Moun Prefere Bondye
Lè nou ranpli ak lanmou Bondye, sa pwoteje nou nan tanpèt lavi yo, men tou, sa rann moman kè kontan yo pi agreyab toujou.
Anvan m kòmanse, mwen dwe di nou ke de nan pitit mwen yo te endispoze pandan yo t ap fè diskou sou chè a, e m pa janm te santi m pi konekte avèk yo pase nan moman sa a. Mwen te gen plis nan tèt mwen pase pòtdesòti sa a.
Fanmi nou gen sis timoun ki pafwa youn fawouche lòt pou di ke li se pitit prefere a. Yo chak gen rezon diferan pou nou prefere yo. Lanmou nou pou chak pitit nou yo pur, li satisfezan e li konplè. Nou pa ta kapab renmen youn nan yo plis pase yon lòt—nesans chak timoun te vin pi bèl ekspansyon lanmou nou. Se lanmou m santi pou pitit mwen yo ki fè m pi byen konprann lanmou Papa m ki nan Syèl la genyen pou mwen.
Pandan ke yo chak ap deklare ke yo se pitit nou pi renmen an, ou ta ka panse ke fanmi nou pa t janm gen yon chanm ki tèt anba. Santiman enpèfeksyon nan relasyon ant paran ak pitit diminye lè l konsantre sou lanmou.
Rive yon lè, petèt paske m ka wè ke n ap dirije nan direksyon yon revòlt familyal inevitab, mwen pral di yon bagay tankou “OK, ou genyen, men mwen pa p di li; ou konn kiyès nan nou m pi prefere.” Objektif mwen se pou chak nan sis yo santi yo yo pote laviktwa ak evite yon lagè total—omwen jiska pwochèn fwa a!
Nan Levanjil li a, Jan dekri tèt li kòm “disip Jezi te renmen an,” kòmsi aranjman sa a te yon fason inik. Mwen renmen panse ke se paske Jan te santi Jezi sitèlman renmen l. Nefi te ban m menm enpresyon an lè l te ekri: “Mwen glorifye nan Jezi m nan.” Natirèlman, Sovè a pa pou Nefi pa plis ke li pou Jan, e poutan nati pèsonèl relasyon Nefi a avèk “li” a Jezi te mennen l nan deskripsyon plen tandrès sa a.
Èske sa pa mèveye ke nou santi pafwa ke Li si totalman ak si pèsonèlman remake nou ak renmen nou? Nefi ka rele L Jezi “pa l”, e nou kapab tou. Lanmou Sovè nou an se “kalite lanmou ki pi wo, pi nòb, ak pi solid,” e li bay li jiskaske nou “rasazye.” Lanmou diven pa janm fini, e nou chak se yon favori presye. Lanmou Bondye se tankou sèk sou yon dyagram Venn, nou tout sipèpoze. Kèlkeswa pati nan nou ki sanble diferan, lanmou li se kote nou jwenn inite.
Èske se yon sipriz ke pi gwo kòmandman yo se renmen Bondye ak renmen moun ki bò kote nou? Lè m wè moun ki montre lanmou kretyen youn pou lòt, mwen gen enpresyon ke lanmou sa a genyen plis pase lanmou pa yo ; se lanmou ki genyen divinite ladan l tou. Lè nou renmen youn lòt konsa, osi konplètman ak totalman ke nou kapab, syèl la patisipe tou.
Donk, si yon moun ki enpòtan pou nou sanble l pa ka santi lanmou divin, nou ka suiv modèl sa a—ki se fè sa ki mennen nou pi pwòch Bondye nou menm epi ansuit fè sa ki ap mennen nou pi pwòch de yo—yon envitasyon san pawòl pou nou vin jwenn Kris la.
Mwen swete mwen te kapab chita avèk ou epi mande w ki sikonstans ki fè w santi lanmou Bondye. Ki vèsè ekriti, ki zak sèvis patikilye? Ki kote w te ye? Ki mizik? Nan konpayi kiyès? Konferans jeneral se yon kote ki rich pou aprann sou konekte avèk lanmou selès.
Petèt ou santi w byen lwen lanmou Bondye. Petèt gen yon kantite vwa dekourajman ak tenèb ki ap peze sou panse ou, mesaj ki ap di w ke ou twò blese ak plen konfizyon, ke w twò fèb ak neglije, twò diferan oswa dezoryante pou w merite lanmou selès nan nenpòt fason reyèl. Si w tande lide sa yo, tanpri tande sa m pral di la a: vwa sa yo senpleman enkòrèk. Nou ka san ezite inyore ide ki di ke enpèfeksyon nou yo fè nou diskalifye pou lanmou selès la—chak fwa nou chante kantik ki raple nou ke Sovè byeneme san defo nou an te chwazi pou yo te “maltrete L, kraze L, [ak] dechire L pou nou,” chak fwa nou pran pen kase. Sètènman Jezi retire tout lawont pou tout moun ki brize. Atravè eta brize pa L la, Li te vin pafè, epi Li ka fè nou pafè malgre jan nou brize. Li te kraze, solitè, dechire, ak maltrete—epi nou ka santi nou konsa tou—men, nou pa separe de lanmou Bondye. “Moun brize; lanmou pafè,” jan chante a di a.
Petèt ke w konnen yon bagay sekrè apwopo tèt ou ki fè w santi ke w pa merite lanmou. Kèlkeswa jan sa w konnen apwopo tèt ou ka kòrèk, ou antò si w panse ke sa mete w nan yon sitiyasyon pi lwen pase kote lanmou Bondye ka rive. Nou pafwa kriyèl ak enpasyan anvè tèt nou nan fason ke nou pa ta janm ka imajine ke nou te kapab anvè nenpòt lòt moun. Gen anpil bagay pou nou fè nan lavi sa a, men meprize tèt nou ak kondanasyon tèt nou anba wont pa sou lis sa a. Kèlkeswa jan nou ta ka santi nou enpafè, bra li pa p vin twò kout. Non. Yo toujou long ase pou “[rive] jwenn nou” epi anbrase nou chak.
Lè nou pa santi chalè lanmou diven an, se pa paske li ale. Pwòp pawòl Bondye yo di: “mòn yo pral ale, e kolin yo pral retire; men bonte [li] p ap kite [nou].” Konsa, jis pou nou klè, lide ke Bondye sispann renmen an ta dwe byen lwen nan lis eksplikasyon posib nan lavi a ki di ke nou p ap rive jwenn li jis apre mòn yo ak kolin yo disparèt la!
Mwen vrèman renmen senbòl mòn sa a ki se prèv sètitid lanmou Bondye. Senbòl puisan sa a demontre nan istwa moun ki ale nan mòn yo pou yo resevwa revelasyon an ak deskripsyon Ezayi te fè konsènan “mòn kay Senyè a” ke yo te “etabli sou tèt mòn yo.” Kay Senyè a se kay alyans ki pi presye nou yo epi se yon kote pou nou tout al retrete nou epi plonje pwofondman nan prèv lanmou Papa nou genyen pou nou an. Mwen menm tou mwen jwi rekonfò ki vini nan nanm mwen lè m anvlope tèt mwen pi sere nan alyans batèm mwen an epi jwenn yon moun ki ak kriye pou yon pèt oswa yon desepsyon epi m eseye ede l eksprime ak jere santiman l yo. Èske se fason sa yo nou ka vin pi plonje nou nan lanmou alyans presye ki se mizerikòdla?
Konsa, si lanmou Bondye pa kite nou, poukisa nou pa toujou santi li? Jis pou m prevni nou: mwen pa konnen. Men, konnen ke yo renmen nou se definitivman pa menm bagay avèk santi ke yo renmen nou, e mwen gen kèk panse ki ta ka ede w pandan w ap chèche repons ou pou kesyon sa a.
Petèt ke w ap lite anba lapenn, depresyon, trayizon, solitid, desepsyon, oswa lòt obstak puisan ki antrave kapasite w pou w santi lanmou Bondye pou ou. Si se konsa, bagay sa yo ka twouble oswa sispann kapasite nou pou nou santi n jan n ta ka santi nou. Pou yon sèten tan omwen, petèt ou p ap ka santi lanmou li, epi konesans ou de Li ap sifi. Men mwen mande m si w ta ka fè eksperyans—avèk pasyans—avèk diferan fason pou eksprime ak resevwa lanmou diven. Èske ou ka fè yon pa an aryè nan tou sa ki devan ou e petèt yon lòt pa ak yon lòt ankò jiskaske w gen yon pi gwo vizyon sou peyizaj la, plis an plis laj, si sa nesesè, jiskaske ou literalman ka “panse a bagay selès” paske w ap gade zetwal yo epi w ap sonje mond inonbrab yo epi atravè yo, Kreyatè yo a?
Keseswa chan zwazo, santi solèy la oswa yon ti van oswa lapli sou po mwen, ak pafwa lè lanati reveye sans adorasyon m pou Bondye—yo chak te jwe yon pati nan ban m koneksyon avèk syèl la. Petèt rekonfò zanmi fidèl yo ap ede. Petèt mizik? Oswa sèvi? Èske w fè yon yon rejis oswa yon jounal sou lè koneksyon w avèk Bondye te pi klè pou ou? Petèt ou ta ka envite moun ou fè konfyans pou yo pataje sous koneksyon divin yo avèk ou pandan w ap chèche soulajman ak konpreyansyon.
Mwen mande m, si Jezi ta chwazi yon kote ou menm avèk li ta ka rankontre, yon andwa prive kote w ta kapab konsantre inikman sou li, èske Li ta chwazi andwa patikilye soufrans pèsonèl ou a, andwa ki asosye avèk bezwen ki pi pwofon w la, kote pesonn pa ka ale a? Yon andwa kote w santi w sitèlman poukont ou ke w santi ou reyèlman kw se sèl moun ki ladan l, men se pa totalman vrè, yon kote ke petèt sèlman Limenm ki te vwayaje la men ke an reyalite Li deja prepare pou rankontre w la lè w rive la? Si w ap tann Li vini, Li gen dwa deja la epi Li ka tou pre?
Si w santi w ranpli ak lanmou nan sezon sa a nan lavi w, tanpri eseye kenbe li menm jan yon paswa kenbe dlo. Otremandi, simaye li tout kote ou ale. Youn nan mirak ekonomi diven an sèke lè nou eseye pataje lanmou Jezi, nou twouve nou ranpli konfòmeman a prensip sa a ki di: “Nenpòt moun ki vle pèdi lavi l pou poutèt mwen, ap jwenn li”
Lè nou ranpli ak lanmou Bondye, li pwoteje nou nan tanpèt lavi yo, men tou li fè moman kè kontan yo vin pi agreyab—jou kè kontan nou yo, lè gen solèy nan syèl la, vin pi klere toujou grasa solèy ki nan nanm nou an.
Annou “anrasinen ak fonde” nan Jezi nou an ak nan lanmou Li. Annou chèche epi valorize eksperyans kote nou santi lanmou L ak pouvwa L nan lavi nou yo. Lajwa levanjil la disponib pou tout moun: pa sèlman pou moun ki gen kè kontan, ni pa sèlman pou moun ki dekouraje. Lajwa se objektif nou, se pa yon kado sikonstans nou yo pote. Nou gen tout bon rezon pou nou “rejwi epi ranpli ak lanmou anvè Bondye ak tout moun.” Annou ranpli tèt nou. Nan non Jezikri, amèn.