Na Vinaka Cecere Cava Me da na Kila: iTokani Vakarisito
E kila na Kalou na nodra gagadre na Luvena, ka dau cakacaka vata kei keda, vakauqeti keda me da dau veivukei.
Ena vica na macawa sa oti keirau a tiko kei na turaga watiqu ena dua na soqoni ena valetabu. Ni keirau curu yani keirau a kidavaki mai vua e dua ka veiqaravi ena valetabu, o ya e dua na itokani talei mai na neirau tabanalevu. Na veikidavaki o ya e a itekivu ni dua na ka talei vei keirau. Keirau a kidavaki ka qaravi vakalevu cake sara mai na so tale na gauna au rawa ni vakasamataka rawa mai vei ira na tamata keirau kila: o ira na itokani mai na neirau tabanalevu makawa, itokani mai na itikotiko raraba, o ira na turaga kei na marama keimami a veiqaravi vata ena neimami dui ilesilesi. Na iotioti ni tamata au a sotava o ya e dua na goneyalewa au a sega ni tauri koya rawa. E irairai totoka ka ni gauna e tekivu vosa kina, au sa qai nanuma rawa: ni a dua vei ira na goneyalewa, ena noqu kalasi ena gauna au a Peresitedi tu kina ni Goneyalewa, o Robin. Ena neirau veivosaki ka veitalanoataka na veigauna vinaka sa oti kei na veika a sotavi, a kaya vei au o koya na kena vinaka vua na gauna o ya. E a vakakina vei au.
Au vakila ni kauta mai na yalololoma levu na veivakauqeti ena noqu biuta na valetabu, ka vakila na kedra bibi na itokani ena noqu bula taucoko. Na Turaga e sa tara na yaloqu ena veigauna, ka vakavuqa sara na nona tarai au mai na nona vakayagataka e dua na noqu itokani.
Keiraua a se qai vakamau vou ga kei Dean ena gauna vata oqo ena tolusagavulu kawalu na yabaki sa oti, ka gole yani ki New Mexico vei rau na noqu itubutubu. Ena neirau a tiko mai kea, e a kauti keirau o tamaqu ki na veiulunivanua ena vualiku ni vanua o ya. Ena yakavi keitou a sotava ena bati ni sala e dua na motoka ka sa kacabote tu na kena taya. E a kaya vei tamaqu ni sa kacabote talega na isosomi ni taya na kena draiva ka gadreva o koya me gole ki na taoni e voleka me laki caka vinaka. A rai yani ko tamaqu vei iratou na nona matavuvale e loma ni motoka, ka kaya vua, “O na sega ni rawa ni lako ki taoni ka lesu mai ni se siga toka. Ia, e tautauvata beka na levu ni nodaru taya. Taura na isosomi ni noqu taya, na gauna ga o yaco rawa tale mai kina ki Albuquerque, qai kauta tale mai vei au.”
E a kurabui sara na turaga oqo baleta na ka sa tukuni vua, a kaya mai, “Ia o sega mada ga ni kilai au.”
A sauma o tamaqu, ka sa nona itovo, “O kemuni e dua na tamata dina, se vakaevei? Ka ko na vakasuka mai na taya vei au.”
Ena vica na macawa ka tarava au a tarogi tamaqu me baleta na taya o ya. A kaya mai ni sa kau lesu mai.
Ena gauna oqo sa yabaki 90 o tamaqu, ka se duadua tikoga na nona ivakarau ni bula. E vuqa era itaba vata kei koya era sa vakani mai na “Kakana ena Qiqi” ia o tamaqu e dau kau kakana vei ira na sa “qase sara.” E dau laki sikovi ira na nona itokani era tauvimate se voleka ni ciba. E dau kauta yani na nona ivaro livaliva me laki vukea na Rotary Club ena sasamaki ni yabaki. Ena noqu vakasamataka na bula kei na cakacaka i Tamaqu, e votu sara vei au na vosa i Peresitedi Packer: e “gumatua tiko o koya ena kosipeli” (“Na Veiyabaki Koula,” Liaona, Me 2003, 82). Na nona bula, me vaka e tukuna na sere, e tara na bula me vinaka kina, kei na veitaratara o ya, e veivakabulai (raica Each Life That Touches Ours for Good,” Hymn no 293). E kila vakavinaka tu o tamaqu na veitokani.
Ena neitou itutu ni Mataveiliutaki ni iSoqosoqo ni Veivukei, e so na gauna keitou dau rogoci ira na marama ni ra kaya ni ra sa sega ni vakila na loloma ni Turaga. Ia ena rairai me ra vakila vakalevu cake na nona loloma kevaka era vakasaqara na Nona veivakauqeti mai na nodra veiqaravi o ira era kauwaitaki ira. Ena rawa beka ni dua na lewe ni nodra tabana se tabanalevu, e dua beka e tiko tikivi ira, se dua sara na vulagi ena vakalougatataki ira mei ivakaraitaki ni loloma i Karisito. E a vakasalataki keda o Elder Henry B. Eyring: “Ko ni sa kacivi mo ni matataka na iVakabula. Na voqa ni nomuni ivakadinadina sa yaco me Nona vosa o Koya, na ligamu sa Nona liga ni veivukei” (Rise to Your Call,” Liaona, Nov. 2002, 76). Kevaka eda vueti ira e so ena yaca i Karisito, sa rawa vakakina me da vueti.
Au kila e dua na dauveituberi ena vuvale ka dau yalodina ena nona veisiko vakavula vua e dua na yada qase sara. E a sega ni veisiko walega, ia ena vula i vuata e dau vakavinakataka na kato ni cagi batabata nei koya na yada ka dikeva na filita ni nona bukawaqa. E a loloma beka ni Kalou o ya, se na loloma nei koya na dauveituberi ena vuvale? Na kena isau, oi rau ruarua.
Na isolisoli cecere cava o solia,
Na vinaka cecere cava eda na kila
Mai na itokani va-Karisito, ena itovo vinaka,
Vaqaqcotaka na noda vakabauta, ka vakabulabulataka na noda veisiga.”
(Hymn no 293)
Ena noqu bula taucoko au sa vakalougatataki mai vei ira na itokani va-Karisito—mai vei ira na noqu itokani, ena gauna ni itabagone, me yaco vei ira e lewe vuqa na tamata ka ra sa vakalougatataka na noqu matavuvale ena veitabanalevu kece keirau a lewena. Na nodra vakabauta ka yalodina ki na Kosipeli i Jisu Karisito, na nodra veiqaravi, na nodra ivakasala momona ka vuku ka sa vakabulabulataka na neitou bula. E so vei ira na noqu itokani era duidui sara mai vei au. Keimami duidui ena veika e so. Keimami sega ni dau veiriti ena so na gauna ka dau veivakamosi yalo. Ia na bula veitokani ena kune kina na duidui—e umanaki sara ga kina. Au dau taleitaka meu sikova na iteki era lewena o ira e duidui na ivakarau ni nodra bula, yabaki kei na vanua era vu mai kina.
Au sotava tiko oqo e dua na ivakatagedegede ni veimaliwai talei niu veiqaravi vata kei rau o Sisita Parkin kei Pingree kei ira na marama tale e so era mataveiliutaki ni veimataisoqosoqo. Oqo e so na marama vinaka. Sa dua na ka na noqu taleitaki ira. Ni oti e tolu na yabaki na neitou cakacaka vata, erau sa kilai au vinaka na lewe ni mataveiliutaki. Erau kila vinaka na noqu vakabauta kei na ivakadinadina, ia erau sa kila talega na noqu malumalumu kei na leqaleqa. Erau kila ni gauna au dau wale mai ena dua na ilakolako balavu au sega sara ni vinaka. Ia au dau vakila na nodrau loloma kei na nodrau vosota kau kila ni rau dau nuitaki au tu ga. Na nodrau ivakadinadina kei na masu e vaqaqacotaka noqu bula. Na nodrau mamarau e vakararamataka na noqu siga. Ena dua tale na kena itukutukuni, keitou sa veitacini.
Au sa sotava na veika oqo vata kei na noqu matavuvale. E dua vei iratou na taciqu gone sa sasaga tiko me bula mai na kenisa ena vica na vula sa oti. Keitou sega ni tiko veivolekati, ia na talevoni e vakavolekati koya mai. Keitou dau veiwasei ena loloma, masu, veika talei, kei na ivakadinadina vinaka ena gauna e sotava tiko kina o koya na veivakararawataki. Eratou itokani vakamareqeti na taciqu. Sa vakakina o iratou na ganequ, na turaga watiqu lomani, iratou na luvequ kei na makubuqu (veitalia ga na nodratou dau kosakosa).
Ena ivakatekivu ni yabaki ni Vakalesui mai, era soqoni vata na lewenilotu curuvou me ra tauyavutaki “Saioni.” Ko Saioni e dua na itikotiko ka vakainaki—e ka vakayalo. Eda sa sega ni soqoni me vaka o ya. Na noda veitabanalevu kei na tabana sa ikoya na noda Saioni. Ia era na ciqoma ga na yalo i Saioni ena gauna era veilomani kina o ira na lewenilotu. E ka ni rarawa, ni so na gauna eda rogoci ira na marama, kei na turaga, era vakararawataki ka ra vakaduiduitaki mai vei ira e so na lewenilotu. Kevaka o iko o tiko ena dua vei rau na yasana oqo—o koya e vakacacani koya ka dua—me kere veivosoti; ka raica rawa na veika o cakava cala. Mo nanuma na ivakasala i Karisito vei keda: “Mo dou duavata sara; ia kevaka dou sa sega ni duavata, dou sa sega ni noqu” (V&V 38:27).
Ena dua na gauna lekaleka sa oti au vosa vua e dua na yalewa ka tarogi au baleti Josefa Simici. E vakatitiqataka tiko o koya na veikacivi kei na ilesilesi i Josefa. Ena noqu a vosa, e a votu mai vei au na vosa ni Turaga vei Oliver Cowdery: “Mo totaki Josefa na noqu tamata ena yalodina” (V&V 6:18). Au sa nuitaka tiko ena siga o ya, kei na veigauna kece ni noqu bula, ka me rawa ni cavuti vei au, “A totaki Josefa o koya.” Au vinakata meu nona itokani.
O Josefa Simici vakataki koya e a itokani vinaka vei ira e lewe vuqa na tamata. E kaya o koya, “Na veitokani sa dua vei ira na ivakavuvuli bibi ni bula ‘Vakamomani’ [e a tuvanaki] me robota ka vakavinakataka na vuravura, ka vakaotia na veivaluvaluti kei na veicati ka ra yaco me ra veitokani ka veitacini” (History of the Church 5:517).
Ia e kila tu o koya ni veitokani e levu cake mai na dua na vakasama raraba. Ena dua na siga e a rogoca o koya ni dua na vale ni dua na lewenilotu era a vakama, o ira na meca. Ena gauna era a vosa ni loloma kina o ira na lewe ni Lotu, a tara mai na parofita e so na ilavo mai na nona taga ka kaya, “Au lomana sara na taciqu o ya ka lima na dola na kena levu. Ena vica beka … na levu ni nomudou lomani [koya]?” (ena Hyrum L. Andreus kei Helen Mae Andrus, comps., They Knew the Prophet [1974], 150).
Eda kila beka na yalo ni veitokani me vakataki Parofita o Josefa? Eda veisautaka beka na yaloda vinaka me da matanataka ena veivukei? Na Kalou e kila na nodra gagadre na luvena, ka sa dau cakacaka o Koya vei keda, ka vakauqeti keda me da veivukei. Ena gauna eda vakamuria kina na veivakauqeti vakaoqo, eda sa butuka tu na vanua tabu, ka ni sa soli vei keda na madigi me da mata ni Kalou ena saumi ni dua na masu.
Kemuni na taciqu kei na ganequ, kevaka eda sa itokani nei Parofita Josefa, eda sa itokani vakakina kei na iVakabula. Eda sa bulataka beka na bula ka vakaraitaka na “yalodina ki na yaca ni iVakabula”? (raica Hymns, naba 293). A vakayacora o Josefa Simici, kei na yabaki taucoko oqo, ni da vakananuma na turaga oqo ka a solia mai na veika sa vakarautaki tiko ena iotioti ni gauna oqo, me da kakua ni nanuma walega na nona lomana na kawa tamata, ia na nona itokani kei na yalodina vua na Turaga. E kaya na Parofita, “Au na tovolea meu marautaka na veika e tu vei au niu kila ni noqu itokani na Kalou. Au na kunea mai Vua na vakacegu.” (The Personal Writings of Joseph Smith, biuta vata o Dean C. Jessee (1984), 239; na kena sipelitaki kei na icegu ni vosa ena kena ivakarau).
E dodonu me matata vei keda, ni ulu ni noda veitokani e dodonu me lako mai vua na Tamada Vakalomalagi kei na Luvena, o Jisu Karisito. Ena vosa ni loloma vei keda na iVakabula, “Meu kaya vei kemudou na wekaqu ni dou sa wekaqu… .” (V&V 93:45). Sa nodra gagadre cecere duadua o ya vei keda na tacina kei na ganena, me kauti keda lesu vei Tamada. Ka sa matata vei keda na kena salatu : na taraicake ni noda bula ki na ivakatagedegede eda rawata, na itovo kei na ivakaraitaki i Karisito. Vakayacora na Nona ivakaro ka cakava na Nona cakacaka kei na Nona lewa.
Niu dau nanuma lesu na gauna au a kidavaki kina e valetabu mai vei ira na lewe vuqa au lomana, au diva me vakalougatataki vakakina na noda bula yadudua. Au vakila e dua na loloma me vaka na cila ni rarama savasava nei Karisito—na loloma ka dodonu me tu e yaloda. Au raitayaloyalotaka na veitabanatalevu kei na tikina ka ra tu vata tu kina na veitokani ena veitabayabaki ni bula kei na veivakatagedegede ni bula ka ra vakatotomuria tiko na ivakavuvuli nei Jisu Karisito.
Au sa vakadinadinataka vei kemuni nikua ni bula tiko na Karisito. Au sa vakavinavinaka Vua. Sa noqu masu meu na Nona itokani tikoga kei na noqu vakayacora sara, au sa nomu itokani talega. Ena yaca i Jisu Karisito, emeni.