Konsantre sou Jezikri ak Levanjil li a
Lè nou inyore distraksyon mond lan epi nou konsantre sou Jezikri ak Levanjil Li a, nou gen garanti ke n ap gen siksè.
An 1996, ekip foutbòl maskilen Nijeryen an te genyen meday lò nan Je Olenpik ki te fèt nan Atlanta, Georgia yo , nan Etazini. Lè final la te fini, foul moun eksite te vide nan lari chak vil ak chak vilaj nan Nijerya; peyi 200 milyon moun sa a (nan moman an) te toudenkou transfòme vin yon selebrasyon masif a dezè dimaten! Te gen lajwa, kè kontan, ak eksitasyon kontajye nan lè a pandan moun yo t ap manje, chante, ak danse. Nan moman sa a, Nijerya te ini, epi chak Nijeryen te kontan dèske yo te Nijeryen.
Anvan Olenpik yo, ekip sa a te travèse anpil difikilte. Lè tounwa a te kòmanse, sipò finansye yo te sispann. Ekip la te deside ale san twous apwopriye, san teren pou yo te antrene, pa t gen ase manje, ni sèvis lesiv.
Jerome Prevost/Getty Images
Rive nan yon pwen, sete kèlke minit sèlman ki te rete pou yo te elimine nan konpetisyon an, men ekip Nijeryen te triyonfe sanzatann kont tout chans. Moman enpòtan sa a te chanje fason yo te konsidere tèt yo. Avèk nouvo kwayans sa a, epi avèk yon travay endividyèl ak travay ekip ak detèminasyon obstine, yo te inyore pil distraksyon yo epi yo te konsantre sou genyen. Konsantrasyon sa a te fè yo ranpòte meday lò, epi Nijeryen yo te batize yo “Ekip rèv la.” Ekip Rèv nan Je Olenpik 1996 la kontinye ap sèvi kòm referans nan espò Nijeryen yo.
David Cannon/Allsport/Getty Images
Yon fwa ekip foutbòl maskilen Nijeryen an te aprann inyore pil distraksyon yo t ap fè fas yo epi konsantre yo sou objektif yo, yo te reyisi odela de sa yo te panse ki te posib—epi fè eksperyans gwo lajwa. (Tankou tout rès nan nou yo Nijerya!)
Nan menm fason an tou, lè nou inyore distraksyon mond lan epi nou konsantre sou Jezikri ak levanjil Li a, nou gen garanti siksè ki depase sa nou ka totalman imajine epi nou santi gwo lajwa. Prezidan Russell M. Nelson te anseye: “Lè lavi nou santre sou plan sali Bondye a … ak Jezikri ak levanjil Li a, nou ka santi lajwa kèlkeswa sa k rive—oswa sa k pa rive—nan lavi nou.”
Mwen priye pou Sentespri a ede nou chak ajoute yon dimansyon pi wo ak pi sakre sou nou antanke disip epi pou nou koute envitasyon Prezidan Nelson te fè pou nou konsantre lavi nou sou Jezikri ak sou levanjil Li a nan chèche atribi Kretyen pou nou ka fè eksperyans lajwa nan Kris la kèlkeswa sa k ap pase oswa pa rive nan lavi nou.
Gen plizyè istwa nan Liv Mòmon an sou moun endividyèl ki te chanje lavi yo nan konsantre sou Jezikri ak sou levanjil Li a.
Alma pi Jèn nan. Li te rebele epi li te konbat kont Legliz la. Papa l, Alma, te priye epi jene. Yon zanj te parèt epi li te rele Alma, Pitit la ala repantans. Nan moman sa a, Alma te kòmanse soufri “doulè yon nanm dane.” Nan moman tenèb yo, li te sonje papa l te anseye ke Kris la t ap vini pou rachte pou peche mond lan. Pandan lespri l te rete konsantre sou panse sa a, li te sipliye Bondye pou mizèrikòd. Lajwa te vini kòm rezilta, yon lajwa li dekri kòm yon bagay eski! Alma te resevwa mizèrikòd ak lajwa te
Pou paran ki gen timoun ki kite chemen an, pran kouraj! Olye pou w mande poukisa yon zanj pa vin ede pitit ou a repanti, konnen ke Senyè a te mete yon zanj mòtèl sou wout li: evèk la, yon lòt dirijan Legliz oswa yon frè ak sè sèvis pastoral. Si w kontinye jene ak priye, si w pa fikse yon kalandriye oswa yon delè pou Bondye, epi si w genyen konfyans ke L ap lonje lamen L pou ede ou, ebyen—pi bonè ou pita—w ap vin wè ke w Bondye ap touche kè pitit ou a lè pitit ou a chwazi pou l koute. Se konsa sa ye paske Kris la se lajwa, Kris la se lespwa; Li se pwomès bon bagay ki gen pou vini Konsa, fè Jezikri konfyans avèk pitit ou a, paske li se fòs chak paran, ak chak pitit.
Yon fwa li te fè eksperyans lajwa nan Kris la, Alma, Pitit la te viv avèk lajwa sa a pandan tout lavi li. E kijan li te kenbe lajwa sa a menm nan difikilte ak eprèv? Li deklare:
“Epi depi lè sa a, jis pou kounyeya, mwen te travay san rete, [pou] m kapab mennen nanm nan repantans; pou m kapab fè yo goute anpil lawja m te goute yo. …
“… Epi … Senyè a ban m yon gwo lajwa nan fwi travay mwen yo. …
“Epi mwen jwenn sipò [nan] eprèv ak pwoblèm tout kalite.” .”
Lajwa nan Kris la te kòmanse pou Alma lè li te egzèse lafwa nan Li epi li te kriye pou mizèrikòd. Alma te kontinye egzèse lafwa nan Kris la nan travay san rete pou l te ede lòt moun goute menm lajwa a. Travay kontinyèl sa yo pou l te mennen lòt moun bay Kris la te pwodui anpil lajwa pou Alma, menm nan eprèv ak pwoblèm tout kalite. Nou wè, “Senyè a renmen efò,” epi efò ki konsantre sou li pote benediksyon. Menm gwo eprèv yo ka “nwaye nan lawja Kris lat.”
Yon lòt gwoup moun nan Liv Mòmon an ki te mete Jezikri ak levanjil li a nan sant lavi yo e ki te jwenn lajwa sete moun ki te fonde vil Elam yo—yon lye kote yo te kapab elve pitit yo epi egzèse relijyon yo a libreman. Pèp jis sa a ki t ap viv bon lavi te tonbe nan esklavaj anba men yon gwoup mawodè epi yo te retire dwa imen fondamantal yo pou egzèse relijyon an. Kèkfwa gen move bagay ki rive bon moun.
“Senyè a te wè l nesesè pou l chatye pèp li a; wi, li te teste pasyans yo ak lafwa yo.
“Se poutèt sa, nenpòt moun ki mete konfyans nan li, y ap leve nan dènye jou a. Wi, e se konsa sa te ye pou pèp sa a.”
Kijan pèp sa a te andire atravè eprèv yo ak soufrans yo? Nan konsantre sou Kris la ak levanjil Li a. Nou wè, pwoblèm yo pa t defini yo; olyesa, chak nan yo te vire al jwenn Bondye paske yo te defini tèt yo kòm yon pitit Bondye, yon pitit alyans, ak yon disip Jezikri. Pandan yo te sonje kiyès yo te ye epi yo te rele Bondye, yo te resevwa lapè, fòs, epi finalman lajwa nan Kris la:
“Epi Alma ak pèp li a te fè sa … yo te leve kè yo bay [Senyè a]; e li te konnen panse kè yo.
“Epi, se te konsa, vwa Senyè a te fè yo tande l nan afliksyon yo, li te di: Leve tèt nou, e konsole nou paske m konnen ki alyans nou te fè avèk mwen; m ap fè alyans avèk pèp mwen an, e m ap delivre l anba esklavaj.”
Kòm repons, Senyè a te “soulaje chay yo … sou zepòl [yo]. … Wi, Senyè a te fòtifye yo pou yo kapab pote chay yo alèz, e yo te aksepte avèk kè kontan ak pasyans tout sa Senyè a te vle.”. Remake byen ke Sen sa yo te kite pwoblèm, soufrans, ak eprèv yo anglouti nan lajwa Kris la! Epi, nan moman egzak la, Li te montre Alma chemen pou yo te chape, epi Alma—yon pwofèt Bondye—te mennen yo nan sekirite.
Pandan n ap konsantre nou sou Kris la epi suiv pwofèt li a, Prezidan Russell M. Nelson, noumenm tou l ap mennen nou nan Kris la ak nan lajwa levanjil li a. Jan Prezidan Nelson te anseye: “Lajwa puisan, epi lè nou konsantre sou lajwa, sa pote pouvwa Bondye nan lavi nou. Jan sa ye nan tout bagay, Jezi se egzanp siprèm nou, ‘ki, pou lajwa ki te tabli devan L a, Li te sipòte kwa a’ [Ebre 12:2.”
Manman m te mouri dènyèman; se te yon chòk pou mwen. Mwen renmen manman m e mwen pa t planifye pou m te pèdi l si jèn konsa. Men atravè lanmò l la, fanmi m avèk mwen te fè eksperyans lajwa. Mwen konnen, gras ak Kris la—li vivan. Epi mwen konnen grasa Kris la ak kle prètriz yo ki te retabli nan Legliz sa a atravè Pwofèt Joseph Smith la, m ap avèk li ankò yon jou. Lapenn pèt manman m nan anglouti nan lajwa Kris la! M ap aprann pou m “panse selès” epi “kite Bondye gen priyorite” ansanm ak rete konsantre sou lajwa ki disponib nan Kris la.
Li envite avèk amou, “Vini jwenn mwen, nou tout ki bouke, nou tout ki anba chay, m a soulaje nou.” Nan non Jezikri, amèn.