’? Li Elder Dieter F. Uchtdorf kixye: “Jun kab’l ink’a’ naxkuy li kaq-sut-iq’ xb’aan naq kaw rib’ li kab’l. Ink’a’ naxkuy xb’aan naq kaw rib’ li saqoonaq. Li kab’l naxkuy li kaq-sut-iq’ xb’aan naq junajinb’il chi kaw rik’in li kawil saqoonaq a’an. A’an lix kawilal li junajiik li aajel ru.”
Li qajunajil rik’in li Jesukristo tixk’e xkawilal qach’ool re xik chi uub’ej sa’ xyanqeb’ li neke’reetz’u li qapaab’aal ut li nokohe’xrahob’tesi. Li Kristo nokoxb’oq chixk’oxlankil a’an rajlal; A’an naxye qe, “Chexʼiloq wankin wiʼ saʼ li junjunq eekʼoxlahom.” Xk’oxlankil li Kolonel naxkutanob’resi li qak’a’uxl re xsik’b’al ru li qab’e, k’anjelak chi maak’a’ qaxiw, ut xtz’eqtaanankil li k’a’ru naxka’pak’ali lix k’utum li Dios. Naq ninnumsi li ch’a’ajkilal ut naweek’a naq ink’a’ chik tinkuy, xk’oxlankil li Kristo naxk’e lin tuqtuukilal ut li woyb’enihom.
Chan ru naru naqoksi lix wankil li Jesukristo? Aajel ru xpaab’ankileb’ li qasumwank ut xnimob’resinkil li qapaab’aal chirix li Jesukristo.
Relik chi yaal, us raj wi laj David kixxok raj jun chik li pek; a’anaq raj lix pekil lix nawom inch’ool. Lix nawom qach’ool nakawresiik rik’in li musiq’ejil na’leb’ naqak’ul sa’ junesal b’ar wi’ naqak’e reetal li santilal sa’ li qayu’am. Maa’ani naru nachapok re li nawom a’an chiqu. Xnawb’al li k’a’ru naqanaw rik’in xnumsinkil li musiq’ejil na’leb’ a’an maajo’ nimal xtz’aq. Xk’amb’al qib’ chi tiik rik’in li nawom a’an nokorach’ab’. Naxk’e xsahil qach’ool! Wi naqara li yaal, taqasik’, ut naq taqataw, taqakol rix.
Li b’oqok
Jo’ naq xinsik’ ru li xwaq li pek, laa’in nekexinb’oq chi na’leb’ak sa’ lee tzoleb’aal, lee molam, malaj lee junkab’al chirix k’a’ chik ru chi kawilal nekeraj ru xtawb’al re kanaak chi paab’ank chi tiik chiru li Dios ut, chi jo’kan, numtaak sa’ xb’een li ruchich’och’.
Li yeechi’ink
Ex wamiiw, li Kristo yo’oon wan re qochb’eeninkil sa’ xb’ehil li qayu’am. Ninyeechi’i eere naq wi teechap li b’arb’ookil ch’iich’, texb’eeq chi chapcho lee ruq’ sa’ ruq’ li Jesukristo. A’an tixk’am eeb’e, ut a’an tixk’e eena’leb’. Xb’aan li ruq’ a’an, texruuq chi numtaak sa’ xb’een li junjunq chi Goliat li taachalq sa’ lee yu’am.
Li xnawom ch’oolej
Ninch’olob’ xyaalal naq wan sahil ch’oolejil sa’ li tijok wulaj wulaj, sa’ rilb’al lix Hu laj Mormon wulaj wulaj, sa’ xk’ulb’al li loq’laj wa’ak rajlal domingo, ut sa’ li xik sa’ seminario—us ta jwal eq’la a’an! Wan sahil ch’oolejil sa’ xb’aanunkil li us.
Wan sahil ch’oolejil sa’ li wank chi tiik chiru lix Dios li choxa ch’och’, laj Kolol re li ruchich’och’, lix Reyeb’ li rey. Wan sahil ch’oolejil sa’ li wank jo’ xtzolom li Jesukristo.
Li Dios a’an li qaYuwa’. A’an naxnaw li rajom eech’ool ut li naru teeb’aanu, ut a’an nekexxkanab’ chixsik’b’al eeb’e.
Ex saaj, li Jesukristo texxtenq’a chi wank chi tiik chi paab’ank toj’ sa’ roso’jik. Ninch’olob’ xyaalaleb’ li na’leb’ a’in sa’ xk’ab’a’ li Jesukristo, amen.