iSevu ni Vosa
Sa vakaitamera na noda icolacola ni toso ki liu. Ia e lagilagi na veika eda rawa ni rawata.
Kemuni na taciqu kei na ganequ, ena vukudra na lewe ni Lotu oqo ena veiyasai vuravura raraba, au vakaraitaka na neimami duavata kei kemuni na neimami itokani Katolika ena nomuni lolosi tiko vakabibi ena gauna oqo. E a sega ni vakacauoca o Pope John Paul II ena cakacakataki ni kena tosoi tiko ga ki liu na Veivakalotutaki, na vakamamadataki ni nodra icolacola na dravudravua, kei na nona doudou ni vosa me baleta na keda yaga kei na dodonu vakatamata. E vakananumi vakalevu sara, vakauasivi mai vei ira na lewe vuqa era dau raici koya cake ena nona veiliutaki
Kemuni na taciqu kei na ganequ, kemuni na noqu itokani ena cakacaka bibi oqo, au nanuma ni ganita ena noqu dolava na koniferedi oqo meu tukuna mada e vica na malanivosa ena vuku ni veika keitou nuitaki kina ena loma ni 10 na yabaki sa oti.
Ena i ka 12 ni Maji 1995, a vakotori kina vei keitou na itavi cecere ka bibi ni mataveiliutaki.
Ena koniferedi ka tarava au cavuta kina na veika oqo:
“Kemuni na taciqu kei na ganequ, sa yaco mai na gauna me da na tucake ka cere cake vakalailai, me da rai cake ka dedeka na noda vakasama me rabailevu cake kina na veika eda vulica ka kila me baleta na itavi ni Lotu i Jisu Karisito ni Yalododonu Edaidai ena kena vakarautaki na yabaki udolu. Oqo na gauna me da kaukauwa kina. Sa gauna me da toso ki liu ka kakua ni lokuyara, ni da sa kila vinaka tiko na ibalebale, na vakaiyanaqa, kei na bibi ni noda ilesilesi. Sa gauna ni caka dodonu ka veitalia ga na veika ena qai yaco e muri. Sa gauna me da na laurai kina ni da dina tiko ena ivakaro. Sa gauna me da na dolele yani kina ena yalovinaka kei na loloma vei ira era rarawa tu kei ira era lakosese voli ena butobuto kei na yaluma. Sa gauna ni veinanumi kei na yalovinaka, me da ivakarau vinaka ka dau veivakarokorokotaki ena noda bula veimaliwai. Ena dua tale na kena vosa me da vaka sara na Karisito” (Koniferedi raraba ni Epereli, Soqoni ena Mataka ni Sigatabu, 2 ni Epereli, 1995).
Sa dodonu mo ni dui vakatulewataka vakataki kemuni se sa vakaevei na yawa ni vanua eda sa lakova mai ena kena kilai ka vakataucokotaki na veisureti ka a soli ena tini na yabaki sa oti.
Na yabaki tini sa oti oqo sa dua na gauna vakasakiti ena itukutuku ni Lotu. Sa laurai na uasivi ni vua ni cakacaka. Sa levu na veika vakaibalebale e rawati.
Na toso ki liu oqo e sega walega ni cakacaka ni Mataveiliutaki Taumada, na Kuoramu ni Apositolo Le Tinikarua, na Vitusagavulu, se na Matabisopi Veiliutaki. E vua ni vakabauta, na masu, na sasaga, na veiqaravi yalodina ni lewe ni mataveiliutaki ni veiiteki yadua se matabose e cake, na matabisopi yadua kei na mataveiliutaki ni kuoramu, na mataveiliutaki ni veimataisoqosoqo yadua, na veilewenilotu yalodina ka bulabula tu vakalotu ni Lotu oqo.
Kivei kemuni yadua na taciqu kei na ganequ, se na vanua cava ga o ni tiko kina, au vakaraitaka na nanuma ni lomaqu, vinaka vakalevu na nomuni veiqaravi cecere ka yalodina. O ni sa rui tamata vakasakiti.
Na vakaturaga kei na uasivi ni kosipeli i Jisu Karisito ka a vakalesui mai vua na Parofita o Josefa sa cila tiko nikua ena kena serau kei na kena totoka.
Ni da mai tu ena mua ni veiyabaki oqo ka railesu, me kakua sara ni basika na yalo qaciqacia se na dokadoka, ia sa rawa ni da vakavinavinaka ena yalomalumalumu ena vuku ni veika sa mai rawa ena tiki ni veiqaravi e so.
Me vakaoqo, sa tubu tikoga na lotu ena veiyasai vuravura me yacova ni sa sivia na iwiliwili ni lewenilotu ena vualiku kei Amerika na iwiliwili ena taudaku ni vualiku kei Amerika.
Ena loma ni tini na yabaki sa oti oqo sa mai tauyavutaki kina e 500 na iteki vovou ka sivia na 4,000 na tabanalevu kei na tabana. Sa mai vakuri na iwiliwili ni lewenilotu ena tolu na milioni.
Na vakacurumi ni yaca ena ivakarau ni vuli sa tubu cake ena 200,000. E vuqa vei ira na noda itabagone era sa kaukauwa cake ka yalodina.
Sa tauyavutaki na iLavovure ni Vuli. Eda a tekivu mai ena sega ia na inuinui ga kei na vakabauta. Nikua e rauta ni 18,000 na itabagone era sa vukei. Era tu ena 27 na matanitu duidui. Era sa vuli ka tekivu lako tani mai na ivesu ni bula dravudravua era a vesuki voli kina na nona itubutubu ena vuqa na itabatamata. Sa vakavinakataki cake na nodra maqosa ka sa vakalevutaki na veika era rawata.
Eda sa vakalevutaka na iwiliwili ni valetabu. Ena 1995, a 47 tiko. Nikua, sa tu e 119, ka tolu tale me na vakatabui ena yabaki oqo.
A sa taba tu na iVola i Momani ena 87 na vosa ena 1995. Nikua sa tu ena 106 na vosa.
E limasagavulu kadua na milioni na ilavelave ni iVola i Momani sa veisoliyaki ena loma ni tini na yabaki sa oti.
Eda sa tara e udolu na valenilotu ena veiyasai vuravura kece. Era sa vale vinaka cake ka veiganiti kei na noda gagadre mai na kena era a tara e liu.
Me kena ikuri, eda sa tara na vale vakasakiti oqo keimami vosa tiko yani kina nikua, na Vale ni Koniferedi, e Salt Lake City e duatani ka totoka.
Ena veika kece oqo, eda sa dolele kosova yani na vuravura me da vukei ira era vakaleqai se na vanua cava ga era tu kina. Ena loma ni tini na yabaki sa oti eda sa solia yani kina na ilavo kei na iyaya e drau na milioni na dola ena veivuke raraba vei ira era sega ni lewe ni noda vakabauta.
Eda butu vanua yani e vuravura ka kauta voli na ivakadinadina ni nona cakacaka o Koya sa Kaukauwa Sara. Ena veiyabaki vata oqo au sa lakova kina e voleka ni milioni na maile ena noqu sikova e rauta ni 70 na matanitu. A dau sala vata kei au na noqu itokani lomani me yacova mai na yabaki sa oti ni sa mai takali yani. E sega ni rawa ni vakamacalataki rawa na noqu galili.
Ia e cecere na noda inuinui ka kaukauwa na noda vakabauta.
Eda kila tu ni da se qai tekivu vocia na dela ni veika ena qai yaco mai ena loma ni veiyabaki sa tu mai liu.
Au sa yacova oqo na ika 95 ni noqu yabaki. Au a sega vakadua ni bau tadra ni na vaqo na balavu ni noqu bula. Na noqu bula au nanuma lesu kina e dua na itukutuku ka lili tu ena dua na peleti veveka ena dua na bai makawa ni bulumakau mai Texas. E vakaoqo:
Kama yani ena dravuisiga,
Luvu yani ena ualuvu,
Laukana mai na rapete,
Sega ni karoni mai vua na ovisa,
Se tikoga oqo!
Au nuitaka me na tu vei au na galala meu na dau veitokani tiko vata kei kemuni na noqu itokani vakacakacaka lomani, me yacova na gauna e vakatara na Turaga. Kau nuitaka me na ciqomi tiko na veiqaravi o ya.
Na noda yavu sai koya na kosipeli ni Turaga o Jisu Karisito. Sa tu oqo na dodonu ni matabete tabu, sa vakalesui mai ena ligadra o ira era a ciqoma vakadodonu sara ga mai vua na Turaga. Sa tadolavi na ilati ka rau sa vosa mai na Kalou ni lomalagi kei na Luvena Daulomani vua na parofita gonetagane o Josefa ena kena dolavi na iotioti ka icavacava ni itabagauna.
Sa vakaitamera na noda icolacola ni toso ki liu. Ia e lagilagi na veika eda rawa ni rawata.
Au na tokaruataka tale ena gauna oqo na veika au a tukuna ena tini na yabaki sa oti, me da “na tucake ka cere cake vakalailai, me da rai cake ka dedeka na noda vakasama me rabailevu cake kina na veika eda vulica ka kila me baleta na itavi ni Lotu i Jisu Karisito ni Yalododonu Edaidai ena kena vakarautaki na yabaki udolu.”
Au sa vakauta yani na noqu iloloma, na noqu veivakalougatataki, kei na noqu vakavinavinaka ena noda dolava na koniferedi cecere oqo. Me liutaka na Yalo ni Turaga na veika kece sara ena yaco, sa noqu masu malumalumu, ena yaca i Jisu Karisito, emeni.