Ekriti Sakre yo—Fondasyon Lafwa
Nou pa ka souzestime enpòtans ekriti sakre yo nan konvèsyon ak nan rete fidèl nan levanjil la.
Madanm mwen, Mary, avèk mwen dènyèman te wè yon mayo ki te gen foto yon liv ak yon mesaj ekri sou devan li ki te di, “Liv: Premye Aparèy Pòtab la”
Mwen te reflechi sou mesaj enteresan sa a ak sou kijan aparèy pòtab tout kalite vin enpòtan. Lè m te reflechi pi plis toujou, mwen te reyalize ke okenn aparèy ni menm yon aparèy ki ekipe avèk entelijans atifisyèl, p ap janm ka osi enpòtan ak siyifikatif ke gidans spirityèl ki soti nan revelasyon divin nan.
Keseswa dijital oubyen kenbe nan men, Bib la ak Liv Mòmon an: Yon Lòt Temwayaj Konsènan Jezikri, bay gidans spirityèl ak ansèyman ki soti nan Jezikri, Sovè Mond lan. Nou apresye liv sa yo pou wòl pwofon yo nan dokimante direksyon Bondye pou ansyen pwofèt ak pèp yo ak gidans yo pote pou lavi pèsonèl pa nou yo.
Konbine avèk ansèyman pwofèt vivan yo, ekriti sakre sa yo bay direksyon doktrinal pou nou nan mond jodia. Ekriti sa yo pi puisan lè yo bay enstriksyon, koreksyon, rekonfò, ak konsolasyon pou moun ak fanmi ki ap chèche gidans nan men Senyè a.
Ekriti yo, konbine avèk enspirasyon spirityèl nan men Sentespri a, kontinye rete sou prensipal ki fasilite konvèsyon moun ki gen “kè brize ak lespri kontri” epi ki vle suiv Jezikri. Ekriti yo ede bati yon fondasyon ki ka kanpe devan efò konstan advèsè a pou diminye lafwa nou.
Nouvo konvèti yo te toujou yon benediksyon ak yon gwo fòs Legliz la atravè tout istwa li. Gen yon egzanp ki patikilyèman presye pou mwen. Lè m te yon jèn evèk, de sè misyonè mèveye t ap anseye fanmi William Edward Mussman. Papa a, yon avoka trè konpetan, sete avoka jeneral yon gwo antrepriz. Madanm devwe li, Janet, t ap ede fanmi an eseye mennen yon lavi pi Kretyen.
Pitit gason ak pitit fi eksepsyonèl yo, ki toulède te nan kòmansman laj 20 tan yo, t ap pran ansèyman yo tou. Toulè kat te resevwa leson yo epi yo te konn ale legliz. Sè misyonè yo te mete aksan sou li Liv Mòmon an ak sou priye pou yon temwayaj konsènan ekriti sakre sa a. Ramakableman, fanmi an te li tout Liv Mòmon an nan yon espri lapriyè nan yon ti bout tan.
Misyonè pieu yo, ki toulède te prezidant Sosyete Sekou anvan sa, te konn akonpaye yo nan reyinyon Sentsèn yo.
Pandan fanmi an t ap apwoche batèm yo, yo te resevwa yon pil dokiman ki t ap kritike Legliz la. Sa sete anvan Entènèt, men dokiman yo te ranpli yon gwo bwat katon.
Sè misyonè yo te envite m kòm yon evèk 34 an ki te fèk aple pou m te ede reponn kesyon yo t ap poze yo. Lè nou te reyini nan salon yo a, gwo bwat ki te plen bwochi kritik sou Legliz la te nan mitan sal la. Mwen te priye anpil apwopo tach sa a. Pandan priyè ouvèti a, Lespri a te chichote m, “Li konnen deja ke se verite.” Sa te enpòtan. Sè yo te kwè ke rès fanmi an te deja gen yon temwayaj. Men yo pa t sèten apwopo papa a.
Mwen te imedyatman enfòme l ke “Lespri a te chichote m ke li te deja genyen yon temwayaj. Èske sete vre? Li te gade m avèk anpil atansyon epi l te di ke Lespri a te konfime l verasite Liv Mòmon an ak Legliz la.
Apresa mwen te mande èske sa t ap nesesè pou nou te repase bwochi yo, si yo te deja genyen yon konfimasyon spirityèl?
Papa a te reponn ke sa pa t ap nesesè. Rès fanmi an te dakò avèk repons li a.
Li te di ke l te gen yon kesyon enpòtan: Youn nan rezon ki fè l te resevwa si tèlman bagay ki opoze a Legliz la se paske yo te manm yon lòt legliz. Epitou, li te pran yon gwo angajman pou l te bati yon nouvo chapèl pou legliz sa a. Li te di m ke sè misyonè yo te anseye l sou enpòtans ladim, sa ke l te aksepte avèk rekonesans, men li t ap mande l si se pa t ap yon move bagay pou l ta onore angajman li te fè anvan an tou. Mwen te asire l ke peye sa l te pran angajman pou l te peye a se t ap yon bagay onorab ak apwopriye.
Mussman yo avèk pitit gason yo, bèlfi yo, ak pitit fi yo.
Tout fanmi an te batize. Yon ane apre yo te sele kòm fanmi nan Tanp Oakland nan Kalifòni an. Mwen te gen privilèj pou m te prezan. Pitit gason an te fini etid li kòm avoka, li te reyisi egzamen Bawo a, epi li te imedyatman al sèvi yon misyon nan Japon. Mwen te obsève atravè ane yo kijan jenerasyon apre a te rete fidèl nan levanjil la. Mwen te gen privilèj pou m te ofisye nan sèlman youn nan pitit pitit fi yo.
Konvèsyon ki fèt nan epòk pa nou yo osi remakab tou. An Jen dènye, Antrenè Andy Reid, antrenè anchèfekip foutbòl Chiefs Kansas City a, avèk mwen, ansanm ak lòt moun ki te reprezante legliz nou an ak lòt legliz, te pale nan yon evenman milti lafwa nan Legliz Riverside la nan Nouyòk. Antrenè Reid te mete aksan sou dezyèm chans ak sou reponn a envitasyon ak opòtinite yo, ki se sa levanjil Jezikri a reprezante. Nan demen maten, avèk madanm nou, Tammy Reid ak Mary, nou te asiste reyinyon sentsèn nan Dezyèm Pawas Manhattan nan. Sete yon sèvis spirityèl. Te gen anpil nouvo konvèti nan asanble a. Senk manm ki te fèk batize, kat gason ak yon jènjan, te pami manm Prètriz Aawon ki t ap distribye sentsèn yo. Mwen kontan pou m rapòte ke gen yon devèsman nouvo manm ki ap fèt toupatou nan Legliz la.
Nou rekonesan pou ogmantasyon remakab sa a nan kantite moun ki reponn a envitasyon sakre yo, chanje lavi yo, epi aksepte opòtinite pou yo suiv Jezikri a. Yo antre nan chemen alyans lan atravè lafwa, repantans, batèm, ak konfimasyon jan yo anseye nan Bib la ak nan Liv Mòmon an.
Nou pa ka souzestime enpòtans ekriti sakre yo nan konvèsyon ak nan rete fidèl nan levanjil la. Ansyen pwofèt yo ki dekri nan Liv Mòmon an te gen konesanssou misyon Jezikri epi yo te anseye levanjil Li a. Liv Mòmon an ede nou rapwoche pi pre Bondye pandan n ap aprann, konprann, ak aplike ansèyman li yo. Pwofèt Joseph Smith te anseye “yon gason [oswa fi] ap vin pi pre Bondye si l suiv presèp yo nan [liv la], pase si l suiv presèp nenpòt lòt liv.”
Pou n konnen si Liv Mòmon an se pawòl Bondye, nou bezwen li, medite, ak priye osijè li epi apresa aji selon presèp li yo. Pwofèt Mowoni te pwomèt ke Bondye ap revele verite liv la ba nou si nou priye avèk yon kè sensè, yon entansyon reyèl, epi avèk lafwa nan Kris la. Etidye Liv Mòmon esansyèl pou konvèsyon dirab.
Pandan n ap reflechi sou relasyon ant Bib la ak Liv Mòmon an kòm aparèy pòtab, yon moun ta gen dwa poze yon kesyon. Nan ki pwen nou panse ke de liv sa yo t ap itil ak konplemantè si Senyè a te deklare ke yo ta pral “ini ansanm” epi “vin fè youn nan men nou”? Se sa Senyè a te deklare konsènan “bwa Jida” a, Bib la, ak “bwa Joseph” la, Liv Mòmon an.
Nan plizyè aspè, Liv Mòmon an founi doktrin fondamantal ki amelyore ak ranfòse Bib la. Doktrin sou Sakrifis Ekspyatwa Jezikri a se yon egzanp puisan.
Bib la bay yon resi klè sou ministè Jezikri nan mòtalite a, enkli lanmò L ak Rezirèksyon Li. Liv Mòmon an pi klè toujou apwopo Sakrifis Ekspwatwa Jezikri a, yon bagay ke pwofèt yo te eksplike an detay anvan nesans Li.
Antèt Alma chapit 42 a reflete enpòtans doktrinal Ekspyasyon Jezikri a.
Li di: “Mòtalite a se yon tan eprèv pou pèmèt lèzòm pou yo repanti epi pou yo sèvi Bondye—Chit Adan an te mennen lanmò tanporèl ak lanmò espirityèl sou tout limanite—Redanmsyon vini pa mwayen repantans—Bondye pou tèt pa Li ekspye peche mond lan—Mizèrikòd se pou moun ki repanti—Tout lòt moun dwe soumèt yo anba jistis Bondye—Mizèrikòd vini akoz Ekspyasyon an—Se sèl moun ki repanti toutbon ki sove.”
Prezidan Russell M. Nelson te di, “Mwen pwomèt ke si nou etidye Liv Mòmon an nan yon espri lapriyè chak jou, n ap ka pran pi bon desizyon—chak jou.” Li pwomèt tou ke si “nou plonje nou chak jou nan Liv Mòmon an, n ap kapab jwenn pwoteksyon kont tout mal ki nan epòk nou yo.”
Jan m te mansyone a, mwen te enpresyone pa konsèp aparèy pòtatif orijinal la—yon liv. Sepandan, mwen rekonèt siyifikasyon enkwayab Entènèt nan mond jodia. Yon aparèy pòtatif modèn kapab bay enfòmasyon ki istorikman ranpli yon gran bibliyotèk. Nou rekonesan dèske n ap viv nan yon epòk konsa. Mwen patikilyèman rekonesan dèske li pèmèt liv sakre yo ak materyèl Legliz yo disponib dijitalman. Entènèt la se yon zouti puisan pou etidye levanjil la. Jodia, anpil moun itilize teknoloji pou pataje ekriti yo avèk zanmi yo. App Liv Mòmon an, paregzanp, se yon mwayen mèveye pou prezante zanmi nou Liv Mòmon an epi nou ka fasilman pataje l nan fason nòmal ak natirèl kèlkeswa kote nou ye.
Pandan ke Entènèt la pote anpil benediksyon an, malerezman, tankou bwochi ekri ki t ap kritike Legliz la mwen te dekri anlè la a, yo itilize l tou pou kreye dout ak pou wonje lafwa nan prensip levanjil presye yo. Sa ka fè pati “mal epòk nou yo” Prezidan Nelson te mansyone yo.
Advèsè a ak moun ki ap asiste li, konsyamman oubyen san yo pa konnen, kreye sou Entènèt la sa ki ekivalan a bwat katon plen dokiman kritik sou Legliz la mwen te dekri anvan an, avèk entansyon pou rale nou ale lwen verite Bondye yo.
Kesyon yo soulve pou kreye dout atravè ane yo remakableman menmjan tou. Sa espesyalman vre lè nou konpare epòk nou an avèk ane 1960 yo, lè m te nan ventèn mwen.
Ekriti yo anseye nou pou nou itilize bon jijman epi pou nou saj nan tout bagay. Entènèt ka itilize nan yon fason pozitif oubyen nan yon fason destriktè.
Ni moun ki manm depi lontan ni moun ki fèk ap etidye levanjil la bezwen byen chwazi nan sa y ap gade. Pa itilize kontni ki imoral, malonèt, oswa enjis. Si w fè sa, bagay sa yo ka mennen w desann sou yon chemen ki ap detwi lafwa ak antrave pwogresyon etènèl ou. Yo gen dwa ka aji sou ou pozitivman oswa negativman. Chèche bagay ki jis epi evite tonbe nan bagay negatif entènèt ki se adiksyon ak pase twòp tan ladan nan. Ranpli lavi nou avèk ide pozitif, ki jis; se pou nou gen lajwa; amize nou men evite foli. Gen yon diferans. Trèzyèm atik lafwa a se yon gid mèveye. Anlè tout bagay, plonje tèt nou regilyèman nan Liv Mòmon an, sa ki ap atire Lespri a nan lavi nou epi ede nou disène verite ak erè.
Konsèy mwen pou moun ki devye soti nan chemen alyans lan nan yon fason kèlkonk se pou yo retounen nan ekriti sakre yo, direksyon pwofèt yo, ak obsèvans relijye nan fwaye yo, ak nan mizik lafwa yo. Chak nanm presye pou Senyè a. Nou bezwen ou! Senyè a bezwen ou, epi ou bezwen Li! W ap toujou byenveni. Pandan anpil ane m yo nan sèvis Legliz la, mwen cheri moun mèveye ki retounen sou chemen alyans yo epi ki apresa sèvi ak beni chak moun yo renmen oswa tout moun yo vin an kontak avèk yo.
Ekriti sakre yo ak pwofèt vivan yo se yon gwo mwayen yon Papa eman ki nan Syèl la mete plan bonè L la disponib pou tout pitit Li yo.
Mwen rann temwayaj sèten mwen sou divinite Jezikri ak reyalite Sakrifis Ekspyatwa l la, nan non Jezikri, amèn.