Lajwa nan Redanmsyon nou
Lanmou ak pouvwa Jezikri kapab sove nou chak anba erè, feblès, ak peche nou yo epi ede nou vin atenn potansyèl nou.
Sa fè dizan, mwen te santi yon enpresyon pou m te pentire yon pòtrè Sovè a. Kwake m se yon atis, m te santi tach la te ontijan depase m. Kijan m ta ka fè yon pòtrè sou Jezikri ki kaptire Lespri Li? Kijan pou m kòmanse? Epi ki bò mwen ta pral jwenn tan?
Menm avèk kesyon mwen yo, m te deside kontinye an anvan epi fè Senyè a konfyans paske Li ap ede m. Mwen te oblije kontinye avanse epi kite posiblite yo nan men Li. Mwen te priye, medite, fè rechèch, ak chema, epi mwen te beni pou m te ka jwenn èd ak resous. Epi sa ki te yon tablo blan te kòmanse chanje pou vin yon bagay an plis.
Pwosesis la pa t fasil. Gen de fwa li pa t sanble sa m te espere an. Te gen moman kote m te jwenn enspirasyon nan penso m ak ide m. Epi te gen anpil fwa, kote mwen te oblije eseye ankò e ankò.
Lè m te panse penti a luil la te finalman konplè ak seche, mwen te kòmanse mete vèni transparan sou li pou pwoteje l kont salte ak pousyè. Lè m te fè sa, mwen te remake ke chève nan penti an te kòmanse chanje, badijonnen, ak fonn. Byen vit mwen te reyalize ke m te aplike vèni an trò bonè, pati sa a nan penti an te mouye toujou!
Literalman mwen te efase yon pati nan penti m nan avèk vèni an. O, kè m te sere. Mwen te santi m kòmsi mwen te detwi sa Bondye te ede m kreye. M kriye epi m te santi m malad. Nan desepwa mwen, mwen te fè sa nenpòt moun ta tipikman fè nan yon moman konsa: m te rele maman m. Avèk sajès ak trankilite, li te di m, “Ou pa p kapab jwenn sa ou te genyen an, men fè pi bon efò w avèk sa w genyen an.”
And I Partook [M te Bwè l], by Kristin M. Yee
Konsa m te priye epi m te plede pou mande èd, epi mwen te pentire tout nannuit la pou m repare bagay yo. Epi mwen sonje jan m te gade penti an nan maten—li te pi bèl pase jan l te ye anvan an. Kòman sa te fè posib? Sa m panse ki te yon erè ireparab te yon opòtinite pou men mizèrikòd Li manifeste. Li pa t fini avèk tablo a, epi Li pa t fini avèk mwen tou. Ala de jwa ak soulajman ki te ranpli kè mwen. M te bay Senyè a louwanj pou lagras Li, pou mirak sa a ki pa t sèlman sove penti m nan men ki te anseye m plis sou lanmou Li ak pouvwa Li pou L sove chak youn nan nou anba erè nou, feblès nou, ak peche nou yo pou ede nou vin yon bagay an plis.
Menmjan pwofondè rekonesans mwen pou Sovè a te grandi pandan Li te ede m repare penti ki te sanble li te “san reparasyon” an, se konsa tou lanmou pèsonèl mwen ak rekonesans mwen pou Sovè a entansifye, lè m mache chèche travay avèk Li kont feblès mwen yo epi pou Li padone erè mwen yo. M ap toujou rekonesan anvè Sovè m nan dèske mwen kapab chanje ak lave. Li gen kè mwen, e mwen espere fè tout sa Li t ap mande m fè ak mande m pou m devni.
Repantans pèmèt nou santi lanmou Bondye epi rive konnen kiyès Li ye ak renmen Li nan yon nivo ke nou pa ta p janm konnen san sa. Konsènan fi ki te wen pye Sovè a, Jezi te di: “ Peche l yo, e m konnen yo anpil, yo padone; paske li renmen anpil: men yon moun yo padone yon ti kras, se yon ti kras l ap montre jan l renmen tou.” Li te renmen Jezi anpil paske Jezi te padone li anpil.
Tèlman gen soulajman ak lespwa lè nou konnen nou kapab eseye ankò—jan Eldè Bednar te anseye, nou kapab resevwa yon remisyon kontinyèl pou peche nou yo atravè pouvwa santifye Sentespri an lè nou repanti ak senserite.
Pouvwa redanmsyon Jezikri a se youn nan pi gran benediksyon nan pwomès alyans nou yo. Panse sou pwomès sa a pandan w ap patisipe nan òdonans sakre yo. San li, nou pa ta p kapab retounen lakay nou nan prezans Papa nou ki nan Syèl la ak moun nou renmen yo.
Mwen konnen ke Senyè a, Sovè nou an, Jezikri, gen pouvwa pou L sove nou. Antake Pitit Bondye Li te ekspye pou peche mondlan epi Li te bay lavi Li epi Li te resevwa li ankò, Li gen pouvwa redanmsyon ak rezireksyon. Li te rann imòtalite yon posiblite pou tout moun ak lavi etènèl pou moun ki chwazi Li. Mwen konnen ke atravè sakrifis ekspyatwa Li nou kapab repanti epi vin vreman lave ak resevwa redanmsyon. Se yon mirak dèske Li renmen oumenm avè m konsa.
Li te di, “Èske nou p ap retounen vin jwenn mwen, e repanti pou peche nou yo, konvèti pou m kapab geri nou?” Li kapab geri tout “dezè” ki nan nanm nou—kote ki seche, ki di, ak dezole akozde peche ak chagren, epi “fè dezè [nou] vin tounen tankou Eden.”
Menmjan nou pa kapab konprann agoni ak pwofondè ki te nan soufrans Kris la te andire nan Getsemani ak sou kwa an, se konsa tou nou “pa kapab mezire limit oswa kapte pwofondè padon, lagras ak lanmou divin [Li].
Gen defwa ou kapab santi ke li pa posib pou w jwenn redanmsyon, ke petèt ou se yon eksepsyon nan lanmou Bondye ak pouvwa ekspiyatwa Sovè a akozde sa w ap konbat loubyen akozde sa w te fè. Men, mwen temwanye ke ou pa bi pa pase kote Mèt la ka rive. Sovè a te “desann pi ba tout bagay” epi Li nan yon pozisyon divin pou Li soulve w ak reklame w soti nan twou ki pi fènwa, pou w antre nan “bèl limyè Li a.” Atravè soufrans Li, Li te trase yon chemen pou chak nan nou kapab simonte fèblès pèsonèl nou ak peche nou yo. “Li gen tout pouvwa pou l sove chak moun ki kwè nan non li e ki pote fwi ki bon pou repantans.”
Menm jan li te nesesè pou m travay ak plede pou jwenn èd selès pou m repare penti an, sa pran travay, kè sensè, ak imilite pou nou pote fwi ki bon pou repantans.” Fwi sa yo gen ladan egzèse lafwa ak mete konfyans nou sou Jezikri ak sakrifis ekspyatwa Li, ofri Bondye yon kè brize ak yon lespri kontri, confese ak abandone peche, retabli sa ki te abime jan nou kapab, epi fè efò pou nou viv ak lajistis.
Pou nou vrèman repanti ak chanje, nou dwe toudabò “gen konviksyon sou peche nou.” Yon moun p ap wè nesesite pou l pran medikaman si l pa konprann ke li malad. Gendefwa nou pa gen volonte pou nou gade andedan tèt nou epi wè sa ki reyèlman bezwen gerizon ak reparasyon.
Nan liv C. S. Lewis ekri yo, Aslan te depoze mo sa yo devan yon mesye ki te anpetre tèt li nan pwòp vis li: “O [limanite], gade kijan nou briyan nan defann tèt nou [kont] tout sa ki te ka fè nou byen!”
Ki kote oumenm avè m te gendwa ap defann tèt nou kont bagay ki te ka fè nou byen?
Annou pa defann tèt nou kont tout sa ki bon ke Bondye vle bannou kòm benediksyon. Kont lanmou ak lagras Li vle pou nou santi. Kont limyè ak konesans Li vle akòde nou. Kont gerizon Li pre pou Li ofri nou e ke Li konnen nou dezespere pou nou jwenn. Kont pi gwo relasyon alyans Li gen entansyon etabli ak tout pitit gason ak pitit fi Li yo.
Mwen priye pou nou kapab mete sou kote nenpòt “zam lagè” ke nou ranmase ak konsyans oubyen san konsyans pou nou defann tèt nou kont benediksyon lanmou Bondye. Zam ògèy—egoyis, lakrent, lahèn, ofans, konplezans ak jijman enjis, jalouzitout bagay ki kapab evite nou renmen Bondye avèk tout kè nou ak kenbe tout alyans nou avèk Li
Lè nou viv alyans nou, Senyè a ka banou èd ak pouvwa nou bezwen pou nou rekonèt ak simonte feblès nou yo, san wete parazit espirityèl ki rele ògèy la tou. Pwofèt nou an te di:
”Repantans chak jou se chemen ki mennen nan purete, epi purete pote pouvwa.”
“Epi, o, nou pral bezwen pouvwa Li anpil nan jou k ap vini yo.”
Menmjan ak penti mwen an, Senyè a poko fini avèk nou lè nou fè erè, konsa tou Li pa kouri lè nou ezite. Gerizon ak èd nou bezwen an se pa yon fado pou Li men se rezon ki fè Li te vini. Sovè a limenm te di:
“Gade m te vini nan mond lan pou m pote redanmsyon nan mond lan, pou m sove mond lan anba peche.”
“Ponyèt mizèrikòd mwen lonje ba nou, nenpòt moun ki vini m ap resevwa l, epi moun ki vin jwenn mwen, y ap beni.”
Se pou sa vini—vini ou menm ki dezole, ki abime, ak tris, vini epi kite fado ou yo epi vin jwenn repo nan Limenm ki plis renmen w. Pran jouk Li, mete l sou zepòl ou. Paske Li dou ak enb nan kè.
Papa nou Ki nan Syèl la ak Sovè an konsyan de ou. Yo konnen kisa ki nan kè w. Yo enkyete pou sa ki enkyete w, menm moun ou renmen yo tou.
Sovè a ka rachte sa ki te pèdi, enkli relasyon ki kraze oubyen fraktire. Li te trase yon mwayen pou tout sa ki tonbe kapab rachte—li bay lavi nan tout sa ki sanble l mouri oubyen san espwa.
Si w ap lite ak yon sitiyasyon ou panse ou ta dwe simonte alèkile, pa lage. Bay tèt ou pasyans, kenbe alyans ou yo, repanti souvan, chèche èd nan men dirijan ou yo si nesesè, epi ale nan kay Senyè a ak regilarite jan ou kapab. Koute epi pote atansyon a enspirasyon Li voye ba ou. Li pa p abandone relasyon alyans Li avèk ou.
Mwen te gen relasyon difisil ak konplèks nan lavi mwen ke m te lite avèk yo epi mwen te chèche amelyore. Gendefwa, mwen te santi kòmsi tout tan se echwe m a p echwe. Mwen te mande tèt mwen, “èske m pa t ranje bagay sa yo dènye fwa an? Èske m pa t vreman simonte feblès mwen an?” M vin aprann avèk le tan ke se pa defo m genyen; men, souvan gen plis travay pou m akonpli ak plis gerizon ki nesesè nan mwen.
Èldè D. Todd Christofferson te anseye: “Asiremen, Senyè a kontan ak moun ki gen anvi pou yo vin devan jijman an diy, moun ki travay ak rezolisyon chak jou pou ranplase feblès yo ak fèmte. Vrè repantans, vrè chanjman gendwa egzije plizyè esè, men toujou gen yon bagay ki rafine ak sentifye nan anbisyon sa yo. Padon ak gerizon divin koule natirèlman sou nanm sa yo.”
Chak jou se yon jou tounèf ki ranpli ak espwa ak posiblite akozde Jezikri. Chak jou oumenm avè m nou kapab vin konnen, menmjan manman Èv te konnen, “lajwa redanmsyon nou an,” lajwa nan santi nou geri, lajwa lè nou santi lanmou enfayib Bondye genyen pou nou.
Mwen konnen Papa nou ki nan Syèl la ak Sovè a renmen nou. Jezikri se Sovè ak Redanmtè tout limanite. Li vivan. Atravè sakrifis ekspityatwa Li, chèn peche ak lanmò te kase ajamè pou nou ka lib pou nou chwazi gerizon, redanmsyon, ak lavi etènèl avèk moun nou renmen yo. Mwen temwaye konsènan bagay sa yo nan non Li, amèn.