A Luvemu Kecega Ena Vakavulici
E dodonu me ra kila na gonelalai ni vakabauta na iVakabula ka vakamuri Koya ena vukei ira me ra na rawata na vakacegu ena vuravura dredre oqo.
E tara na yaloda na veivakacaca ena veiyasai vuravura. Na nodra vakararawataki na gonelalai, sega na ka era kila, e tara sara vakabibi na noda bula. Eda raici ira na gonelalai ka sa sega tu na nodra matavuvale me vukei ira, me taqomaki ira, ka lomani ira. E gadreva na yaloda me da dodoliga ka vukei ira yani— dua ga na ka me rawa me bau vukea na nodra rarawa ka bau nuitaki kina na nodra bula. Eda vakavinavinaka ni rawa me da bau veivuke tu kina. Eda vakayaloqaqataki mai vei ira ka ra sa vukei ira tu na gonelalai oqo.
Ia, e sega ni gadrevi me da rai sara vakayawa ka qai raici ira na gonelalai ka dredre tu na ivakarau ni nodra bula, ka ni bolei keda sara tu ga. Eda na sega beka ni vakila ni noda sa rai sara vakayawa mai vei ira eda bula veimaliwai tu nikua. Eda sa kila dina tiko li na veika dredre sa yaco tiko vei ira na luveda? E rawarawa toka na noda kila na veika vakayago era na vinakata ia e vakacava na veika vakayalo era vinakata? Era sa kila tiko li na rarama kei na vakacegu ni kosipeli i Jisu Karisito? E vakavulica na ivola ni Kalou, “A luvemu kecega ena vakavulici ira na Turaga, ena ka levu talega na nodra vakacegu na luvemu.”?1
O ira na gone era gadreva na vakacegu ka kauta mai na nodra kila ni dua tiko na Tamadra Vakalomalagi dauloloma, ka a tala mai na luvena o Jisu Karisito ka kauta mai na rarama kei na vakanuinui ki vuravura. Sa vakatau vei keda na i tubutubu na noda tuberi ira na gone ki na vakacegu kei na rarama o ya.
E vakaraitaki tiko ena iyaloyalo ka a droinitaka o Carl Bloch mai Denmark na ituvaki ni nodra bula vakayalo e so na gonelalai. Na droini oqo e vakatakarakarataka tiko na italanoa ka tiko ena ivola i Joni. E uto ni vakasama ni yaloyalo oqo, o Karisito na dauveivakabulai ka dauveivakacegui. E kauta laivi tiko na iubi ni tauvimate mai vua e dua na tamata ka sa davo tu me tekivu mai na gauna e a sucu kina. Na tamata e waraka tiko na mana ni veivakabulai me na yaco ena tobu ni sisili mai Peciseita, ia e sega ni dua me kauti koya. Ena nona wawa voli o ya, ena nona nuitaka me yaco na caka mana, sa basika na Karisito kei na kaukauwa me vakabulai koya.
E levu sara e laurai ena droini oqo, ia e sega ni dua me rai sara tikoga vakadodonu vua na Karisito. E wavu tu ena kedra maliwa na Turaga, ia e dua ga na tamata e kila ni sai ikoya o ya. O ira na kena vo era dui qarava ga na ka era dau qarava ena veisiga era sega ni vakila na kaukauwa i Jisu kei na ka mana sa vakarau yaco e matadra. E dua na gonelailai kei na dua na yalewa, rairai o tinana, erau rairai tiko vei Jisu, ia me vakataki ira na kena vo e rai tiko na matadra ki na dua tale na vanua. E na mata sara mada ga ni Turaga, e a sega ni rawa vua na marama oqo me liutaka na gone vua na i Vakabula. Au vakananuma tiko se eda na calata vaka beka o ya na gauna vinaka me da lako kina vei Karisito? E sa vakaososotaki keda beka li na ogaoga ni bula oqo ka sa bonata na noda rai vakayalo, ka sa sega gona kina ni da vakanamata ki na ka e bibi duadua? Au vakananuma tiko se eda sa calata beka na noda dodonu me da vulica na veika baleta na Turaga kei na nona loloma. Eda sa calata li na dodonu me da veiwaseitaka na kosipeli i Jisu Karisito. Eda sa raici ira kece na gonelalai kei ira na itabagone ena nodra wavu tu ena kedra maliwa na tamata—me ra waraka me ra kila na ka e bibi duadua.
Au rawa sara ga ni rogoca na gonelailai kei ira na so tale na gone ni ra tagi tiko ka cavuta tiko na qaqa ni sere ka da dau lagata, “Meu vuli meu dau muri Jisu tu.” Nanuma na qaqana:
Meu vuli meu dau muri Jisu tu;
Ka meu dau masu vua na Kalou;
Ki lomalagi e nona i serau;
Vuli, vuli muri koya tu.2
Eda sa vakavulici ira tiko li na luveda me ra kila, vakila, ka marautaka na totoka, kaukauwa, kei na mana ni kosipeli i Jisu Karisito? E vakasalataka o Peresitedi Gordon B. Hinckley: “Me da sa tuberi ira na luveda me ra kilai Koya eda vakatoka me Turaga o Jisu Karisito. Me da vakavulici ira na luveda me ra kila na ivakavuvuli ni veivakabulai ni kosipeli.”3 E dodonu me ra kila na gonelalai ni vakabauta na iVakabula ka vakamuri Koya ena vukei ira me ra na rawata na vakacegu ena vuravura dredre oqo.
Eda vakavulici ira vakacava na luveda? E rawa ni da vakamuria na kena icakacaka e vakayacora na iVakabula. Eda wilika ena iVola i Momani na nona a rairai na iVakabula ki na Ra kei Vuravura ni sa tucaketale mai na mate. Ena nona vakavulici ira tiko na tamata, e a vakasoqoni ira vata mai na gonelalai ki Vua. E tekiduru ka masu vata kei ira ka masulaki ira. E vakalougatataki ira yadudua na gone. E vakila na nodra marautaka na tiko e ke ya ka sa qai dolavi lomalagi me rawa ni ra vakavulici mai cake na gonelalai.
Ni ko ciqomi ira na gone ena nomudou teveli ni kana, o sa okati ira tiko ena nomudou dau wili ivolanikalou e veisiga, kei na lotu vakamatavuvale, o sa vakayacora tiko na nona ivakaraitaki na i Vakabula ena nomu lomani ira ka vakavulici ira. Ni ko vakayacora tiko oqo raica me ra kila ni dou sa saga vata tiko vakamatavuvale mo dou talairawarawa ki na ivunau ka mo dou bula dodonu me rawa ni o dou matavuvale tawamudu. Ena rawa ni dua na gauna ni veitalanoa tu ga vaka oya eda vakauqeti ki na me da taroga na taro e veiganiti se me da na tukuna na ka sara ga e gadrevi tiko ke rawa ni na vukei ira na luveda me ra kila ka vakila na rarama ni Turaga. Kevaka eda vakatara oqo ena liutaki keda na Yalotabu.
Era sa tu oqo ka bula maliwai keda na gone vinaka ka gugumatua sara. E rawa ni da vukei ira me ra sotava na vakacegu ena bula oqo ka vaka kina na bula sa bera mai.
E dodonu me vakila na Rarama i Karisito, me rawa kina ni ra digitaka na Rarama ka biuta laivi na butobuto. E a sotava o Mosese e dua na ka mana ni a vakamataliataki ka raica na Kalou ena matana vakayalo. Ni sa vakavulici oti o Mosese mai vua na Kalou ka sa raica na Nona lagilagi kei na cakacaka, sa qai basika vata mai kei Setani na butobuto kei na veilecayaki. Me vaka ni sa sotava oti o Mosese na rarama kei na lagilagi ni Kalou, sa kila kina na kena duidui. E a dei ena nona veisaqasaqa kei Setani ka kaya, Ko cei ko iko? Raica ko I au oqo e dua na luve ni Kalou.”4
O ira na gonelalai e dodonu me ra vakasinaiti ena rarama ni kosipeli baleta ni gauna e yaco mai kina na veitemaki sa rawa ni ra tukuna, “Au kila se o cei o au. Au luve ni Kalou. Au kila na ka meu na cakava. O au meu na papitaiso, ciqoma na YaloTabu, ka talai rawarawa ki na ivunau.” Ni oti o ya era na rawa ni tukuna na gone, “Au kila se cava au rawa ni yacova. Au rawa ni dua na goneyalewa buladodonu” se “Au rawa ni dua na gonetagane buladodonu.” O ira na gone era vakasinaiti tu ena kila ka kei na rarama vakaoqo e rawa ni ra vakatulewataka me ra besetaka na butobuto ka vakanamata ki na rarama kei na vakacegu ni kosipeli.
O ira na gone e sa maroroi tu e yalodra na kosipeli, era na raica na liga ni Turaga ena nodra bula. O ira na gone e levu sara na ka era kila mai na ka eda nanuma ka levu talega na ka e rawa ni ra cakava mai na ka eda vakasamataka. Au sa vulica ni o ira na gone e tiko vei ira na rarama ni kosipeli era na vakabauta. Era dau sega ni vakatitiqa. O Samantha yabaki 11 e kaya, “ Au kila ni kosipeli e dina baleta niu rawa ni vakila.” O Penijamini, yabaki 3 e kaya. “Au kila ni Tamada Vakalomalagi e rogoca ka sauma na noqu masu baleta ni lomani au.” O ira na gone e tiko vei ira na rarama ni kosipeli era na tukuna, “Au kila ni Yalo Tabu e lutaki au tiko baleta niu dau marau ena gauna au vakila kina niu sa digitaka meu vakamuria.
O Samu, sa tekivu me vakila na ka e dau yaco ena veivakauqeti ni Yalo Tabu. Ni dau tarogi koya o tinana, “O cei na YaloTabu?” sa qai dau kaya, “e dua na yalo vakacegu ka dau tiko e lomaqu.” O Samu e kila vinaka tiko ni gauna e tauvimate kina o tacina lailai macawa rua, e vakauqeti koya na Yalo Tabu me kerea na veivuke ni Turaga.
Sa rawa li ni ko vakila na nodra vakacegu na ilala gonelalai oqo?
Na nodra vakavulici na gone e gadrevi kina na yalodina. Ena gadrevi kina na nodra lomani vakayadua na gone me rawa ni ra vakila kina na nona dau lomani ira na Turaga, ia oqo ena gadrevi sara ga kina na yalodina. Au a vakayagataka na qaqa ni sere “Meu Vuli Meu Dau Muri Jisu Tu,” ka a vola o Sister Clara McMaster. Sa qai wasea vei au o Sister McMaster ni gauna e a vakaitavi tiko kina ena matabose ni iSoqosoqo Raraba ni Lalai sa qai lesi vua me vulica e dua na sere ni nodra dau tuberi na gonelalai. E raica ni oqo e dua toka na itavi dredre, ka sa qai masulaka me kila na tekivutaka ka me vakaotia sara yani.
Ni sa oti ga na ka e cakava sa solia sara yani ka qai tukuni vua ni se sega ni donu o ya. E sega ni tukuni vua na ka me veisau, ia me tosoya tikoga na nona saga me yacova ni sa donu. Sa malumu sara ga mai na nona rai vakayalo ka sa sega tale ni kila na ka me cakava. Sa qai lesu tale vua na Turaga, veisautaka e so na tikina ka solia yani. E vakatolutaki na ilakolako ni kena caka vakaoqo, sa qai tukuni vua ni sa qai donu vinaka, me kakua tale ni dua na veisau me cakava.
E dina ni so na gauna e sa voleka sara me vakasuka o Sister McMaster, ia sa qai gumatuataka tale na ka e a soli vua me cakava ka nuitaka ni na vakalougatataka na nodra bula na gonelalai. Na sere ka a vakauqeti me vola e sa lagati mai vei ira na qase na gonelalai ena veiyasai vuravura ena vica vata na veimataqali vosa. Na sere oqo e tutaka tiko na gagadre ni yaloqu —ni o ira kece na gonelalai e ra na vulica na lako ena rarama ni kosipeli i Jisu Karisito. E tekivu na sere oqo ena dua na kerekere mai vua edua na gonelailai,“Meu vuli meu dau muri Jisu tu”
ka laki tini ena dua na yalayala, “Marau, marau, muri koya tu.”5
Ena taura toka e dua na gauna kei na sasaga, ia me kakua ni da rawai vakarawarawa se me da sa soro. Era gadreva na luveda na vakavatukana ni yalayala, “ena ka levu talega na nodra vakacegu na luvemu”6 Kakua ni laiva me lakosese e dua na gone ni ra sa lomani mai vua na Tamada Vakalomalagi kei Jisu Karisito. Me ra vakavulici kece na gonelalai me ra kilai ira vakataki ira, na cava me ra cakava, kei na ka e rawa ni ra rawata me ra vakataki cei.
Au vakavinavinaka vei ira era dau dodoliga me ra vukei ira na gonelalai, o ira era lomani ira ka vakavulici ira, veitalia se vakacava tu na kedra itutu ni nodra bula, me rawa ni ra vakila na vakacegu ena rarama ni kosipeli ka ciqoma na veivakalougatataki ni Turaga.
Au via vosa vakatabakidua vei ira kece na gonelalai ena veiyasai vuravura. Au sa sotava e so vei kemuni eke, ka so vei kemuni mai na veivanua vakataki Aferika, Yatu Filipaini, Korea, kei na wale tikoga oqo mai Ukraine kei Rusia. Au sa sikovi kemuni e koronivuli ni paraimiri, ena rara ni qito, ena iSoqosoqo ni Lalai, vakakina ena valenibula ni gonelalai. Au nuitaka ni ko ni kila tiko na levu ni nomuni lomani mai vei ira na lewe ni nomuni matavuvale, nomuni qasenivuli ni Lalai, vakabibi sara mai vei rau na Tamada Vakalomalagi kei Jisu Karisito.
Kakua ni vakalailaitaka na veivakalougatataki kei na veigauna vinaka e via solia vei iko na Kalou. Na ivakatagegede ni nomu isulsusulu, nomu ivosavosa, nomu itovo, e ivakaraitaki e tautuba ni veika e tiko mai loma ka vakaraitaka na nomu sa muria na ituvatuva ni Tamada Vakalomalagi.
Na ka vinaka ko ni cakava vei au e sivia sara na ka o ni nanuma rawa. Vinaka vakalevu na nomuni dau vakavuna na marau kei na nuidei ki na vuni yaloqu, ki na yalodra na nomuni iliuliu ni Lalai, vakabibi vei ira na nomuni itubutubu. Ni yalovinaka ka qai dau vakavinavinaka vei ira era dau lomani kemuni ka vakavulici kemuni. Au kila kau gadreva mo ni kila, ni o kemuni na luve ni Kalou, e lomani kemuni na Tamada Vakalomalagi ka rawa ni ko ni masu vei Koya e na dua ga na gauna sa rawa kei na vanua cava ga e rawa. Tovolea mo dau vakamuri Jisu Karisito tikoga, ka solia vei iko na vakanuinui ni bula oqo kei na bula tawamudu.
Au vakadinadinataka na veika oqo ena yaca i Jisu Karisito, emeni.