Mòtalite a Fonksyone!
Malgre eprèv, chagren, ak difikilte nou tout rankontre yo, Papa byeneme nou ki nan Syèl la te fè plan bonè a yon fason pou nou pa destine pou n echwe.
Pou plizyè ane mwe te responsab vizit ofwaye pou yon sè granmoun nan pawas mwen. Lavi li pat fasil. Li te gen plizyè pwoblèm sante epi te gen anpil doulè tout lavi li akòz you aksidan li te fè lè l te piti nan lakou rekreyasyon. Li te divòse a 32 an ak kat timoun piti pou l te elve ak pran swen, li te remarye a 50 an. Dezyèm mari l la te mouri lè l te gen 66 an, epi sè sa a te viv 26 an ankò kòm vèv.
Malgre tout pwoblèm lavi l yo, li te fidèl nan alyans li yo jiska lafen. Sè sa a se te yon jeneyalojis pasyone, li te asiste nan tanp, li te yon kolektè ak ekriven istwa familyal. Malgre ke li te gen anpil eprèv difisil, e san keksyon li pafwa te santi tristès ak solitid, li te gen yon figi lajwa ak yon pèsonalite grasye ak plezan.
Nèf mwa apre li te mouri, youn nan pitit gason l yo te fè yon eksperyans remakab nan tanp lan. Li te aprann pa pouvwa Sentespri a ke manman l te gen yon mesaj pou li. Li te kominike avèk li, men se pat vizyon ni pawòl ki te ka tande. Mesaj san dout sa a te vini nan lespri pitit gason an soti nan men manman l: “Mwen vle w konnen ke mòtalite a fonksyone, epi mwen vle w konnen kounye a mwen konprann poukisa tout bagay te rive [nan lavi mwen] jan sa te fèt la—e tout bagay. OK.”
Mesaj sa a plis remarkab lè yon moun konsidere sitiyasyon ak difikilte sè sa a te andire ak simonte yo.
Frè m ak sè m yo, mòtalite a fonksyone! Li fèt pou l fonksyone! Malgre eprèv, chagren, ak difikilte nou tout rankontre yo, Papa byeneme nou ki nan Syèl la, ki saj, e ki pafè ki te fè plan bonè a yon fason pou nou pa destine pou n echwe. Plan li a bay yon chemen pou nou leve pi wo pase echèk mòtèl nou yo. Senyè a te di, “Paske gade, sa a se travay mwen ak laglwa mwen—pou m reyalize imòtalite ak lavi etènèl lòm.”
Sepandan, si nou dwe benefisye “èv ak … laglwa,” menm “imòtalite ak lavi etènèl,” nou dwe atann pou nou resevwa enstriksyon ak ansèyman, epi pou nou pase anba dife rafinè a—pafwa jiska limit total nou. Si nou evite pwoblèm, eprèv, ak difikilte mond sa a konplètman, sa t ap tankou fè yon detou sòti nan pwosesis ki vrèman nesesè pou mòtalite a fonksyone a.
Epi konsa, nou pa ta dwe etone lè tan difisil rive sou nou. N ap rankontre sitiyasyon ki teste nou menm ak moun ki pèmèt nou pratike vrè charite ak pasyans. Men, nou bezwen andire anba difikilte nou yo epi sonje, jan Senyè a te di:
“Epi nenpòt moun ki bay vi l nan kòz mwen, poutèt non mwen, l ap jwenn li ankò, lavi etènèl menm.
“Se poutèt sa, nou pa bezwen pè ènmi nou yo [oswa pwoblèm nou yo, defi nou yo, oswa eprèv lavi sa a], paske mwen te dekrete … , Senyè a di, m ap pwouve nou nan tout bagay, si nou pral rete nan alyans mwen an … pou yo ka jwenn ou diy.”
Lè nou santi nou boulvèse oswa enkyete pou pwoblèm nou yo oubyen lè nou santi ke nou ap resevwa plis pase sa ki jis nan difikilte lavi a, nou ka sonje sa Senyè a te di pitit Izrayèl yo:
“Epi w ap sonje tout fason Senyè a, Bondye w la, te gide w pandan karant ane sa yo nan dezè a, pou l te ka fè w enb, pou l te teste w, pou w te konnen sa ki nan kè w, si w t ap respekte kòmandman l yo oswa non.”
Jan Leyi te anseye pitit gason l Jakòb:
“Ou te soufri afliksyon ak anpil lapenn. … Sepandan, … [Bondye] pral konsakre afliksyon w yo nan avantaj pa w. … Se poutèt sa, m konnen w rachte, poutèt lajistis Redanmtè ou la.”
Paske lavi sa a se yon tès tès ak “nwaj nwa pwoblèm pandye sou nou ak menase pou detwi lapè nou,” li itil pou n sonje konsèy sa a ak pwomès nou jwenn nan Mozya 23 ki gen rapò ak difikilte lavi a: “Men, nenpòt moun ki mete konfyans li nan [Seyè a] menm moun sa tou ap leve nan dènye jou a.”
Lè m jèn, mwen te pèsonèlman fè eksperyans yon gwo doulè emosyonèl ak yon gwo lawont ki te vini kòm rezilta moze aksyon yon lòt moun, ki te afekte m nan estim tèt mwen ak santiman diyite m devan Senyè a pandan plizyè ane. Sepandan, mwen rann temwayaj pèsonèl ke Senyè a kapab fòtifye nou epi sipòte nou nan kèlkeswa difikilte nou resevwa pandan vwayaj nou nan vale dlo nan je sa a.
Nou abitye avèk eksperyans Pòl la:
“Epi pou m pa t egzalte m pi wo gras a abondans revelasyon yo [Mwen te resevwa], yo te ban m yon pikan nan kò a, mesaje Satan pou souflete m, pou apeche m vin ògeye.
“Pou bagay sa a, mwen te lapriyè Senyè a twa fwa, pou l te kite m.
“Li te di m, Gras mwen sifi pou ou: paske se nan feblès puisans mwen akonpli.” Se poutèt sa, ak kè kontan, mwen pito glorifye nan feblès mwen yo, pou puisans Kris la ka repoze sou mwen.”
Nou pa konnen kisa “pikan nan kò” Pòl la te ye. Li te chwazi pa dekri si se te yon maladi fizik, yon enfimite mantal oswa emosyonèl, oswa yon tantasyon. Men, nou pa bezwen konnen detay sa a pou nou konnen ke li te lite epi sipliye Senyè a pou l ede l, e finalman, se fòs ak pouvwa Senyè a ki te ede l atravè bagay sa a.
Menm jan ak Pòl, se gras a èd Senyè a ke m te evantyèlman fòtifye emosyonèlman ak espirityèlman, epi finalman mwen te rekonèt apre anpil ane ke mwen te toujou yon moun ki gen valè e ki diy pou benediksyon levanjil yo. Sovè a te ede m venk santiman endiyite ak pou m padone padon sensè moun ki fèm ofans. Finalman, mwen te konprann Ekspyasyon Sovè a sete yon kado pèsonèl pou mwen e Papa m ki nan Syèl la ak Pitit Gason l lan renmen m pafètman. Akòz Ekspyasyon Sovè a, mòtalite a fonksyone.
Pandan ke finalman m te gen benediksyon pou m rekonèt fason Sovè a te sove m e te kanpe bò kote m atravè eksperyans sa yo, mwen konprann byen ke move sitiyasyon nan ane adolesan m nan sete vwayaj pèsonèl mwen mwen ak eksperyans pa mwen, epi rezolisyon ak rezilta evantyèl la pa ka pwojte sou moun ki te soufri e ki ap kontinye soufri poutèt konpòtman enjis lòt moun.
Mwen rekonèt ke eksperyans lavi yo—bon ak move—kapab anseye nou leson ki enpòtan. Kounye a mwen konnen epi m rann temwayaj ke mòtalite a fonksyone! Mwen espere ke kòm rezilta pou total eksperyans lavi m yo—bon ak move—mwen gen konpasyon pou viktim inosan nan aksyon yon lòt moun ak senpati pou moun yo maltrete yo.
Mwen espere sensèman ke kòm rezilta eksperyans lavi m yo—bon ak move—mwen pi janti avèk lòt moun, mwen trete lòt moun menm jan Sovè a t ap fè, mwen gen pi gwo konpreyansyon pou pechè a, epi mwen gen entegrite total. Lè nou apiye n sou gras Sovè a epi nou kenbe alyans nou yo, nou ka sèvi kòm egzanp sou gwo pòte Ekspyasyon Sovè a.
M ap pataje yon dènye egzanp ki montre ke mòtalite a fonksyone.
Matant Èldè Hales la, Lois VandenBosch, ak manman li, Klea VandenBosch.
Manman m pa t gen yon vwayaj fasil atravè mòtalite a. Li pa t resevwa okenn distenksyon ni onè mond lan epi li pa t gen opòtinite pou l te fè etid pi lwen pase lekòl segondè. Li te fè maladi polyo lè li te timoun, sa ki te lakòz yon lavi doulè ak malèz nan janm goch li. Nan laj granmoun, li te fè eksperyans anpil sikonstans fizik ak finansye difisil men li te rete fidèl nan alyans li yo epi li te renmen Senyè a.
Lè manman m te gen 55 an, gran sè m nan te mouri, li kite yon pitit fi uit mwa, nyès mwen, san manman. Pou plizyè rezon, manman m te rive elve nyès mwen an an gran pati pou 17 ane ki te suiv yo, souvan nan sikonstans trè difisil. Poutan, malgre eksperyans sa yo, li tevolontèman sèvi fanmi l, vwazen ak manm pawas li yo ak kè kontan epi li te sèvi kòm ouvriye òdonans nan tanp pandan plizyè ane. Pandan plizyè nan dènye ane nan lavi li, Manman m te soufri nan yon fòm maladi mantal, li te souvan plen konfizyon, epi li te rete nan yon mezon retrèt. Malerezman, li te poukont li lè li te mouri sanzatann.
Plizyè mwa apre li te mouri, mwen te fè yon rèv mwen pa janm bliye. Nan rèv mwen an, mwen te chita nan biwo mwen nan bilding administrasyon legliz la. Manman m antre nan biwo a. Mwen te konnen li te soti nan mond dèzespri a. M ap toujou sonje santiman mwen te genyen yo. Li pa t di anyen, men li te reyone yon bote espirityèl ke mwen pa t janm fè eksperyans anvan e ke mwen gen difikilte pou m dekri.
Figi l ak tout limenm li te vrèman mayifik! Mwen sonje m te di l: “Manman, ou bèl anpil wi!” an referans ak pouvwa espirityèl li ak bote li. Li te salye mwen—ankò san pale. Mwen te santi lanmou li pou mwen, e mwen te konnen lè sa a li te kontan e li te geri anba sousi ak difikilte mond lan yo epi li t ap tann “yon rezirèksyon gloriye.” Mwen konnen ke pou manman m, mòtalite a te fonksyone—epi li fonksyone pou nou tou.
Travay Bondye ak laglwa Li se pou L reyalize imòtalite ak lavi etènèl lòm. Eksperyans mòtalite yo fè pati vwayaj ki pèmèt nou grandi ak pwogrese ale nan imòtalite ak lavi etènèl sa a. Yo pa t voye nou la a pou nou echwe men pou nou reyisi nan plan Bondye pou nou an.
Wa Benjamen te anseye: “Plis ankò, M ta vle nou konsidere benediksyon ak eta bonè moun sa yo ki respekte kòmandman Bondye yo. Paske Gade, yo beni nan tout bagay, ni tanporèl ak espirityèl; e si yo rete fidèl jiska lafen, y ap jwenn akèy nan syèl la, pou yo kapab rete avèk Bondye nan yon bonè ki p ap fini.” Nan lòt mo, mòtalite fonksyone!
Mwen temwaye ke si nou resevwa òdonans levanjil yo, nou antre nan alyans avèk Bondye epi answit nou kenbe alyans sa yo, si nou repanti, sèvi lòt moun, epi andire jiska lafen, nou menm tou nou ka gen asirans ak konfyans total nan Senyè a ke mòtalite a fonksyone! Mwen temwaye konsènan Jezikri epi avni gloriye nou avèk Papa nou ki nan Syèl la vin posib pa lagras ak Ekspyasyon Sovè a. Nan non Jezikri, amèn.