Bondye Renmen Tout Pitit Li Yo
Jezikri toujou ap aple nou, epi Li itilize nou, sèvitè òdinè Li yo, pou mennen pitit Li yo vini jwenn Li.
Kisa Papa nou ki nan Syèl la dezire de nou menm? Èske w konprann ke lè w te nan egzistans premòtèl ou a, Papa nou ki nan Syèl la t ap prepare w pou lavi ou sou tè a? Pandan l t ap pale avèk jèn yo, Prezidan Russell M. Nelson te di “Papa nou ki nan Syèl la te rezève anpil espri nòb—petèt… pi bon ekip Li a—pou faz final sa a.” Paske li te rezève n pou dènye jou sa yo, li nesesè pou nou aprann vin disip Jezikri.
Senyè a, Jezikri, se Bon Bèje a, e Li konnen twoupo L la, e twoupo a konnen Bèje Li a paske “li rele pwòp mouton l yo pa non yo.” Li toujou ap aple nou, epi Li itilize nou, sèvitè òdinè Li yo, pou mennen pitit Li yo vini jwenn Li.
Sa gen kèlke tan, yon prezidan pieu avèk mwen t ap vizite kèk manm Legliz nan yon katye nan lokalite a. Apre nou te fini vizit nou te planifye yo, prezidan pieu a te mande m si nou te kapab ale wè yon lòt fanmi. Li te gen enpresyon ke nou ta dwe pale avèk yo.
Nou te frape pòt la, epi yon sè te ouvri li. Li te gade m, men li pa t konnen kiyès mwen te ye, konsa, li pa t di anpil bagay. Mwen te lonje men m nan direksyon prezidan pieu a, ki te salye l pa non li. Osito ke l te tande l epi wè l la, li te kontan. Kanpe la devan pòt la, yo tou de te anbrase youn lòt epi yo te kriye ansanm. Sa te kreye ton pou vizit nou an. Nou pa t konnen ke sè a te resevwa chimyoterapi jou anvan an. Li te santi l twò fèb pou l te pran swen pitit gason adilt li a. Konsa mwen te ede prezidan pieu a abiye pitit gason li a, epi nou mete l nan chèz woulant li. Nou te ba l manje ke yon lòt sè janti nan pawas la te pote, epi nou te ede l ak lòt bagay. Anvan nou te kite kay yo a, nou te beni yo.
Tout sa ki t ap pase nan tèt mwen pandan vizit sa a se te yon konfimasyon ke Jezikri renmen yo pwofondeman. Li konprann yo e li pèsonèlman konnen doulè sitiyasyon inik yo a. Prèske tout vizit la te fèt an silans. Nan okazyon sa a, nou pa t bay yon gwo prèch oswa pataje vèsè nou te pi renmen, men Senyè a te beni nou avèk Lespri li an abondans.
Youn nan pi gwo rezon ki fè Papa nou ki nan Syèl la voye nou isit la nan moman sa a se pou nou ka reyalize tout potansyèl nou. Preche Levanjil mwen an anseye nou ke antanke disip Kris la, nou ta dwe evite konpare tèt nou youn a lòt. Kapasite espirityèl ou inik, pèsonèl, ak natirèl, epi Papa ou ki nan Syèl la vle ede w devlope yo. Ap toujou gen yon moun ou ka ede santi lanmou Papa w ki nan Syèl la. Potansyèl ou diven. Pandan ke li sètènman enpòtan pou prepare tèt ou pou reyisi nan mond sa a ki trè konpetitif la, youn nan misyon enpòtan ou pandan tout lavi ou se vin yon disip Jezikri epi suiv enpresyon Lespri a. Pandan w ap fè sa, Bondye ap beni lavi w, l ap beni fanmi w kounyea oswa nan lavni, epi l ap beni lavi pitit Li yo ke w rankontre yo.
N ap viv nan yon tan ki gen anpil opòtinite. Malgre ke nou fè fas ak anpil difikilte, mwen konnen yo la an pati pou pèmèt nou ede lòt moun santi lanmou Papa nou ki nan Syèl la. Pezidan Nelson te anseye: “Nan jou k ap vini yo, nou pral wè pi gran manifestasyon pouvwa Sovè a ke mond lan pa t janm konn wè.” Nou gen privilèj pou nou veye sou moun ki bezwen yon koutmen, yon akolad, yon santiman rekonfò, oswa tou senpleman pou nou avèk yo an silans. Si nou ka ede soulaje fado yo, menm si sèlman pou yon ti moman, lè sa a n ap kapab wè gwo manifestasyon pouvwa Sovè a nan lavi yo.
Antanke disip Jezikri, Sen Dènye Jou yo kapab fè yon diferans pozitif nan mond lan. Nou kapab bay yon santiman lajwa ki reflete nan figi nou—yon lajwa ke nou pataje avèk pawòl lanmou ak aksyon jantiyès. An nou vin bon vwazen, bon anplwayè, ak bon travayè. Ann fè efò pou nou vin bon kretyen tout tan.
Senyè a te retabli levanjil Li a ak òdonans ki nesesè yo pou pitit Papa nou ki nan Syèl la ka gen tout pwomès ki mare nou avèk Li. Lè n ap ede sè nou yo ak frè nou yo nan difikilte kotidyen yo, an nou sonje tou pou nou ede yo fè ak kenbe pwomès sakre sa yo avèk Papa yo ki nan Syèl la pou ke anretou li ka pwomèt yo pi bèl benediksyon pou lavi sa a ak pou letènite. Pwomès sa yo posib sèlman atravè Retablisman levanjil Jezikri a ak kle prètriz Li yo.
Otremandi, nou ka ede lòt moun rete sou chemen alyans lan. Gen kèk nan nou ki devye soti nan chemen an de tanzantan, epi konsa nou dwe sonje ke pou Papa nou ki nan Syèl la nou toujou gen posiblite pou nou retounen. Menmsi pakou nou an pa pakou ki pi pafè a, Sovè a toujou fè nou sonje ke, “Chak fwa [nou repanti] epi nou [chèche] padon, avèk entansyon reyèl, [n ap] padone.”
Youn nan riz advèsè a jodi a se fè nou panse ak kwè ke pa gen okenn fason pou nou chanje oswa ke nou pa gen espwa ankò. Panse destriktif sa a lakòz anpil nan nou sispann eseye. E se nan moman sa a menm ke lanmou nou, pawòl ankourajman nou ak sipò nou, tan nou, ak èd nou ka bay yon moun ase espwa pou l eseye yon lòt fwa ankò.
Petèt w ap panse, “OK, men kiyès ki ap sèvi mwen?” Lè n ale epi nou beni lavi frè ak sè nou yo, n ap kolekte temwayaj ki ap ranpli lavi nou ak lafwa nan Senyè Jezikri. Temwayaj sa yo pral revitalize nou pou nou eseye yon lòt fwa ankò pou tèt pa nou. Sentespri a va fè nou vivifyeepi ede nou avèk temwayaj renouvle pou nou ka kontinye avèk pwòp difikilte ak eprèv pèsonèl pa nou yo. Chak fwa nou chèche beni lavi lòt moun, Senyè a gen mizèrikòd pou nou plis toujou.; Li ban nou fòs e li ede nou nan lavi nou.
Tanpri sonje ke Senyè Jezikri se Sovè w epi li konprann ou pèsonèlman. Li konnen kisa sa ye pou nou manifye yon apèl epi kite tout bagay dèyè pou ede pitit Bondye yo. Li gen pouvwa pou l beni w nan tout bagay, si w kwè nan Li epi w pa doute.
Chè frè m ak sè m yo, nan jou sa a kote yon dirijan prètriz te santi enspirasyon pou nou te vizite yon manman ak yon pitit gason li ke nou pa t genyen nan ajanda nou an, mwen pwoklame ke Bondye te konnen yo te bezwen nou. Alafen, se mwenmenm ki te resevwa sèvis la. Jou sa a, mwen te resevwa youn nan pi gwo leson sou lanmou Sovè a pou nou.
Mwen temwaye ke Jezikri se Sovè mond lan, ke li vivan, li te viv e li te mouri pou ou menm avèk mwen, e li te resisite pou ou menm avèk mwen pou nou kapab aspire a reyinyon selès ki plen lajwa avèk moun ki deja sou lòt bò vwal la. Mwen konnen ke li konprann ou menm avèk mwen pafètman. Li konprann chak nan moman difisil nou yo, epi Li gen pouvwa pou ede nou nan moman kote nou santi nou pi vilnerab yo. Mwen konnen Senyè Jezikri ak Papa nou ki nan Syèl la te parèt devan Joseph Smith pou retabli levanjil la nan epòk sa a. Mwen konnen chè pwofèt nou an, Presidan Russell M. Nelson, se yon pwofèt Senyè a, e mwen temwaye konsènan bagay sa yo nan non Jezikri, amèn.