K’ojob’anb’il chi junxilaj re kʼanjelak
Li qaChoxahil Yuwa’ naraj xk’eeb’al chanaw laa k’ojob’ankil chi junxilaj ut tixb’aanu naq nakatzol ut nakataaqe li rajom a’an.
Sa’ li q’ojyin a’in, nawaj aatinak rik’ineb’ lix saajilal li Iglees, li toj yookeb’ chi k’iik, li saaj winq ut ixq li te’k’amoq xb’e li toj te’k’iiq.
Sa’ li octubre re 2013, li qaraarookil profeet, Awa’b’ej Russell M. Nelson, kixye: “Li qaChoxahil Yuwa’ naxnaw eeru chi junxilaj. Laa’at jo’ ralal xk’ajol, kisik’man aawu xb’aan a’an re tatchalq sa’ ruchich’och’ chiru tz’aqal li hoonal a’in, jo’ aj k’amol b’e sa’ lix k’anjel sa’ xb’een li ruchich’och’.”
Wiib’ chihab’ chaq anajwan, li Awa’b’ej Nelson kixye ajwi’:
“Anajwan, ninyaab’asi chi kaw inch’ool naq li Qaawa’ naxpatz’ re chixjunileb’ li saaj winq li k’ulub’ejeb’ naq te’xkawresi rib’ ut te’xik sa’ mision. Choq’ reheb’ li saaj winq aj santil paab’anel, li k’anjelak choq’ misioneer a’an xteneb’ahom li tijonelil. Ex saaj winq, k’uulanb’ilex choq’ re li kutan a’in naq yoo chi uxmank lix yeechi’inb’il ch’utub’ankil Israel. …
“Choq’ reheb’ li saaj ixq ut li ixq, nim xwankil li xik sa’ mision, a’ut moko teneb’anb’il ta. … Tijonqex re teenaw ma naraj li Qaawa’ naq texxik sa’ mision, ut li Santil Musiq’ej texxsume sa’ lee ch’ool ut sa’ lee k’a’uxl.”
Lix yehom li profeet naq li Qaawa’ naxk’uulaheb’ li saaj sa’eb’ li kutan a’in re xch’utub’ankil Israel ut lix b’oqom chi tijok re xnawb’al k’a’ru naraj li Qaawa’ naq taab’aanu, a’aneb’ xcha’al li osob’tesink aak’ulum chaq rik’in li Dios naq toj maji’ nakatyo’la. Chiqajunilo li nokoyo’la sa’ li ruchich’och’ a’in xoowan chaq rik’in li qaChoxahil Yuwa’ jo’ alalb’ej sa’ musiq’ej. Li Qaawa’ kixye re laj Moises, “Laa’in, li Qaawa’ Dios, kinyo’ob’tesi chixjunil li k’a’aq re ru … sa’ musiq’ejil, rub’elaj naq kiwan chi tz’ejwalejil chiru lix b’een li ch’och’.”
Naq katxyo’ob’tesi sa’ musiq’ej, a’an katxra jo’ ralal xk’ajol yo’ob’tesinb’il sa’ musiq’ej ut kixk’e jun laa choxahilal ut jun laa wanjik maak’a’ roso’jik.
Chiru chaq laa wanjik rik’in, “xasik’ chaq ru anihaqat ut li tatruhanq chixb’aanunkil.” Xat-osob’tesiik chaq rik’in li sik’ok-u, b’ar wi’ wan aawankil chixsik’b’al li rajom aach’ool, ut xasik’ ru li jwal aajel ru jo’ lix taaqenkil lix k’uub’anb’il na’leb’ re sahil ch’oolejil li qaChoxahil Yuwa’, li naraj naxye, “xk’ulb’al aajunxaqalil re tz’ejwalej, ut rik’in li taak’ul sa’ li ruchich’och’, ut chixtawb’al sa’ roso’jik li choxahilal li tatruuq chixk’ulb’al jo’ aj eechanihom re li junelik yu’am.” Li sik’ok-u a’an kiwan xwankil, sa’ laa yu’am naq toj maji’ nakatyo’la chaq, ut toj yoo chi wank xwankil sa’ laa yu’am anajwan. Jo’ ralal li Dios yo’ob’tesinb’ilat sa’ ruchichoch’ a’in, “xatk’i sa’ laa nawom ut xatzol xraab’al li yaal.”
Naq toj maji’ nakatyo’la, li Dios kixsik’ aawu re xb’aanunkil lix k’anjel chiru li yu’am a’in sa’ li ruchich’och’. Wi wanqat chi tiik, eb’ li osob’tesink lix k’eeman chaq aawe tixk’e aawankil chixb’anunkil chixjunil li k’anjelak sa’ li yu’am a’in, jo’ ajwi’ re tatk’anjelaq sa’ li iglees ut tattz’aqonq sa’ lix nimal ru k’anjel li yoo chi b’aanumank anajwan: lix ch’utub’ankil Israel. Eb’ li yeechihom ut osobtesihom kik’eeman chaq aawe nak’ab’a’iman k’ojob’ank chi junxilaj. “Li tzol’leb’ re li k’ojob’ank chi junxilaj wan choq’ reheb’ chixjunil li komon re li iIglees.” Li k’ojob’ank chi junxilaj moko naraj ta naxye naq tatk’anjelaq ka’ajwi’ b’ar wi’ xatteneb’aak. Eb’ li osob’tesink a’an ut li elk chi uub’ej neke’k’ulman sa’ li yu’am a’in sa’ xk’ab’a’ laa chaab’ilal re sik’ok-u, jo’ chanru naq laa k’ojob’ankil chi junxilaj naq maji’ nakatyo’la kik’ulman sa’ xk’ab’a’ laa tiikilal. Naq nakatwan chi k’ulub’ej ut nakatxik chi’uub’ej sa’ xb’ehil li sumwank, tatruhanq chi k’anjelak sa’ xtzol’leb’aaleb’ li Saaj Ixq malaj sa’ li xmolameb’ li tijonelil. Osob’tesinb’ilaqat re k’anjelak sa’ li santil ochoch, re tatwanq jo’ aj ilol komon winq malaj ixq, ut re tatxik sa’ mision jo’ xtzolom li Jesukristo.
K’a’ut naq jwal aajel ru xsik’b’al, xnawb’al, ut xtawb’al ru laa k’ojob’ankil chi junxilaj? Sa’ jun kutankil neke’tam wi’ li patz’om, b’ar wi’ chixjunileb’ neke’raj xnawbal aniheb’ a’an, li xnawb’al naq li Dios naxnaw ut xrosob’tesi chaq li junjunq naq toj maji’ nayo’la rik’in lix “chaab’ilal li osob’tesink naq … toj maji’ nayo’la, naq yo’yo, ut ani a’an ut li rajom chi maak’a’ roso’jik,” a’an naxk’am chaq li sahil tuqtuukilal sa’ li qak’a’uxl ut sa’ li qach’ool. Xnawb’al anihat laa’at natikla rik’in xtawb’al ru laa wosob’tesinkil kixk’e chaq aawe li Dios naq toj maji’ nakatyo’la sa’ li ruchich’och’ a’in. Li qaChoxahil Yuwa’ naraj xk’eeb’al chanaw laa k’ojob’ankil chi junxilaj ut tixb’aanu naq nakatzol ut nakataaqe li rajom a’an.
Nawulak chiwu li naxtaqsi li Awa’b’ej Nelson sa’ Instagram. Li jwal xwulak chiwu a’an lix taqsi sa’ li 20 re julio re 2022. A’an kixtz’iib’a’:
“Nink’oxla naq wi li Qaawa’ yoo raj chawaatinankil sa’ kristiaanil, li xb’een wa tixk’e chanaw a’an anihat tz’aqal laa’at. Ex inraarookil amiiw, laa’ex tz’aqal ralal xk’ajol li Dios sa’ musiq’ej. …
“… Matsach rik’in li na’leb’ a’in: Laa choxahilal q’axal xchaq’al ru. Sa’ xsik’b’al chi kok’ aj xsa’, li Dios tixk’ut chawu li ani naru tatwulaq wi’.”
Ma naru ninwotz eerik’in chan ru naq lin yuwa’ kixk’ut chiwu xnawb’al anihin laa’in ut lix k’uub’anb’il na’leb’ li Dios sa’ lin yu’am?
Sa’ jun li sabado eq’la naq wan chaq 13 chihab’ we, yookin chixyok’b’al li pim jo’ xcha’al lin k’anjel sa’ li xamaan. Naq kinraqe’, kiwab’i chi eek’ank li okeb’aal chirix chaq li qochoch ut kiwil lin yuwa’ naq yoo chinb’oqb’al re tinxik xtawb’al. Kinb’eek toj reetal kintaw li okeb’aal ut kixye we naq tinchunlaaq chixk’atq. A’an jun ch’ina-usil eq’la. Toj nanaq sa’ inch’ool naq chunchu chink’atq chi laq’lookeb’ lix b’een qatel. Kixtikib’ aatinak rik’in xyeeb’al we naq nikinixra. Kixpatz’ we k’a’ruheb’ lin jayalihom chiru lin yu’am. Kink’oxla, “Moko ch’a’aj ta a’an.” Ninnaw naq nawaj wiib’ li k’a’aq re ru: nawaj naq nimaq woq ut nawaj xik chi b’eek chi kok’ aj xsa’. Moko xnimal ta ru li wajom. Kise’ek, ut chirix a’an kixye: “Steven, nawaj xwotzb’al jun li na’leb’ aawik’in li jwal aajel ru choq’ we. Nintijok chiru li qaChoxahil Yuwa’ re naq a’an tixk’e li tinye anajwan chi kanaaq taxaq sa’ laa waam ut sa’ laa k’a’uxl re naq maajun wa taasachq sa’ aach’ool.”
Kinkana chirab’inkil lin yuwa’ chi anchal inch’ool sa’ li hoonal a’an. Kixsutq’isi rib’ wik’in, kixka’ya xsa’ li wu ut kixye, “At walal, chakol rix li k’a’ru nakab’aanu sa’ laa yu’am naq maajun yoo chi ilok aawe” Maak’a’ chik kixye re naq li k’a’ru kiraj naq tintaw ru taa’ok sa’ xchamal li waam.
Chirix a’an kixye, “Li hoonal b’ar wi’ maa’ani wan chak’atq ut maa’ani na’ilok re k’a’ru yookat. Eb’ li hoonal b’ar wi’ nakak’oxla naq li ninsik’ ru xb’aanunkil anajwan maa’ani naxrahob’tesi, ka’ajwi’ laa’in.
Chirix a’an kixye, “Mas wi’chik chiru jalan hoonal re laa yu’am, li k’a’ru taab’aanu sa’ li hoonal a’an tatxtenq’a chiru li yale’k ut li rahilal taanumsi; ut li taasik’ ru xb’aanunkil naq maa’ani na’ilok aawe tatxtenq’a ajwi’ chi elk chi uub’ej ut lix sahil aach’ool li taaweek’a, mas wi’chik chiru jalan chik hoonal re laa yu’am.”
Lin yuwa’ kixk’ul li rajom xch’ool. Lix yaab’ xkux ut lix rahom kiweek’a sa’ li raatin kikana sa’ lin k’a’uxl ut sa’ li waam sa’ li kutan a’an.
Chiru chixjunil lin yu’am xintzol naq lix nimal ru sachb’a-ch’oolej kik’ulman sa’ li hoonal a’an sa’ xsutam lin junkab’al sa’ chaq lin ka’ch’inal, a’an naq, naq wankin injunes chi maa’ani na’ilok we, nikinru chi nach’ok sa’ tij rik’in li Dios re xk’ulb’al li k’utb’esinb’il na’leb’. Lin yuwa’ kixk’ut chaq chiwu chan ru tinnaw ru li osob’tesiik nachal sa’ xk’ab’a’ li kojob’aak chi junxilaj xb’aan li Dios. Anajwan naq maa’ani na’ilok we, kintzol naq lix Hu laj Mormon a’an raatin li Dios. Kinnaw naq li Dios kinixk’ojob’ chaq chi junxilaj re tinxik sa’ mision. Kintaw ru naq li Dios naxnaw wu ut a’an nikinrab’i ut naxsume lin tij. Kintzol naq li Jesus a’an li Kristo, laj Kolol qe ut laj Tojol qix.
Us ta naab’al lin paaltil chalen chaq sa’ li kutan naq kinna’leb’ak wochb’een lin yuwa’, lix yalb’al inq’e chixkolb’al rix li k’a’ru ninb’aanu sa’ lin yu’am naq maa’ani na’ilok we wan choq’ aj chapol we chiru lix kaq-sut-iq’ li yu’am ut nikinixtenq’a chixsik’b’al inkolb’al ut k’iraak, rik’in xkawob’resinkileb’ li osob’tesink re rahok ut li xtojb’al rix li maak xb’aan li qaKolonel.
Ex saaj winq ut ixq, naq nekekol rix li k’a’ru nekeb’aanu sa’ lee yu’am naq maa’ani na’ilok eere sa’ li k’a’ru nekeb’aanu; sa’ rab’inkil li chaab’il b’ich; sa’ rilb’aleb’ li loq’laj hu; sa’ li tijok chi kok’ aj xsa’ chi wan xyaalal; ut sa’ xyalb’al eeq’e chixk’ulb’al ut chixtz’ilb’al rix lee rosob’tesinkil naxk’e li yuwa’b’ejil aj k’anjel, teek’ul eena’leb’. Sa’ li raatin li Awa’b’ej Nelson taatehe’q, “xsa’ lee ru chiru li yaal re li yu’am a’in tz’aqal chi yaal naq a’an li hoonal re tesik’ ru laa’ex chan ru teeraj taawanq lee yu’am chi junelik.”
Li qaChoxahil Yuwa’ tixsume lee tij, li tijok nekeb’aanu naq maa’ani na’ilok eere. A’an tixk’ut cheru lee chaab’ilal ut lee seeb’al li osob’tesinb’ilex wi chaq chi junxilaj ut teerek’a naq lix rahom texxq’alu, wi nekepatz’ chi anchal eech’ool ut chi anchal eech’ool teeraj xnawb’al. Naq teekol rix lee b’aanuhom naq maa’ani na’ilok eere, lee tz’aqonik sa’ eb’ li k’ojob’anb’il k’anjel ut sa’ li sumwank re li evangelio wanq chi ch’olch’o xyaalal. Taawanq chi us eejunajil rik’in li Dios sa’eb’ li sumwank li teeb’aanu rik’in a’an ut textaqsiiq re taawanq xnimal ru eeroyb’enihom, eepaab’aal, ut k’ojk’ooq eech’ool sa’eb’ lix yeechi’ihom naxb’aanu a’an. Ma nakawaj xnawb’al lix k’uub’anb’il na’leb’ li Dios choq’ aawe? Ninch’olob’ xyaalal naq a’an naraj naq laa’ex teenaw a’in, ut xmusiq’a lix profeet sa’ li ruchich’och’ re qab’oqb’al chi tijok ut xk’ulb’al li na’leb’ li naxte xsa’ li qu. Ninch’olob’ xyaalal a’in ut lix wankil lix tojb’al rix li maak xb’aan li Jesukristo li nokoxtenq’a chi wank ut chixyalb’al xsahil li osob’tesink kanab’anb’il chaq xb’aan li Dios, sa’ xk’ab’a’ li Jesukristo, amen