Ou Dwe Pwòp
Repantans chak jou pèmèt nou disène gidans Senè a atravè Sentespri a.
Lè m te gen anviwon senkan, m tap jwe foutbòl avèk zanmi m yo dèyè legliz la nan ti vilaj mwen an nan Côte d’Ivoire. M sonje byen klè apèl predikatè a te fè kongregasyon li a pou yo netwaye rad yo an preparasyon pou Sovè a ki pral vini. Paske m te jèn, m te pran apèl sa literalman. M te kouri al lakay mwen osi vit ke ti janm mwen yo te kapab epi m te sipliye manman m pou l te netwaye kèk rad mwen yo pou m te ka san tach ak prepare pou Sovè a ki t ap vini nan jou apre a. Malgre manman m te septik konsènan retou pwòch Sovè a, li te kanmèm lave pibon rad mwen an.
Nan demen maten, m te mete rad la ki te toujou yon tijan mouye epi m te rete tann atantivman pou anons arive Sovè a. Pandan jounen an t ap fini epi anyen pa t fèt, m te deside al nan chapèl la. M te reyèlman dezapwente lè m te wè legliz la te vid epi Sovè a pa t rive. Ou ka imajine jan m te santi m pandan m m t ap retounen lantman al lakay mwen.
Dèzane apre, pandan m t ap resevwa leson misyonè yo an preparasyon pou m vin manm Legliz Jezikri pou Sen Dènye-jou yo, m te li bagay sa a: “Epi okenn bagay sal pa kapab antre nan wayòm Li a; se poutèt sa pèsonn pa kapab antre nan repo Li a, eksepte moun ki te lave rad yo nan san m, poutèt lafwa yo, ak repantans pou tout peche yo, ak fidelite yo jiskalafen.”
Klarifikasyon m te resevwa nan lè sa a te ede m konprann verite enpòtan ki te echape jèn lespri m nan ane pase desa a. Mesaj predikatè a te santre sou enpòtans purte espirityèl. Li te egzòte kongregasyon an pou yo te chèche repantans, fè chanjman nan lavi yo, epi retounen jwenn Sovè a pou redanmsyon.
Papa nou ki nan syèl la konprann vwayaj mòtèl nou an ak peche inevitab nan lavi nou. M pwofondeman rekonesan ke Li bay yon Sovè pou ekspye transgresyon nou yo. Atravè sakrifis redanmsyon Sovè a, nou chak ka repanti epi chèche padon epi vin pwòp. Repantans, yon prensip fondasyon nan levanjil la, esansyèl pou devlòpman ak rezilyans espirityèl nou pandan n ap navige sou difikilte lavi yo.
Pandan konferans jeneral avril 2022 a, Prezidan Russell M. Nelson te envite chak manm Legliz la pou yo fè eksperyans lajwa repantans chak jou. Li te di:
“Tanpri, pa pè ni pa ranvwaye repantans nou. Satan rejwi nan mizè nou. Fè sa vit. Chase enfliyans li nan lavi nou. Kòmanse jodia pou nou ka fè eksperyans lajwa ki genyen nan chase lòm natirèl la. Sovè a toujou renmen nou, men espesyalman lè nou repanti. …
“Si w santi w te ekate de chemen alyans lan al twò lwen oubyen twò lontan epi pa gen okenn mwayen pou w retounen, sa senpleman pa vre.
Si gen yon bagay ou pat totalman repanti pou li, m ankouraje w pou w koute apèl Prezidan Nelson an pou w pa pwokrastine repantans ou. Sa ka mande kouraj pou w angaje nan pwosesis sa; sepandan, m ka asire w, lajwa ki sòti nan repantans reyèl depase konpreyansyon. Atravè repantans, fado remò nou yo leve, epi yon santiman lapè ak trankilite ranplase yo. Lè nou repanti avèk senserite, nou sanktifye atravè san Sovè a, nou ogmante sansiblite nou pou enspirasyon ak enfliyans Sentespri a.
Konpayon etènèl mwen an te fèt avèk yon andikap tande, epi kòm rezilta, li dwe mete yon èd pou tande. Pousyè ak swèkò ka afekte pèfòmans aparèy sa yo epi se konsa chak maten m wè dilijans li ap lave tib nan koneksyon an anvan l mete èd pou tande a. Woutin senp ki konsistan sa a elimine nenpòt salte, imidite, oubyen kondansasyon, konsa, sa amelyore kapasite l pou tande ak kominike avèk efikasite. Lè li pa okipe rityèl chak jou sa a, kapasite l pou l tande a soufri pandan tout jounen an; pawòl ki pale yo vin gradyèlman diminye epi alafen li vin pa ka tande yo. Menmjan netwayaj èd li a chak jou a pèmèt li tande klè a, repantans chak jou pèmèt nou disène gidans Senyè a atravè Sentespri a.
Prèske nan fen ministè Senyè a nan mòtalite a epi anvan depa li al nan Jaden Jetsemane a, Li te prepare disip Li yo pou yo te kanpe devan tribilasyon ki ta pral vini yo. Li te ba yo asirans, Li te di konsa “Men, Konsolatè a, ki se Sentespri a, ke Papa a ap voye nan non m nan, li va moutre nou tout bagay, epi li va fè nou sonje tout bagay, tout sa m te di nou.”
Yonn nan fonksyon esansyèl Sentespri a se avèti, dirije, ak gide chak moun ki koute vwa enteryè trankil la. Menmjan tiyo kominikasyon èd pou tande ki bloke a ka anpeche l fonksyone kòtèkteman an, se konsa tou koneksyon espirityèl nou avèk Papa nou ki nan Syèl ka andomaje, epi mennen nan move konsepsyon danjere oubyen nan yon enkapasite pou tande konsèy Li. Envansyon entènèt la fè enfòmasyon pi aksesib ke l te janm ye anvan. Sa ka fè nou vire jwenn mond lan pou direksyon olye de Bondye. Prezidan Russell M. Nelson te anseye, “Nan jou k ap vini yo, li p ap posib pou nou siviv spirityèlman san gid, san direksyon, rekonfò, ak enfliyans konstan Sentespri a.”
Mwen rekonesan dèske nou chak ka resevwa don Sentespri a nan moman konfimasyon nou. Sepandan, Prezidan Dallin H. Oaks te avèti ke “benediksyon ki disponib atravè don Sentespri a kondisyone sou diyite [epi] ‘Lespri Senyè a pa rete nan tanp ki pa pur’ [Elaman 4:24].”
Lè nou chwazi pou suiv gidans pwofèt ak apot yo, kapasite nou pou gen Sentespri a kòm yon konpayon konstan an grandi. Sentespri a bay klète nan pran desizyon, li enspire panse ak enpresyon ki aliyen avèk volonte Papa nou ki nan Syèl la. Genyen Sentespri a kòm konpayon konstan se bagay ki enpòtan pou pwogrè espirityèl nou.
Resaman, mwen te gen tach pou m te prezide sou yon konferans pieu nan pieu Salt Lake Granger West la nan Utah. Pandan evènman sa, m te rankontre yon prezidan pieu ki te devlope kapasite l pou l te disène enfliyans Sentespri a avèk dilijans atravè viv nan jistis ak repantans chak jou. Kòm yon pati nan efò sèvis pastoral nou, nou te koòdone vizit nan twa fwaye. Lè nou te fini dènye vizit nou an, nou te twouve ke nou te genyen apwoksimativman 30 minit ki te rete anvan pwochen angajman nou an. Pandan nou t ap retounan nan sant pieu a, Prezidan Chesnut te resevwa yon enpresyon pou l te vizite yon fanmi adisyonèl. Nou toude te dakò pou suiv enfliyans sa.
Nou te deside vizite fanmi Jones, kote nou te dekouvri Sè Jones ki te oglije ret kouche sou kabann akoz maladi. Sete aparan ke li te bezwen yon benediksyon prètriz. Avèk pèmisyon li, nou te administre li. Lè nou t ap prepare pou n t ale, Sè Jones te mande kijan nou te fè konnen ke li te gen bezwen ijan pou yon benediksyon. Laverite sèke, nou pat konnen. Sepandan, Papa nou ki nan Syèl la, ki te okouran bezwen sè a, te konnen epi L te enspire Prezidan Chestnut pou nou te vizite kay sè a. Lè nou reseptif a gidans ti vwa dous la, nou pibyen ekipe pou nou fè sèvis pastoral a moun ki bezwen yo pi byen.
Mwen temwaye konsènan yon Papa eman ki nan syèl. Jezikri se Sovè ak Redanmtè limanite. Mwen temwaye ke Ekspyasyon Jezikri a reyèl epi lè nou aprann suiv gidans Sentespri a, L ap dirije nou pou nou repanti ak itilize pouvwa Ekspyasyon Sovè a nan lavi nou. Prezidan Russell M. Nelson se vrè pwofèt vivan Senyè a, avèk tout kle prètriz yo sou tè a jodia. Nan non Jezikri, amèn.