![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F3b%2F4e%2F3b4ed05eaa17cbc93ba3c5bc8b03a6de4432b671%2F3b4ed05eaa17cbc93ba3c5bc8b03a6de4432b671.jpeg/full/!250,/0/default)
Xka’pak’alil chixjunil li k’a’aq re ru
Re naq tooruuq chiroksinkil li xtaql li qach’ool, tento taawanq k’a’ru taqatz’il rix sa’ ka’kab’il.
Toje’aq, naq yookin chaq chixb’eresinkil lin b’eleb’aal ch’iich’ sa’ jun li na’ajej ink’a’ nawb’il ru qab’aan, xinsurisi wib’ ut kook’ame’ li wixaqil ut laa’in sa’ jun li ch’ina be’ chi k’iila kiloom ut ink’a’ xooru chi sutq’iik wi’chik. Kiqak’ul jun li qab’oqb’al re rula’aninkil jun li qamiiw ut ki’ok qak’a’uxl rik’in naq jwal toob’ayq wi’chik chi wulak.
Naq wanko sa’ li b’e a’an ut yookin chixsik’b’al b’ar too’elq, kink’e li maak sa’ inb’een xb’aan naq ink’a’ kink’e reetal chi us li sistema re navegacion. Chirix naq xink’ul chi jo’kan, xin’ok chixk’oxlankil naq sa’ qayu’am wan naq noko’ok chixb’aanunkil li ink’a’ us, ut chan ru tooruuq chi wank rik’in tuulanil ut kuyuk toja’ naq tooruuq chi sutq’iik wi’chik.
Li qayu’am junelik naraj naq taqasik’ ru li qab’e. Li qaChoxahil Yuwa’ xmaatani qe li xtaql li qach’ool re ajwi’ naq tooruuq chi tzole’k sa’ xsik’b’al ru li qab’e—ma li chaab’il malaj li ink’a’ chaab’il. Noko’el sa’ li b’e ink’a’ us rik’in xjalb’al qak’a’uxl. Chi jo’ka’in naq na’ux li k’iik. Li na’leb’ kixkawresi choq’ qe li qaChoxahil Yuwa’, a’an re naq tootzoloq, took’iiq, ut tooxik chi uub’ej sa’ xjayal li junelik yu’am.
Chirix naq laa’in ut li wixaqil xootzole’ xb’aaneb’ li misioneer ut xoo’ok sa’ li Iglees k’iila chihab’ chaq, junelik natoche’ li waam xb’aan li na’leb’ kixk’ut laj Lehi chiru li ralal laj Jakob sa’ lix Hu laj Mormon. Kixk’ut chiru naq “li Qaawaʼ Dios kixkʼe re li winq re tixbʼaanu xjunes ribʼ li naraj” “ut naq tento taa’uxq naq taawanq chixka’pak’alil chixjunil li k’a’aq re ru.” Re naq tooruuq chiroksinkil li xtaql li qach’ool, tento taawanq k’a’ru taqatz’il rix sa’ ka’kab’il. Naq a’an yooko chixb’aanunkil, lix hu laj Mormon naxjultika ajwi’ naq “kʼeebʼilebʼ tzʼaqal qanaʼlebʼ” ut “naq lix Musiq’ li Kristo” k’eeb’il qe chiqajunilo, re naq “taqanaw b’ar wan li us ut li ink’a’ us.”
Sa’ li qayu’am, rajlal wankeb’ li b’e li tento taqatz’ileb’ rix. Qayehaq:
-
Xtz’ilb’al rix ma taqataaqe lix taqlahom li Dios.
-
Xsik’b’al ru li paab’ank, ut xk’eeb’al reetal li sachb’a-ch’oolej, malaj xtz’eqtaanankil li paab’ank wi ta toj maak’a’ wan li naqil.
-
Xpaab’ankil naq li Dios tooxtenq’a, malaj xxuwankil naq taawanq ch’a’ajkilal sa’ li kutan chal re.
Chanchan li xink’ul laa’in naq xinsach sa’ li b’e a’an, maare jwal ra wi’chik naq nokosach sa’ xk’ab’a’ li xqasik’ laa’o xb’aan naq wan li maak sa’ qab’een qajunes. A’b’anan, junelik naru naqasik’ ru xk’ojob’ankil qach’ool rik’in li jalb’a-k’a’uxlej, xtuqub’ankil ru li ink’a’ us, ut xk’ulb’al qana’leb’ xb’aan.
Wan ajwi’ naq naru taqak’ul li ch’a’ajkilal ut li yale’k-ix b’ar wi’ maak’a’ toojaleeq. Maare chi jo’ka’in:
-
Xk’ulb’al li kawilal malaj li yajel.
-
Xnumsinkil li tuqtuukilal malaj li pleetik sa’ tenamit.
-
Xk’ojlajik li hoonal re kutan malaj ewu, ut xpohil li saq’ehil malaj hab’al q’e.
-
Xnumsinkil xq’ehil li k’anjelak rub’elaj xq’ehil li hilank.
Us ta ink’a’ naru taqaye k’a’ru taqak’ul sa’ li k’a’aq re ru a’an, naru b’an taqaye chan ru taqanumsi. Tooruuq chixnumsinkil rik’in sahil ch’oolej malaj rahil ch’oolej. Naru taqasik’ qana’leb’ ut li qatenq’ankil xb’aan li Qaawa’, malaj naru taqak’oxla naq wanko qajunes sa’ xnumsinkil li ch’a’ajkilal. Naru “taqajalb’ehi li qajukub’” sa’ li ak’ b’e, malaj ut naru taqaye naq maak’a’ toojaleeq. Naq sa’ q’ojyin wanko, naru taqaloch li qasaqen. Sa’ xkehil li hab’al q’e, us raj taqak’e chiqix li aq’ej tiq tiq ru. Sa’ xq’ehil li yajel, naru taqasik’ li b’an ut li musiq’ejil tenq’. Naqasik’ chan ru taqanumsi chixjunil li k’a’aq re ru naqak’ul.
Lix yiib’ankil qana’leb’, li tzolok, li sik’ok, xsik’b’al ru qab’e, ink’a’ na’ux yal xjunes rib’. Chinaq sa’ qach’ool naq laa’o aj b’aanunel. Maawa’o yal aj k’ulunel. Misach sa’ qach’ool naq li Jesus kixye naq “tixk’ul sa’ xb’een lix rahileb’ ut lix yajeleb’ lix tenamit … re taaruuq … xk’eeb’al qatenq’ankil” naq yooko chixsik’b’al a’an. Naru naqasik’ ru xk’ojob’ankil qib’ sa’ xb’een li saqoonaq, a’an li Jesukristo, re naq wi taak’ulunq li sut iq’ “maak’a’aq xwankil sa’ qab’een.” A’an kixye naq “yalaq ani li taachalq [rik’in], a’an tixxk’ul; ut osob’tesinb’ileb’ li neke’chal [rik’in].”
Anajwan ut, wan jun chik li na’leb’ li jwal aajel ru. Laj Lehi kixye naq “tento taa’uxq … chixka’pak’alil chixjunil li k’a’aq re ru.” A’an naraj naxye naq maak’a’ naru tixjach rib’ rik’in lix tz’aqob’. Naru ajwi’ te’xtenq’a rib’ chirib’ileb’ rib’. Ink’a’ raj tooruuq chixnawb’al li sahilal wi ta ink’a’ ak xqak’ul junaq li rahilal. Li tz’okaak nokoxtenq’a chi saho’k sa’ xb’antioxinkil li wa. Ink’a’ raj tooruuq chixnawb’al b’ar wan li yaal wi ta maab’ar ajwi’ naqil li tik’ti’.
Li tz’aqob’resink-ib’ a’in chanchan ajwi’ li xka’pak’alil ru jun li tumin. Rajlal rajlal nawan xka’pak’alil ru. Wan li na’leb’ a’an sa’ li aatin kixtz’iib’a laj Charles Dickens, li naxye, “a’an xq’ehil li jwal us, a’an xq’ehil li jwal ink’a’ us.”
Inyehaq chan ru naq laa’in ut li wixaqil naqak’ul chi jo’kan sa’ qayu’am laa’o. Li sumlaak, li junkab’alib’k, ut xk’iiresinkileb’ li qakok’al xk’e li sahil ch’oolej jwal nim sa’ qayu’am, a’b’an xk’e ajwi’ li rahil ch’oolej jwal nim naq wan ani sa’ qayanq li naxk’ul xtoch’olal, xyoʼtik li raam, malaj xrahilal. Wan naq chirix li sahil ch’oolejil rik’ineb’ li qakok’al na’ok ajwi’ k’iila sut sa’ li yajel, li oksiik sa’ b’anleb’aal, xsachb’al li wark xmaak li qak’a’uxl, ut xk’ojob’ankil ajwi’ qach’ool rik’in li tijok ut li qosob’tesinkil sa’ li tijonelil. Li xka’pak’alil xqak’ul xk’ut chiqu naq maajun wa wanko qajunes rik’in xnumsinkil li rahilal, ut naxk’ut ajwi’ li jo’ k’ihal tooruuq chixkuyb’al rik’in xtenq’ li Qaawa’. Li k’a’ru xqak’ul xtz’aqob’resi ru li qana’leb’, ut anajwan wan xwankil chixjunil. Ma ink’a’ tab’i’ choq’ re a’an li qayu’am arin?
Na’ilman ajwi’ a’in sa’eb’ li loq’laj hu:
-
Laj Lehi kixye re li ralal laj Jakob naq li ch’a’ajkilal li kixnumsi sa’ li yamyookil ch’och’ kixtenq’a chixnawb’al lix nimal ru li Dios, ut naq li “[Dios] taarosob’tesi lix ch’a’ajkilal choq’ re lix chaab’ilal.”
-
Naq laj Jose Smith kitz’ape’ sa’ li tz’alam sa’ Liberty, li Qaawa’ kixye re naq “chixjunil li k’a’aq re ru a’in tixk’e xna’leb’, ut taawanq choq’ re xchaab’ilal.”
-
Anajwan, lix mayejankil rib’ li Jesukristo, a’an li rahob’tesiik q’axal nim chalen chalen, a’b’an xwaklesi ajwi’ li nimajwal usilal naq xtoj rix lix maak chixjunileb’ li ralal xk’ajol li Dios.
B’ar wi’ wan saq’e, tento taawanq xmuhel li q’ojyin. Li b’uut’iha’ naxk’am chaq sache’k, a’b’an nak’amok ajwi’ chaq yu’am. Li ya’al-u re rahilal naxjal rib’ rik’in sahil ch’oolej. Li rahil ch’oolej sa’ xkamik jun li qas qiitz’in toj nasumeek ajwi’ rik’in sahil ch’oolej sa’ xk’ulb’al wi’chik qib’. Naq yoo li nimla pleetik sa’eb’ li tenamit, yoo ajwi’ li q’unal ch’oolej ut li rahok-ib’ li naru taa’ile’q xb’aaneb’ li wan “xnaq ru re ilok, ut lix xik re ab’ink.”
Yalaq b’ar sa’ li ruchich’och’ anajwan natawman li xiw—a’an li xiw chirix li k’a’ru chalel. A’b’an li Jesus kixye naq taqakanb’ qib’ sa’ ruq’ ut naq “too’iloq wan wi’ [a’an] sa’ li junjunq qak’oxlahom; miwiib’an eech’ool, mexxuwak.”
Qayalaq qaq’e re naq taqil xka’pak’alil ru chixjunileb’ li tumin li naqak’ul sa’ qayu’am. Us ta ink’a’ nak’utun xkab’il li ru chi junpaat, naru taqanaw ut taqapaab’ naq wan ajwi’ aran.
Naru taqanaw naq li qach’a’ajkilal ut li qarahilal ink’a’ neke’xye chan ru wanko; chan ru naqanumsi b’an, a’an li nokoxtenq’a chi k’iik ut chi nach’ok rik’in li Dios. A’an b’an li qak’a’uxl ut li qab’aanuhom li jwal naxye wi’chik chan ru wanko chiru li qach’a’ajkilal.
Naq wanq aakawilal, chawoxloq’i ut chab’antioxi junelik. Naq yoo laa yajel, chiwanq aakuyum ut chasik’ aana’leb’ rik’in, ut chanawaq naq truuq taajale’q jo’ chanru naraj li Dios. Naq ra laa ch’ool, chapaab’ naq yal junpak’al li b’e wan li sahil ch’oolej; wan naq yal maji’ nak’utun. Chajal laa wilob’aal ut chawaklesi laa k’a’uxl rik’in rilb’al chaab’ilal sa’ xyi li rahilal, xb’aan naq ak nawb’il naq wanq ajwi’ aran! Misach sa’ laa ch’ool li b’antioxink. Chasik’ li paab’ank. Chasik’ xpaab’ankil li Jesukristo. Chasik’ xkanab’ankil rajlal aawib’ sa’ ruq’ li Dios. Chasik’ xk’oxlankil “li k’a’ru re choxa,” jo’ chanru li toje’ xye qe li Awa’b’ej Russell M. Nelson!
Chiwanq sa’ qach’ool rajlal li chaq’al ru na’leb’ k’uub’anb’il xb’aan li qaChoxahil Yuwa’ choq’ qe. A’an nokoxra ut kixtaqla chaq lix raarookil Alal chiqatenq’ankil sa’ li qayalb’a-ix ut chixteeb’al li okeb’aal re tooruuq chi q’ajk rik’in a’an. Yo’yo li Jesukristo ut rajlal wan chiqoyb’eninkil, re naq taqab’oq chiqatenq’ankil, chiqakawresinkil, ut chiqakolb’al. Ninch’olob’ xyaalal eere li na’leb’ a’in, sa’ xk’ab’a’ li Jesukristo, amen.