Vakavinavinakataki ni Nodra iVakasala O Ira era sa Qase Cake

Elder Stephen B. Oveson

Ena Kuoramu ni Vitusagavulu

Me noda na kena qaravi vakamatau ni ka ni kaukauwa ni ivakadinadina, vakauasivi ni sa dau wasei mai vei ira [era sa qase cake sara].

Kemuni na taciqu kei na ganequ, ena noda vakarau rogoca na itinitini ni vosa nei Peresitedi Hinckley ni mai cava tiko na koniferedi raraba totoka oqo, au sa nuitaka sara ni da vakila oi keda yadua na noda kalougata ni da ciqoma mai vei ira na parofita kei ira na iapositolo ni Turaga na taucoko ni vuku kei na ivakasala momona, kevaka ena rogoci ka vakamuri, ena vukea na noda liutaki yani vakavoleka vua na noda iVakabula. E dodonu me da vakavinavinakataka sara mada ga na noda mai bula donuya na gauna era sa dau ciqoma tikoga na iliuliu ni Lotu, e dina ni so sa qase sara, na ivakatakila kei na veivakauqeti ka muataka tikoga na matanitu ni Kalou ki liu ena veisiga yadua.

Ena gauna ni noqu cauravou, a soli vei au e dua na ivola kau vakasalataki sara kina vakadodonu meu vakaraitaka niu sa dua na gone yalodina ka talairawarawa ia ena gauna au sa qase cake kina kau na gadreva kina na ivakasala, e dodonu meu na lako vei rau na noqu itubutubu, e dina beka ni rau sa na “qase sara,” meu laki vakavukui mai vei rau, vakacegui ka dusimaki. Sa mai leqa o tamaqu ena ruasaagavulu vakacaca na yabaki sa oti, ka sa dua e ivakaraitaki cecere ni ivurevure ni vuku vei au ena veisiga ni noqu bula taucoko, ka keitou se qai mai vakotora walega oqo ena Moniti sa oti na yagoi tinaqu yabaki 101 ena yasai nona itokani tawamudu. Ena nona yabaki dua na drau, a vakadeitaka tale vakadua na nona ivakadinadina talei ena vosa oqo: “Na kosipeli e dua na ivakarau ni bula; e tiki ni ituvatuva oqo me vukea na nodra dro tani mai na yalona. E vakalevu cake sara, niu vakabauta ni bula oqo e vinaka ia na bula e tarava e totoka cake sara” (“Growing Old Graciously: Lessons from a Centenarian,” The Religious Educator 5, naba 1.[2004]:11).

E dau tukuna vakawasoma vei au o tinaqu ni dau masulaki au kei na noqu vuvale ena veisiga. Ena gauna sa roro voleka tiko mai vua na ilati, sa vakaibalebale ka veinanumi na nona masu. Oi rau ruarua na noqu itubutubu, ka vakakina o noqu momo kei noqu nei, eratou sa bula vosota tikoga ena sala dodonu ka vakarautaka rawa tu e dua na iyau ni veiqaravi ena yalodina me ra vakamuria o ira na nodratou kawa.

Ena Ensign ni Noveba 1989 e toka kina e dua na vosa i Peresitedi Ezra Taft Benson ka vaka: “Na Turaga e kila ka lomani ira na sa qase sara ena kedra maliwa na Nona tamata. Sa kena ivakarau tu mai oqo, ka sa dau vakatikora vei ira o Koya e vuqa sara na Nona ilesilesi cecere. Ena veitabagauna e so, sa dau dusimaki ira na Nona tamata mai vei ira na parofita era sa qase cake. Sa gadreva o Koya o ira era vuku ka bula mai vakadede, na veidusimaki vakalou mai vei ira sa vuqa sara na yabaki ni nodra yalodina tiko mai ena Nona kosipeli” (“To the Elderly in the Church,” Ensign, Nov. 1989, 4).

Na veivakasama oqo e vakavuna meu nanuma sara na vunau cecere e so, veivakalougatataki, ivakadinadina, kei na veivakasalataki ni parofita kei na iapositolo ena veitabagauna era biuta tu mai, vakabibi ni ra sa kila ni ra sa “qase tiko” ka vakavakarau me ra “lako sobu ki na kuvu ni soso.” E so vei ira na itinitini ni veivosa oqo era okati talega ki na ivolanikalou cecere ka dau cavuti vakalevu. Me vakaoqo: Ena Mosese 6:57 e vakamatatataka vakavinaka kina o Inoke, “Ia mo vakatavulica vei ira na nomu kawa, ni sa kilikili me ra veivutuni na tamata kecega; kevaka e sega, era na sega ni rawata na matanitu ni Kalou, raica sa sega na ka tawa savasava sa tiko rawa … e matana.” Na imatai ni ivakavuvuli oqo ni kosipeli e a vakavulici mai na gauna i Atama kei Ivi, ka vakadewataki sobu mai na dua na kawatamata ki na dua tale, ka sa ivakadinadina tiko ni ivolanikalou, ena veigauna kecega.

O Josefa o koya ka a volitaki ki Ijipita a solia na vosa ni ivakasala oqo vei ira na kai Isireli: “Koi au, kau sa mate: ia na Kalou ena talevi kemudou vakaidina, ka kauti kemudou cake tani ena vanua oqo ki na vanua sa bubului kina ko koya kivei Eparaama, kei Aisake kei Jekope” (Na iVakatekivu 50:24).

Ni mai cava e vica na itabatamata, ka sa vaka me vakavotukanataki mai na parofisai i Josefa, a vosa vakalougatataki ira na mataqali Isireli o Mosese ka solia na itutu ni veiliutaki vei Josua, ka a qai liutaki ira lesu na tamata ki na vanua yalataki. Ni sa voleka ni mai cava tiko na bula nei Josua, a kaya o koya na vosa tawamudu oqo o ya “mo ni digitaki koya edaidai kemuni na qarava; … ia koi au kei ira na noqu lewe ni vale keitou na qaravi Jiova” (Josua 24:15).

Ko ira na parofita mai ki muri me vakataki Jeremaia, Aisea, kei Malakai, era a tukuna talega na nodra ivakadinadina talei ena gauna ni nodraa veiqaravi, ka parofisaitaka na nona lako mai na Mesaia kei na Nona veisorovaki tawamudu.

Eda kunea vakalevu na ituvatuva vakaoqo ena iVola i Momani ena kena vakamatatataki mai na nodratou itinitini ni vosa o Nifai, Jekope kei Penijamini na Tui, ni nodratou veivunauci momona a veisautaka rawa na nodra vakasama e dua taucoko na matanitu, ka qai vakacava mada na vosa vuku nei Apinatai, ka doudou ena nona vosa ka kila vinaka tu ni sa voleka mai na nona gauna. “Dou vakavulica vei ira ni sa rawa walega na bula ena vuku i Karisito na Turaga, ka sa ikoya na Tama ni gauna Tawamudu” (Mosaia 16:15). E tomana tale vei ira o Alama kei na luvena, o Alama, ka vakakina vei Ilamani, na luvei Ilamani, ka a solia wale na ivakasala talei sara vei ira na luvena tagane: “Ia oi kemudrau na luvequ, mo drau nanuma mo drau tara na nomudrau yavu ena uluvatu ni noda iVakabula, sa ikoya na Karisito na Luve ni Kalou … ni sa dei sara na uluvatu drau sa tara kina; ia kevaka sa tara cake na tamata ena yavu oqo, ena sega ni bale rawa” (Ilamani 5:12).

O ira na parofita oqo kei ira mai na iVola i Momani, ka vakakina o Momani, a volavola me baleti keda, ka kila vinaka tu ni da na gadreva na nodra kila ka kei na vuku me na vukei keda ena gauna leqaleqa oqo. Na iVola i Momani mada ga e mai tini ena nona veivakaroti kaukauwa sara o Moronai, na luvei Momani, ka kaya vei keda: “Io dou lako vei Karisito ka biuta tani na ivalavala sa sega ni vakalotu, mo dou vinaka kina; ia kevaka dou sa biuta tani na ivalavala sa sega ni vakalotu ka lomana na Kalou ena lomamudou taucoko, kei na nomudou igu taucoko, sa na qai rauti kemudou na nona loloma” (Moronai 10:32).

E tu talega oqo vei keda na “iotitoi ni ivakadinadina” vakaoqo ena Veiyalayalati Vou, me vakataka na vosa cecere nei Paula, “Au sa vala oti ena ivalu vinaka, au sa ciciva oti na cere, au sa taura matua na vakabauta” (2 Timoci 4:7) ka sa ivakadinadina ni nona vosota ki na ivakataotioti.

Eda vakararamataki sara vakavinaka ena nona bula torocake na iApositolo levu o Pita, ena nona kaya, “dou vakaisulu ena yalomalumalumu; ni sa vorati ira na viavialevu na Kalou, ia sa solia na isolisoli loloma vei ira na yalomalumalumu. O koya mo dou qai vakamalumalumutaki kemudou e ruku ni liga kaukauwa ni Kalou, me vakalevulevui kemudou cake ko koya ena gauna sa lokuci” (1 Pita 5:5–6).

Ia o koya ga na tamata cecere duadua ena veigauna kece sara me da vuli mai vua sai koya na Turaga vakataki Koya ka sa tucake tale, ka a vunauci ira kina na Nona iapositolo kei ira na nona tisaipeli, “O koya mo dou qai lako ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu: Vakavulici ira me ra vakabauta na ka kece kau a vosa kina vei kemudou: ka mo dou kila, au sa tiko vata kei kemudou ena veisiga kecega, ka yacova na ivakataotioti kei vuravura” (Maciu 28:19–20).

Oqo e dua na iyau levu ni yalodina kei na kila ka era sa solia vei keda na ivolanikalou kece oqo. Eda na kunea rawa li na veiulutaga momona talei era tiko yaduadua kina? Au vakabauta ni na rawarawa sara na noda raica:

Ni Karisito, na Luve ni Kalou, e bula tiko ka sa noda Dauaveivueti ka iVakabula.
Ni dodonu me da muri Koya ka vakaraitaka ni da lomani Koya ena noda dau nanumi Koya ka yalomalumalumu ena vakamuria na Nona ivakaro.
Ni sa rawa ni da veivutuni ka vakasavasavataki ena vuku ni Nona veisorovaki.
Ni sai keda na Nona tamata ni veiyalayalati ka dodonu me da maroroya na Veiyalayalati eda sa okati kina.
Ni dodonu me da kaburaka yani na Nona kosipeli ki vuravura taucoko.
Ni dodonu me da vakabauta, veivutuni, papitaiso, ciqoma na Yalo Tabu, ka vosota ki na ivakataotioti.

Ena itaagauna oqo, o ira na parofita ni Veivakalesui mai edaidai era sa dau vunautaka tikoga ena veigauna taucoko na ivakavuvuli e tukuni tiko eke. Ena nona veivakavulici o John Taylor eda vulica “Ni sa Luve ni Tamata, a vosota rawa o Koya na veika kece e rawa ni vosota na yago; ni sa Luve ni Kalou a valuta na veika kecega, ka laki tiko vakadua ena liga imatau ni Kalou” (“Nodra iVakavuvuli na Peresitedi ni Lotu: John Taylor [2001], 44)

E dua vei ira na vosa au dau taleitaka mai vei Peresitedi Spencer W. Kimball:

“Ki na nodra ivakadinadina o ira na tagane kei na iapositolo qaqa ni gauna makawa—o ira na tacida era cakacaka vata kei na iVakavuvuli oqo—au semata kina na noqu ivakdinadina. Au kila ni ko Jisu Karisito sa Luvena na Kalou bula ka a mate o Koya me baleta na ivalavala ca kei vuravura.

“O Koya e noqu itokani, ka noqu iVakabula, noqu Turaga ka noqu Kalou.

“Mai na vu ni yaloqu taucoko, e sa noqu masu me ra rawata o ira na Yalododonu … na iyau tawamudu vata kei Koya ena matanitu silesitieli” (“An Eternal Hope in Christ,” Ensign, Nov. 1978, 73).

Na noda Parofita nikua, o Peresitedi Gordon B. Hinckley, e tomana tikoga me liutaki keda ena kaukauwa ni nona yalodina, me vaka a vakaraitaka o koya ena nona vosa ena dua na koniferedi ni iteki walega oqo: “E tiko na noqu ivakadinadina, e ka bula, katakata, ka bibi sara, baleta na dina ni cakacaka oqo. Au kila ni bula tiko na Kalou na Tamada Tawamudu ka sa Karisito ko Jisu, na noqu iVakabula ka noqu Dauveivueti. Sai Koya ga na iliuliu ni Lotu oqo. Oqo ga na noqu gagadre meu tosoya tikoga ki liu na cakacaka oqo me vaka ga e vakayacora vakakina o Koya” (Inspirational Thoughts,” Liaona, Okot. 2003, 5).

Ni vakalekalekataki na nodra ivakadinadina o ira kece na iapositolo kei na parofita ni gauna makawa kei na gauna oqo, eda raica kina na vosa tawamudu ni Parofita o Josefa Simici ka a kaya:

“Ia me ikuri ni itukutuku kece ka vakadinadinataki kina ko Koya, keirau sa tukuna oqo na kena iotioti me yacova edaidai. Raica sa bula dina tiko ko Koya!

“Keirau a raici Koya vakaidina ni sa tiko ena liga imatau ni Kalou; keirau sa rogoca talega na domo sa tukuna ni sai Koya na Le Duabau ga nei Tamana” (V&V 76:22–23).

Oi au e dua na ivakadinadina talei i Jisu Karisito, au sa gadreva meu kuria na noqu vakadeitaka na dina ni ivakadinadina kece sara sa tukuni oti. Au kila ni o Tamada vakalomalagi sa Tama dina ni yaloda ka sa noda iVakabula o Jisu Karisito, na noda Dauveivueti, noda Turaga, ka da muria na Nona ivakaro na noda iTokani (raica Joni 15:14). Ni da vulica na ivolanikalou me na vakararamataki keda yani kina ka vakavinavinakataka vakalevu na kaukauwa ni ivakadinadina vakabibi ni ra cavuta o ira era vuku cake ka qase sara, sa nqu masu oqo, ena yaca i Jisu Karisito, emeni.