![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F88%2Fed%2F88ed62f85ab01be7a39a1c5bfe8b9b2e7be11461%2F88ed62f85ab01be7a39a1c5bfe8b9b2e7be11461.jpeg/full/!250,/0/default)
Chattijoq, yoo chi ab’ink
Nakatinb’oq chi tijok re xnawb’al naq li qaChoxahil Yuwa’ wan aran, chi tijok re k’iik re wulak jo’ a’an; ut chi tijok re xk’utb’al lix rahom chiruheb’ li kristiaan.
Ex was wiitz’in, nasaho’ inch’ool naq xinru chixpaab’ankil li musiq’anb’ilin wi’ anajwan, a’an raatinankileb’ li kok’al!
Ex kok’al, a’ yaal b’ar wankex nawaj xyeeb’al jun li na’leb’ eere.
Li qaChoxahil Yuwa’ nakatxra! Laaʼat jun reheb’ lix kok’al. A’an naxnaw aawu. Naraj aawosob’tesinkil. Nintz’aama chi anchal li waam naq taaweek’a lix rahom.
Ma nawulak chawu xk’ulb’al li maatan? Nawaj aatinak chirix jun li maatan li jwal ch’ina-us tz’aqal li kixk’e li qaChoxahil Yuwa’b’ choq’ re aatenq’ankil. A’in li maatan re tijok. K’a’jo’ xnimal ru maatan li tijok! Naru noko’aatinak rik’in li qaChoxahil Yuwa’ yalaq jo’q’e, yalaq b’ar.
Naq li Jesus kiwan sa’ ruchich’och’, kixk’ut chiqu li tijok. A’an kixye, “Chextzʼaamanq, ut texkʼuluq.”
B’ar wankeb’ li maatan li naru taatz’aama sa’ tijok? Wankeb’ naab’al, a’b’an anajwan nawaj aatinak chirix oxib’ ajwi’:
-
Tijok re xnawb’al.
-
Tijok re k’iik.
-
Tijok re xk’utb’al.
Aatinaqo b’ayaq chirix li junjunq a’an.
Xb’een, tijok re xnawb’al
B’ar wan li taawaj xnawb’al?
Wan jun li b’ich na’aatinak chirix li tijok li neke’xb’icha li kok’al sa’ chixjunil li ruchich’och’. Natikla rik’in jun patz’om. Ma nakanw k’a’ru b’ichul a’an? Wi ink’a’ raj ninxutaanak, tinb’icha raj choq’ eere!
“At inYuwa’, ma wankat aran? Ut laa kok’al, ma taawab’i xtijeb’ a’an?”
Chan ru naru taanaw tz’aqal naq laa Choxahil Yuwa’ wan aran, us ta ink’a’ nakawil ru?
Li Awa’b’ej Russell M. Nelson xatxb’oq naq “taak’e laa ch’ool rik’in laa Choxahil Yuwa’. … Chirix a’an, ab’in.” Ab’i li nakaweek’a sa’ laa ch’ool ut li k’a’ru na’ok sa’ laa k’a’uxl.
Li qaChoxahil Yuwaʼwan jun xxaqalil li tibʼ ut bʼaq okenaq li nimanbʼil xloqʼal, ut aʼan lix Yuwaʼ laa musiqʼ. Xb’an naq li qaChoxahil Yuwa’ wan chixjunil li wankilal rik’in ut naxnaw chixjunil li k’a’aq re ru, naru rilb’aleb’ chixjunileb’ li ralal ut naru chirab’inkil ut xsumenkil li junjunq chi tij. Naru nakatwulak xnawb’al aajunes naq a’an wan aran ut naq nakatxra.
Naq taanaw naq li qaChoxahil Yuwa’ wan tz’aqal ut naq nakatxra, tatwanq chi maak’a’ aaxiw ut wanq aawoyb’enihom! “Kim, chattijoq; yoo chi ab’ink.”
Ma wan naq nakaweek’a li junaatal? Sa’ jun kutan, naq li qi li xAshley wan waqib’ chihab’ re, wan xjunes chirix li tzoleb’aal, maak’a’ li ramiiw re b’atz’unk. Naq xkana aran ut nareek’a naq maajun narahok re, x’ok jun li aatin sa’ xk’a’uxl: “Il b’i’! Moko injunes ta wankin! Wan li Kristo wik’in!” Li xAshley xwiq’ib’ rib’ chirix li tzoleb’aal, xb’as lix tel, ut xtijok chiru lix Choxahil Yuwa’. Naq xte li ru, xk’e reetal naq jun li ch’ina ixqa’al wan aran ut xpatz’ re ma taaraj b’atz’unk. Li xAshley xtaw ru naq “wan qaloq’al choq’ re li Qaawa’ ut naq maajun wa wanko qajunes.”
Maare anchal nakawaj xnawb’al k’a’ut naq yookat chixnumsinkil junaq ch’a’ajkilal sa’ laa yu’am malaj k’a’ut naq ink’a’ xak’ul li osob’tesink xapatz’ sa’ tij. Wan naq li jwal us taqapatz’ re li qaChoxahil Yuwa’, a’an maawa’ xpatz’b’al k’a’ut, a’b’an k’a’ru.
Ma nanaq sa’ aach’ool lix junkab’al laj Nefi naq yookeb’ chixnumsinkil li tz’okaak naq yookeb’ chi xik chiru li yamyookil ch’och’? Naq laj Nefi ut eb’ li ras xkoheb’ chi yohok re wanqeb’ lix tzakemq, xtoqe’ lix tzimaj laj Nefi. A’ut a’an moko xpatz’ ta k’a’ut.
Laj Nefi xyiib’ jun chik lix tzimaj ut xpatz’ re lix yuwa’, laj Lehi, b’ar naru taaxik re xtawb’al li tzakemq. Laj Lehi kitijok ut li Qaawa’ kixk’ut chiru b’ar naru taaxik laj Nefi. Li qaChoxahil Yuwa’ tatxb’eresi naq taapatz’ re k’a’ru naru nakab’aanu ut k’a’ru naru nakatzol.
Xkab’, tijok re k’iik
Li qaChoxahil Yuwa’ naraj aatenq’ankil re tatk’iiq! K’a’jo’ naq nokoxra, jo’kan naq xtaqla chaq li Ralal Jesukristo re xk’utb’al chiqu chan ru toowanq. Li Jesus kirahob’tesiik, kikamsiik, ut kiwakli re naq taaruuq taakuye’q qamaak ut took’iiq re tooruuq chi wulak jo’ a’an.”
Ma tawaj tatk’iiq sa’ laa kuyum ut sa’ laa tiikilal? Ma tawaj tatk’iiq sa’ junaq laa seeb’al? Maare wan laa xutaan ut nakawaj tatk’iiq sa’ xkawilal laa ch’ool. “Kim, chattijoq”! Rik’in lix Musiq’, laa ch’ool naru najala, ut naru nakak’ul aatenq’ankil.
Lin ak’ amiiw aj Jonah xye: “Wan naq nachal inxiw naq yookin chi xik sa’ li tzoleb’aal eq’la. Nink’oxla naq maare tinb’ayq chaq, maare wanq k’a’ru taasachq sa’ lin ch’ool, malaj maare ch’a’ajaq li yalok-ix te’xk’e. Naq wan chaq we lajeeb’ chihab’, xintikib’ li tijok rajlal naq ninxik sa’ li tzoleb’aal sa’ li b’eleb’aal ch’iich’ rochb’een lin na’. Ninpatz’ lin tenq’ nawaj, ut nintijok ajwi’ chirix lin junkab’al. Jo’kan ajwi’ nink’oxla li k’a’aq re ru li nawaj xb’antioxinkil. [Li tijok chiru lin Choxahil Yuwa’] xinixtenq’a. Wan naq ink’a’ nak’ojlaak inch’ool chi junpaat naq nin’el sa’ li b’eleb’aal ch’iich’, a’b’an naq nin’ok sa’ li tzoleb’aal, aran naweek’a li tuquukilal.”
Lix paab’aal laj Jonah yoo chi k’iik naq natijok wulaj wulaj ut naxik chi uub’ej.
Rox, tijok re xk’utb’al
Naru nakattijok re xpatz’b’al aatenq’ re xk’utb’al lix rahom li qaChoxahil Yuwa’ choq’ reheb’ li kristiaan. Rik’in lix Musiq’, li qaChoxahil Yuwa’ tatxtenq’a chixk’eeb’al reetal naq junaq li kristiaan ra xch’ool re tatruuq chixtuqub’ankil xch’ool. A’an naru nakatxtenq’a chixk’utb’al lix rahom sa’ xkuyb’al xmaak junaq li kristiaan. Naru naxk’e aatenq’ankil re k’anjelak chiru junaq ut chixyeeb’al re naq a’an jun ralal li Dios. Naru nakatenq’aheb’ li kristiaan re naq te’wulaq chixnawb’al ru ut chixraab’al li Jesus ut li qaChoxahil Yuwa’ jo’ nakab’aanu laa’at.
Chixjunil lin yu’am xinpatz’ naq lin yuwa’ taawulaq jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Us ta toj saajin chaq, ninnaw lix k’ihal li osob’tesink a’an taaruuq chixk’ulb’al. Li qajunkab’al taaruuq raj chixk’ulb’al li osob’tesiik re li tz’ape’k sa’ junajil chi junelik. Lin junkab’al, eb’ li wamiiw, ut laa’in xootijok rajlal chirix lin yuwa’, a’b’an ink’a’ ki’ok jo’ komon sa’ li Iglees. Li qaChoxahil Yuwa’ ink’a’ naxmin ru junaq re xb’aanunkil k’a’ruhaq. A’an naru naxk’e xsumenkil li qatij chi jalb’il ru.
Naq ak xinniman b’ayaq xink’ul li wosob’tesinkil rik’in li yuwa’b’ejil aj k’anjel. Sa’ li wosob’tesinkil, a’an xye we naq li naru ninb’aanu re xtenq’ankil lin junkab’al chi wank sa’ junajil sa’ choxa, a’an xk’utb’esinkil lix evangelio li Jesukristo sa’ lin yu’am A’an li tinruuq chixb’aanunkil!
Lin yuwa’ kikam naq 86 chihab’ wan re Oob’ kutan chirix naq xkam, xweek’a jun xsahil inch’ool. Lin Choxahil Yuwa’ xk’e chinnaw rik’in lix Musiq’ naq lin yuwa’ naraj xk’ulb’al li osob’tesink naxk’e lix evangelio li Jesukristo! Maajun wa taasachq sa’ inch’ool li kutan naq xinwiq’ib’ wib’ chiru li artal sa’ li santil ochoch rochb’een li wiitz’in ut eb’ li was re tz’ape’k sa’ junajil rik’in lin na’ lin yuwa’. Xintikib’ tijok re xpatz’b’al li osob’tesiik a’an naq wankin chaq sa’ li tzoleb’aal reheb’ li kok’al, ut xink’ul naq ak wankeb’ chik li wi.
Maare yookat chixpatz’b’al sa’ tij li osob’tesink choq’ re laa junkab’al ut choq’ reheb’ li kristiaan nakaraheb’ . Maakanab’ xyalb’al aaq’e! Li qaChoxahil Yuwa’ tixk’ut chawu li tatruuq chixb’aanunkil.
Ye re laa Choxahil Yuwa’ li wan sa’ laa ch’ool. Naq yooqat chixpatz’b’al re chi anchal aach’ool lix tenq’, taak’ul lix Musiq’ re aab’eresinkil. Li tijok wulaj wulaj tatxnujob’resi rik’in li rahok choq’ re li qaChoxahil Yuwa’ ut li Jesukristo. Ut a’an tatxtenq’a rajb’al xtaaqenkil chiru chixjunil laa yu’am!
K’oxla li taak’ulmanq raj wi chixjunileb’ li kok’al re Africa, Sudamerica, Asia, Europa, Norteamerica, ut Australia te’tijoq wulaj wulaj. Chixjunil li ruchich’och’ taa’osob’tesiiq rik’in lix rahom li Dios!
Nakatinb’oq chi tijok re xnawb’al naq li qaChoxahil Yuwa’ wan aran, chi tijok re k’iik re wulak jo’ a’an; ut chi tijok re xk’utb’al lix rahom chiruheb’ li kristiaan. Ninnaw naq yo’yo a’an ut naq nakatxra. “Chattijoq, yoo chi ab’ink.” Sa’ lix loq’laj k’ab’a’ li Jesukristo, amen.