Tuleiga Faaiu
O mea sa saunoa i ai failauga taitasi, o lana taumafaiga ma le lototatalo lena e faailoa atu le malamalama o le a musuia ai.
O’u uso e ma tuafafine pele, ua tatou olioli ma fiafia i se konafesi matagofie. Ua tatou toe faapaiaina le Tapeneko o Sate Leki, a o tatou toe faaaogaina ina ua mavae se faafouga tele. Sa tatou faatumulia lenei Maota Autu mo Konafesi i ona vaega uma mo sauniga taitasi. Ua alu atu a tatou upu i le salafa o le lalolagi i tagata o le Ekalesia o loo salalau i tulimanu uma.
O lea, o le a tatou toe taliu i o tatou aiga. Matou te fautuaina outou, o ē o le a aveina taavale, ina ia faia ma le faaeteete. Aua nei faatama’iaina e se faalavelave le agaga o lenei konafesi matagofie.
Matou te faamoemoe o le a outou faaaogaina le lomiga ia Me o mekasini a le Ekalesia e fai ma matua o le upu mo a outou afiafi faaleaiga, e toe iloilo ai mea sa tautalagia i lenei konafesi. O mea sa saunoa i ai failauga taitasi, o lana taumafaiga ma le lototatalo lena e faailoa atu le malamalama o le a musuia ai ma faama’ite ai i latou uma o ē sa faalogo i ai ina ia taumafai teisi; ma faaleleia teisi.
Ia i ai le filemu ma le lotogatasi i o outou fale. Tane, ia alolofa ma faapelepele ia outou ava. O i latou o a outou oa aupito taua. Ava, ia faamalosiau ma tatalo mo a outou tane. Latou te manaomia le fesoasoani uma e mafai ona latou maua. Matua, fai faalelei a outou fanau ma le agalelei tele. O i latou o le tupulaga faia’e o le a latou aumaia le mamalu i o oulua igoa.
I le taimi nei, a o tatou taapeape ai mo se vaitau, ia faamanuia atu le Atua ia te outou, a’u uo pele. Ou te tatalo ai, a o ou faatofa atu, i le suafa o Iesu Keriso, amene.