Li Jesukristo a’an xyi li qayu’am
Eb’ lix chamal ru qapatz’om, eb’ li neke’chal naq yooko xnumsinkileb’ xninqal ru yale’k, neke’tuqub’aman rik’in xrahom li Jesukristo li maak’a roso’jik.
Chiru li qayu’am sa’ ruchich’och’, wan naq nayale’ qix rik’ineb’ li ch’a’ajkilal: lix nimal rahil ch’oolejil naq neke’kam li qech’alal, li xnimal ru yalok q’e rik’ineb’ li yajel, lix may li maa’usilal, li numtaak sa’ qab’een, lix maak’a’il li k’anjel, li ch’a’ajkilal sa’ junkab’alej, li wank sa’ junesal, malaj li ruuchinihom lix ninqal ru pleetik. Sa’eb’ li hoonal a’an, li qaam naxsik xkolb’al. Naqayal qaq’e chixnawb’al: B’ar naru naqataw li b’an re li tuqtuukilal? Ani naru naqakanab’ wi’ qib’ re tooxtenq’a rik’in li paab’ank ut lix kawilal qach’ool re xnumsinkileb’ li yale’k a’an? Ani wan li kuyuk rik’in, li rahok li naramok chixjunil, ut li nimla wankilal re qataqsinkil ut qachapb’al?
Eb’ lix chamal ru qapatz’om, eb’ li neke’chal naq yooko xnumsinkileb’ xninqal ru yale’k, neke’tuqub’aman rik’in xrahom li Jesukristo li maak’a roso’jik. Rik’in a’an, ut rik’ineb’ li osob’tesink naxyeechi’i lix evangelio li k’ojob’anb’il wi’chik, neke’qataw lix sumenkileb’ li qapatz’om. Rik’in lix tojb’al rix li maak chi maak’a’ roso’jik naxyeechi’i qe jun li maatan jwal nim—jun re oyb’enink, k’irtesink, ut lix wanjik rajlal ut chi junelik sa’ li qayu’am. Li maatan a’in wan choq’ reheb’ chixjunileb’ li neke’nach’ok rik’in paab’aal, sa’ xq’alunkil li tuqtuukilal ut li kolb’a-ib’ li naxyeechi’i chi maak’a’ xtz’aq.
Li Qaawa’ naxye’ li ruq’ choq’ qe chiqajunilo, jun b’aanuhom li nareetali lix choxahilal rahom ut chaab’ilal. Lix b’oqom choq’ qe moko ka’aj ta wi a’an jun b’oqom; a’an jun choxahil yeechi’ihom, kawresinb’il rik’in lix wankil li rusilal. Sa’eb’ li loq’laj hu, a’an naxye rik’in rahok:
“Chalqex wik’in chejunilex li lub’luukex ut tawajenaqex xb’aan lee riiq, ut laa’in texinhiltasi.
“K’ulumaq lin iiqleb’ sa’ eeb’een ut tzolomaq eerib’ wik’in, xb’aan naq tuulanin ut q’un lin ch’ool, ut teetaw xhilob’aal eeraam.
“Xb’aan naq moko ra ta lin iiqleb’, ut li nink’e cheriiqani moko aal ta.”
Lix saqenkil ru lix b’oqom “kimqex wik’in” ut “k’ulumaq lin iiqleb’” naxk’ut xyaalal lix nimal lix yeechi’ihom—jun li yeechi’ihom tz’aqal re ru li nareetali lix rahom, naxyeechi’i choq’ qe: “Teetaw eehilal.”
Sa’ xsik’b’al chi anchal qach’ool qatenq’ sa’ musiq’ej, noko’ok sa’ jun li nimla jalaak li naxkawob’resi li qanawom. Naq naqataw ru lix nimla rahom li qaChoxahil Yuwa’ ut li Jesukristo chi tz’aqal re ru, li qaam nanujak rik’in b’antioxihom, tuulanil, ut jun ajom ak’ob’resinb’il re xtaaqenkil li b’e re wank jo’ xtzolom.
Li Awa’b’ej Russell M. Nelson kixye, “Naq naqajayali li qayu’am rik’in lix k’uub’anb’il na’leb’ li Dios re li kolb’a-ib’ … jo’ ajwi’ li Jesukristo ut lix evangelio, naru naqeek’a xsahil qach’ool, maak’a’ naxye li k’a’ru nak’ulman—malaj li ink’a’ nak’ulman—sa’ li qayu’am. Li sahil ch’oolejil nachal rik’in ut b’antiox re a’an.”
Naq ki’aatinak laj Alma rik’in li ralal, a’an kixye: “Ut anajwan, at walal Helaman, kʼe reetal, wankat saʼ aasaajil, joʼkan ut naq nintzʼaama chawu naq chawabʼi li waatin ut chattzoloq wikʼin; xbʼaan naq ninnaw naq ebʼ li ani nekeʼxkanabʼ ribʼ chiru li Dios teʼkawresiiq saʼ li yaleʼk rixebʼ, ut li rahilal nekeʼxnumsi, ut lix chʼaʼajkilalebʼ, ut teʼwaklesiiq saʼ rosoʼjik li kutan.”
Laj Helaman, naq ki’aatinak rik’ineb’ li ralal, kik’utuk chirix li na’leb’ maak’a’ roso’jik sa’ xk’eeb’al li Kolonel sa’ xyi li qayu’am: “Chijultiko’q, chijultiko’q eere naq a’ sa’ xb’een lix saqoonaq laj tojol qix, a’an li Kristo, li Ralal li Dios naq tento teek’e eek’ojob’ankil.”
Sa’ Mateo 14 naqatzol naq sa’ li hoonal naq li Jesus kirab’i resil xkamik laj Jwan aj Kub’sihom Ha’, kixsik’ ru wank sa’ junesal. A’b’anan, naab’al ke’taaqenk re. Eek’asinb’il xb’aan li toq’ob’ank-u ut lix rahom chi ink’a’ kixkanab’ naq lix rahil xch’ool tixjalb’ehi ru lix k’anjel, li Jesus kixk’ulub’aheb’, kixk’irtesiheb’ li yaj wankeb’ sa’ xyanqeb’. Naq ki’ewuuk, eb’ lix tzolom ke’jilok chixk’atq chixyeeb’al re: wankeb’ naab’aleb’ li kristiaan maak’a’eb’ xtzakemq. Ke’xye re li Jesus naq tixchaq’rab’iheb’ li tenamit re naq toxe’xloq’ chaq xwaheb’, a’b’an li Jesus, rik’in xnimal xrahom ut royb’enihom, kixpatz’ reheb’ lix tzolom naq te’xk’eheb’ b’an chi wa’ak.
Naq lix tzolom ke’ok xk’a’uxl xb’aan li kipatz’man naq te’xb’aanu, li Jesus kixk’utb’esi xpaab’aal ut xrahom chirix lix Yuwa’, chi maak’a’ roso’jik lix rahom chirixeb’ li kristiaan. Kixtaqlaheb’ chi hilank li tenamit sa’ li pach’aya’, kixchap yal oob’ li wa ut wiib’ li kar, kixsik’ ru b’antioxink chiru lix Yuwa’, kixk’e reetal naq k’eeb’il lix wankilal li Dios re.
Chirix naq kib’antioxin, li Jesus kixjachi li wa, ut eb’ lix tzolom ke’xjek’i reheb’ li tenamit. Kiwan li sachb’a-ch’oolej, moko ka’aj ta wi’ kitz’aqlok li kaxlan wa, ki’ela’an b’an kab’laju chakach. Eb’ li ke’wa’ak wankeb’ tana 5.000 chi winq, rochb’eeneb’ li ixq jo’ eb’ ajwi’ li kok’al.
Li sachb’a-ch’oolej a’in naxk’ut jun xchamal ru na’leb’: naq wanko chiru li yale’k, moko ch’a’aj ta xkanab’ankil qib’ sa’ li ch’a’ajkilal. A’b’anan, li Jesukristo kixk’ut li wankilal nawan naq naqajayali qib’ rik’in lix Yuwa’, naq nokob’antioxin ut naq naqak’e reetal naq lix b’ehil li qach’a’ajkilal moko junelik ta wanq qik’in, rik’in b’an li Dios.
Naq wanko chiruheb’ li ch’a’ajkilal, noko’ok chixk’eeb’al reetal li k’iila ramleb’ naqanumsi. Eb’ li qach’a’ajkilal neke’ru chi ile’k ut naxik qach’ool chirixeb’, a’b’anan xq’axb’al ru natawliman sa’ li qajayalihom. Naq naqak’e li Kristo sa’ xyi li qak’a’uxl ut qab’aanuhom, naqatiikob’resi qib’ rik’in lix jayalihom ut lix kawilal. A’in moko naraj ta naxye naq lix yalb’al qaq’e maak’a’ na’ok wi’; nokoxtenq’a b’an chixtawb’al xb’ehil chi b’eresinb’il xb’aan li choxa. Jo’ ruuchinihom, naqataw xb’ehil ut qatenq’ xb’aan jun nawom q’axal taqenaq. Xyu’aminkil li qajayalihom rik’in li Kristo naxk’e qakawilal ut li qanawom re wulak chi numtaak sa’ xb’een li qach’a’ajkilal, ut naxjultika qe naq rik’in li Kolonel, li chanchan ta wi naq a’an jun xnimal ch’a’ajkilal naru nawulak jo’ jun chaab’il b’e toj reetal naq took’iiq sa’ musiq’ej.
Li seraq’ chirix laj Alma alalb’ej sa’ lix Hu laj Mormon naxk’ut jun li na’leb’ chirix li tojb’a-ix ut xchamal x’aajelil ru xjayalinkil li qayu’am rik’in li Kristo. Sa’ xtiklajik, laj Alma ink’a’ kixk’ulub’a lix Iglees li Qaawa’, xjalb’ehiheb’ b’an naab’al chiru xb’ehil li tiikilal. A’b’anan, jun li choxahil k’ulum, eetalinb’il rik’in jun li anjel, ki’rajsi sa’ lix xik’ ilok.
Sa’ li q’oyinal hoonal, chi tawasinb’il xb’aan lix maak ut sa’ rajb’al ru re xtawb’al junaq li relik chiru lix wanjik sa’ musiq’ej, laj Alma kijultiko’ re lix k’utum lix yuwa’ chirix li Jesukristo ut lix wankil re xtojb’al rix li maak. Chi anchal lix ch’ool re xk’ulb’al li tojb’a-ix kixjal chi anchal lix k’a’uxl ut kixtz’aama chi anchal xch’ool li ruxtaan li Qaawa’. Li hoonal a’an re q’axtesink-ib’, kixk’am li Kristo re xtuqub’ankil lix k’a’uxl laj Alma naq kixsik’ chi anchal xch’ool li ruxtaan, ut kixyoob’ jun tz’aqal jalaak. Li raalob’ lix kadeenil li maak ut li tawasiik kisach ut kisutq’i choq’ sahilal ut tuqtuukilal.
Li Jesukristo a’an li qoyb’enihom ut xsumenkil chixjunil lix ninqal ru rahilal re li qayu’am. Rik’in lix mayej a’an, kixtoj rix li qamaak ut kixk’ul sa’ xb’een chixjunil li qarahob’tesinkil—li rahilal, li xik’ ile’k, ut li xuwak—ut naxkuy qamaak ut nokoxk’irtesi naq naqapaab’ ut naqayal qaq’e chixjalb’al li qayu’am. A’an laj K’irtesinel qe, naxk’ojob’ li qach’ool ut naxtuqub’ qach’ool rik’in lix rahom ut lix wankil, jo’ naq kixk’irtesiheb’ naab’al chiru lix yu’am sa’ ruchich’och’. A’an li yo’yookil ha’, li naxnujob’resi chixjunil lix chamal li qaam chi kok’ aj xsa’ rik’in lix rahom ut xchaab’ilal. A’an xcha’al li yeechi’ihom kixk’e re li ixq aj Samaria chire li ha’, kixyeech’i’ jun “yu’amha’ nab’ululnak re li junelik yu’am.”
Ninch’olob’ chi anchal inch’ool naq li Jesukristo yo’yo ut naq a’an naxb’eresi lix loq’laj Iglees, Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Ninch’olob’ xyaalal naq a’an laj KoloI re li ruchich’och’, li Awaʼbʼej re Tuqtuukilal, lix Reyeb’ li rey, ut lix Qaawaʼilebʼ li qaawaʼ, laj Tojol rix li ruchich’och’. Ninnaw chi anchal inch’ool naq junelik wanko sa’ lix k’a’uxl ut sa’ li raam. Jo’ jun chik esil chirix, a’an kixk’ojob’ wi’chik lix Iglees sa’ roso’jikeb’ li kutan a’in ut kixb’oq li Awab’ej Russell M. Nelson jo’ xprofeet ut Awa’b’ej re li Iglees sa’eb’ li kutan a’in. Ninnaw naq li Jesukristo kixk’e lix yu’am re naq taawanq qayu’am chi junelik.
Naq naqayal qaq’e chixk’eeb’al sa’ xyi li qayu’am, nak’eeman qe li k’utb’esinb’il na’leb’, lix chamal tuqtuukilal nokoxkol, ut lix tojb’al rix li maak li maak’a’ roso’jik naxk’e xkuyb’al qamaak ut qak’irajik. Sa’ xk’ab’a’ a’an naq naqataw xkawub’ qach’ool re q’axok-u, xkawil qib’ re xik chi uub’ej, ut li tuqtuukilal li nachal rik’in li Dios ut naxq’ax ru chixjunil li na’leb’. Qayalaq qaq’e chi jilok rik’in li Dios, lix yo’leb’aal chixjunil li k’a’ru chaab’il, li roqechal li qayo’onihom sa’ li qasutq’ijik rik’in li qaChoxahil Yuwa’. Sa’ lix loq’laj k’ab’a’ li Jesukristo, amen.