E Kilai Iko ena Yacamu
O na sega beka ni rogoca na Turaga me kaciva na yacamu, ia o Koya e kilai kemuni yadudua sara ga ka kila na yacamuni.
Ena “mataka ni dua na siga vinaka sara ena itekivu ni vula itubutubu, ena yabaki dua na udolu walu na drau ruasagavulu” ena nona a lako yani e dua na cauravou yabaki 14 o Josefa Simici ki na veikau, tekiduru ena masu ka “raica e rua na Tamata, ia na kedrau iserau kei na iukuuku sa sega ni vakamacalataki rawa, raica erau sa tucake tu e maliwa lala donuya na [matana].” E kaya o koya, “A sa kacivi au e dua vei rau ena yacaqu, dusi koya na kena ikarua ka kaya—Oqo na noqu Gone ni Toko, Mo Rogoci Koya!”1 Ena rawa mo vakasamataka mada na nona vakasama na cauravou yabaki 14 o Josefa Simici ni sa raica na Kalou na Tamada kei na Luvena o Jisu Karisito ka me qai rogoca na Tamada Vakalomalagi me kacivi koya ena yacana?
Ena gauna au a sikova kina na Veikau Tabu, au a saga meu raitayaloyalotaka se na vakacava beka kevaka me a o au o Josefa Simici. Ena noqu vakasamataka tiko, a vakavotuya na Yalotabu ki na utoqu tavatukituki niu sa tucake tiko ena vanua tabu kei na veika kece sara e a tukuna o Parofita Josefa Simici e ka dina. Eda sa qai liaci keda rawa ni da sa vakaiyautaki ena nona vakabauta qaqa, kei na nona tudei tu me talairawarawa vua na Kalou. E sa saumi mai na nona masu malumalumu. E a raici Tamana kei na Luvena lomani. E kea ena Veikau Tabu, au kila ni ko Tamada Vakalomalagi e sega walega ni kilai Josefa Simici ena yacana, ia e kilai keda yadudua sara ena yacada—me vakaga ni o Josefa Simici e vakaitavi bibi sara ena cakacaka levu ka veivakurabuitaki oqo, sa tu talega na noda itavi bibi me da vakayacora ena gauna oqo.
Ko kila tiko li ni Tamada Vakalomalagi e kilai iko dina tiko—ena yacamu. Na ivolanikalou e vakavulica vei keda ni oqo e ka dina. Ena gauna a lako yani kina o Inosi ki na veikau me laki masu, e tukuna vakaoqo, “A sa rogo mai e dua na domo ka kaya: Inosi, sa bokoci na nomu ivalavala ca, ia ko na vakalougatataki”2 E a sega walega ni masu o Mosese ia a vosa talega vua na Kalou e matana votu, ka a kaya na Kalou vei Mosese, “Ia i Mosese na luvequ; au sa solia vei iko e dua na ilesilesi”3 Na Turaga e kilai Jekope ena yacana ka veisautaka me ko Isireli me veiganiti kina kei na nona ilesilesi e vuravura.4 E a vakayacora talega vakakina vei Paula kei Eparaama kei Sera. Ena wase 25 ni Vunau kei na Veiyalayalati, e a vosa vakalougatataki kina o Emma Smith me vakacegui kina ka dusimaki ena nona bula. E a tekivuna na Turaga ena vosa veivakalougatataki oqo, ena nona a kaya, “Emma Smith na luvequ; mo rogoca na vosa ni Turaga na nomu Kalou sa tukuna oqo vei iko.”5
O na sega beka ni rogoca na Turaga me kaciva na yacamu, ia o Koya e kilai kemuni yadudua sara ga ka kila na yacamuni. E kaya o Elder Neal A. Maxwell, “Au sa vakadinadinataka oqo vei kemuni ni Kalou e sa kilai kemuni tu vakayadudua … mai na dua sara na gauna balavu (raica V&V 93:23). E a sa lomani kemuni yadudua tu mai na dua sara na gauna balavu. E sega walega ni kila o Koya na yacadra kece sara na kalokalo (raica Same 147:4; Aisea 40:26); E kila vinaka tu o Koya na yacamuni na nomuni rarawa kei na nomuni marau!”6
Ko na kila rawa vakacava ni yacamu kei na nomu gagadre e kila na Tamada Vakalomalagi? E kaya o Elder Robert D. Hales, “Wilika na ivolanikalou. Tekiduru ka masu. Kerekere ena vakabauta. Vakarorogo ki na Yalo Tabu… . Bulataka na kosipeli ena vosota kei na sasaga.”7
Oqori na veika e a cakava o Josefa. Na nona ivakadinadina e vukei keda kece sara me da kila tiko ni da sa kilai ka lomani tiko mai vua na Tamada Vakalomalagi. Sa dina sara ni da sa “luvena yalewa na Tamada Vakalomalagi dau lomani keda.”8 O Elder Jeffrey R. Holland e kaya vei keda: “E sega ni dua vei keda oqo e lomani ga vakalailai se lomani vakalevu cake mai vua tale e dua… . E lomani keda kece sara o Koya—na veilecayaki, oca, nanumi koya ga kei na veika kece sara… . E vakayaloqaqataki ira kece era ciciva na cere, ka kailavaka tiko yani ni veisisivi oqo e valuti kina o ivalavala ca, sega ni tamata.”9
Ena gauna e a vakavukui kina o Josefa ena ka oqo e a sega ni rawarawa na nona bula. Sa dina sara, e a sotava o koya na veika dredre mai vei ira na nona ilawalawa kei ira na qase. Na itukutuku kei Josefa Simici e tuvanaka vei keda yadua e dua na iwalewale bibi. Sa rawa me da bulataka na nona ivakavuvuli ena gauna eda veilecayaki kina, ena gauna ni veivakasaurarataki, ena gauna e wavoliti keda kina na veitemaki e so, se da yalolailai se galili. Sa rawa me da masu! E rawa ni da kaciva na Kalou ena yaca Tabu, ni Luvena o Jisu Karisito, ka kerea na vakacegu, veidusimaki, kei na veivakadodonutaki. Ko sa bau sotava beka e dua na leqa ka sega ni kila na cava mo cakava? E kaya o Josefa, “Sa druma sara na lomaqu” E a kaya “Au sa kaya e lomaqu: A cava meu cakava?”10
A rawata rawa vakacava o koya na vakacegu kei na veidusimaki? E a vulica o koya na ivolanikalou, tugana na kedra yalayala, ka “mani nakita meu sa ‘vakatakerekere vua na Kalou!’”11 Na kena isau e a ciqoma o koya ena mataka ni vula itubutubu o ya e a veisautaka na nona bula kei na nona rai. Sa kila o koya. Sa rawata o koya e dua na ivakadinadina ni Kalou kei Jisu Karisito, kei na ivakadinadina sa rawa kina vua me bulataka na kosipeli ena vosota kei na sasaga. E a sega ni vakataotaki koya na nodra veivakaleqai kei na veivakacacani, ena nona vosa sara ga a kaya, “Au a raica dina e dua na raivotu; au sa kila na ka oqori, kau kila ni sa kila talega na Kalou, sa dredre sara meu cakitaka.”12 Sa rawa vua me na tudei tu ga ena vuku ni nona ivakadinadina. E rawa vakakina vei iko.
Kevaka o vakila na bibi ni nodra veivakacacani na tamata, mo masu, kerekere ena vakabauta, ka vakarorogo ki na Yalo Tabu. Mo qai bulataka na kosipeli. A liaca rawa sara o Josefa na ivalavala tawa kilikili kei na nona malumalumu. E a tomana tale—na nona masu. Na isau ni nona masu, a sikovi koya na agilosi o Moronai. A vola o Josefa: “A kacivi au ena yacaqu” ka kaya “ni sa digitaki au na Kalou meu qarava e dua na cakacaka.”13
Ena gauna eda masu kina, na Turaga ena veidusimaki ka vakarautaki keda ki na noda itavi. Ena dua na vula ikatakata, ena noqu veisiko voli e Iurope vata kei ira na BYU International Folk Dancers, au a vulica kina e dua na ka bibi. Au a tauvimate kau a yalolailai kina. Au sa via vakacegu ka meu sa lesu ki vale. Keimami a tiko mai Sikoteladi me keimami veivakamarautaki vei ira na lewenilotu, dauvakatataro, kei ira na daukaulotu. Keimami a gole yani ki na itikotiko ni kaulotu me dua kina na masu. Niu curu yani, au a raica sara e dua na vatu ena loga ni senikau e liu. E a ceuti tu ena vatu oqo na vosa, “Se cava ga na nomu itavi, vakayacora vakavinaka.” Na vosa o ya a curuma sara ga na yaloqu vaka na livaliva. Au vakila ni sa vosa vei au na vatu o ya. E a veisautaki au. Au a liaca rawa e kea ni sa tiko na noqu itavi sega walega ena ilakolako ni meke o ya, ia ena noqu bula taucoko ka ni sa ka bibi sara meu “cakava vakavinaka” na noqu itavi.14
Na cava e namaka tiko na Turaga me da cakava? E namaka o Koya me da vakayacora na noda itavi ena iotioti ni gauna ni vakarau yaco mai o Koya. E namaka tiko o Koya me da vakadeitaka na noda sa kilikili rawa me da lesu ka laki bula vata kei Koya. E namaka o Koya me da ucui Koya. Vakatotomuria na ituvatuva i Josefa. Au taleitaka na qaqa ni sere era se qai lagata ga oqo na matasere, “But undaunted, still he trusted / In his Heavenly Father’s care”15 Na yalodei e kena ibalebale na sega ni lomalomarua, yaloqaqa tikoga. O Josefa, e vakatokai koya vakaikoya me dua e “dausaqata” na matanitu ni tevoro. A kaya o koya, “Sa kila na vu ni ca ni keirau … na veisaqasaqa kau na vorati koya ena nona sasaga”16 Au sa vola tu ena majini ni noqu ivolanikalou, Dau saqata!” Vakabauta na nona veitaqomaki na Tamada Vakalomalagi.
Oi keda yadudua ena bibi sara na noda itavi kevaka eda na muria na ituvatuva a tauyavutaka o Josefa Simici. Na Turaga a vaqaqacotaki Josefa Simici ena nona ilesilesi vakalou. Ena vaqaqacotaki iko o Koya ena nomu itavi. Sa na rawa talega Vua me talai ira mai na Nona agilosi tabu me ra mai vakavulici iko. Ia oqo na bolebole—Ena rawa beka mo tu ena yasana era na rawa ni curu mai kina na agilosi? Ena rawa beka mo vagagalu ka vakarorogo? Ena rawa beka mo yalodei ka vakabauta?
Eda sa bula tiko ena gauna sa vakalesui mai kina na taucoko ni kosipeli ki vuravura vua na parofita ni Turaga, o Josefa Simici. Eda sa bula tiko ena gauna sa tiko kina vei keda na iVola i Momani me dusimaki keda. Eda sa bula tiko ena gauna e sa tiko kina kei keda e dua na parofita bula, na kaukauwa ni matabete e vuravura, kei na kaukauwa ni veivauci me ra vakaduavatataki kina na matavuvale ena valetabu vakalou. Sa dina sara ni so na siga “ena sega ni guilecavi rawa”!17
Sa noqu masu ni o keda yadudua eda na qaqaco ena noda vakabauta, me rawa ni da vakamuria kina na ituvatuva i Josefa Simici ka a tauyavutaka vei keda me da rawata kina e dua na ivakadinadina. Sa noqu masu talega oi kemuni yadua mo ni sa kilikili ena matataka na Yacana. E yalataka o Koya : “Me vaka ga sa tu e mataqu na lomalagi vou kei na vuravura vou kau sa cakava … ena tu vakatalega … na yacamudou.”18
Na noqu ivakadinadina ni kosipeli vakalesui mai i Jisu Karisito sa ivakarau ni idusidusi ka ikelekele ni noqu bula. Au vakavinavinakataka na noqu mai tu e matamuni nikua ka kaya mai na vu ni yaloqu dina, “Turaga keitou Vuabale.”19 Au vakavinavinakataka vakalevu na nona dodonu e dua na cauravou yabaki 14 ka a masulaka me saumi mai na nona vakatataro ka qai dinata sara na veika vuku a soli vua.
Oi kemuni yadudua sa tiko na nomuni itavi mo ni cakava ena cakacaka levu ka veivakurabuitaki oqo. Ena vukei kemuni o Koya. Ena tubera na ligamuni o Koya.20 E kilai kemuni ena yacamuni. Au sa vakadinadinataka oqo, ena yaca i Jisu Karisito, emeni.