Dou Reki Ga Ka Yalodina Ena Gauna ni Voravora

Elder Adhemar Damiani

Ena Vitusagavulu

Na kosipeli i Jisu Karisito ena vaqaqacotaki keda ka solia vei keda na kila na ka e tawamudu meda na sotava kina na veika ena yacovi keda ena yalomarau.

Eda kunea rawa vakacava na vakacegu ena vuravura oqo? E rawa vakacava me da vosota me yacova na ivakataotioti? E rawa vakacava me da vakamalumalumutaka na veidredre kei na veivakatovolei eda sotava tiko?

E kaya na iVakabula o Jisu Karisito : “A veika oqo kau sa tukuna vei kemudou, mo dou rawata na vakacegu ena vukuqu. Dou na kunea e vuravura na rarawa; ia mo dou vakacegu; au sa vakamalumalumutaki vuravura.”¹

Me vaka ni tiki ni bula vakatovolei vakayago, eda lakova mai na rarawa, mosi, kei na veivakayalolailaitaki. Eda na rawa walega ni kunea na vakacegu vei Jisu Karisito. E rawa vua me vukei keda me da rawata na vakacegu ka vakamalumalumutaka kece na veibolebole ena bula oqo.

Na cava na kena ibalebale me da reki ga? E kena ibalebale me tu ga vei keda na vakanuinui, kakua ni yali vei keda na vakabauta ka bulataka na bula mamarau: “Ia sa sucu na tamata me rawata na marau.”² E kena ibalebale me da sotava na bula ena yalodei.

Na kosipeli i Jisu Karisito e solia vei keda na kaukauwa kei na ituvatuva matau tawamudu me da sotava kina ena reki na veika ena yaco mai. Ia sa dodonu, me da kakua ni dau vakawalena na veidredre era a parofisaitaki me baleta na noda gauna.

Na cava soti na veidredre oqo? E rawa vakacava me da sotavi ira?

E so vei ira na veidredre oqo sa ikoya na lailai ni inuinui, lailai ni loloma, kei na lailai ni vakacegu.

E vakatavulica na parofita o Moronai, “Ia kevaka sa sega vei kemudou na inuinui, dou sa kune rarawa; ia sa yaco na rarawa ena vuku ni ivalavalaca.”³ Vei ira e so, na veiyabaki mai oqo e rawa me levu tale ga kina na rarawa. Ni levu cake ga na ivalavalaca, ena levu cake talega na rarawa.

E kaya na iVakabula, “Ia ni sa tubu vakalevu na ivalavalaca, ena batabata mai na nodra loloma na lewe vuqa.”⁴ Me vaka ni sa tubu cake tiko ga na ivalavalaca, e sa yali tiko yani na loloma dina. Na ka e sa yaco, na rere, yalolailai, ka sa tubu tiko ga na taqaya!

E kaya na Turaga vua na Parofita o Josefa Simici: “Raica au … ia me ra kila na tamata ni na yaco kusarawa … ena kau tani kina e vuravura na vakacegu, ka na mai lewa na nona matanitu na tevoro. Ia sa lewai ira talega na nona tamata na Turaga ka liutaki ira.”⁵ Eda bula tiko ena dua na gauna ena kena sa kau tani mai vuravura na vakacegu.

Ena dua tale na yasana, eda bula tiko ena dua na bula lagilagi, e dua na gauna e vakalesuya mai kina na Turaga na Nona matabete. E sa vakalesui mai na kosipeli dina. Na matanitu ni Kalou e vuravura sa ikoya na Lotu i Jisu Karisito ni Yalododonu Edaidai! Eda sa veivuke tiko ena kena vakarautaki na vuravura ki na gauna me na lako mai kina na Turaga o Jisu Karisito ka mai veiliutaki.

Na cava e dodonu kina me da lako sivita yani na veivakatovolei ena bula oqo?

E sega ni vunitaka na Turaga ni na vakatovolea o Koya na noda vakabauta kei na talairawarawa. “Eda na vakatovolei ira ena vakayagataki ni vuravura,” e kaya, “era na muria na veika kece sa vakarota vei ira na Turaga na nodra Kalou se sega.”⁶

Ena iVola Tabu, eda wilika kina na Nona iVola na Dauvunau, “Sa tautauvata na ka sa yaco vei ira na tamata kecega: sa duavata na ka sa yaco vei ira na yalododonu, vei ira talega na tamata ca; vua sa vinaka ka savasava, vua talega sa sega ni savasava …; me vakataki koya sa vinaka sa vakakina ko koya sa ivalavalaca… . Ni sa duavata ga na ka sa yacovi ira kecega.”⁷ Na veivakatovolei ni bula e rawa ni yaco mai vua na tamata ka a tara na nona bula ena dela ni vatu ni kosipeli, sa vaka tale ga kina na lialia ka a tara na nona bula ena veika vakavuravura oqo.⁸

E dodonu me da sotava vakacava na veivakatovolei vakaoqo?

E kaya na Turaga, “Kevaka e dua sa via muri au, me kakua ni muria na lomana, ia me colata ga na nona kauveilatai ena veisiga, ka muri au.”⁹ E dodonu me da dau colata ga e veisiga na noda kauveilatai ka sasaga tiko ga ki liu—ka kakua ni lako wavoki tiko ga vakatikitiki ena noda ilakolako tawamudu.

Eda na kila rawa vakacava kevaka eda vakatovolei tiko se totogitaki keda tiko na Turaga?

E dua na gauna donu me da tubu kina sa ikoya na veivakatovolei. E kaya na Turaga, “Raica sa kilikili me ra vakatovolei na noqu tamata ena ka kecega, me ra marautaka kina na veika lagilagi au sa vakarautaka tu me nodra; io na lagilagi kei Saioni. Ia ko koya sa sega ni vosota rawa sa sega ni kilikili me curu ki na noqu matanitu.”¹⁰

E na gauna eda vakatovolei kina, e dodonu me da vakasamataka ka taroga, “Na cava e vinakata vei au na Turaga meu cakava ena mataqali ituvaki vakaoqo?”

E a tukuna na Turaga na vosa ni veivakacegui oqo vua na Parofita o Josefa Simici: “Mo kila sara na luvequ ni ko na kalougata vakalevu kevaka ko sa vosota rawa na veika kece oqo. Raica na Luve ni Tamata sa vosota rawa na veika e toro subu sara. Ia ko nanuma li ni ko sa uasivi cake mai vua?”¹¹ E ganita me da dikeva na veivakatovolei yadudua me vaka e dua na gauna donu ni tubu. Ena dua na siga e rawa ni da na qai kila kina se na cava na vuna.

E kaya na Turaga, “Ko ira yadua au sa lomana, au sa vunauca me bokoci kina na nodra ivalavalaca, ia au sa vunauci ira meu sereki ira kina.”¹² E lomani keda vakayadua sara na Turaga. E vinakata o koya me da marau. Na mamarau oqo e lako mai ena noda vakabauti Jisu Karisito, na noda dodonu kei na veivutuni dina, mai na noda talairawarawa ki na Nona ivunau, kei na noda vosota me yacova na ivakataotioti.

Ena so na gauna e rawa ni da nanuma ni sega ni dau rogoca se sauma mai na Turaga na noda masu. Ena veigauna vakaoqo, e ganita me da tu vakadua mada ka vakasamataka na cava eda sa bau cakava ena noda bula taucoko. Kevaka e gadrevi, e dodonu me da laiva na noda bula me rau duavata kei na kosispeli iJisu Karisito: E a vakatakila na Turaga vua na Parofita o Josefa Simici:

“Ia ko i au na Turaga au sa lewa me yaco vei ira na veika rarawa ena vuku ni nodra caka cala… .

“Era sa berabera ni rogoca na domona na Turaga na nodra Kalou; a ka oqo sa berabera talega kina ni rogoca na nodra masu na Turaga na nodra Kalou; io sa sega ni rogoca ena gauna ni nodra rarawa.

“Ia ena gauna ni nodra tiko sautu era sa vakawaletaka na noqu ivakaro; ia ni ra sa rarawa, era sa qai vakasaqarai au.”¹³

Ena gauna e tu kina vei keda na gagadre dodonu me da laiva na noda bula me rau duavata kei na lewa ni Turaga, ena dau tu vakarau o Koya me veivuke ena kena vakamamadataki na noda icolacola.

Na cava e vakarusa na noda reki ka marau kei na noda inuinui?

E kaya o Jisu Karisito vei ira na iApositolo Le Tinikarua ni levu na veika e rawa me vakarusa na noda inuinui, ka vakavuna noda soro; ka rawa kina na noda coko ena veitemaki, vorati na veivakararawataki kei na leqa bibi, sega ni vosoti na veivakacacani, rerevaka “na veika” vakavuravura, vaqara taumada na vutuniyau, soro ka dodoonu me vosoti me yacova na ivakataotioti, ka vakalaiva na parofita vakailasu me ra vakaisini keda.¹⁴

Na cava e solia vei keda na yalodei kei na inuinui?

Na veisureti ni Turaga kivei keda vakayadua sa ikoya “Dou lako mai vei au ko ikemudou vakayadua ga sa oca ka colata na icolacola bibi, ia kau na vakacegui kemudou.”¹⁵ O Jisu Karisito e tu vua na kaukauwa me solia vei keda na vakacegu mai na mosi kei na vakararawataki.

Na parofita o Moronai e vakatavulica:

“Ia kevaka e dua sa vakabauta, sa tu talega vua na inuinui; ia kevaka sa sega na vakabauta, sa sega talega na inuinui… .

“… Ia ko koya sa yalomalua ka yalomalumalumu ka vakatusa ena kaukauwa ni Yalo Tabu ni sa Karisito ko Jisu, sa kilikili me tu talega vua na loloma.”¹⁶

Kevaka eda cakacakataka e veisiga na vakabauta, na yalomalua, yalololoma, ka vakamalumalumutaki na lomada, vakatusa ni o Jisu na Karisito, ka ciqoma na Nona Veisorovaki o Jisu Karisito, ena vukuda, eda na vakalougatataki ena kaukauwa kei na inuinui ni da sotava ka vakamalumumalumutaka na veivakatovolei kei na mosi ni bula oqo.

Na cava soti e so na yalayala ni Turaga kivei keda yadua?

“O ikemudou na luvequ; mo dou reki ka marau; raica au sa tiko ga ena kemudou maliwa ka sega ni biuti kemudou.”¹⁷

“Ia mo dou reki ga niu sa tuberi kemudou tiko. Raica sa soli vei kemudou na matanitu kei na kena veivakalougatataki; sa nomudou talega na lagilagi me tawamudu.”¹⁸

Ni cavuqaqataki na vosa nei parofita Ica: “Ia ko ira yadua sa vakabauta na Kalou era sa vakanuinui dei ki na dua na vuravura sa vinaka cake, ka sa dua na nodra tikina ena liga imatau ni Kalou; oqo na inuinui sa rawa ena vakabauta; a sa nodra ikelekele na tamata.”¹⁹

E Tamada na Kalou. O ikeda na luvena. E lomani keda o Koya. E gadreva o Koya me da marau eke, ena bula oqo, ka tawamudu. E liutaki keda tiko e dua na parofita dina ni Kalou edaidai. O Jisu na Karisito. E rawa me da kunea mai vei Koya na vakacegu ena vuravura oqo. Ena yaca i Jisu Karisito, emeni.