Byenveni nan Legliz Lajwa a
Akoz lavi ak misyon redanmtris Sovè nou an, Jezikri, nou ka—epi nou ta dwe—moun ki gen plis lajwa sou tè a!
Mwen te batize nan Legliz Jezikri pou Sen Dènye-jou yo nan lavèy Noèl 1987, sa gen prèske 37 ane. Sete vrèman yon jou mèveye nan lavi m, ak nan vwayaj etènèl mwen an, epi mwen pwofondeman rekonesan pou zanmi m yo ki te prepare chemen an epi ki te mennen m nan dlo nouvo nesans sa a.
Menmsi batèm ou se te yè oubyen anpil ane pase, menmsi ou rasanble nan yon batiman pawas miltip Legliz la oubyen anba yon tonèl an tach, menmsi ou resevwa sentsèn an souvni Sovè a an Thai oubyen Swahili, m ta vle di ou, byenveni nan legliz lajwa a! Byenveni nan Legliz lajwa a
Legliz lajwa a
Poutèt plan amou Papa nou ki nan syèl la pou chak pitit Li yo, epi poutèt lavi ak misyon redanmtris Sovè nou an, Jezikri, nou kapab—epi nou ta dwe—moun ki gen plis lajwa sou tè a! Menm lè tanpèt lavi yo nan yon mond ki souvan twouble ap frape sou nou, nou ka kiltive yon sans lajwa ak lapè enteryè ki ap grandi akoz esperans nou nan Kris la ak konpreyansyon nou plas pa nou nan bèl plan bonè a.
Apot Seyè a ki pi granmou nan, Prezidan Russell M. Nelson, pale konsènan lajwa ki vini nan yon lavi ki santre sou Jezikri nan prèske chak diskou li fè depi li te vin Prezidan Legliz la. Li rezime l avèk presizyon: “Lajwa soti nan Limenm epi gras a Limenm. … Pou Sen Dènye Jou yo, Jezikri se lajwa!”
Nou se manm Legliz Jezikri a. Nou se manm legliz lajwa a! Epi pa gen kote lajwa nou ta dwe pi aparan pase lè nou rasanble ansanm chak Saba nan reyinyon sentsèn pou adore sous tout lajwa a! La a, nou rasanble avèk pawas ak branch familyal nou pou selebre sentsèn Soupe Seyè a, delivrans nou anba peche ak lanmò, ak gras puisan Sovè a! Se la a nou vini pou eksperimante lajwa, refij, padon, remèsiman, ak apatenans nou jwenn atravè Jezikri!
Nan lespri rejwisans kolektif nan Kris sa a, kisa ou jwenn? Èske se sa ou pote? Petèt ou panse sa pa gen anyen pou wè avèk ou, oubyen petèt ou abitye avèk fason bagay yo toujou fèt la. Men, nou tout ka kontribye, kèlkeswa laj nou oubyen apèl nou, pou fè reyinyon sentsèn nou yo vin yon moman byenveni, ranpli-lajwa, santre sou-Kris, otan ke yo ka ye, anime avèk yon lespri lajwa ak reverans.
Reverans plen lajwa
Reverans ki plenlajwa ? Ou dwe ap mande tèt ou, “Èske sa posib?” Ebyen, wi, sa posib! Nou pwofondeman renmen, onore, ak respekte Bondye nou an, epi reverans nou koule sòti nan yon nanm ki rejwi nan amou abondan, mizèrikòd ak sali Kris la! Reverans plen lajwa sa a pou Seyè a ta dwe karakterize reyinyon sentsèn sakre nou yo.
Sepandan, pou anpil moun, reverans sèlman vle di: kwaze bra nou byen sere sou anlè vant nou, bese tèt nou, fèmen je nou, epi rete dousman—pou tout tan! Sa ka petèt yon bon fason pou anseye timoun piti plen enèji nou yo, men, pandan n ap grandi ak aprann, an nou asire nou ke reverans se ankò plis pase sa. Èske se konsa nou ta dwe ye si Sovè a ta avèk nou? Non, paske “nan prezans [Li] se lajwa total”!
Ebyen, pou anpil nan nou transfòmasyon sa a nan sèvis sentsèn nou yo pral mande pratik.
Patisipe ak Adore
Nou pa rasanble nan Saba a senpleman pou patisipe nan reyinyon sentsèn epi pou nou tcheke l sou yon lis. Nou vini ansanm pou adore. Gen yon diferans siyifikatif nan de bagay sa yo. Asiste vle di prezan nan yon bagay. Men, adore se entansyonèlman louwe ak adore Bondye nou an nan yon fason ki transfòme nou!
Sou Chè a ak nan Kongregasyon an
Si nou rasanble an souvni Sovè a ak redanmsyon Li te rann posib la, figi nou ta dwe reflete lajwa nou ak gratitid nou! Yon fwa, Elder F. Enzio Busche te rakonte yon istwa kote lè li te prezidan branch epi yon tigason nan kongregasyon an te gade l sou chè a epi l te mande byen fò, “Kisa mesye ki gen figi move sa a ap fè la a?” Moun ki chita sou lotèl yo—oratè yo, dirijan yo, koral la—ak moun ki rasanble nan kongregasyon yo kominike avèk lòt “byenveni nan legliz lajwa sa a” atravè ekspresyon yo genyen sou figi yo!
Chante Kantik
Lè n ap chante, èske nou mete ansanm pou nou louwe Bondye ak Wa nou an, kèlkeswa kalite vwa nou, oubyen èske n ap sèlman mamote oubyen nou pap chante ditou? Ekriti yo di ke “kantik moun ki jis yo se yon priyè pou [Bondye]” kote nanm Li rejwi. Konsa, an nou chante! Epi louwe Li!
Diskou ak Temwayaj
Nou santre diskou ak temwayaj nou yo sou Pè Selès la ak Jezikri ak sou fwi nou pwodwi lè nou viv levanjil Yo a avèk imilite, fwi ki “pi dous pase tout lòt bagay ki dous.” Lè sa a nou reyèlman “fete … menm jistan [nou] ranpli, pou [nou] pa grangou, ni … swaf,” epi chay nou vin pi lejè, atravè lajwa Pitit Gason an.
Sentsèn nan
Pwen santral e glorye reyinyon nou yo se benediksyon ak resepsyon sentsèn nan, pen ak dlo a ki reprezante don ekspyasyon Seyè nou an ak tout objektif reyinyon nou an. Sa se “yon tan tan sakre pou renouvèlman espirityèl” kote nou se temwen ankò ke nou dispoze pou pran sou tèt nou non Jezikri epi fè alyans ankò pou nou toujou sonje Sovè a ak kenbe kòmandman Li yo.
Nan kèk sezon nan lavi a, nou petèt apwoche sentsèn nan avèk kè nou lou anba chay ensipòtab. Nan lòt fwa, nou vini lib epi san chaje ak sousi ak pwoblèm. Pandan n ap koute benediksyon pen ak dlo a avèk atansyonepi nou pran senbòl sakre sa so, nou ka santi nou bezwen reflechi sou sakrifis Sovè a, sou agoni Li nan Jetsemane a, angwas Li sou kwa a, ak doulè ak lapenn Li te sipòte nan plas nou yo. Se sa ki pral soulaje nanm nou, lè nou konekte soufrans nou avèk pa Li. Nan kèk lòt fwa, n ap santi nou emèveye anba gratitid etonan devan lajwa ki “dous ak pwofon” pou sa don mayifik Jezi a rann posib nan lavi nou ak nan letènite nou! Nou pral rejwi pou sa ki gen pou vini—bèl reyinyon nou avèk Papa byeneme nou an ak Sovè resisite nou an.
Nou petèt te kondisyone pou nou sipoze ke objektif sentsèn nan se chita sou ban an ap panse sèlman a tout fason nou te fè erè pandan semèn anvan an. Men, an nou vire abitid sa a tèt anba. Nan moman trankilite sa a, nou ka medite sou anpil fason nou wè Seyè a pousuiv nou san rete avèk amou mèveye Li semèn sa a! Nou ka reflechi sou kisa sa vle di pou “dekouvri lajwa repantans chak jou.” Nou ka bay remèsiman pou tout lè Sovè a te antre nan jèfò ak triyonf nou yo ak lòt okazyon kote nou te santi gras, padon, ak pouvwa Li ki ban nou fòs pou simonte difikilte ak sipòte fado nou yo avèk pasyans epi menm avèk ankourajman.
Wi, nou medite sou soufrans ak enjistis Redanmtè nou an te sibi pou peche nou yo, epi sa fè nou reflechi seryezman. Men kèkfwa, nou rete bloke la a—nan jaden an, sou kwa a, andedan tonb lan. Nou pa ka avanse al nan lajwa tonbo ki te ouvri a, defèt lanmò a, ak viktwa Kris la sou tout sa ki ta ka anpeche nou gen lapè epi retounen nan kay selès nou an. Keseswa nou gen dlo tristès oubyen dlo gratitid nan je nou pandan sentsèn nan, ann nou sa avèk emèveyman pou bòn nouvèl don Pitit Gason an Papa a ban nou an!
Paran avèk Pitit Ki Jèn oubyen Ki Gen Bezwen Espesyal yo
Kounyea, pou paran ki gen pitit ki jèn oubyen ki gen bezwen espesyal yo, souvan, pa gen zafè trankilite ak silans pou refleksyon pandan sentsèn nan. Men, nan kèk ti moman nan semèn nan, nou ka anseye, atravè egzanp, sou amou, gratitid, ak lajwa nou santi pou Sovè a ak nan men Sovè a pandan n ap pran swen ti mouton L yo konstamman. Pa gen okenn efò pou fè bagay sa a ki gaspiye. Bondye sousye de nou anpil.
Konsèy Familyal, Pawas ak Branch
Menmjan lakay nou tou, nou ka kòmanse amelyore espwa nou ak sa nou atann pou tan nou nan legliz la. Nan konsèy familyal yo, nou ka diskite sou fason chak moun ka kontribye nan fason siyifikatif a swete tout moun byenveni nan legliz lajwa a! Nou ka planifye epi atann nou pou nou fè yon eksperyans lajwa nan legliz la.
Konsèy pawas ak bran ka vizyone ak kreye yon kilti reverans plen jwa pou lè sentsèn nou an, nan idantifye etap pratik ak siy vizyèl pou ede.
Lajwa
Lajwa parèt diferan pou diferan moun. Pou kèk moun, li ka bèl salitasyon byenveni jwaye nan pòt la. Pou lòt moun, se kapab trankilman ede moun santi yo konfòtab nan souri ba yo ak chita bòkote yo avèk yon kè janti ki ouvè. Pou moun ki santi yo abandone oubyen pouse soukote, chalè envitasyon an ap vital. Finalman, nou ka mande tèt nou kouman Sovè a ta vle nou pase lè sentsèn nan. Kouman Li ta vle pou chak nan pitit Li yo santi yo byenveni, byen konsidere, nouri ak renmen? Kouman Li ta vle nou santi nou lè nou vini pou nou renouvle atravè sonje ak adore Li?
Konklizyon
Nan kòmansman vwayaj lafwa pa m nan, lajwa nan Jezikri sete premye dekouvèt mwen, epi sa te chanje mond mwen an. Si w pako dekouvri lajwa sa a, anbake nan rechèch sa a. Se yon envitasyon pou resevwa kado lapè, limyè, ak lajwa Sovè a—pou pran gran plezi nan li, pou emèveye nan li, epi pou rejwi nan li, chak Saba.
Amon nan Liv Mòmon an eksprime santiman kè mwen lè l di konsa:
“Kounyeya, èske nou pa gen rezon pou nou rejwi? Wi, m di nou, pa t janm gen moun ki te gen gwo rezon pou yo te rejwi tankou nou, depi mond lan te kòmanse, wi, e kontantman m depase limit, jistan m ap fè chèlbè nan Bondye m nan; paske li gen tout pouvwa, tout konpreyansyon, li konprann tout bagay, li se yon Èt ki gen mizèrikòd, menm pou l sove moun ki repanti, e ki kwè nan non l.
“Kounyeya, si bagay sa a se chèlbè, m ap fè chèlbè menm. Paske se lavi m ak limyè m, … lajwa m ak gran remèsiman m. ”
Byeveni nan legliz lajwa a! Nan non Jezikri, amèn.