Na Kaukauwa ni Vunautaka na Noqu Kosipeli

Elder Richard G. Scott

Ena Kuoramu ni iApositolo Le Tinikarua

Au vakauqeti kemuni mo ni raica mada na ivurevure talei oqo me na vukei kemuni ena nomuni sasaga ni kaulotu.

Au vakavinavinakataka vakalevu ena noqu rawa ni mai vosa vei kemuni baleta e dua na veiqaravi talei ka na vakarawarawataka vei keda yadua me da wasea vei ira na noda daulomani kei na itokani na itukutuku lagilagi ni Vakalesui mai ni Lotu i Jisu Karisito. E sa vaqaqacotaka tu na nodra vakasama kei na yalodra na noda daukaulotu ka ni oqo ena vakaiyaragitaki ira me ra vakavulica na nodra itukutuku ena kaukauwa ka vakadinadinataka na Turaga, o Jisu Karisito kei na Nona parofita, o Josefa Simici ka sega ni vakayacori ena dua na vosa vakarautaki e yalani. Ena kena a tauyavutaki taumada baleti ira na daukaulotu tudei e so era sa raica rawa ni ivolavakarau oqo sa vakaraitaki tiko ni na yaga sara vei ira na itubutubu era gadreva me ra vakarautaki ira na luvedra ki na kaulotu. E so na cauravou kei na goneyalewa ka vakakina e so na veiwatini era sa taurivaka tiko na ivurevure oqo me ra vakavakarau kina ni se bera ni ra curuma yani na Missionary Training Centers. E so na iliuliu ni matabete era sa vakadinadinataka na kena yaga ena nodra vakarautaki na lewe ni Matabete i Eroni ki na kaulotu. Sa iyau talei sara na ivola oqo ena kena vukei na sasaga ni matabete kei na veimataisoqosoqo ena nodra vukei na lewenilotu curuvou me ra qaqaco ena ivakadinadina kei na talairawarawa. Au tukuna tiko eke na idusidusi vou, Vunautaka na Noqu Kosipeli, kei na veika ni veiqaravi e vakarautaki tu kina me vaka na iTuvatuva ni Daukaulotu e Veisiga.

Meu wasea mada vei kemuni na vuna au sa rui taleitaka kina na Vunautaka na Noqu Kosipeli? E se bera mada ni vakaoqo na kena vakamatatataki na cakacaka ni daukaulotu. Au sa dau tarogi ira tu mai na dauakaulotu ena veiyabaki “na cava na inaki ni nomuni kaulotu.” E duidui sara vakalevu na veika era tukuna. E vuqa e sega sara ni vakayavutaki vakavinaka na inaki ni nodra sasaga. Na imatai ni draunipepa ena idusidusi oqo e raica vakatabakidua sara vakabibi na nodra inaki dina: “Sureti ira me ra lako vua na Karisito ena nodra vukei me ra ciqoma na kosipeli vakalesui mai ena vakabauti Jisu Karisito kei na Nona Veisorovaki, na veivutuni, papitaiso, ciqomi ni isolisoli ni Yalo Tabu, ka vosota ki na ivakataotioti.” Na lewena e vakatura na kena sala ena veiliutaki ni Yalotabu.

Na ivolavakarau taumada ni daukaulotu era a gugumatua ena kena gauna ia sa veisau sara na vuravura. Na itovo ka vakayavutaka na usutu ni bula raraba sa ravuta sara vakaca o Setani kei ira na nona ilawalawa. Sa gadrevi sara tiko vakatotolo na kena vakavoutaki na sala me wasei kina na taucoko ni dina sa vakarautaka tale e vuravura na Kalou. Oqo e okati kina na kena kilai vakavinaka na ituvatuva ni marau ni Kalou kei na kena sa vakalesui mai ki vuravura vua e dua ga na Nona parofita, o Josefa Simici. Sa vakakina na Lotu i Jisu Karisito kei na kaukauwa ni matabete me cakacaka ena Yacana sa vakatikori tale mai ki vuravura ena kena taucoko.

Io a vakavulica o Peresitedi Hinckley: “Sa vuqa vata mai na yabaki oqo eda taurivaka tiko e dua na ivakarau ni lesoni ni daukaulotu. Sa yaco kina na veika vinaka… . Ia e ka ni rarawa ni kena ivakarau oqo, ni sa dede na kena vakayagataki sa vaka me wiligusutaki tu ga, e sega kina na Yalotabu kei na dina yadudua ni tamata …

“E dodonu vei ira na [daukaulotu] me ra kila vakavinaka na lewe ni lesoni. Ia e dodonu … me ra vakavulica na lesoni ena nodra vosa ga ena veivakauqeti dusimaki ni Yalo Tabu.”¹

Na ivakavuvuli o ya sa vatuivakadei ni Vunautaka na Noqu Kosipeli. O ira na daukaulotu ena veiyasai vuravura ena gauna oqo era sa tugana tu e lomadra kei na nodra vakasama na itukutuku ni kena vakalesui mai na kosipeli i Jisu Karisito, yavu ni veivakabulai, na ivakaro bibi, kei na lawa kei na cakacaka vakalotu ni kosipeli. Na veilesoni oqo era sa qai cavuta ga vakataki ira ena veidusimaki ni Yalotabu. Na vakasama oqo sa veisautaka sara ga vakalevu na nodra gugumatua na daukaulotu.

E umani tu ena Vunautaka na Noqu Kosipeli na wase ni vola e tu kina na itukutuku talei sara ena kena kidavi ka kila vakavinaka na veidusimaki ni Yalo Tabu. Era tiko kina na ivolanikalou ni vakarautaki ni vuli vagumatua kei na sala ni vakavinakataki na kila ka yadudua. E dua na wase ni vola e vakamacalataka na vuna e vatuivakadei kina ni noda vakabauta na iVola i Momani; na kena rawa ni sauma na veitaro bibi baleta na tamata; na kena rawa ni taracake na vakabauta ka vukea na nodra toro voleka na tamata vua na Kalou. Na ikuri ni ivakasala e vakaraitaka tiko ni sa ivurevure bula na iVola i Momani ni rawa ni taurivaka e dua na tamata me vakadeitaka kina ni dina noda itukutuku. E vakavulici e dua na itovo va-Karisito me vaka na inuinui, kei na loloma. Sa vakarautaki tu na vakatutu momona ni kena vulici e dua na ivosavosa ni daukaulotu. Sa vakarautaki tu na ituvatuva matata ka gugumatua me vukea e dua na daukaulotu me yalomatuataka na gauna. Na iwalewale yaga e sa wasei me kilai ka vakarautaki o koya me vakatavulici. Sa vakarautaki o koya me vakatavulici. Sa vakarautaki tu na veidusimaki vinaka me vukei ira yadua era na yalataka ka maroroya na nodra veiyalayalati ka yacova yani na papitaiso, vakadeitaki kei na maroroi. Na ivolavakarau oqo e tiko kina na iyaragi me umanaki kina na nodra sasaga na daukaulotu tudei, ira na iliuliu ni tabanalevu kei na iteki, kei na lewenilotu. Ena veivuke o ya sa na rawa kina vei ira na lewenilotu vou me ra tudei tikoga ena matavuvale ni Lotu. Sa tiko na ivakadei cecere ni ko ira era sa papitaiso ka vakadeitaki era taura na yaca i Jisu Karisito ka yalodina me muria na Nona ivakaro ena ciqoma na Nona veivakalougatataki sa yalataka ena nona bula taucoko.

Ena nodra sa vakayagataka o ira na daukaulotu na ivakavuvuli mai na Vunautaka na Noqu Kosipeli e vuqa era sa gumatua sara ena nodra veivakavulici ena yalodina ka kerea na veivakadeitaki ni ivakadinadina ni Yalo Tabu. Ena dua na gauna lekaleka sa oti au a kerea e rua na ivukevuke nei dua na peresitedi ni tabana ni kaulotu me rau wasea na raivotu i Josefa Simici ka meu vakatakarakarataka e dua na dauvakatataro. Au a nakita meu bolei rau sara vakaukauwa meu raica kina na veika erau na tukuna. Ia na dodonu ni nodrau itukutuku, sa savasava ni yalodrau, na ivakarau matau ni kena tukuni, ena vakatovotovo mada ga oqo, sa rui kaukauwa sara, au sa sega ni vakayacora rawa.

Sa rawa mo raica vakataki iko na veivakatorocaketaki oqo. Sureti rau na daukaulotu ki nomu vale me rau mai solia na imatai ni lesoni ki na nomu matavuvale. Ena nodra sa dusimaki vakavosa tu ena Yalotabu erau na vakamacalataka ga vakataki rau na sala a taurivaka na Tamada Vakalomalagi me vakayagataki ira na parofita ena veitabagauna kece me veitaratara kei ira na luvena baleta na Nona ituvatuva ni bula na nodrau ivakadinadina ni rau dauvakadinadinataka na raivotu vakalou ena nodrau a rairai na Tamada kei na Luvena o Jisu Karisito vei Josefa Simici. Erau na vakamatatataka sara na veika e yaco veitarataravi ka vakalesui mai kina na taucoko ni kosipeli kei na kaukauwa me cakacaka ena yaca ni Kalou e vuravura oqo. Sa rawa talega mo ni lako vata kei ira na daukaulotu ena nodra laki vunautaka yani na itukutuku veivakauqeti oqo. Na nomu tiko rawa ekea ena vaqaqacotaki ira era na rogoca na dina talei oqo ena imatai ni gauna.

Na nodratou sasaga cecere na Mataveiliutaki Taumada, na Kuoramu ni Le Tinikarua, ira na Vakaitutu Raraba e so kei na vuqa na ilawalawa yalodina, na lewenilotu gugumatua e so era a vakarautaka na Vunautaka na Noqu Kosipeli kei na kena gacagaca. Vei ira era vakaitavi ena kena tauyavutaki era sa ivakadinadina ni veidusimaki vakalotu ni Turaga ena cakacaka ni Yalo Tabu ena kena vakasamataki, tuvanaki, ka vakadeitaki na lewe vakaivola ni Vunautaka na Noqu Kosipeli.

Ena kena vakatovotovotaki ena 14 na tabana ni kaulotu e a veisautaki vakalailai na Vunautaka na Noqu Kosipeli. Na kena o ya sa mai raici tale, veisautaki, ka vakadonuya mai na Mataveiliutaki Taumada kei na Kuoramu ni Le Tinikarua. Ena ika 15 ni Okotova, 2004 ena dua na kakaburaki ena setilaiti e vuravura a vakatakilaitaki kina vei ira na peresitedi ni tabana ni kaulotu kei ira na iliuliu ni daukaulotu na Vunautaka na Noqu Kosipeli. Era a yadua kece sara na daukaulotu e vuravura e dua na kena ilavelave Vakavalagi. E dina ga ni lewe levu era sega ni vosa Vakavalagi, era vakila ni ra sa tiki ni vakavoutaki ni cakacaka ni kaulotu. A veivakurabuitaki sara ni so na daukaulotu era vosataka ga na vosa ni vanua tale e so era a vakauqeti me ra vulica na vosa Vakavalagi. Ena ivakatekivu ni yabaki oqo sa veikauyaki na Vunautaka na Noqu Kosipeli ena vosa vaka-Japani, Korea, Sipeni kei na Potukali. Ni na mai cava na yabaki, sa vakabauti tiko ni na tabaki rawa ena vuqa na vosa era taurivaka na daukaulotu.

E sega walega ni o ira na daukaulotu era vakalougatataki mai na Vunautaka na Noqu Kosipeli:

E dua na radini peresitedi ni tabana ni kaulotu a vulica ka tugana na veivosa kece sara mai na Vunautaka na Noqu Kosipeli, ka vakakina na tiki ni ivolanikalou yadua. A qai cakava o koya e dua na ka e dau datuvutaka tu e liu—e a sureta e dua na wekana me vulica, ka tugana na iVola i Momani. A ciqoma na tamata o ya na nona veisureti ka sa vinaka sara vua.
E dua tale na matavuvale a vakayagataka na Vunautaka na Noqu Kosipeli me vakarautaki ira kina na luvena ki na kaulotu. Eratou a kaya. “E a isevu me taura e dua na ilesilesi na luvei keirau yabaki 17. Me vaka e namaki, a vakaraica o koya na tikina lekaleka duadua ena ivola. Na nona lesoni o koya, e 20 walega na miniti ni kena tusanaka vakavinaka na ivakavuvuli, ka lako vata kei na ivolanikalou kei na ivakadinadina.”
Oqo mai vua e dua na tama e vakarautaka tiko na luvena tagane ki na kaulotu: Na “Vunautaka na Noqu Kosipeli e sa … vakararamataka na noqu rai ni kila vakavinaka na inaki ni bula, na noqu itavi vakalewe ni Lotu, vakatama ka turaga vakawati… . Sa solia talega vei au na veiyaragi tudei meu cakava rawa kina na ilesilesi o ya.” Sa mai kacivi na cauravou o ya me laki kaulotu.

E vuqa sara na veika vinaka e sa mai rawa ena loma walega ni vitu na vula ni kena mai tavoci na Vunautaka na Noqu Kosipeli, ia e se vo na kena cecere sara ka na yaco ni da sa mataitaka vinaka sara na iyaragi ni kaulotu vakasikiti oqo.

Keimami vakauqeti kemuni mo ni vakayagataka na ivola oqo ena nomuni bose ni mataveiliutaki, komiti e cake ni matabete, kei na matabose ni tabanalevu me vakadeitaki kina vei ira era taura ena nodra bula na veiyalayalati ni papitaiso era na ciqoma ena nodra bula taucoko na veivakalougatataki taucoko ni lewena na lotu. Ena kena vakayagataki na iTukutuku ni Cakacaka ni veika sa vakayacori me baleta na tamata yadua e vakavakarau tiko me papitaiso sa na rawa me vaqaqacotaki vakaukauwa na nodra sasaga na lewenilotu kei na daukaulotu. Au sa vakabauta ni ko ira na curuvou mai ena rawarawa sara me ra vakayacora na nodra gagadre ni nodra tudei tiko ena gauna era cakacaka vata kina o ira na lewenilotu kei ira na daukaulotu ena kena vakayagataki na Vunautaka na Noqu Kosipeli.

Na nodratou itukutuku na Mataveiliutaki taumada ena Vunautaka na Noqu Kosipeli e veivakauqeti vakalevu sara vei ira na daukaulotu ka rairai me na vakayaloqaqataki kemuni ena nomu cakacaka ni kaulotu. E kaya vakaoqo: “E sega tale ni dua na cakacaka ni veivakauqeti me vakaoqo, … sa tuvanaki na Vunautaka na Noqu Kosipeli me vukei kemuni mo ni dua na daukaulotu vakavakarau vinaka, ka yalomatua vakayalo ka dua na dauveituberi veivakauqeti gumatua… . Keimami solia e dua na bolebole mo ni lamata cake ki na dua na yalo vou ni gugumatua ni kena vukei na Tamada Vakalomalagi ena Nona cakacaka lagilagi… . Ena saumi kemuni na Turaga ka vakalougatataki kemuni ena nomu qaravi Koya ena yalomalua kei na masumasu.”²

Ena rawa beka mo ni raica na kena yaga? Ko ni na marautaka vata kei au ena nomuni sa tekivu mo ni kila vinaka ena nomuni bula ka vakayagataka na iyaragi ni kaulotu oqo. Me vaka na kena sega ni vaka na ivurevure ni daukaulotu e liu, na Vunautaka na Noqu Kosipeli sa vakarautaki tu ena sitoa ni Lotu vei ira na lewenilotu kei na iliuliu era vinakata.

Sa yaga cecere beka ni Vunautaka na Noqu Kosipeli o ya ena kena laurai ena nodra bula na daukaulotu era sa suka ni ra na itubutubu kaukauwa cake, iliuliu ni Lotu daucakacaka ka maqosa baleta na tubucake e lako mai ena kena kilai vakavinaka ka bulataki na lewena veivakauqeti.

Ena vukudra na noda daukaulotu e vuravura raraba, eda vakaraitaka na noda vakavinavinaka cecekia kivei ira na liga ni cakacaka yalodina ena kena vakarautaki, tabaki ka veikauyaki na Vunautaka na Noqu Kosipeli. Eda sa vakavinavinakataki ira yadudua na peresitedi ni tabana ni kaulotu era sa kenadau tiko ni kena vakayagataki vagumatua. E dodonu me da dolea ena vakavinavinakataki na Turaga baleta na Nona veivakauqeti. Au vakayaloqaqataki kemuni mo ni raica mada na ivurevure talei oqo me na vukei kemuni ena nomuni sasaga ni kaulotu ni dua na itubutubu e vakarautaki luvena ki na kaulotu, e dua na iliuliu ni Lotu e vukei ira na saumaki vou mai, e dua na lewenilotu e wasea na kosipeli, se dua ga na tamata e vakavakarau me veiqaravi. Mo ni vakauqeti ka vakalougatataki tikoga ena nomuni vakayacora vakakina. Ena yaca i Jisu Karisito, emeni.