Fè Papa Nou Konfyans
Bondye fè nou konfyans pou nou pran anpil desizyon enpòtan epi nan tout bagay, Li mande nou pou nou fè L konfyans.
Nan 1e Jen 1843, Addison Pratt te kite Nauvoo, Illinois, pou l t al preche levanjil la nan zile Hawaii yo, li te kite madanm li, Louisa Barnes Pratt, pou pran swen jèn fanmi yo a.
Nan Nauvoo, pandan pèsekisyon t ap entansifye, sa ki te fòse Sen yo pou yote pati, epi pita nan Winter Quarters pandan yo t ap prepare pou imigre al nan Vale Salt Lake la, Louisa te devan desizyon pou l te konnen si l ta dwe fè vwayaj la. Li t ap pi fasil pou l te rete epi tann Addison retounen pase pou l ta vwayaje poukont li.
Nan toude okazyon yo, li te chèche direksyon nan men pwofèt Brigham Young, ki te ankouraje l pou l t ale. Malgre gran difikilte a ak retisans pèsonèl li, li te fè vwayaj la avèk siksè chak fwa.
Nan kòmansman, Louisa pa t vrèman kontan nan vwayaj la. Sepandan, avan lontan li te kòmanse apresye zèb vèt nan prèri a, flè mawon kolore yo, ak moso tè sou bò rivyè yo. “Tenèb nan panse m nan te efase gradyèlman,” li te ekri, “epi pat gen yon lòt fi ki te pi kontan nan tout gwoup la.”
Istwa Louisa a enspire m pwofondeman. M admire volonte l pou l te mete preferans pèsonèl li yo sou kote, kapasite l pou l te fè Bondye konfyans ak fason egzèse lafwa li te ede l wè sityasyon an diferamman.
Li raple m ke nou gen yon Papa ki renmen nou nan Syèl la, ki pran swen nou nenpòt kote nou ye epi nou ka fè L konfyans plis pase nenpòt moun oubyen nenpòt lòt bagay.
Sous Verite a
Bondye fè nou konfyans pou nou pran anpil desizyon enpòtan epi nan tout bagay, Li mande nou pou nou fè L konfyans. Sa espesyalman difisil lè jijman oubyen opinyon piblik nou diferan de volonte Li pou pitit Li yo.
Kèk moun sijere ke nou ta dwe chanje definisyon sa ki jis ak sa ki mal paske, yo di laverite relatif, chak moun defini reyalite li, oubyen Bondye tèlman gen jenewozite ke Li pa vrèman sousye de sa nou fè.
Lè nou chèche konprann ak aksepte volonte Bondye, li nesesè pou nou sonje limit ant byen ak mal pa la pou nou defini yo. Bondye te etabli limit sa yo Limenm, baze sou verite etènèl pou benefis ak benediksyon nou.
Dezi pou chanje verite etènèl Bondye a gen yon istwa ki long. Li te kòmanse anvan mond la te kòmanse, lè Satan te revòlte kont plan Bondye a, nan chèche nan legoyis pou l detwi libabit lèzom. Selon modèl sa a, moun tankou Cherèm, Neyò, ak Koriyò te deklare ke lafwa se foli, revelasyon pa enpòtan, epi nenpòt sa nou vle fè se byen. Avèk tristès, trè souvan, devyasyon sa yo ale lwen verite Bondye yo mennen moun nan gwo lapenn.
Byenke kèk bagay ka depann de kontèks la, se pa tout bagay ki konsa. Prezidan Russell M. Nelson anseye avèk konsistans ke verite Bondye pou sali yo absoli, endepandan, epi defini pa Bondye Limenm.
Chwa Nou
Chwazi kimoun pou nou fè konfyans se youn nan desizyon ki pi enpòtan nan lavi a. Wa Benjamen te enstwi pèp li a, “Kwè nan Bondye; kwè Li egziste … ; kwè li gen tout sajès … ; kwè lèzòm pa konprann tout bagay Senyè a kapab konprann.”
Erezman, nou gen ekriti yo ak direksyon nan men pwofèt vivan yo pou ede nou konprann verite Bondye a. Si nou bezwen klarifikasyon anplis sa nou genyen an, Bondye bay li atravè Pwofèt Li a. Epi Lap reponn priyè sensè nou yo atravè Sentespri a lè nou chèche konprann verite nou pako apresye totalman yo.
Èldè Neil L. Andersen te anseye yon fwa ke nou pa ta dwe etone “si kèkfwa vizyon pèsonèl [nou] pa an amoni nan kòmansman avèk ansèyman pwofèt Seyè a. Kisa yo se moman pou aprantisaj, moman imilite, kote nou mete ajenou pou nou priye. N ap avanse ak lafwa, ak konfyans nan Bondye, pandan nou konnen ke avèk letan n ap resevwa plis klate espirityèl nan men Papa nou ki nan Syèl la.”
Nan tout tan, li itil pou nou sonje ansèyman Alma a ke Bondye bay pawòl Li selon atansyon ak efò nou konsakre ladan l. Si nou koute pawòI Bondye a, n ap resevwa plis; si nou inyore konsèy Li, n ap resevwa mwens jiskaske nou pa genyen ditou. Pèt konesans sa a pa vledi ke verite a te fo; okontrè, li montre ke nou pèdi kapasite pou nou konprann li.
Vire gade Sovè a.
Nan Kapènawòm, Sovè a te anseye konsènan idantite L ak misyon Li. Anpil moun te twouve pawòl Li yo difisil pou tande, sa te fè yo vire do yo epi yo pat “[mache] ankò avèk Li.”
Poukisa yo te demake?
Paske yo pa t renmen sa L te di yo. Konsa, yo te fè pwòp jijman pa yo konfyans, yo te refize pou tèt yo benediksyon ki tap vini si yo te rete yo.
Li fasil pou ògèy nou kanpe ant noumenm ak verite etènèl la. Lè nou pa konprann, nou ka pran yon poz, kite santiman nou stabilize, epi apresa chwazi fason pou nou reyaji. Sovè a te egzòte nou pou nou “gade sou [Li] nan tout panse; pa doute, pa pè.” Lè nou konsantre sou Sovè a, lafwa nou ka kòmanse depase sousi nou.
JanPrezidan Dieter F. Uchtdorf te ankouraje nou fè : “Tanpri, doute dout nou yo anvan nou doute lafwa nou. Nou pa dwe janm pèmèt dout nou yo kenbe nou prizonye e kenbe nou lwen amou, lapè, ak don diven ki vini pa lafwa nan Senyè a, Jezikri.”
Benediksyon Vini pou Moun ki Rete yo
Pandan disip yo t ap mache kite Sovè a jou sa a, Li te mande Douz yo, “Èske n ap kite m tou?”
Pyè te reponn:
“Senyè, kiyès nou pral jwenn? se oumenm ki gen pawòl lavi etènèl yo.
“Epi, nou kwè epi nou konnen ou se Kris la, Pitit Gason Bondye vivan an.”
Kounyea, Apot yo t ap viv nan menm mond lan epi yo te rankontre menm presyon sosyal avèk disip ki te mache ale yo. Sepandan, nan moman sa a, yo te chwazi lafwa yo epi fè Bondye konfyans, konsa, yo te prezève benediksyon Bondye bay moun ki rete yo.
Petèt oumenm, tankou mwen, pafwa twouve nou sou toulède bò desizyon sa a. Lè nou twouve l difisil pou nou konprann oubyen anbrase volonte Bondye, sa rekonfòtan pou nou sonje ke Li renmen nou jan nou ye a, nenpòt kote nou ye. Epi Li gen yon bagay ki pibon pou nou. Si nou lonje men ba Li, L ap asiste nou.
Tandiske sa ka difisil lè n ap lonje men ba Li, tankou jan Sovè a te di papa ki t ap chèche gerizon pou pitit gason li a, “Tout bagay posib pou moun ki kwè.” Non moman difisil nou yo, nou tou ka kriye, “Ede [m] nan enkwayans mwen.”
Soumèt Volonte Nou a Pa Li
Èldè Neal A. Maxwell te ansenye yon fwa ke “soumisyon volonte nou se vrèman sèl bagay pèsonèl nou genyen pou nou mete sou lotèl Bondye a.” Se pa etonan ke Wa Benjamen te si enterese pou pèp li a te vin “ tankou yon timoun, obeyisan, dou, enb, pasyan, ranpli avèk lanmou, ki vle soumèt tèt li bay tout bagay Senyè a jije nesesè pou fè l andire, menm jan yon timoun soumèt tèt li bay papa l.”
Kòm toujou, Sovè a te bay egzanp pafè a pou nou. Avèk yon kè lou, epi konesan travay penib Li te gen pou L te fè a, Li te soumèt anba volonte Papa L, pou akonpli misyon mesyanik Li a epi ouvri pwomès letènite a pou oumenm avèk mwen.
Chwa pou soumèt volonte nou a Bondye a se yon aksyon lafwa ki chita nan kè lavi nou kòm disip. Lè nou fè chwa sa a, nou dekouvri ke libabit nou pa diminye; okontrè, li ogmante epi rekonpanse pa prezans Sentespri a, ki pote objektif, lajwa, lapè, ak esperans nou pa ka jwenn onkenn lòt kote.
Sa gen kèlke mwa, yon prezidan pieu avèk mwen te vizite yon sè nan pieu l la ak pitit gason jèn adilt li. Apre anpil ane separe avèk Legliz la, pèdi sou chemen difisil ak ostil, li te retounen. Pandan vizit nou an, nou te mande l poukisa li te retounen.
Li te di “Mwen te gache lavi m,” “epi m te konnen ki kote m te dwe ye.”
Apresa m te mande l kisa li te aprann nan vwayaj li a.
Avèk emosyon, li te pataje ke li te aprann ke li te bezwen al legliz ase lontan pou l kraze abitid pa al legliz la epi ke li te bezwen rete jikaske se la li te anvi rete. Retou li a pat fasil, men lè l te egzèse lafwa nan plan Papa a, li te santi Lespri a retounen.
Apresa, li te ajoute, “M aprann pou tèt pa m ke Bondye bon epi chemen Li yo pibon pase pa m yo.”
Mwen rann temwayaj konsènan Bondye, Papa Etènèl nou an, ki renmen nou, ak Pitit Gason Li a, Jezikri, ki sove nou. Yo konnen doulè ak difikilte nou. Yo pap janm abandone nou epi yo konnen pafètman kouman pou sekouri nou. Nou ka gen kè kontan lè nou fè Yo konfyans plis pase nenpòt moun oubyen nenpòt bagay. Nan non sakre Jezikri, amèn.