Konferans Jeneral
“Sa Se Levanjil Mwen An”—“Sa Se Legliz Mwen An”
Konferans jeneral Oktòb 2024
13:49

“Sa Se Levanjil Mwen An”—“Sa Se Legliz Mwen An”

Èldè Dale G. Renlund

Nan Kolèj Douz Apot yo

Sa a se levanjil Sovè a, ak Legliz Li a (gade 3 Nefi 27:21; Mozya 26:22; 27:13) Konbinezon yo de a puisan ak transfòmatif.

Pandan anpil syèk, poud nwa sete eksploziv pi puisan ki te disponib. Li te ka lanse boulèt kanon, men li pa t efikas pou ekplwatasyon minyè ak pwojè konstriksyon wout yo. Li te twò fèb pou l te kraze wòch.

An 1846, yon chimis Italyen ki rele Ascanio Sobrero te sentetize yon nouvo eksplozif, nitwogliserin. Likid grès sa a te omwen mil fwa pi puisan pase poud nwa a. Li te ka kraze wòch fasilman. Malerezman, nitwogliserin nan te enstab. Si ou pa t twò wo anlè lè w lage l, l ap eksploze. Si l te fè twò cho, li t ap eksploze. Si l te fè twò frèt, li t ap eksploze. Menmsi yo te mete l nan yon chanm frèt, ak sonb epi abandone l, li t ap finalman eksploze. Pifò peyi te bani transpòtasyon li, epi anpil te bani fabrikasyon li.

An 1860, yon syantis Syedwa ki rele Alfred Nobel te kòmanse eseye stabilize nitwogliserin. Apre sèt ane eksperimantasyon, li te atenn objektif li nan absòbe nitwogliserin lan nan yon sibstans prèske san valè ki te rele tè diatome oubyen kieselguhr. Kieselguhr se yon kalite wòch frajil ki ka kraze fè poud. Lè l melanje avèk nitwogliserin, kieselguhr absòbe nitwogliserin nan epi pat ki fòme a ka pran fòm “bagèt.” Nan fòm sa a, nitwogliserin vin pi plis estab. Li ta ka stoke, transpòte, epi itilize san danje avèk yon puisans eksplozif entak. Nobel te rele konbinezon nitwogliserin ak kieselguhr la “dinamit.”

Dinamit te chanje mond lan. Li te fè Nobel vin rich tou. San yon stabilizatè, nitwogliserin nan te jis twò danjere pou itilizasyon komèsyal valab, jan Ascanio Sovreto te twouve a. Poukont li, jan m te mansyone a, kieselguhr, te gen ti kal valè. Men konbinezon de konpozan sa yo te bay dinamit tranfòmatif ak presye.

Nan menm fason an, konbinezon levanjil Jezikri a ak Legliz Jezikri pou Sen Dènye Jou yo founi benefis puisan ki ka transfòme nou. Levanjil la pafè, men yon legliz avèk manda diven nesesè pou preche li, kenbe purte li, ak administre òdonans sakre l yo avèk otorite ak pouvwa Sovè a.

Reflechi sou konbinezon levanjil Sovè a avèk Legliz Li a jan li te etabli pa pwofvèt Alma nan Liv Mòmon an. Legliz la te responsab pou preche “okenn lòt bagay sinon repantans ak lafwa nan Senyè a, ki ta [pral rachte] pèp li a.” Avèk itilizasyon otorite Bondye, Legliz la te responsab pou administre òdonans batèm lan “nan non Senyè a, pou temwaye ke yo [antre] nan yon alyans avèk li … [pou] sèvi li epi kenbe kòmandman li yo.” Moun ki te batize yo te pran non Jezikri sou tèt yo, rantre nan Legliz Li a, epi yo te jwenn pwomès gwo pouvwa atravè devèsman Lespri a.

Moun te anvayi dlo Mòmon yo pou yo te tande Alma ki t ap preche levanjil la. Malgre yo te venere dlo sa yo ak forè ki te antoure yo, Legliz Senyè pa t yon andwa ni yon batiman, ni se pa sa l ye jodia. Legliz la se senpleman moun òdinè, disip Jezikri, ki reyini ak òganize nan yon estrikti avèk manda diven ki ede Senyè a akonpli objektif Li yo. Legliz la se enstriman ki sèvi pou nou aprann wòl santral Jezikri ak Ekspyasyon Li a nan plan Papa nou ki nan Syèl la. Legliz la ofri kanal ki gen otorite pou moun yo ka patisipe nan òdonans yo epi fè alyans dirab avèk Bondye. Kenbe alyans sa yo rapwoche nou pi pre Bondye, ba nou aksè nan pouvwa Li, epi transfòme nou an moun Li vle pou nou vini an.

Menm jan dinamit san nitwogliserin pa t ap anyen patikilyèman spesyal la, Legliz Sovè a se Legliz Li sèlman si li bati sou levanjil Li a. San levanjil Sovè a ak otorite pou administre òdonans yo, Legliz la eksepsyonèl

San efè stabilizan kieselguhr la, nitwogliserin te gen pouvwa limite kòm yon eksplozif. Jan listwa montre l, san Legliz Senyè a, konsa tou konpreyansyon lèzom de levanjil Li a te enstab—ak tandans pou devyasyon doktrinal epi siseptib a enfliyans diferan relijyon, kilti, ak filozofi. Yon melanj enfliyans sa yo te evidan nan chak dispansayon ki te mennen nan sila a ki se dènye a. Malgre levanjil la te inisyalman revele nan purte li, entèpretasyon ak aplikasyon levanjil sa a te gradyèlman pran fòm yon divinite ki te manke pouvwa paske Legliz ki divinman otorize a te absan.

Legliz Jezikri pou Sen Dènye Jou yo bay aksè nan pouvwa Bondye paske Li otorize l alafwa pou anseye doktrin Kris la ak pou ofri òdonans sali ak egzaltasyon levanjil yo. Sovè a gen gwo dezi pou L padone peche nou, ede nou aksede nan pouvwa Li, epi transfòme nou. Li te soufri pou peche nou yo epi li gen dezi pou padone nou kont pinisyon ke otreman nou t ap merite. Li vle nou vin sen epi pèfeksyone nan Li.

Jezikri gen pouvwa pou fè sa. Li pa t senpleman senpatize avèk enpèfeksyon nou yo epi lamante pou kondanasyon etènèl nou kòm konsekans peche. Non, Li te ale pi lwen ke sa, enfiniman pi lwen ke sa, epi retabli Legliz Li a pou ba nou aksè nan pouvwa Li.

Esans levanjil ke Legliz la anseye a sèke Jezikri te pote “chagren nou yo, epi pote tristès nou yo.” Li te “pran sou li inikite nou tout.” Li “te andire kwa a,” kase “kòd lanmò yo,” monte nan syèl la, epi … al chita sou kote dwat Bondye, pou reklame de Papa a dwa li pou l gen mizerikòd.” Sovè a te fè tout sa paske Li renmen Papa Li epi Li renmen nou. Li deja peye pri enfini a pou L ka [reklame] tout moun ki gen lafwa nan Li [epi plede] ” pou yo—pou nou. Jezikri pa vle okenn lòt bagay plis pase pou nou repanti epi vin jwenn Li pou Li ka jistifye nou ak sanktifye nou. Avèk dezi sa a, Li enfatigab ak inebranlab.

Aksè nan pouvwa alyans Bondye a ak lanmou nan alyans Li a se atravè Legliz Li a. Konbinezon levanjil Sovè a ak Legliz Li a transfòme lavi nou. Li te transfòme granparan matènèl mwen yo. Granpapa m, Oskar Andersson, te travay nan yon chantye naval nan Högmarsö, yon zile nan achipèl Stockholm lan. Madanm li, Albertina, ak pitit li yo te viv sou teritwa Syedwa a. Yon fwa chak de semèn, jou Samdi, Oskar te navige bato li vin lakay li pou wikenn nan avan l te retounen nan Högmarsö nan Dimanch apremidi. Yon jou, pandan l te nan Högmarsö, li te tande de misyonè Ameriken ki t ap preche levanjil retabli Jezikri a. Oskar te santi ke sa l te tande a sete verite pur, epi li te ranpli avèk yon lajwa endeskriptib.

Pwochèn fwa li te retounen lakay li, Oskar te di Albertina tout bagay konsènan misyonè yo avèk antouzyas. Li te eksplike ke li te kwè sa yo te anseye a. Li te mande l pou l te li bwochi ke misyonè yo te ba li yo, epi li te di l ke li pa t panse ke okenn nan pitit yo ta pral genyen yo ta dwe batize lè yo te timoun. Albertina te fache epi l te voye bwochi yo jete nan pil fatra a. Yo pa t pale anpil apresa avan Oskar te kite pou l t al travay nan Dimanch apremidi.

Imedyatman apre l te fin ale, Albertina te rekipere bwochi yo. Li te atantivman konpare doktrin yo avèk ansèyman nan Bib pèsonèl li a. Li te etone paske l te santi ke sa l te li yo te vrè. Pwochèn fwa Oskar te retounen lakay la, li te resevwa yon bèl akèy, ansanm ak Liv Mòmon li te pote avèk li a. Albertina te li avèk enpasyans, konpare doktrin lan ankò ak sa ki te nan Bib li a. Tankou Oskar, li te rekonèt verite pur la epi li te ranpli avèk lajwa endeskriptib.

Oskar, Albertina, ak pitit yo te demenaje ale Högmarsö pou yo te ka pre kèk manm Legliz la nan kote sa a. Yon semèn apre Oskar ak Albertina te fin batize an 1916 la, Oskar te jwenn apèl kòm dirijan gwoup Sen Högmarsö sa yo. Tankou anpil nouvo konvèti, Oskar ak Albertina te rankontre anpil kritik akoz nouvo lafwa yo a. Agrikiltè lokal yo te refize vann yo lèt, konsa Oskar te navige travèse fjord la chak jou pou l t al achte lèt nan men yon lòt agrikiltè pi toleran.

Men pandan ane apre yo, kantite manm Legliz la nan Högmarsö te ogmante, an pati akoz temwayaj puisan ak gwo antouzyas misyonè Albertina. Lè gwoup la te vin yon branch, Oskar te jwenn apèl kòm premye prezidan branch li.

Manm nan branch Högmarsö sa yo te venere zile sa a. Sa sete Dlo Mòmon pa yo. Sa sete kote yo te vin gen yon konesans de Redanmtè yo a.

Atravè ane yo, pandan yo t ap kenbe alyans batèm yo, Oskar ak Albertina te vin transfòme pa pouvwa Jezikri. Yo te gen dezi pou yo te fè plis alyans epi resevwa benediksyon tanp pa yo. Pou yo te jwenn benediksyon sa yo, yo te definitivman emigre soti lakay yo nan Lasyèd pou vini Salt Lake City an 1949. Oskar te sèvi kòm dirijan manm Högmarsö yo pandan 33 ane.

Konbinezon nitwogliserin ak kieselguhr la te vin fè dinamit presye; konbinezon levanjil Jezikri a ak Legliz Li a depase tout pri. Oskar ak Albertina te tande pale de levanjil retabli a paske yon pwofèt Bondye te aple, asiyen, epi voye misyonè nan Lasyèd. Pa manda diven, misyonè yo te anseye doktrin Kris la epi pa otorite prètriz la yo te batize Oskar ak Albertina. Kòm manm, Oskar ak Albertina te kontinye aprann, devlope, ak sèvi lòt moun. Yo te vin Sen Dènye Jou paske yo te kenbe alyans yo te fè yo.

Sovè a fè referans ak Legliz Jezikri pou Sen Dènye Jou yo kòm “legliz mwen” an paske Li ba li manda diven pou akonpli objektif Li yo—preche levanjil Li a, ofri òdonans ak alyans Li yo, epi rann posib pou pouvwa Li ka jistifye ak sanktifye nou. San Legliz Li a, pa gen okenn otorite, okenn preche verite revele yo nan non Li, okenn òdonans oswa alyans, okenn manifestyon sou pouvwa divinite a, okenn transfòmasyon nan moun Bondye vle pou nou devni an, epi plan Bondye pou ptit Li yo se pou anyen. Legliz la nan dispansasyon sa a entegral a plan Li.

Mwen envite nou pou n angaje tèt nou pi konplètman nan Sovè a, levanjil Li a, ak Legliz Li a.” Pandan n ap fè sa, nou pral reyalize ke konbinezon levanjil Sovè a ak Legliz Li a pote pouvwa antre nan lavi nou. Pouvwa sa a delwen pi gran pase dinamit. Li pral kraze wòch ki sou wout nou yo epi tranfòme nou pou nou vin yon eritye nan wayòm Bondye a . Epi nou pral vin “ranpli ak yon lajwa ineksplikab e yon laglwa total .” Nan non Jezikri, amèn.

Nòt

  1. Poud nwa se yon melanj nitrat potasyòm (salpetre), souf, ak chabon bwa. Li klasifye kòm yon eksplozif fèb oubyen yon eksplozif a randman fèb akoz rit dekonpozisyon relativman lan li genyen, ki fè l pbrile a yon vitès ki pa pwodui son. Eksplozif puisan oubyen eksplozif a randman puisan bay detonasyon olyue yo brile, sa ki pwodui yon ond ak chòk sipèsonik.

  2. Dinamit pèmèt yon ogmantasyon san presedan nan kreyasyon tinèl pou tren yo, sistèm kanivo yo, ak sòbwe [metwo} yo nan tout mond lan—pwojè jeni majè yo ki t ap enposib pou [akonpli] san eksplozyon kontwole yo [ke] dinamit [te pèmèt]. Prèske tout triyonf spektakilè travay jeni yo nan [fen 19èm ak debi 20èm syèk]—Souteren Lond lan, Pn Bwouklin nan, Ray Tren Transkontinantal la, ak Kanal Panama—repoze ekstansivman sou nouvo eksplozif la” (Steven Johnson, The Infernal Machine: A True Story of Dynamite, Terror, and the Rise of the Modern Detective [2024], 24; gade tou p. 44).

  3. Paske nitwogliserin nan limenm pa t valid komèsyalman, Ascanio Sovrer pa t vin rich akoz entèvanxyon l lan/ Spandan: lè Alfred Nobel te konstwi yon faktori dinamit nan Avigliana, Itali, an 1873, Sobrero te chwazi kòm yon konsiltan byen-peye pou rekonèt ak deklare li kòm moun ki envante nitwogliserin. Sobrero te kenbe pozisyon sa jistan li mouri an 1888. (Gade G. I. Brown, The Big Bang: A History of Explosives [1998], 106.)

  4. Pou istwa sou poud nwa, nitwogliserin, ak dinamit, gade Brown, The Big Bang, 1–121.

  5. Levanjil Jezikri a se sinonim pou doktrin Kris la.

  6. Gade Moza 18:7, 20; 25:15, 22.

  7. Mozya 18:10.

  8. Gade 2 Nefi 31:13.

  9. Gade Mozya 18:17; 25:18, 23; Alma 4:4–5; Elaman 3:24–26; 3 Nefi 28:18, 23.

  10. Gade 2 Nefi 31:12–14; Mozya: 18:10.

  11. Legliz la fondamantal nan ofri alyans sakre yo bay pitit Papa nou ki nan Syèl la. Se pou sa pandan dotasyon nan tanp yo, manm yo fè alyans pou kenbe lwa konsekrasyon an. Sa vledi ke yo “dedye tan yo, talan yo, ak tout bagay Senyè a ka ba yo kòm benediksyon pou bati Legliz Jezikri a sou tè a” (Manyèl Jeneral: Sèvi nan Legliz Jezikri pou Sen Dènye Jou yo, 27.2, Libreri Levanjil)).

  12. Gade Russell M. Nelson, “Spiritual Treasures,” LyawonaNov. 2019, 77.

  13. Gade Mozya 18:22; Moyiz 6:68; Gid Ekriti yo, “Pitit gason ak Piitt fi Bondye yo,” Libreri Levanjil.

  14. Gade 3 Nefi 27:13–21.

  15. Gade Atik Lafwa 1:5.

  16. Gade Russell M. Nelson, “Rejwi nan Don Kle Prètriz yo,” Lyawona, Me 2024, 121; 3 Nefi 27:9–11.

  17. Sovè a “te chwazi kèk kòm apot; epi kèk pwofèt; epi lòt kòm evanjelis; epi kèk kòm, pastè ak enstriktè” konsa pou “nou [ka] tout vini nan inite nan lafwa, epi vin konnen Pitit gason Bondye a, … pou dezòmè pa genyen okenn timoun, k ap chanje lide, ki kite kouran nenpòt doktrin trennen yo, pa riz lèzòm, ak mètdam, ki ka twonpe yo nan ba yo manti” (Efezyen 4:11–16

  18. Senkretis se yon tèm teknik pou melanj diferan relijyon, kilti, oswar lekòl panse.

  19. Gade Joseph Smith—Istwa 1:19.

  20. Gade “Retablisman Plenitid Levanjil Jezikri a: Yon Pwoklamasyon Bisantnè pou Mond lan,” Libreri Levanjil. Prezidan Russell M. Nelson te li pwoklamasyon an kòm yon pati nan mesaj li nan 190èm Konfereans Jeneral Anyèl la, 5 Avril, 2020, nan Salt Lake City, Utah (gade Russell M. Nelson“Koute Li,” Ensign, Me 2020, 91–92).

  21. Nou ka gen aksè nan pouvwa Bondye nan egzèse lafwa nan Jezikri, repanti pou peche nou yo, epi kenbe alyans nou fè yo avèk Pè Selès la ak Jezikri nan òdonans tankou batèm, dotasyon an, ak sentsèn nan.

  22. Gade Gid Ekriti yo, “Jistifikasyon, Jistifye,” Librevi Levanjil.

  23. Gade Gide Ekriti yo, “Sanktifikasyon,” Libreri Levanjil.

  24. Gade Morowi 10:32–33.

  25. Gade Ebre 4:15; gade tou referans 15a.

  26. Gade Doktrin ak Alyans 19:15–18.

  27. Gade Ezayi 53:4–12.

  28. Ebre 12:2.

  29. Mozya 15:23.

  30. Mowoni 7:27–28; gade tou Doktrin ak Alyans 45:3–5.

  31. Gade Mozya 18:30.

  32. Gade Inger Höglund and Caj-Aage Johansson, Steg i Tro: Jesu Kristi Kyrka av Sista Dagars Heliga i Sverige 1850–2000 (2000), 66–67.

  33. Doktrin ak Alyans 115:4.

  34. Gade Doktrin ak Alyans 84:19–21

  35. Si w resevwa sa Legliz Senyè a ofri, ou ka vin pèfeksyone nan Kris avan Legliz Li a vin pèfèksyone, lè li vin pèfèksyone. Objektif li se pou pèfeksyone ou. non Legliz la. Objektif Li pa janm te, metaforikman, fè kieselguhr tounen dyaman; Obektif li sete pou rafine nou vin tounen lò pur, pou sove a egzalte ou kòm eritye ansanm avèk Li nan wayòm Papa nou ki nan Syèl la.) Men sa bezwen vin tounen objektif nou, tou. Sa se chwa pa w!

  36. Elaman 5:44.